Deputetja e PD, Ina Zhupa, ka marrë një konfirmim të fortë dhe një mbështetje të fuqishme në betejën e saj politike dhe të Grupit Parlamentar të PD në lidhje me mbrojtjen e Parkut Kombëtar të Butrintit. Mbështetja ka ardhur nga ish-kongresmeni amerikan Joseph DioGuardi, i cili ka vendosur të vijë në Shqipëri, në seancën që do të zhvillohet në Gjykatën Kushtetuese, së bashku me deputeten e PD.

DioGuardin, Zhupa e ka cituar shpesh në përplasjet me mazhorancën në komisione dhe parlament për të mos lejuar privatizimin e një pasurie kombëtare, trashëgimi kulturore, siç është Parku Kombëtar i Butrintit nga Faondacioni Shqiptaro-Amerikan për Zhvillim. Zhupa e ka denoncuar këtë Fondacion dhe presidentin e tij me qëndrime antishqiptare deri edhe në foltoren e Kuvendit dhe nuk ka munguar që t’i mëbrrijë nj letër përgëzimi nga z. DioGuardi. Lexo: ‘Richard Hodges i Butrintit, antishqiptar dhe sharlatan”

Në vijim, ja se si është shprehur Zhupa mbi letrën e ish-kongresmenit dhe në vijim, teksti i plotë i saj:

“Letra që më ka adresuar ish kongresmeni Joseph DioGuardi më mbush me përgjegjësi dhe krenari për betejën e drejtë që po zhvilloj për Butrintin! Ish-kongresmeni me origjinë arberëshe është gjithmonë zë i parë kur flitet për interesat kombëtare të shqiptarëve.

Kongresmeni DioGuardi ishte njeriu i parë që ktheu vëmendjen e gjithë Komitetit të Marrëdhënieve me Jashtë të Shteteve të Bashkuara të Amerikës mbi Kosovën dhe gjendjen në të cilën ishte vendi.

Është kënaqësi të njoftoj që kongresmeni ka shprehur angazhimin e tij për të ardhur në Shqipëri dhe do të jetë prezent në krahun tim, në krahun e Butrintit, në krahun e shqiptarëve, në krahun e kushtetutës në seancën publike që do zhvillohet në Gjykatën Kushtetuese

Kongresmeni DioGuardi shprehet ndër të tjera “jam i bindur se veprimet e AADF për të marrë përsipër menaxhimin e Parkut Kombëtar të Butrintit nuk përfaqësojnë as objektivat e politikës së jashtme të qeverisë së SHBA dhe as qëllim legjislativ të Kongresit të SHBA”.

Teksti i plotë i përkthyer në shqip: 

E dashur deputete Zhupa

Lavdëroj me gjithë zemër luftën tuaj parimore, të guximshme dhe të vendosur për të shpëtuar Parkun Kombëtar të Butrintit nga marrja e paligjshme e menaxhimit nga Fondacioni Shqiptaro-Amerikan për Zhvillim [AADF].

Në këtë mënyrë mund të jemi të sigurt se xhevahiri i kurorës së historisë së Shqipërisë menaxhohet vetëm dhe ekskluzivisht nga qeveria shqiptare dhe vetëm për të mirën e popullit shqiptar.

Si ish-kongresmen i SHBA-së, kam ndjekur me shumë interes veprimet tuaja legjislative për ndryshimin e ligjit aktual shqiptar për Trashëgiminë Kulturore.

Kam investuar shumë nga koha ime për t’u shpjeguar administratës amerikane në Uashington, si dhe miqve të mi në Kongresin e SHBA, veprimet politikisht manipuluese dhe të paligjshme të ndërmarra nga AADF në lidhje me Butrintin.

Siç mund ta dini, unë u kam shkruar disa anëtarëve të Kongresit të SHBA, duke përfshirë Kryetarin e Komisionit të Senatit për Marrëdhëniet me Jashtë Robert Menendez, dhe administratores së USAID-it, Samantha Poëer, si dhe organeve të UNESCO-s në Paris.

Unë jam po aq i interesuar dhe mbështetës për sfidën juridike thelbësore që ju keni bërë përpara Gjykatës Kushtetuese të Shqipërisë.

Ky është një moment historik për të cilin ju duhet të ndiheni shumë krenare dhe unë po mendoj seriozisht të vizitoj Shqipërinë për të marrë pjesë në seancat publike në Gjykatën Kushtetuese, në mënyrë që të perceptohem si i interesuar drejtpërdrejt për çështjen e Butrintit për të raportuar më pas në Kongresin dhe administratën amerikane.

Shfrytëzoj rastin të ritheksoj se, kur Kongresi i SHBA krijoi Fondet e Ndërmarrjeve, asgjë në ligjin përkatës nuk mund të “interpretohet se i quan Fondet e Ndërmarrjeve, si agjenci ose institucione të Qeverisë së Shteteve të Bashkuara”.

Prandaj, jam i bindur se veprimet e AADF për të marrë përsipër menaxhimin e Parkut Kombëtar të Butrintit nuk përfaqësojnë as objektivat e politikës së jashtme të qeverisë së SHBA dhe as qëllim legjislativ të Kongresit të SHBA.

Ndryshe nga ajo që propozohet tani për Parkun Kombëtar të Butrintit në Shqipëri, parqet tona kombëtare në pronësi publike në SHBA që janë vende të Trashëgimisë Botërore të UNESCO-s menaxhohen vetëm dhe ekskluzivisht nga Shërbimi ynë i Parqeve Kombëtare, një agjenci e Departamentit të Brendshëm të SHBA.

Në mbyllje, ju përgëzoj edhe një herë për punën tuaj të shkëlqyer për të rivendosur dinjitetin e shtetit shqiptar dhe për të forcuar më tej lidhjet e vërteta SHBA-Shqipëri.

Mezi pres t’ju takoj personalisht në Shqipëri.
Gëzuar Vitin e Ri 2023!
Sinqerisht,
Joseph J. DioGuardi