Ish deputeti i PS, Petro Koçi ka reaguar lidhur me protestat e përnatshme në Bulevardin “Dëshmorët e Kombit”, duke i cilësuar ato si një fenomen që duhet trajtuar me seriozitet dhe pjekuri politike.

Me anë të një postimi në Facebook, Koçi ndalet edhe te nevoja për reforma të brendshme në Partinë Socialiste. Teksa thumbon Belinda Ballukun, ai thotë se personat nën hetim penal duhet të largohen nga funksionet e deleguara.

Sipas tij, rastet flagrante të korrupsionit duhen shoqëruar edhe me kallëzime penale.

“Ndërkohë qeveria nuk mund ta lere luftën kundër korrupsionit vetëm ne duart e SPAK. Rastet  flagrante te shpërdorimit duhet te shoqërohen me masa publike administrative dhe kallëzime penale.

Vete PS ka nevoje te zëvendësojë skemën e përqendrimit te pushtetit nga duart e te deleguarve drejt te zgjedhurve te strukturave te bazës. Dhe natyrisht te liroje nga delegimi çdo individ nen ndjekje penale”, thuhet në reagimin e Koçit.

Ai kërkoi gjithashtu forcimin e mëtejshëm të SPAK-ut, heqjen e imunitetit për zyrtarët e lartë për një periudhë të caktuar, reformimin e sistemit zgjedhor për të garantuar përfaqësim më të drejtë, si dhe masa më të forta kundër përfshirjes së administratës publike në proceset zgjedhore.

Reagimi i plotë

Duke shprehur publikisht mbështetjen për aksionet e fundit të SPAK kundër krimit të organizuar që ka shtrirë tentakulat e pastrimit të parave në ndërtim, blerje dhe përvetësim tokash etj nuk mund të mos reagoj sërish për protestat e përnatshme në Bulevardin Dëshmorët e Kombit.

Shumica e pjesëmarrësve aty janë idealistë, të pakënaqur nga administrata dhe misionarë për çështje të pastra publike. Sigurisht që benzina politike vjen kryesisht nga e djathta e menjanuar nga Sali Berisha, nga arrivistë të çdo lloji që shohin shanse për t’u promovuar në të ardhmen në Kuvend. Nuk mungojnë as krerët e partickave të rrjeteve sociale që na bëjnë si gazetarë politikë me celularë në dorë.

Parrulla e Ballit Kombëtar “Shqipëri e shqiptarëve, vdekje tradhëtarëve” e vërteton përpjekjen që protesta të përdoret për revansh të së djathtës ndaj së majtës.

Por protesta e idealistëve duhet të shfrytëzohet si energji popullore për të zhvilluar një demokraci të garantuar institucionale, forcim të luftës ndaj korrupsionit nëpërmjet fuqizimit të SPAK dhe vendosjes së standarteve për barazi dhe solidaritet social bashkëkohor.

PS-së nuk i duhet nënshtrim, por reflektim serioz që përfshin reformë kushtetuese e ligjore në këto piketa:

1-Anulim i ndryshimeve kushtetuese të 21 Prillit 2008 të propozuara nga Sali Berisha që e kthyen Republikën nga parlamentare në kryeministrore.

Kjo do të krijonte frymëmarrje dhe oksigjen për kontroll të parlamentit mbi ekzekutivin.

2-Forcim ligjor i funksionalitetit dhe efikasitetit të SPAK të shoqëruar me një ligj special që heq imunitetin e zyrtarëve të lartë të paktën për 10 vitet e ardhshme.

3-Hartimi dhe aprovimi i një sistemi zgjedhor që garanton pluralizëm dhe barazi përfaqësuese në raport me votat në nivel kombëtar.

4-Rreptësimi i mbikëqyrjes dhe penalizimit për përfshirjen e administratës shtetërore në proceset zgjedhore.

5-Ndërmarrja e një reforme praktike në funksionimin dhe rezultatet e Kadastrës ku një zgjidhje e shumëpritur do ishte kalimi i kompetencës për lëshimin e vërtetimeve të pronave të certifikuara te noterët.

Ndërkohë qeveria nuk mund ta lërë luftën kundër korrupsionit vetëm në duart e SPAK. Rastet flagrante të shpërdorimit duhet të shoqërohen me masa publike administrative dhe kallëzime penale.

Vetë PS ka nevojë të zëvendësojë skemën e përqendrimit të pushtetit nga duart e të deleguarve drejt të zgjedhurve të strukturave të bazës.

Dhe natyrisht të lirojë nga delegimi çdo individ nën ndjekje penale.

Në fund theksoj që protesta duhet trajtuar me pjekuri, as me armiqësi, por as me naivitet.

Le të shërbejë pjesa e pastër e saj si një investim për më shumë demokraci dhe jo thjesht për ndërrim të të ndenjurave të pushtetit.

Vetëm nga demokracia përfiton shumica dhe populli.

Vetëm kështu protesta do ta nxiste dhe jo frenonte integrimin europian që po troket te porta.

Lufta qoftë edhe sovraniste thjesht për pushtet në rastin e protestës do të ishte vetëm një korrupsion i ri! gsh