VOAL

GJAKOVË: DREJT MITINGUT TË POEZISË, JUBILAR, TË 60 ME RADHË – Cikël poetik nga ENVER GJERGJEKU- Përgatiti për botim MUHARREM KURTI

April 8, 2023

RUBRIKA: Krijues të shquar të letërsisë bashkëkohore shqipe, pjesëmarrës dhe fitues të çmimeve në Mitingun e Poezisë.

Enver Gjergjeku (1928, Gjakovë, 2008 Prishtinë ). Botoi librat me poezi: Asht i ynë (1972), Pengu (1977), Sogjetar amshimi (1982), etj.

Është bashkëthemelues i Mitingut të Poezisë dhe një kontribuuesi i shquar në të. Konsiderohet si sonetisti më i dalluar i letërsisë shqipe bashkëkohore dhe poet i antologjive të vërteta të poezisë shqipe bashkëkohore.

Poezi të Enver Gjergjeku:

XIXËLLOJA

Ti fluturake e pangushllueme n’errësi

Dhe pjesë e diellit të plasun

Ti yll i kallun e në shkamb i rrasun,

Që lind mbas muzgut e bredh në stuhi.

Xixëllojë,eshkë mitare e mendjes sime,

Gurrë e ndezun e livadheve të mija;

Xixëllojë,komet që të pret gjithsija-

Frymë e vringllume,xixë për premtime.

Ti je flakë e fjalës – poezi e shkrueme –

Dalë nga afshi ynë – votër e pikëllimit,

Ti je shpuzë pa plang e mall’ i prendimit.

Ti i ndriçon netët – kangët e harrueme,

E frymëzimin e mban në flatrimin tand,

Që n’qerpik’t e mij tashi digjet gand.

DILEMA E KËNGËS

A ky është kthimi,apo hap zbrazëtie?

Dielli kështu më zgjon? Apo rigon shi?

S’do t’i kthehem barit,as asaj errësie.

Kah do vemi,ditë,kur asgjë nuk ndi?

A jam tash i zgjuar,apo m’mashtron drita?

Ndëgjoj hap’n e vjeshtës,lulja fle në mua

Çdo gjë që dash’rova – tek ajo s’arrita –

Askund ndonjë thnegël,sa për t’më shoqërua.

Kënga e menduar kishte për të treguar:

Se si njëherë moti ish feniks ndër ne.

Po. Është ajo vetë,që kurrë pa u friguar,

U la prore n’gjak,n’stuhi dhe rrufe.

Po ç’është tani kjo? Ëndërr o hap lashtësie?

Malli kështu më zgjon? Jo! Është hap’ humnera.

S’do t’i kthehem barit,as asaj errësie,

Që për sy të mi presin untë përhera.

SKYFTERI

Po shtegton në nji rreth e udhë t’caktueme

Askund synin tand gac’ e t’untë pa e lu’jtë.

Nuk di Shkëlzenit në maje a kishe me mujtë

Peng me ia lanë zemrën tande gur t’gurzueme

Dëshiroj thellësitë me t’i matë që n’to u përbine,

Me ta varë në sqep dhe qafë nji grimë mëshirë,

Për ato viktima që n’klithje je tue i thirrë.

O, ti me gjak dhe pupla kurrnjiherë s’u ngine.

Po shtegton nëpër re të buta tepër kryenaltë

Zemrën e diellit si me pasë kaplue me ata thoj.

Kur ta ndiej at’ klithje të mnershme, se po droj.

Se me ujën tande krenat e hetuese po na i matë.

Vetëm mos ma sqepo kët’ bardhësi të diellit,

Se s’kam me çka t’i rris këto kambë të prillit!

GURI I LASHTË

N’ty është mbyllur era si rob i përhershëm,

Shira e shumë stinëve me rrufe mbuluar,

Mbyllur është dhe dreni n’zemër i plaguar,

Që për një sorkadhe klith me zë të tmerrshëm.

N’ty është mbyllur lulja q’u këput në pranverë,

Dhe çdo ngjyrë e zërit me stuhi e zgjuar

Ja tash ëndrra ime që s’ka për t’pushuar

Çdo gjë do t’rilindë që n’ty vdiq njëherë

Nata është mbyllur përherë n’gjirin tënd

Një yll ne na duhet që të zgjohet guri

Një shkëndi na duhet që t’shkëlqejë biluri

Dora jonë pjellore q’i fal tokës shend

Ja një fjalë e lindur që nuk di t’lakojë

Ajo gurin n’gurë përherë do ta zgjojë.

LEJLEKU I METALIT

Kujtuam përherë vatrën e shtigjeve të mërgimit

Duart me myshk na u mbushën sytë me blozë

Kur na shtërngoi muzgu net’ve të pikëllimit

Hyri n’palcën tonë Kalë i Trojës s’ngratë

Dielli midis eshtrash flakëroi si argjendi

Gjaku n’meridiane prore po na ngjizet

Kështu na ndjeku fati na përcolli dhe shendi

Kur flakë e blerimit në qerpikë na ndizet

Na për flokët tanë shkuam në çdo pyll

Përveç bishash t’egra asgjë nuk kemi gjetur

M’atë anë ditës s’shurdhër na flakëroi një yll

Në një gomë të shkyer këmbët na kanë mbetur

Dhe do fjale plastike ja tash na kërc’nohen

N’vend t’lejlekut n’kulm t’metaltë zogj lëshohen

twitter
Follow
facebook
linkedin

Fjalë kyçe: ENVER GJERGJEKU, Muharrem Kurti

GJAKOVË: DREJT MITINGUT TË POEZISË, JUBILAR, TË 60 ME RADHË – Cikël poetik nga ENVER GJERGJEKU- Përgatiti për botim MUHARREM KURTI

Lajmet me interesante

Lajmet e fundit

ARKIVA E LAJMEVE

RRETH NESH

GJAKOVË: DREJT MITINGUT TË POEZISË, JUBILAR, TË 60 ME RADHË – Cikël poetik nga ENVER GJERGJEKU- Përgatiti për botim MUHARREM KURTI

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL