Kryeministri shqiptar Edi Rama nënshkruan marrëveshje për menaxhimin e refugjatëve me Italinë – Diskutime te ngjashme edhe në Gjermani

Nga Rashela Shehu, Anila Shuka, Deutsche Welle

Kryeministri shqiptar Edi Rama dhe homologia e tij italiane Giorgia Meloni nënshkruan këtë të hënë në Romë, më 6.11.2023, një marrëveshje për menaxhimin e refugjatëve. Sipas Melonit, në portin e Shengjinit, në Lezhe, do të ngrihen dy struktura pritëse për emigrantët, të financuara dhe menaxhuara nga Italia.  Gjatë konferencës për mediat, kryeministri Edi Rama tha se është i gatshëm të ndihmojë Italinë për të menaxhuar situatën e vështirë me refugjatet, numri i të cilëve ka ardhur në rritje.

Edhe në Gjermani ka diskutime për marrëveshje të ngjashme me Shqipërinë. Eksperti i emigracionit Zëvendëskryetari i Bundestagut Gjerman, nga Partia FDP,  Wolfgang Kubicki, i tha DW, se grupi parlamentar i partisë së tij e propozon një gjë të tillë në një raport të fundit për emigracionin, pa përmendur në mënyrë eksplicite Shqipërinë. Edhe eksperti i migracionit Ruud Koopmans, u shpreh para ca javësh në gazetën Bild që të ketë marrëveshje me të ashtuquajtura vende të treta të sigurta, ku të kthehen edhe persona që nuk vijnë prej këtyre vendeve.