VOAL

Cikël poetik nga DIN MEHMETI- Përgatiti për botim MUHARREM KURTI

April 4, 2023

RUBRIKA: Krijues të shquar të letërsisë bashkëkohore shqipe, pjesëmarrës dhe fitues të çmimeve në Mitingun e Poezisë.

Din Mehmeti (1929, Gjocaj, 2010 Gjakovë). Botoi librat me poezi: Në krahët e shkrepave (1961), Rini diellore (1961), Dridhjet e dritës (1969), Heshtje kallur (1972), Ora (1974), Ikje nga vdekja (1978), Fanar në furtunë (1981), Fatin tim nuk e nënshkruaj (1984), As në tokë as në qiell (1988), Gjaku që këndon (1993), Prapë fillimi (1996), Lumturia është mashtrim (1999), Mos vdis kur vdiset (2001), Verbim i bardhë (2004) Vajet e shiut (2010).

Është bashkëthemelues i Mitingut të Poezisë dhe njeri prej më kontribuuesve në të.

Ka fituar çmimin poezia më e mirë e mbrëmjes qendrore në Mitingun e vitit 2001 dhe libri më i mirë në vitet e tetëdhjeta të shekullit njëzetë.

Konsiderohet njeri ndër krijuesit ndër më të mirë të poezisë shqipe bashkëkohore dhe poet i antologjive te vërteta të poezisë shqipe bashkëkohore.

Poezi të DIN MEHMETI

PAKËZ NË ËNDËRR PAKËZ NË ZHGJËNDËRR

Jam pakëz i ndrydhur pakëz i çliruar

Duke vrapur pas emrit

Pakëz i zverdhur pakëz i fiksuar

Jam pakëz i ngrirë pakëz i shkrirë

Duke kënduar për ty

Pakëz i rrahur pakëz i ndjekur jam

Jam pakëz i përbuzur nga Dielli

Kënga jote më ka ndezur

E më ka stërpikur me lot

Pakëz i vrarë edhe nga ylli jam

Jam ëndërr pakëz zgjëndërr

Pakëz fëmijë kur fluturojnë zogjtë

Jam pakëz endacak-shtegtimin e kam në gjak

Duke ecur me ty kalistrok

Pakëz i çuditshëm kur qëlloj retë

Jam pakëz i dyshimtë pakëz kokëfortë

Kur shkelmoj zotërat që s’dinë të ngopen kurrë

Pakëz diçka nëpër zjarr diçka nëpër ujë

Diçka që hyn në të ardhmen

Për të ikur nga vdekja jam…

NGA QIELLI PIKON VERDH

Ditët e shpresave

I fshehim nën jastëk

Vdekja duke bredhur

Bie në kurthin e sëmundjes

Rreth spitalit

Zhagas ecin njërzit

Për një dashuri në shpirt

Ditët e shpresave

I fshehim nën gjuhë

Ëndrrat i kruajmë

Me brecën e hënës

Nga qielli pikon verdh…

BREGU FSHIN DJERSËT

Yjet pikëlojnë frikë

Deti pëllet në fërfëllazë

Bregu fshin djersët

Sytë shkëndija të kuqe

Nata mbulon varret

Bregu klith

Ferra në duar ferra në këmbë

Ajri i prishur këndon vetëm

Djerrinë pa krahë

Gjarpërinjtë s’dinë ç’të bëjnë

Me frushullimat e veta

Bregu fshin gjakun

Yjet kërkojnë ndihmë

E unë fshihem në lëkurën e djegur

Bregu çmendet

Një violin e vonë hap

Zemra në ujdhesë

E pastaj çdo gjë lufton me çdo gjë

Derisa nata të pjellë ditën e re…

BALADA PËR FRAZËN E FRYRË

Nga fraza e fryrë

Doli hajni i ri i luleve

U zverdhën parrullat

Biografia e dekoruar

u fsheh

pas karrigeve të lakmive

u rrokatën duartrokitjet

atë ditë fjalët morën kokën në dorë

duke vrapuar në oshëtimat e lumenjve

dhe shumë kohë fishkëlluan trenat

para se të hynin në tunelet e reja

atë ditë dielli shkuli ferra

varret nxorrën eshtra

twitter
Follow
facebook
linkedin

Fjalë kyçe: Muharrem Kurti

Cikël poetik nga DIN MEHMETI- Përgatiti për botim MUHARREM KURTI

Lajmet me interesante

Lajmet e fundit

ARKIVA E LAJMEVE

RRETH NESH

Cikël poetik nga DIN MEHMETI- Përgatiti për botim MUHARREM KURTI

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL