Kryetari i zgjedhur i Vatrës nuk i ka marrë votat e mjaftueshme për një mandat 4-vjeçar, dhe për pasojë ai po vepron jashtë mandatit.

DEKLARATË

Ervin Dine
Kryetar i Kuvendit të Vatrës
11 Shkurt 2024

Me cilësinë e Kryetarit të Kuvendit të Federatës Panshqiptare të Amerikës Vatra, lëshoj këtë deklaratë sa më poshtë vijon:

Jam zgjedhur në këtë pozitë me shumicë të cilësuar votash në Kuvendin e Vatrës të datës 26 Shkurt 2022.

Bazuar në Kanunoren e Vatrës, mandati im është i vlefshëm deri në Kuvendin e radhës të Vatrës.

Me këtë cilësi statuore, deklaroj se i mbështes plotësisht grupin e vatranëve, të cilët dje paqësisht hynë në Selinë e Vatrës në New York dhe me kurajo dhe vendosmëri qëndruan në të drejtën e tyre në sallën e Vatrës, derisa oficerët e zbatimit të ligjit amerikan u angazhuan në zgjidhjen e situatës.

E përshëndes gjithashtu edhe aktin e oficerëve të policisë, duke i dhënë të drejtën vatranëvë të dyja krahëve, si anëtarë të barabartë para ligjit të Vatrës, për të hyrë dhe përdorur ambientet e Vatrës në mënyrë të barabartë për të gjithë.

Shtëpia e Vatrës është dhe duhet të jetë e hapur për të çdo vatran që ka kontribuar për Vatrën në çdo kohë të historisë së saj dhe për çdo shqiptar patriot.

Vatranët kanë detyra dhe të drejta të barabarta të garantuara në Kanunore, pa marrë parasysh përkatësinë fetare, kahun politik apo krahinat nga vijnë.

Mbyllja e dyerve është një kulturë mesjetare dhe nuk i shërben vëllazerimit dhe frymës së bashkëpunimit në mes vatranëve për ti shërbyer çështjes kombëtare.

Unë si kryetar i Kuvendit të Vatrës, kam qenë dhe jam konsistent në mendimin tim se Kuvendi i shkurtit 2022 nuk i përfundoi punimet për arsye kohe dhe për pasojë strukturat e Vatrës nuk janë plotësuar apo zgjedhur ligjërisht.

Kryetari i zgjedhur i Vatrës nuk i ka marrë votat e mjaftueshme për një mandat 4-vjeçar, dhe për pasojë ai po vepron jashtë mandatit. Po ashtu, Kanunorja është miratuar në mënyrë të pjesshme.

Si përfundim, duke parë situatën e kaosit në Vatër, mendoj se vetëm një Kuvend paqësor shtesë me delegatët egzistues, është zgjidhja më e mirë për të dalë nga kjo situatë e krijuar.

I bëj thirrje kryetarit të Vatrës, që të marrë masat e nevojshme dhe të krijojë kushtet, që sa më parë të thërrasë një Kuvend i ri të Vatrës, në mënyrë që Vatra të kthehet në binarë kushtetues.

Me respekt,

Ervin Dine
Kryetar i Kuvendit të Vatrës