.
Mes lindjes e vdekjes
thellë merr frymë
asgjëja hyjnore
dhe qan si njeri
.
LETËR NGA MEKSIKA PËR ARBENIN
(Për ditëlindjen e pestë të nipit i cili jeton në Santiago të Kilit)
.
Arben
unë po plakem mbrapsht
po shndërrohem në fëmijë
të vetmuar
mbase një ditë në një livadh
në qiell
do të filloj të rritem sërish
me qingja e me engjëj
Këtë verë isha në Rahovec
dhe atje sivjet
si në dy dekadat e fundit
dielli dhe hëna nuk ndriçonin
por piqnin
digjnin
më duhej të shkoja në Caffe Bar
The Doors
e ta shuaja zjarrin me birra të Pejës
e ta shuaja gacën me raki rrushi
se në gacë isha shndërruar
kështu që tash të flet hiri
hiri që e mban mend që dikur
ishte zjarr
zjarr i dashurisë majë bjeshke
apo mes hardhive të rrushit
dhe si dielli dhe hëna e sivjetme
u ndriçoja rrugën të tjerëve
derisa u dogja u bëra hi
(Tash do të kthehen shirat
do të bie edhe borë
pranvera do të më shndërroj në
gur të fortë)
.
Arben tash po mplakem por jo si të tjerët
jo si ata që bëhen të urtë të
mençur të matur
po bëhem fëmijë
po të arrijë në moshë
je larg se do të kishim lozur bashkë
do ta dhuroja një
çamçakëz Bazooka
se i solla dy nga Kosova
m’i dhuroi pronarja e dyqanit
të ëndrrave
që quhej Jeta
(sepse edhe rruga njëdrejtimëshe
ku ndodhet shitorja
quhet Jeta)
se nuk kishte para të imta për të
ma kthyer kusurin
.
Tashmë e din se si krijohen balonat
me çamçakëz
do t’i frynim deri sa të shpërthenin
do të tregoja se çka kam parë
në Kosovë
në të vërtetë do t’i dhuroja
ato pamje
se ato që shohim janë tonat
vetëm tonat
ashtu siç jemi ne të atyre që
na shohin
.
Eh pra
e kam parë çdo ditë për një muaj
të tërë një mace
që para dyerve të mbyllura të një
shtëpie të braktisur
sapo dëgjohej namazi i mëngjesit
i incizuar
i myezinëve të ndryshëm
nga altoparlantët e xhamive
të ndryshme
e linte një mi të ngordhur dhe
priste të hapen dyert
e shtëpisë
kur mbaroi muaji
macja një javë të tërë
e sillte nga një këlysh të ngordhur
të saj
para derës së shtëpisë
dhe priste të hapen dyert
dikur dorëzohej
i merrte me vete
vetëm Zoti i madh e dinte se ku
i çonte
.
Në mëngjes zgjoheshin pak njerëz
ata që kishin për të shkuar në punë
një nga të sëmurët mendor
i cili zakonisht me fanellën
e supermanit
dilte për kafe në çarshinë e qytetit
gruaja po ashtu e sëmurë mendore
para xhamisë kryesore
nga ata që shkonin për t’u falur
kërkonte pesë euro lëmoshë
sa për një biletë autobusi deri
në Prizren
dhe për t’i ngrënë pesë qebapë
ndërsa kur e pyesnin se përse i
nevojiten ato pesë euro
ajo mezi e priste këtë rast që
t’u përgjigjej
në të vërtetë dukej sikur jetonte
për atë moment
dhe si dikush që e shpallte fitoren
ndaj një armiku të përbetuar
ua përplaste në fytyrë
me plot dinjitet
dua të shkoj në Prizren për të
bërë seks
.
Zgjoheshin edhe të rinjtë që e
braktisnin atdheun
aty-këtu ndonjë plak a plakë
që u shkonin fëmijëve për vizitë në
dhera të huaj
zgjoheshin kurbetçarët për t’u
kthyer nga kanë ardhur
zgjohej edhe i forti i lagjes
një veteran i rrejshëm i luftës
së fundit
dilte te dera e oborrit
dhe sa herë kalonte atypari ndonjë
vajzë a grua e fqinjëve
lehte si qenë
po po
ai i njëjti
që me gruan e vet bënte seks
një herë në vit
vetëm në pranverë
apo në sezonin kur bëjnë
seks kafshët
për t’u shumuar
.
Në murin e lartë që quhet Kosovë
zgjohen edhe njerëzit e vizatuar
duke i ledhatuar kërthizat
me fytyra të kënaqura
apo më mirë të them të
vetëkënaqura
që duken sikur sapo
kanë masturbuar
.
Zgjohej edhe fqinji që e torturonte
qenin e vet
ia mësonte të birit të tij
se si zbutet kafsha tashmë e butë
Së bashku me të në mes
të Rahovecit
në ora pesë të mëngjesit
që njëzet e dy vjet
zgjohej edhe fqinji tjetër
i cili në mes të oborrit të tij
të vockël
e mprehte me çekan shatin
dhe me sa zë që kishte
e këndonte këngën e
Destan Begut
pastaj kthehej në gjumë
se nuk kishte vresht
nuk kishte arë
Zgjohej tmerrshëm realiteti
ngrihej në dy këmbët e pasme
i zgjaste kthetrat e mprehta
si thika
kah e nesërmja
zgjohej edhe urrejtja mes njerëzve
zgjoheshin demonët
zgjoheshin analistët politikë
akademikët e shpifur
mësuesit e shpifur
mjekët e shpifur
heronjtë e shpifur
zgjoheshin gratë e rrahura e të
dhunuara një natë më parë
se duhej ta përgatitnin ushqimin
para se t’u zgjohen burrat
zgjoheshin edhe burrat e rrahur po
atë mëngjes
se duhej t’ua përgatitnin kafenë e
parë grave të tyre
zgjoheshin banorët e burgut
përjashto këtu drejtorin e burgut
dhe të burgosurve të privilegjuar
zgjoheshin oligarkët
zgjoheshin besa edhe shumica e
të vdekurve për së gjalli
dhe natyrisht
zgjoheshin edhe kafshët e egra
dhe të buta
.
Nuk zgjoheshin
Nuk zgjoheshin
Hëm
Nuk zgjoheshin i dashur Arben
vetëm ata apo ato
që kishin vdekur përnjëmend
dashuria mes njerëzve
këlyshët e ngordhur të maces
minjtë që i sillte para dyerve po
ajo mace
prokurorët
dhe politikanët
Ushtarët e armikut në Kosovë
kishin meny të pasur shqiptare
.
Në mëngjes
qumësht nga gji të shqyer nënash
dhe foshnje të palindura të ziera
në zjarr shtëpish
servirur me sy të zinj të kaltër apo
ngjyrë kafe
dhe nga një shishe lotë valë
.
Dikush kënaqej sall me nga një
kokë të pjekur
Në drekë
zemra të plasura të të
gjitha moshave
të ziera në lëng eshtrash në
njërën anë
dhe mish kurrizi të pjekur në gacë
përcjellë me tru të fërguar fëmijësh
e sallatë klithmash spërkatur me
uthull tmerri
dhe nga një litër e gjysmë gjaku
vashash të dhunuara
.
Dikush kënaqej sall me nga një
kokë të pjekur
Në darkë
mushkëri të zeza e të bardha
aty këtu ndonjë veshkë
mish fëmije të përzier me gjakun
e nënave
ca tul plake a plaku pjekur në hell
njelmësuar me kripën që nxirrej
nga loti
.
Dikush kënaqej sall nga një kokë
të pjekur
Në meskohë
bluanin vesh të majtë e të djathtë
gishtërinj duarsh e këmbësh
aty këtu ndonjë hundë të përgjakur
dhe ëndrrat tona të thara në murin
e pushkatimit
Dikush kënaqej sall me një kokë
të pjekur
Piqnin e zienin në zjarr shtëpish
hanin e pinin kafka shqiptarësh
sikur të mos ishin njerëz
Apo jo Zoto
derisa vera i ktheu në dheun e tyre
kur u majmën nga vdekja
.
“Copa ime e qiellit”, Botimet “KOHA”, 2015
Drejtuesi i Report tek RAI3 Sigfrido Ranucci: Do ta transmetojmë – presim akord të intervistojmë Ramën
Gazetari italian: Më shumë u shqetësova kur pashë se si ishte zhdukur emri i Olsi Ramës nga hetimet
Autori i emisionit “Report” i referohet sondazhit të BalkanWeb: 60% e shqiptarëve i besojnë investigimit të RAI 3
Kumbulla e fëmijërisë Poemë nga Elida Buçpapaj
Osmani – Vuçiçit: Viktimat janë këtu, kërkoju falje nëse ke dinjitet!
Poezi nga AVIGDOR HAMEIRI (1890 -1970)- I përktheu MIMOZA EREBERA
Instituti Ndërkombëtar Republikan: Kosova dhe Shqipëria, vendet më pro-perëndimore në Ballkanin Perëndimor
Një ditë para se të pyetet në SPAK, Veliaj deliron: Jam pemë me kokrra që më gjuajnë me molotov
Fija e hollë e anëtarësimit në KiE- Nga Florim Zeqa
Baerbock: Ballkani sa më shpejt në BE! Nuk mund të lejojmë Rusinë të ndërhyjë në rajon
Inteligjenca maqedonase: Shteti në shënjestër të sulmeve hibride ruse e kineze
Stoltenbergu zhvillon vizitë të paparalajmëruar në Kiev
