Dy poezi nga TAHIR BEZHANI

December 11, 2023

MREKULLIA E ÇATISË….

.

Nuk është e vetmja mrekulli

Të mbarosh shtëpi që ëndërron

T’i gdhendësh trarët me durim

E t’i lidhësh me gozhdë përmbi

Sado së bashku të bëjnë dashuri

Jetë e dhunshme i thonë

Jetë nën gozhdë, me tradhti….

E sa kohë të gjatë do të ketë vlerë

.

Skalitja e dy drunjtëve faqesh bardhësi

Me një gjen të lindur, rritur në bashkësi

T’i pëlqesh “gojë-gojë” me mjeshtëri

Nuk mbajnë mes vete zili…

.

Kalimtarët ua kanë lakmi

Si kullave ilirike në trojet etnike

Edhe tërmetet hamenden

Kur luajnë lojën me dredhi…

.

ATY TE BLINI

Aty

Te “Blini i Poetit “në Pejë

Pranë atij druri të plasur kohe

Kafeja e mëngjesit avullonte

Radhazi ngrohtësisht shikonim njëri- tjetrin

Hurbnim lëngun, tjerrshim llafe

Buzagazet jehonin syprinës së valëve

Lumëbardhi buzëqeshte me krenari

Ecte me vrap ,bënte rrugëtimin e tij

Sejdi Berisha ngjante në përmendore

Mbante në dorë një fletë të bardhë e lapsin e zi

Radhiteshin fjalët, shkruante poezi

Për njerëzimin e kohët nxira moteve

Në zemër vargu rrëfente qëndresën,

Mbillte dashuri për brezat

Për fushat e malet,

Për këtë tokë të gjakosur…

Kur lapsi mbaroi ngjyrën e tij

I nevrikosur poeti tha:

Miqtë e mi

“Shikojeni këtë stilolaps

Do e hedh në Lumbardhë

Të mbetët si hieroglifë

Le t’i pëshpëritë vargjet e zemrës sime

Dëshmi jete e kam këtë Bli!….”

Lala e Nekiu qeshen me xhelozi,

Luli nuk ishte atë ditë mes nesh

U ndjeva i dërmuar mes vargjesh si tunxh

Admiroja atë burrë e vargun e plastë të tij

“Rrofsh sa Blini i thash!…”

Ika, e lash varur në vargun brilant

Aty te Blini,

Mbolla kujtimin e gjatë për stilolapsin

Për vargun e tij…..

.

Pejë,

23.tetor,2023

• twitter

  Follow
• facebook
• linkedin

Fjalë kyçe: TAHIR BEZHANI