Nga Miranda Devine, New York POST

Problemet e reputacionit të FBI-së janë shtuar me arrestimin e Charles McGonigal, ish-shefi i kundërzbulimit në zyrën e FBI-së në New York, një nga gjahtarët kryesorë të spiunëve në vend, i akuzuar për korrupsion, i cili del se është i lidhur edhe me Hunter Biden, djali i Presidentit Joe Biden.

Në aktpadinë e dyfishtë të ngritur ndaj tij muajin e kaluar, McGonigal akuzohet se ka marrë pagesa sekrete nga një ish-oficer i zbulimit shqiptar, ka mbajtur të fshehta takimet me kryeministrin shqiptar Edi Rama, dhe ka tentuar të heqë oligarkun rus Oleg Deripaska nga lista e sanksioneve të SHBA.

Shqiptarët e përmendur nga prokurorët e lidhin këtë skandal me Hunter Biden dhe kompaninë energjetike kineze CEFC që i pagoi xhaxhait të tij Jim miliona dollarë në një marrëveshje për të cilën Joe Biden u kritikua se u bë pjesë e saj pas përfundimit të mandatit si zëvendëspresident.

Sipas prokurorëve, McGonigal mori 225 mijë dollarë në vjeshtën e 2017 ndërsa ishte ende shef i zyrës së kundërzbulimit në New York nga shqiptari i identifikuar nga media shqiptare dhe evropiane si Agron Neza.

Neza e prezantoi McGonigal me një tjetër shqiptar me lidhje të forta, Dorian Duçka, i cili ishte këshilltar i Ramës dhe punonte edhe për CEFC.

Një fotografi e publikuar muajin e kaluar në median shqiptare, me burim nga China Daily në maj 2017, tregon Duçkën bashkë me kryetarin e CEFC, Ye Jianming, i cili i dha Hunterit një diamant 3.16 karat, me vlerë 80 mijë dollarë, në shkurt 2017.

Ye i caktoi Hunterit edhe një kuotë ligjore 1 milion dollarë në mes të 2017, e cila u pagua për të ndihmuar kolegun e tij në CEFC, Patrick Ho, pas arrestimit.

Dikush me emrin e pazakontë si të Duçkës shfaqet në laptopin e braktisur të Hunterit, në një bisedë me email për CEFC midis Hunterit dhe partnerëve James Gilliar e Rob Walker.

“Dorian na ka ndihmuar shumë në fillim kështu që duhet të shohim se si mund ta përfshijmë edhe atë”, shkruante Gilliar në një email më 13 maj 2017.

“S’ka se si të mos e përfshijmë, dhe nëse shumica thotë jo, do ta paguaj nga paga ime”, përgjigjej Hunter.

Kjo ishte një bujari e pazakontë nga Hunter, i cili në atë kohë u qahej partnerëve në biznes se s’kishte pará dhe kërkonte një pjesë më të madhe nga fitime.

“Hunter nuk të jepte asnjë qindarkë”, thotë një burim që beson se Doriani i përmendur është Duçka, pasi Gilliar kishte bërë biznes për CEFC në Shqipëri. “Kështu që fjalët e Hunterit se do ta paguante (Dorianin) janë tregues i lidhjeve të forta”.

Pse e paguanin shqiptarët McGonigalin?

Sipas Belind Këlliçit, kandidati i Partisë Demokratike opozitare në Tiranë në zgjedhjet për kryetarin e Bashkisë, McGonigal hapi hetime të FBI-së për kundërshtarë politikë të kryeministrit socialist Rama, hetime të përdorura për t’i deklaruar persona non grata, që nuk mund të bënin biznes apo të hapnin llogari bankare në SHBA.

Lista e zezë e McGonigal

Rreth një duzinë politikanësh të opozitës apo njerëz nga biznesi që përkrahnin partitë opozitare u futën në “listën e zezë” të McGonigal.

Ajo përfshinte liderin e opozitës Sali Berisha, i cili u godit me statusin persona non grata dhe u ndalua të hynte në SHBA me vendim të Sekretarit të Shtetit Antony Blinken.

Fundjavën e kaluar, skandali McGonigal luajti rol kryesor në një protestë antiqeveritare në Shqipëri para kryeministrisë, me thirrje për dorëheqjen e kryeministrit me akuzën për korrupsion për shkak të takimeve të tij me McGonigal.

Pllakatat me emrin e ish-agjentit të FBI-së ishin kudo.

Lidhjet e Hunterit me FBI kanë qenë temë diskutimesh midis partnerëve të tij në biznes. Një burim kujton se i është treguar për një bisedë të zhvilluar midis korrikut e shtatorit 2017, në cilën Hunter u pyet nga Ye i CEFC nëse mund të zbulonte përmes kontakteve të tij në FBI apo Departamentin e Drejtësisë nëse Ye apo Ho ishin objektiva të ndonjë hetimi nga ana e FBI-së.

Hunter iu përgjigj më vonë se të dy ishin në rregull dhe nuk po hetoheshin.

Menjëherë më pas, në nëntor, Ho u kthye në SHBA dhe u arrestua nga agjentët të FBI-së në aeroportin JFK.

“Kryetari Ye u tërbua” që informacioni nga Hunter ishte i gabuar, kujton burimi.

“Ai i kërkoi specifikisht të shihte nëse Patrick Ho apo ai vetë ishin në shënjestër. Hunter iu përgjigj që jo. Pastaj Ho shkon në SHBA dhe ndalohet në JFK. Ata u tërbuan fare. Personi me të cilin Hunter foli në FBI e gënjeu duke i thanë që Ye dhe Ho nuk ishin të dyshuar”.

E dimë që Hunter kishte të paktën një informator në FBI sepse avokati njujorkez Edward Kim, të cilit Hunter i pasoi detyrën ligjore për të ndihmuar Ho pas arrestimit, e pyeti Hunterin në një email nëse mund të mbështetej te kontaktet e tij në FBI.

“Nëse je në gjendje të gjesh emrat e agjentëve të FBI-së me të cilët fole, do të ishte ndihmë e madhe”, i shkruante Kim më 18 nëntor 2017, në përgjigje të kërkesës së Hunterit që firma e tij të përfaqësonte Ho.

Në atë kohë McGonigal ishte në krye të Divizionit të Kundërzbulimit në zyrën e FBI-së në New York, e cila kreu arrestimin.

Një fije e hollë lidh Hunter e McGonigal në jetën e tyre personale, teksa emrat e tyre shfaqen së bashku si marrës të 29 emaileve për ndeshje lakrosi të vajzave të tyre, në atë kohë adoleshente, nga një shkollë e shtresës së lartë në Washington ku shkonin fëmijët e Hunterit, në kohën kur McGonigal punonte në zyrën e FBI-së në Washington. Nuk ka ndonjë provë që të jenë takuar gjatë asaj kohe.

McGonigal u largua nga FBI në shtator 2018 pasi ish- e dashura i tregoi shefit të tij për qese me pará në apartamentin e tij në Brooklyn.

Por, ironikisht, ai ishte një nga ekspertët me lidhje të forta i shfrytëzuar nga Këshilli i Atlantikut para zgjedhjeve 2020 për të paralajmëruar për ndërhyrje ruse në emër të Trump.

Në atë kohë ai dyshohet se merrte pará nga Deripaska.

McGonigal, një nga të preferuarit e ish-shefit të FBI-së James Comey, ishte i përfshirë edhe në hetimin fals të FBI-së për bashkëpunimin Trump-Rusi, si shef i Seksionit të Koordinimit të Kundërzbulimit Kibernetik në zyrën e FBI-së në Washington. Ai thuhet se ishte instrumental në hapjen e hetimit fillestar Crossfire Hurricane (emri i koduar i hetimit për lidhjet e fushatës së Trumpit me Rusinë – Syri).

Pasi u vendos në New York, një muaj para zgjedhjeve 2016, McGonigal thuhet se u përfshi në mandate monitorimi të paligjshëm kundër ndihmësit të fushatës së Trumpit, Carter Page.

Teksa kongresmenët Reublikanë e Demokratë po përpiqen ta shfrytëzojë skandalin McGonigal për përfitime politike, nuk ka asgjë që Drejtori i FBI-së Chris Wray mund të bëjë për të rikthyer besimin e publikut te agjencia e tij e katandisur si mos më keq. syri.net