Zëri i Amerikës: Zoti Bardhi, deklarata e sotme të Kryetarit të Komisionit Qendror të Zgjedhjeve Ilirjan Celibashi, dëshmojnë se hapësirat kohore për të ndërhyrë në aspekte të rëndësishme të Reformës zgjedhore, janë shumë të ngushta. Por ju nuk po lejoni zhvillimin normal të mbledhjeve të Komisionit të Posaçëm parlamentar, duke këmbëngulur në ndryshimin e përbërjes. A nuk do të ishte më mirë që të zgjidhnit mes jush këtë histori dhe të realizohej reforma?

Gazment Bardhi: Së pari, reforma nuk është bllokuar për shkak të problemeve të brendshme në Partinë Demokratike. Komisioni i Reformës Zgjedhore është ngritur nga Kuvendi i Shqipërisë që në shkurt të vitit 2022 dhe po bën dy vjet nga momenti i krijimit të tij dhe jemi dëshmitar që ka zero produkt, zero mbledhje dhe zero punë për të cilën Kuvendi e ka ngarkuar saktësisht për shkak të bllokimit që i është bërë punës së komisionit. Deputetët e opozitës kanë kërkuar riformatimin e Komisionit të Reformës Zgjedhore. Ka një kërkesë tonën nga shtatori i vitit 2023, që këmbëngulim jo vetëm për ta bërë funksional Komisionin e Reformës Zgjedhore, por sigurisht për të mbajtur përgjegjës edhe cilindo anëtar brenda grupit tonë parlamentar që nuk ka ushtruar përgjegjësin që grupi i ka ngarkuar si anëtar apo bashkëkryetar i Komisionit të Reformës Zgjedhore. Unë ndaj tërësisht të njëjtën qëndrim me komisionerin Celibashi që reforma zgjedhore do të duhet përmbyllur me kohë. Pra, do të duhet të jetë e realizuar shumë kohë përpara zgjedhjeve. Por, mbi të gjitha do të duhet të jetë një reformë që adreson shqetësimet e OSBE-ODIHR-it, shqetësimet e Komisionit të Venecias, por sigurisht edhe vendimet e Gjykatës Kushtetuese, përfshirë votën e qytetarëve shqiptarë që jetojnë jashtë vendit.

Zëri i Amerikës: Megjithatë, këmbëngulja juaj, kërkesat që ju keni depozituar në Kuvendin e Shqipërisë, zoti Bardhi, nuk po marrin një përgjigje pozitive deri tani. Ju thoni se nuk do lëvizni nga qëndrimi juaj, nga ana tjetër kemi qeverinë e cila thotë se në fund fare mund ta realizojë reformën edhe në mënyra të tjera. Çfarë do të bëni? Ka një plan B, ka një mënyrë tjetër?

Gazment Bardhi: Së pari, detyra jonë është të bëjmë atë që është në interes të qytetarëve dhe në interes të qytetarëve është një reformë zgjedhore gjithëpërfshirëse, konsensuale, që adreson realisht shqetësimet që ka Shqipëria sa i takon garancive për zgjedhje të lira dhe të ndershme. Nuk na duhet një reformë zgjedhore që favorizon njërën palë pjesëmarrëse në zgjedhje apo palën tjetër pjesëmarrëse në zgjedhje. Do të duhet të caktojmë rregulla të një gare të barabartë mes palëve politike dhe të kemi mundësi që në vitin 2025 t’i japim popullit shqiptar zgjedhje të pakontestuara, të lira dhe të ndershme. Ky duhet të jetë qëllimi madhor i reformës zgjedhore. Ne për këtë po e bëjmë betejën në parlament dhe sigurisht që nuk jemi të gatshëm që të heqim dorë nga kjo betejë sa kohë që i shërben interesit publik.

Zëri i Amerikës: Të ndalemi pak tek beteja në Parlament. Zoti Bardhi, prej disa muajsh ju po pengoni zhvillimin normal të punës së parlamentit, ndërkohë shumica po i kalon për pak minuta të gjitha ligjet që ajo dëshiron. Çfarë po arrini ju me këtë lëvizje, se kështu ndodhi dhe me bojkotimin e parlamentit, pastaj të zgjedhjeve, dhe nuk arritët asgjë, dhe u detyruat të pranoni që kishit gabuar, duke marrë hapa të tilla.

Gazment Bardhi: Së pari ne nuk po e bojkotojmë Parlamentin. Pra, nuk po përdorim këtë mjet, i cili në të shkuarën ka rezultuar jo efikas, sa i takon aksioneve të opozitës. Por jemi duke ndjekur të njëjtën rrugë që po ndjek mazhoranca me opozitën. Nuk po pengojmë ne punën e parlamentit, është mazhoranca, është qeveria, që po pengon opozitën të ushtrojë ato përgjegjësi dhe ato detyra, atë mision që ia kanë ngarkuar qytetarët dhe që i garantohet nga kushtetuta e Republikës së Shqipërisë.

Zëri i Amerikës: Po zoti Bardhi. Por ligjet po miratohen në fund, edhe pse po bëni rezistencë aty?

Gazment Bardhi: Nuk mund të sillemi sikur ne jemi në Shtetet e Bashkuara të Amerikës. Ne jemi në Shqipëri dhe ne e dimë që një ligj i propozuar nga qeveria miratohet gjithmonë me votat e shumicës. Çdo ide racionale apo konstruktive e opozitës, kultura politike në vend ka qenë dhe vijon të mbetet për fat të keq edhe gjatë kësaj periudhe, që nëse e thotë kundërshtari im politik edhe nëse ideja është e mirë, e vlefshme ose një alternativë që i shërben më mirë interesit të qytetarëve, ajo nuk merret parasysh.

Zëri i Amerikës: Megjithatë, zoti Bardhi ju jeni aty edhe për të përcjellur qëndrimin e opozitës.

Gazment Bardhi: E rëndësishme është që së pari kauza për të cilën ne po bëjmë betejën të jetë e drejtë, të jetë legjitime, ne nuk po bëjmë një betejë për veten tonë, po bëjmë një betejë që të kemi mundësi t’iu shërbejmë qytetarëve dhe komisionet hetimore, pra kontrolli ndaj ekzekutivit është një shërbim ndaj qytetarëve, ne jemi mandatuar për ketë dhe do duhet ta ushtrojmë.

Zëri i Amerikës: Do e ndryshoni objektin e komisioneve hetimore?

Gazment Bardhi: Në ç’kuptim ta ndryshojmë?

Zëri i Amerikës: Ta riformuloni…

Gazment Bardhi: Kam qenë i gatshëm në çdo moment, që në nisje të këtij procesi, përpara se të refuzoheshin nga grupi parlamentar i Partisë Socialiste për t’u ulur në dialog dhe për të gjetur një formulim të objektit sipas vlerësimit që kishin kolegët. Kanë qenë kolegët e Partisë Socialiste që kanë refuzuar dhe unë sot nuk e di. Jam kryetar i grupit parlamentar të Partisë Demokratike dhe nuk e di se çfarë shqetësimi ka me objektin e kërkesave tona për komision.

Zëri i Amerikës: Ata thonë se duhet të ndryshoni objektin…

Gazment Bardhi: Të na thonë se si duhet t’i ndryshojmë…

Zëri i Amerikës: Le të ndalemi pak në një argument tjetër zoti Bardhi. Në një deklaratë që ka dhënë Sekretari i Rithemelimit, Flamur Noka i cili ka deklaruar se mes tyre dhe grupimit tuaj, çështja e bashkimit, përtej aksionit në parlament, është çështje ditësh, madje pritet vetëm rikthimi juaj nga vizita e këtushme në Shtetet e Bashkuara. Konkretisht, për çfarë bashkimi bëhet fjalë konkretisht?

Gazment Bardhi: Së pari besoj se jeni të njohur me faktin që grupi parlamentar i Partisë Demokratike është bashkuar ne nje aksion tërësor kundër qeverisë në përmbushje të misionit të vet kushtetues dhe misionit që na kanë ngarkuar qytetarët. Kjo përsa i përket pjesës në jetën parlamentare. Sigurisht që Partia Demokratike përgjatë këtyre dy viteve, ka qenë e ndarë, ne kemi kuptuar dhe secili prej nesh është i ndërgjegjshëm që ndarja e Partisë Demokratike jo vetëm e ka dobësuar opozitën, por praktikisht e ka bërë atë jo funksionale, ndaj jemi duke vlerësuar çdo mundësi për të patur një bashkim të Partisë Demokratike përtej asaj që ka ndodhur deri tani me grupin parlamentar, pra një projekt të përbashkët politik, një projekt të përbashkët të përballjes edhe jashtë parlamentit me qeverinë e korruptuar të Edi Ramës.

Zëri i Amerikës: Zoti Bardhi, Rithemelimi njeh zotin Berisha si kryetar të Partisë Demokratike, ju do e njihni atë si të tillë në rast bashkimi?

Gazment Bardhi: Ka zero rëndësi fakti se kush njeh kë tashmë në Partinë Demokratike sa kohë çështja e legjitimitetit të institucioneve të Partisë Demokratike është një çështje që sot që flasim ndodhet në gjykatë. Në këtë kuptim, sa të merremi me historinë nëse unë e njoh zotin Berisha apo zoti Berisha më njeh mua, apo ne të dy njohim dikë tjetër e me radhë, ne do duhet të fokusohemi te jo që ka nevojë sot Shqipëria. Shqipëria ka nevojë për një Parti Demokratike për sa kohë është partia më e madhe e opozitës që të jetë e bashkuar, që ka nevojë për një opozitë që përmbush misionin e saj dhe sigurisht ka nevojë për një opozitë që i prezanton qytetarëve një ekip dhe një alternativë për t’u bërë e besueshme.

Zëri i Amerikës: Si do e bëni këtë?

Gazment Bardhi: Janë të gjitha mundësitë nëse secili prej nesh kapërcen interesin personal, kapërcen veten dhe mendon se kush është më e mira për vendin, më e mira për Shqipërinë, më e mira për qytetarët shqiptarë.