Nuk do të thotë se je shqiptar vetem të flasësh shqip apo ta kesh një emër shqiptar, por atë ta dëshmosh së vepruari për kombin tënd.

Kur njerëzit e mëdhej nga vlera dhe cilësia, por dhe nga veprat, e që i bëjnë jo veç për të mirën përsonale por për atë kombëtare në përgjithësi, na janë ajka vlerëmadhe e kombit. Pa të tillët do na mungonte krenaria që e kemi si etni e veçantë para çdo kombi tjetër. Me të tillët njerëz u bëmë faktor dhe prezantues e promovues vlerash edhe gjithandej diasporës shqiptare nëpër botë; me ta u bë disi edhe riidentifikimi i neve si komb; për të cilën vlerë që kishim, forcat e ndryshme sunduese por dhe ato përkrahëse të tyre u përpoqën të na zhbëjnë kombëtarisht. Kësaj nuk iu arrit, falë burrave me më vlerë të kombit, siç na është i yni Shaban Salih Gashi. Ku për këtë të mirë fati na e solli birin e kombit, që kurrë s‘u ndal në shtimvlerën, dhe deri në çlirimin përfundimtar nuk pushoi së vepruari.

Vepra e Shabanit na e dëshmoi se, pavarësisht rrethanave me plot vështirësi e rreziqe me plot sakrifica, të sakrifikosh për atdheun është obligim moral e patriotik për çdo shqiptar.

Me krenarinë më të madhe i vëra këto shkronja në ndërtim fjalësh për njeriun dhe pjesëtarin e familjes tonë Shaban Gashin, i cili që nga rinia e hershme me sjelljet, të bëmat dhe veprimtarinë e vetë të gjithanshme sot na bën krenarë; e çmojmë fatin që e patëm dhe e kemi njeriun më vlerëmadh që mund ta ketë dikush.

Si në fëmijëri, rini dhe në pjekurinë e vet, ishte dhe na është shëmbull i veprimtarisë rezistuese dhe sakrificës për gjithë jetën në të mirën e kombit dhe atdheut.

Edhe pse largë në distancë jetonim, Shabani në Pejë e ne në Grabanicë, vizitat na ishin shumë të shpeshta; kushtet e udhëtimit na ishin shumë të vështira, se për të shkuar në Pejë, njëherë duhej shku këmbë në Klinë (mbi 5km) e mëpastaj me tren…; por këtë e bënim me dëshirën më të madhe. Në atë kohë nuk na ishte magjistralja Prishtinë – Pejë. Në pushimet e gjata shkollore me javë të tëra i kalonim si me Shabanin ashtu edhe me Haxhiun, Aliun, Sadikut e Ganiun (djem të dajës së Shabanit e kushëri të mi); pa i lënë anash hallën time Zelfijen (nanë e Shabanit), bacin Bajram (dajë i Shabanit), dadë Fatimën (motër e Shabanit), pastaj dadën Xufë e kështu me radhë.

Në këto dy familje të Shaban Gashit e Bajram Haxhë Berishës kalova muaj të tërë  përgjatë katër viteve përsa isha në shkollë të mesme po në Pejë.

Edhe këta kur na vinin në Grabanicë rrinin me javë tek ne.

Bash asnjë aheng gëzimi nuk e kishte bukurinë e as madhështinë pa pjesëmarrjen e këtyre dy familjeve vlerëmëdha; e sidomos i veçanti ynë Shabani; biles ftoheshin edhe në gazmende të tjera nga shumë familje të Grabanicës; ku me kujtohet në do dasma Shabani, për nderim, ishte edhe flamurtar (bajraktar), siç ishte rasti në dasmën e Anton Arifit, dikund në vitet e 70-ta.

Shabani, me pedantërinë që kishte, ishte një shembull i mirësjelljes dhe adukatës sidomos për neve që rrinim më së shpeshti me të. Edhe sjellja e tij shëmbullore ndaj prindërve të tij, por dhe në përgjithësi, neve na mësonte, se të tillë duhet të jemi edhe ne.

Si jetimë që ishimin (vitetet e 70-ta) përgëdhelja e dadës Zelfije, dadës Fatime e, e Shabanit në veçanti, neve ndjeheshim se nuk qenkemi të vetëm, edhepse tanimë kishim mbetur pa babanë.

Kur na vinin këta në vizitë, e ndjenim veten disi më të fortë dhe më të mëdhej; kjo ishte si punë jetimësh e shumë edhe të varur nga të tjerët.

Nganjëherë Bajram Haxha (Berisha) dajë i Shabanit, vinin në grup familjar tek ne, me vete merrte edhe sharkinë, dhe ia thojke këngës deri në orët e vona e në dritë të llambës apo fitilaçi me vajgur; por nuk mungonte as i veçanti ynë Shabani.

Pas burrërimit Shabanit i erdhi edhe koha për martesë, e këtë e bëri me një rugovase Xhevahiren (Xhevën), vajzë e një babai burrë shumë të çmuar fisnik rugovas, të quajtur Misin. Me të cilin kishim fatin të rrinim shpeshherë, dhe të dëgjonim fjalë tamam burrash.

Edhe pas martesës Shabani me familjen e ngushtë tani të krijuar, Grabanicën e vizitonte shpesh, por tani me rrethana krejtësisht tjera… Ishte një burrë model i burrërisë për të tjerët. Kishte kriju një familje shembullore, dhe vet i punësuar me kualifikime të larta dhe me të ardhura t‘mira. Ishte një familje për lakminë e të tjerëve. Në çdo tubim dhe vizitë ishin të veçuar me pedantërinë dhe kulturën që kishin; pra, ishin një familje tipike intelektuale dhe të respektuar nga të gjithë që e njihnin.

Në vitet e 80-ta sikur u përmbys çdo gjë e tyre; Shabani me veprimtarinë e vet atdhetare ishte bërë halë në syrin e atij pushteti okupues policor; kishin filluar përcjelljet dhe përndjekjet; ftohej pandalshëm në stacionin policor në Pejë; iu bastis disaherë edhe banesa në Pejë; jeta badhkë me gjithë familjen iu bë e pamundëshme të vazhdohej në ato rrethana. Kështu, filloi të rrënohej e tëra e arritu dhe e krijuar si më së miri por me plot mund. Shabani me zemërthyerje detyrohet t‘a lë vendlindjen dhe të emigronte në vende të largëta; së pari në Zvicër pastaj në Gjermani dhe më në fund në Sh.B.A..

Edhe këtu Shabani, pas shumë mundimeve dhe peripetive, shëndriti si Ylli polar; mblodhi familjen rreth vetës dhe u integrua çdokund ku e kërkonte puna me karakter kombëtar; u bë faktor unifikues i mërgatës shqiptare, e sidomos në vitet e 90-ta ku jeta intitucionale kishte ra përtokë nga aparthejdi policor serbosllav. U angazhua që mërgata të jetë sa më kontributdhënëse në të mirën e kombit dhe në çlirimin e Dardanisë. Senzibilizoi çështjen shqiptare (të Kosovës) në qarqet më të larta të mundëshme në ShBA. Që më kohë Shabani kishte kriju kontakte shumë të ndërsjellta dhe të besueshme me kongresmenë dhe emra me peshë të madhe politike në botë. Me të tillë faktorë, e në të mirë të qështjes tonë, Shabani kishte udhëtuar disa herë  në Dardani e Shqipëri.

Besimi i shfaqur ndaj Shabanit dëshmojnë shumë emisione televizive e dokumentarë të ndryshëm ku vlerëmadhi na është i dukshëm në shoqërim me njerëz që vendosnin për fatin tonë si komb.

Edhë pas përfundimit të luftës, Shabani nuk ndejti duarkryq; u aktivizua në rimëkëmbjen e Dardanisë së shkatërrur nga lufta barbare; senzibilizoi shqiptarët për ndihmë dhe rindërtim; sidomos të shkollave e spitaleve; dhe me qellim që jeta institucionale të fillojë së vepruari.

Shabani ynë, si pjesë të veçantë të bëmirësisë së tij, mori hapin për ndërtimin e një objekti ndërlidhës ShBA -Kosovë (Dardani), me qëllim aktiviteti të ndërsjellë të vlerave historike, kombëtare e kulturore e pse jo edhe arkivore të këtyre dy vendeve historikisht mike, dhe ky objekt ngreh shtat në Pejën e Haxhi Zekës, me emërtimin ’Shtëpia e Bardhë‘.

Shabanit tonë i falenderohem prej toke e në qiell për të bëmat, për të cilat kurrë nuk kurseu mund e as sakrificë deri në çlirimin definitiv, e që na bëri të gjithëve krenarë që e patëm dhe e kemi.

Shoqëria jonë, por dhe faktori zyrtar i shtetit tonë, i kanë borxh të tillëve, t‘i kenë në konsideratë dhe t‘i çmojnë dhe vlerësojnë si gurthemel të shtetësisë së Kosovës, dhe sikurqë na është vlerëmadhi Shaban, të vlerësohet me Mirënjohje Presidenciale.

U jam përjetësisht mirënjohës nipi ynë vlerëmadh, dhe ju uroj shëndet e mbarësi në vazhdim!

Ps. Arsyeja që nuk më la të shkruaj edhe më gjerësisht, më është dalja e librit të vetë Shabanit këto ditë nga shtypi (botimi), ku janë të përfshira thuajse shumica e të bëmave dhe fakteve, por jo edhe të gjitha ato që e kompletojnë emrin dhe veprën me shumë vlera të këtij njeriu që la gjurmë të pashlyera, të cilat do na janë pjesë e pasurisë së historiografisë tonë kombëtare.

Kohë më parë shfaqa gatishmërinë që të isha pjesë kontributdhënëse e pasurimit të këtij libri, por rrethanat e krijuara një gjë të tillë nuk ma bënë të mundur.

Biznesmeni i mirënjohur shqiptaro-amerikan Harry Bajraktari i ka bërë thirrje ambasadorit amerikan në Tiranë, Eric Wendt, dhe përfaqësuesve evropianë që të angazhohen me protestuesit, qeverinë dhe opozitën shqiptare për krijimin e kushteve për formimin e një qeverie teknike.

Në një reagim të publikuar në rrjetet sociale, Bajraktari kërkon dorëheqjen e kryeministrit Edi Rama, duke argumentuar se ai nuk mund ta mbajë vendin peng.

Gjithashtu, ai i bën thirrje qeverisë që të ndalë dhunën ndaj protestuesve paqësorë dhe të hapë rrugën për një tranzicion paqësor të pushtetit.

Bajraktari thekson se aleatët perëndimorë duhet të monitorojnë të gjithë procesin, me qëllim garantimin e zgjedhjeve të lira, të ndershme dhe demokratike në Shqipëri.

“Ambasadori amerikan Eric Wendt dhe përfaqësuesit evropianë duhet të angazhohen me protestuesit, qeverinë dhe opozitën në Shqipëri për të krijuar kushtet për formimin e një qeverie teknike.

Edi Rama nuk mund ta mbajë vendin peng. Ai duhet të ndalë dhunën ndaj protestuesve paqësorë, të japë dorëheqjen dhe t’i hapë rrugën tranzicionit paqësor të pushtetit.

Aleatët perëndimorë të Shqipërisë duhet ta monitorojnë gjithë procesin. Kjo është rruga e vetme që Shqipëria të ketë zgjedhje të lira, të ndershme e demokratike”, shkruan Bajraktari në reagimin e tij.

Në fund të mesazhit, biznesmeni shqiptaro-amerikan shpreh mbështetjen për Shtetet e Bashkuara, aleatët evropianë të Shqipërisë dhe popullin shqiptar.

Reagimi:

“Ambasadori amerikan Eric Wendt dhe përfaqësuesit evropianë🇪🇺, duhet të angazhohen me protestuesit, qeverinë dhe opozitën në Shqipëri për të krijuar kushtet për formimin e një qeverie teknike.

Edi Rama nuk mund ta mbajë vendin peng. Ai duhet të ndalë dhunën ndaj protestuesve paqësorë, të japë dorëheqjen dhe t’i hapë rrugën tranzicionit paqësor të pushtetit.

Aleatët perëndimorë të Shqipërisë duhet ta monitorojnë gjithë procesin. Kjo është rruga e vetme që Shqipëria të ketë zgjedhje të lira, të ndershme e demokratike.

Zoti i bekoftë Shtetet e Bashkuara, aleatët evropianë të Shqipërisë dhe mbarë popullin shqiptar”.

Avokati i njohur shqiptaro-amerikan Joseph Dedvukaj, i cili në shtator 2026, hapi dyert e shtëpisë së tij në Detroit, për të pritur kryeministrin Edi Rama dhe delegacionin e tij gjatë vizitës në Michigan, ka refuzuar publikisht propozimin për t’u emëruar konsull i Shqipërisë në këtë shtet.

Ai ka shkuar më tej duke kërkuar dorëheqjen e menjëhershme të kryeministrit, në një deklaratë që ka tërhequr vëmendjen e komunitetit shqiptar në SHBA dhe të medias në Shqipëri.

Dedvukaj, avokat me më shumë se 30 vite karrierë në fushën e aksidenteve rrugore dhe me një bilanc mbi 350 milionë dollarë kompensime të fituara për klientët e tij, ishte një nga figurat kryesore të pritjes së ngrohtë që iu bë Ramës në shtëpinë e familjes Dedvukaj.

Në atë kohë, ai e cilësoi darkën si “një nder dhe kujtesë të rrënjëve shqiptare”.

Vetë Rama, gjatë takimit me diasporën, kishte njoftuar hapjen e shpejtë të një konsullate shqiptare në Detroit, si përgjigje ndaj kërkesave të komunitetit të madh shqiptaro-amerikan në Michigan.

Sipas burimeve të afërta me avokatin, propozimi për postin e konsullit erdhi si vazhdim i asaj vizite dhe i premtimit për përfaqësim diplomatik më të afërt.

Por Dedvukaj e ka refuzuar kategorikisht.

Në një mesazh të dërguar mediave dhe të shpërndarë në rrjetet e diasporës, ai shpjegon se nuk mund të pranojë një detyrë, që do ta lidhte me një qeveri të cilën e sheh si të dështuar në përmbushjen e pretendiimeve të shqiptarëve, si brenda ashtu edhe jashtë vendit.

“Nuk mund të shërbej si përfaqësues i një qeverie që nuk dëgjon zërin e qytetarëve të saj. Protestat e fundit në Shqipëri, kërkesat e studentëve dhe të opozitës për dorëheqje nuk janë thjesht zhurmë politike; ato janë shprehje e një lodhjeje të thellë. Unë e hapa shtëpinë time me respekt për institucionin e kryeministrit dhe për diasporën, por respekti nuk do të thotë heshtje kur situata përkeqësohet,” thuhet në deklaratën e tij.

Avokati thekson se postet diplomatike, duhet të shërbejnë interesave të komunitetit dhe jo interesave partiake.

Ai kritikon vonesat në shërbimet konsullore, mungesën e transparencës dhe atë që e quan “përdorim të diasporës për qëllime politike”.

Në këtë kontekst, Dedvukaj i bën thirrje Ramës të japë dorëheqjen, duke argumentuar se vetëm një ndryshim në krye të qeverisë mund të rivendosë besimin e shqiptarëve brenda dhe jashtë kufijve.

Reagimet në komunitetin shqiptar të Michiganit janë të ndara.

Disa e vlerësojnë qëndrimin e Dedvukajt si shenjë të pavarësisë së diasporës, ndërsa të tjerë e shohin si një hap të ashpër ndaj një lideri që ka mbështetur hapjen e konsullatës.

Ndërkohë, nga Tirana nuk ka pasur ende një reagim zyrtar mbi refuzimin e propozimit.

Ky zhvillim vjen në një kohë kur protestat në Shqipëri, vazhdojnë të kërkojnë ndryshime thelbësore. Dedvukaj, i cili ka ndërtuar karrierën e tij mbi mbrojtjen e të drejtave të individëve, duket se po e zgjeron këtë mision edhe në planin publik, duke e vendosur dinjitetin e diasporës mbi çdo ofertë institucionale.

Avokati shqiptaro-amerikan Joseph Dedvukaj i ka drejtuar një letër të hapur kryeministrit Edi Rama, duke i kërkuar dorëheqjen dhe nisjen e një procesi për kalimin paqësor dhe kushtetues të pushtetit. Në letrën e tij, ai shpreh shqetësimin për situatën politike në Shqipëri, protestat e studentëve, pretendimet për dhunë policore dhe akuzat për korrupsion ndaj zyrtarëve të lartë.

Avokati thekson se dorëheqja e Ramës duhet të konsiderohet një akt përgjegjësie ndaj vendit dhe jo një lëshim përballë dhunës. Ai kërkon gjithashtu një marrëveshje mes mazhorancës dhe opozitës, me përfshirjen e studentëve dhe shoqërisë civile, për të garantuar një tranzicion institucional.

Avokati thekson se rezultati i zgjedhjeve parlamentare të 11 majit 2025 duhet të respektohet dhe se 856.177 qytetarët që votuan Partinë Socialiste nuk mund të shpërfillen. Megjithatë, sipas tij, mandati zgjedhor nuk e përjashton kryeministrin nga përgjegjësia për menaxhimin e krizës aktuale.

“Dhuna nuk mund të zëvendësojë qeverisjen kushtetuese”, shkruan ai, duke dënuar si aktet e dhunshme ndaj institucioneve dhe policisë, ashtu edhe përdorimin e paligjshëm të forcës ndaj protestuesve.

Ai kërkon hetime të pavarura për pretendimet e dhunës policore dhe për aktet kriminale gjatë demonstratave, ndërsa thekson se shqetësimet e studentëve për kostot dhe kushtet e arsimit të lartë meritojnë përgjigje konkrete.

Në letër kujtohen edhe protestat studentore të dhjetorit 2018 dhe Pakti për Universitetin, për të cilin avokati kërkon një vlerësim transparent të angazhimeve të realizuara dhe atyre të mbetura të papërfunduara.

Avokati propozon që largimi i Ramës të shoqërohet me një marrëveshje publike politike, e cila të garantojë një qeveri pasardhëse, reforma institucionale dhe zgjedhore, transparencë për investimet e mëdha dhe masa konkrete për arsimin.

Ai u referohet neneve 96, 97, 105 dhe 106 të Kushtetutës, duke argumentuar se kalimi i pushtetit mund të realizohet përmes mekanizmave kushtetues, pa cenuar përfaqësimin parlamentar. Mes propozimeve të tij është edhe nisja e një procesi për ndryshimin e Kushtetutës, me qëllim kufizimin e numrit të mandateve të kryeministrit.

Letra:
Ju shkruaj si shqiptaro-amerikan që ia ka kushtuar jetën shërbimit ndaj komunitetit shqiptar në Miçigan dhe mbështetjes së trevës së Malësisë. Ju shkruaj si dikush që dëshiron ta shohë Shqipërinë të ketë sukses.

Më 20 Shtator 2026, në shtëpinë time në Miçigan, më kërkuat të shqyrtoja mundësinë për t’i shërbyer Shqipërisë në një funksion konsullor në Miçigan. Ju thashë se do ta merrja në konsideratë. Ju jam mirënjohës për besimin dhe ndihem i nderuar nga kërkesa, por me respekt e refuzoj. Ju shkruaj si qytetar privat, pa kërkuar emërim apo përfitim personal, i shqetësuar për të ardhmen e Shqipërisë.

Në zgjedhjet parlamentare të 11 majit 2025, 856.177 shqiptarë votuan për Partinë Socialiste nën drejtimin Tuaj, duke i dhënë asaj 83 nga 140 vendet në Kuvend. Këta votues meritojnë respekt dhe zëri i tyre nuk mund të shpërfillet sepse të tjerë kanë dalë në rrugë. Shumë shqiptarë nuk po u bashkohen këtyre protestave. Edhe ata kanë të drejta, shqetësime dhe një interes të ligjshëm për të ardhmen e vendit të tyre.

Duhet gjithashtu të kundërshtojmë një precedent të rrezikshëm: drejtuesit e zgjedhur nuk duhet të detyrohen të largohen nga detyra sa herë që demonstratat bëhen të dhunshme. Vënia e zjarrit ndërtesave publike, sulmet ndaj policisë dhe shkatërrimi i pronës private nuk japin mandat demokratik. Personat përgjegjës duhet të japin llogari përmes procedurave ligjore dhe me respektim të plotë të së drejtës për një proces të rregullt ligjor. Njëkohësisht, shteti duhet të mbrojë tubimet paqësore dhe të sigurojë hetim të shpejtë, efektiv dhe të pavarur të pretendimeve të besueshme për përdorim të paligjshëm të forcës nga policia. Dhuna nuk mund të zëvendësojë qeverisjen kushtetuese.
Megjithatë, një mandat zgjedhor mbart përgjegjësi të jashtëzakonshme në një krizë të jashtëzakonshme. Pretendimet për korrupsion që përfshijnë zyrtarë të lartë dhe raportimet për keqtrajtim të demonstruesve nga policia kërkojnë shqyrtim të besueshëm dhe të pavarur.
Shqetësimet e studentëve për kostot dhe kushtet e arsimit të lartë meritojnë një përgjigje konkrete dhe përmbajtësore. Sipas gjykimit tim, rikthimi i besimit të publikut kërkon llogaridhënie dhe angazhim të mirëfilltë me ata që shprehin kritika në mënyrë paqësore.
Edhe në Dhjetor 2018, studentët protestuan për çështje të arsimit të lartë dhe qeveria Juaj shpalli Paktin për Universitetin. Rishfaqja e shqetësimeve për përballueshmërinë e kostove dhe kushtet në universitete e bën të domosdoshëm një vlerësim transparent të atyre angazhimeve: çfarë u realizua, çfarë mbetet e papërfunduar dhe çfarë veprimesh të mëtejshme nevojiten. Çdo marrëveshje e re duhet të parashikojë angazhime të matshme dhe raportim publik të pavarur. Fitorja në zgjedhje nuk i zgjidh të gjitha çështjet e udhëheqjes që lindin më pas.

Sipas gjykimit tim, ky moment kërkon dorëheqjen tuaj. E kërkoj këtë jo si lëshim ndaj dhunës, por si një akt të vetëdijshëm përgjegjësie ndaj të gjithë vendit, përfshirë ata që votuan për Ju. Besoj se një marrëveshje e besueshme tani ka më shumë mundësi të ketë sukses nën drejtimin e një pasardhësi sesa nën vazhdimin e udhëheqjes suaj.

Vetëm dorëheqja Juaj nuk do të mjaftonte. Ju bëj thirrje të ndihmoni në negocimin e një marrëveshjeje publike ndërmjet shumicës parlamentare dhe opozitës, me kontribut të mirëfilltë nga përfaqësuesit e studentëve që protestojnë paqësisht dhe nga shoqëria civile.
Sipas neneve 96 dhe 97 të Kushtetutës, kur posti i Kryeministrit mbetet vakant, Presidenti emëron Kryeministrin me propozimin e partisë ose koalicionit që zotëron shumicën e vendeve në Kuvend, më pas vijon procesi i kërkuar i miratimit parlamentar. Neni 106 kërkon që Kryeministri dhe ministrat në largim të qëndrojnë në detyrë deri në emërimin e Këshillit të ri të Ministrave. Neni 105 parashikon gjithashtu një mocion konstruktiv mosbesimi: të paktën një e pesta e deputetëve mund të propozojë një mocion që përcakton një pasardhës; miratimi kërkon që më shumë se gjysma e të gjithë deputetëve të zgjedhin atë pasardhës; dhe Presidenti dekreton shkarkimin dhe emërimin brenda dhjetë ditëve. Ju kërkoj të merrni nismën për të siguruar një kalim të rregullt të pushtetit përmes këtyre institucioneve kushtetuese.

Marrëveshja duhet të përfshijë:
-Një pasardhës dhe një kabinet të aftë për të fituar besim të gjerë, duke përfshirë profesionistë të respektuar e jopartiakë, me një program të bërë publik dhe të paraqitur në Kuvend.
-Një përgjigje të menjëhershme dhe konkrete ndaj shqetësimeve të studentëve për kostot dhe kushtet e arsimit të lartë, me angazhime të matshme, afate dhe raportim të rregullt publik.
-Hetime të pavarura për abuzimet e pretenduara të policisë dhe aktet kriminale të dhunës gjatë protestave, pa ndërhyrje politike ose trajtim preferencial, duke kërkuar llogaridhënie përmes procedurave kushtetuese dhe ligjore të zbatueshme.
-Reformë institucionale dhe zgjedhore sipas një kalendari të bërë publik, me respektim të plotë të pavarësisë së gjyqësorit, duke përfshirë nisjen e procesit të ndryshimit të
Kushtetutës për të kufizuar numrin e mandateve të Kryeministrit. Çdo ndryshim duhet të përmbushë kërkesat e nenit 177, përfshirë shumicën e cilësuar dhe procedurat e zbatueshme të referendumit.
-Transparencë në investimet e mëdha të huaja dhe zhvillimin bregdetar, duke filluar me një shqyrtim të pavarur të projekteve të mëdha të zhvillimit që prekin territorin e mbrojtur dhe bregdetin jugor, si dhe me bërjen publike të kushteve të tyre.
-Politika të migracionit dhe të qëndrimit të bazuara në standarde të qarta ligjore, mbikëqyrje transparente parlamentare dhe vendime të ekzekutivit që i nënshtrohen ligjit dhe kontrollit gjyqësor, me vëmendje ndaj komuniteteve shqiptare, gjuhës dhe trashëgimisë kulturore, si dhe me respektim të plotë të të drejtave të njeriut dhe detyrimeve ndërkombëtare të Shqipërisë.

Nëse zgjedhjet e parakohshme bëhen pjesë e zgjidhjes, ato duhet të zhvillohen sipas rrugës kushtetuese. Kjo rrugë respekton besimin e votuesve Tuaj përmes Kuvendit të zgjedhur prej tyre dhe u jep atyre që shprehin kritika paqësisht një mundësi të mirëfilltë për t’u dëgjuar.

Besoj se një kalim paqësor dhe kushtetues i pushtetit, i ndërmarrë me nismën Tuaj, mund ta forcojë të ardhmen evropiane të Shqipërisë. Ai do të tregonte se Shqipëria mund të përballojë një krizë politike përmes institucioneve të saj, të mbrojë shprehjen paqësore të mospajtimit dhe të punojë për një qeverisje që jep llogari. Këto janë angazhime të denja për aspiratat evropiane të Shqipërisë.
Shqipëria është një komb i vogël me një trashëgimi të lashtë. Ne dëshirojmë të ruajmë identitetin, kulturën dhe ndjenjën e bashkësisë së saj, duke u dhënë fëmijëve të saj çdo mundësi për të përparuar. Arsimi duhet të jetë në qendër të misionit të shtetit, duke përgatitur brezin e ardhshëm për punë me kuptim dhe për një jetë me dinjitet e mirëqenie të përbashkët. Të rinjtë e Shqipërisë meritojnë mundësinë ta ndërtojnë këtë të ardhme në vendin e tyre.
Ju mund të ndihmoni që kjo të bëhet e mundur duke e angazhuar shumicën Tuaj në një marrëveshje serioze që mbron përfaqësimin e votuesve të saj dhe u ofron atyre që shprehin kritika paqësisht një rrugë të mirëfilltë drejt reformave. Ju kërkoj të ndihmoni në arritjen e kësaj marrëveshjeje dhe të jepni dorëheqjen si pjesë e zbatimit të saj. Besoj se ky hap do të ishte një akt përgjegjësie ndaj të gjithë vendit.

bw

Mark Gjonaj, ish-anëtar i Këshillit Bashkiak të New York-ut, i është drejtuar me një shkresë kryeministrit Edi Rama dhe Presidentit të Republikës, duke kërkuar ndalimin e dhunës ndaj studentëve protestues, dorëheqjen e kryeministrit dhe krijimin e një qeverie tranzitore.

Në shkresën e tij, Gjonaj shpreh shqetësimin për situatën e krijuar gjatë protestave në Shqipëri dhe i kërkon Ramës të ndalojë përdorimin e dhunës ndaj të rinjve që kanë dalë në rrugë për të protestuar.

Përveç kërkesës për largimin e kryeministrit dhe krijimin e një qeverie tranzitore, Gjonaj njofton edhe dorëheqjen e tij nga pozicioni si anëtar i Këshillit Koordinues të Diasporës.

“I bëj thirrje qeverisë suaj të ndërmarrë menjëherë këto veprime: të ulë tensionet dhe t’i japë fund dhunës së tepruar; të garantojë llogaridhënien e policisë; të hetoj dhe të ndjekë penalisht shkeljet dhe të krijojë një qeverie tranzitore. 

Për të rikthyer stabilitetin dhe për të parandaluar trazira të mëtejshme apo çdo humbje jete, ju bëj thirrje, kryeministër Rama, të jepni dorëheqjen”, shkruan Gjonaj.

Një grup mjekësh dhe profesionistësh shëndetësorë shqiptarë që jetojnë dhe punojnë në Gjermani kanë ndërmarrë një peticion drejtuar Bundestagut gjerman dhe deputetëve gjermanë në Parlamentin Evropian.

Në peticion, ata shprehen të shqetësuar për situatën në Shqipëri dhe protestat që, sipas tyre, prej më shumë se katër muajsh po zhvillohen në Tiranë dhe qytete të tjera.

Ata kërkojnë një qëndrim publik në mbrojtje të së drejtës për protestë paqësore, si dhe një hetim të pavarur e transparent mbi pretendimet për përdorim joproporcional të forcës nga policia.

“Organizata të të drejtave të njeriut kanë raportuar përdorim joproporcional të forcës nga policia dhe hedhje gazi lotsjellës pa paralajmërim. Edhe Delegacioni i BE-së në Tiranë ka kërkuar hetim të shpejtë të këtyre pretendimeve.”, thuhet në reagim.

Një pjesë e veçantë e peticionit i kushtohet edhe raportimeve për përdorimin e automjeteve që perceptohen si ambulanca në mbështetje të veprimeve policore. Mjekët kërkojnë garanci për kujdes mjekësor të paanshëm ndaj të gjithë të lënduarve, si dhe mbrojtje për personelin mjekësor dhe gazetarët.

“Si mjekë, e dimë se çfarë dëmtimesh shkakton gazi lotsjellës, sidomos te fëmijët, të moshuarit dhe të sëmurët kronikë. Ambulancat dhe personeli mjekësor duhet të shërbejnë vetëm për kujdesin ndaj të lënduarve, kurrë si pjesë e operacioneve policore.”, thuhet më tej.

Ata i bëjnë thirrje deputetëve gjermanë që çështja të përfshihet në axhendën e procesit të anëtarësimit të Shqipërisë në BE, veçanërisht në lidhje me shtetin e së drejtës dhe të drejtat themelore. Peticioni apelon që të përdoren mjetet diplomatike në dispozicion për të parandaluar përshkallëzimin e mëtejshëm të situatës.

LETRA E PLOTE:

Të nderuar zonja dhe zotërinj deputetë,

Ne, mjekë dhe profesionistë shëndetësorë shqiptarë që jetojmë dhe punojmë në Gjermani, po ndjekim me shqetësim të madh situatën në Shqipëri. Deri kur do të heshtë Evropa, ndërkohë që qytetarët dalin në rrugë për të kërkuar në mënyrë paqësore të drejtat e tyre demokratike?

Prej më shumë se katër muajsh, mijëra qytetarë, mes tyre shumë studentë dhe të rinj, protestojnë në Tiranë dhe në qytete të tjera. Organizata të të drejtave të njeriut kanë raportuar përdorim joproporcional të forcës nga policia dhe hedhje gazi lotsjellës pa paralajmërim. Edhe Delegacioni i BE-së në Tiranë ka kërkuar hetim të shpejtë të këtyre pretendimeve. Veçanërisht shqetësuese janë raportimet për automjete që perceptohen si ambulanca, të cilat duket se janë përdorur në mbështetje të veprimeve policore.

Si mjekë, e dimë se çfarë dëmtimesh shkakton gazi lotsjellës, sidomos te fëmijët, të moshuarit dhe të sëmurët kronikë. Ambulancat dhe personeli mjekësor duhet të shërbejnë vetëm për kujdesin ndaj të lënduarve, kurrë si pjesë e operacioneve policore.

Për këtë arsye, ju kërkojmë:

1. Të mbani një qëndrim publik në mbrojtje të së drejtës për protestë paqësore në Shqipëri.
2. T’u kërkoni autoriteteve shqiptare një hetim të pavarur dhe transparent për përdorimin joproporcional të forcës dhe për rastet që përfshijnë automjete mjekësore.
3. Të kërkoni garanci për kujdes mjekësor të paanshëm ndaj të gjithë të lënduarve dhe mbrojtje për personelin mjekësor dhe gazetarët.
4. Ta vendosni këtë çështje në axhendën e procesit të anëtarësimit të Shqipërisë në BE, veçanërisht te kapitujt për shtetin e së drejtës dhe të drejtat themelore.
5. Të përdorni të gjitha mjetet diplomatike në dispozicion për të parandaluar një përshkallëzim të mëtejshëm.

Shumë prej nesh janë shtetas gjermanë dhe kontribuojnë çdo ditë në sistemin shëndetësor të Gjermanisë. Prindërit, vëllezërit, motrat dhe të afërmit tanë jetojnë në Shqipëri. Ajo që ndodh atje nuk është për ne një çështje e largët politike, por prek drejtpërdrejt familjet tona.

Evropa nuk mund ta mbrojë demokracinë vetëm përmes fjalimeve solemne. Vlerat evropiane nuk duhet të ndalen në kufijtë e Bashkimit Evropian. Shqipëria ka nevojë për një Evropë që sheh, dëgjon dhe kërkon përgjegjësi. Jo dikur, por tani.

Me konsideratë të lartë,

Mjekët dhe profesionistët shëndetësorë shqiptarë në Gjermani

Panorama

Protestat e studentëve dhe të rinjve në Shqipëri kanë marrë mbështetjen edhe të studentëve shqiptarë në Universitetin prestigjioz të Harvardit, në Shtetet e Bashkuara të Amerikës.

Përmes një deklarate publike, Shoqata e Studentëve Shqiptarë në Harvard ka shprehur solidaritet të plotë me të rinjtë që protestojnë, duke dënuar përdorimin e forcës disproporcionale dhe ndalimet e paligjshme nga organet e rendit.

Studentët shqiptarë të Harvardit theksojnë se distanca nuk e zbeh përkushtimin e tyre ndaj demokracisë dhe të drejtave të njeriut, ndërsa i bëjnë thirrje autoriteteve shqiptare të ndalojnë menjëherë çdo akt frikësimi dhe represioni.

Në deklaratë kërkohet lirimi i personave të ndaluar në mënyrë të paligjshme dhe vendosja përpara përgjegjësisë ligjore e atyre që kanë tejkaluar kompetencat.

“Mbrojtja e qytetarëve dhe e fjalës së lirë duhet të jetë detyrë primare e shtetit, jo arsye për frikësim apo represion”, thuhet ndër të tjera në deklaratën e studentëve shqiptarë të Harvardit.

Deklaratë nga Shoqata e Studentëve Shqiptarë në Harvard

Si studentë shqiptarë në Harvard, po ndjekim me shqetësim të thellë zhvillimet e fundit në Shqipëri. Distanca nuk e zbeh përkushtimin tonë ndaj të drejtave të njeriut, lirisë së shprehjes dhe të ardhmes demokratike të vendit tonë. Qëndrojmë plotësisht në mbështetje të studentëve, të rinjve dhe të gjithë qytetarëve që ushtrojnë të drejtën e tyre kushtetuese për të protestuar në mënyrë paqësore. E drejta për t’u shprehur dhe për të kërkuar të drejtat pa frikë është shtylla kryesore e çdo shoqërie të lirë.

Ndajmë të njëjtin shqetësim për përdorimin e forcës disproporcionale, si dhe ndalimet e paligjshme të të rinjve e të miturve nga organet e rendit. Mbrojtja e qytetarëve dhe e fjalës së lirë duhet të jetë detyrë primare e shtetit, jo arsye për frikësim apo represion. Në të njëjtën kohë, bëjmë thirrje që protestat të ruajnë frymën e tyre paqësore dhe të qytetëruar, me qëllim që zëri i studentëve të mbetet i fuqishëm dhe dinjitoz.

I bëjmë thirrje autoriteteve përkatëse në Shqipëri të ndërpresin menjëherë çdo akt frikësimi, të lirojnë të ndaluarit në mënyrë të paligjshme dhe të mbajnë përgjegjësi ligjore personat që kanë tejkaluar kompetencat e tyre. Panorama

Veprimtari shqiptaro-amerikan Harry Bajraktari i është drejtuar me një letër ambasadorit të ri amerikan në Shqipëri, Eric Wendt, duke shprehur shqetësimin për dhunën policore ndaj studentëve dhe keqtrajtimin e gazetarëve gjatë protestave kundër qeverisë së Edi Ramës. Bajraktari kërkon që SHBA-të të mos qëndrojnë vëzhguese pasive përballë zhvillimeve në Shqipëri, por të angazhohen në mbrojtje të demokracisë dhe lirive qytetare. Ai paralajmëron gjithashtu se komuniteti shqiptaro-amerikan do të angazhohet me miqtë e tij në Washington për të mbrojtur të drejtat e qytetarëve shqiptarë.

Në reagimin e tij, Bajraktari u del në mbështetje studentëve dhe të rinjve që po protestojnë kundër qeverisë së kryeministrit Edi Rama, duke theksuar se ata nuk janë armiq të Shqipërisë, por e ardhmja e kombit shqiptar.

Ai i kujton kryeministrit se qeveria duhet t’u shërbejë qytetarëve dhe t’u japë llogari atyre, ndërsa dënon përdorimin e forcës ndaj protestuesve dhe gazetarëve që raportojnë nga terreni.

Përmes letrës drejtuar ambasadorit amerikan, Bajraktari kërkon angazhim konkret të Shteteve të Bashkuara në mbrojtje të lirive dhe të drejtave demokratike në Shqipëri. Ai njofton se komuniteti shqiptaro-amerikan do të vijojë përpjekjet e tij në Washington, duke shfrytëzuar lidhjet me miqtë dhe mbështetësit e Shqipërisë në kryeqytetin amerikan.

Më poshtë, reagimi i plotë i Harry Bajraktarit:

Studentët dhe rinia që po protestojnë kundër qeverisë së Kryeministrit Edi Rama nuk janë armiq të Shqipërisë. Ata janë e ardhmja e kombit shqiptar!

Një gjë duhet ta dijë Kryeministri Rama: Qeveria është për qytetarët dhe e qytetarëve.

Studentët që po kërkojnë arsim më të mirë, perspektivë, llogaridhënie dhe demokraci duhet të dëgjohen, jo të luftohen. Historia ka treguar se zëri i popullit nuk mund të shtypet me forcë, e as pushteti të mbahet me dhunë.

🇺🇸 Në një letër që i kam dërguar Ambasadorit të ri amerikan në Shqipëri, z. Eric Wendt, e shpreha shqetësimin tim të thellë për këtë situatë. Jam shumë i shqetësuar nga pamjet e tmerrshme të arrestimeve dhe përdorimit të tepruar të forcës policore ndaj studentëve, si dhe të keqtrajtimit të gazetarëve që po mbulojnë protestat.

Prandaj, Ambasadorit Wendt i kërkova që Amerika të mos mbetet vëzhguese pasive e këtyre ngjarjeve, por të angazhohet në mbrojtje të lirive dhe të drejtave demokratike në Shqipëri.

Për më shumë se 100 vjet, që nga Presidenti Woodrow Wilson e deri më sot, Amerika ka qëndruar pranë popullit shqiptar 🇺🇸🇦🇱 Edhe sot, shqiptarët i kanë sytë nga miku i tyre më i madh.

Shqipëria ka nevojë për demokraci të vërtetë. Për një qeveri që punon e i jep llogari popullit, jo që shtyp e godet protestat e studentëve.

Në ditët në vijim, ne si komunitet shqiptaro-amerikan do të angazhohemi me miqtë tanë në Washington, në mbrojtje të demokracisë, lirive dhe të drejtave të qytetarëve në Shqipëri.

Zoti e bekoftë popullin amerikan!
Zoti e bekoftë popullin shqiptar!

sn

Në pasditën e së dielës së 11 tetorit në Conegliano (Treviso-Itali), nën patronatin e Familjes Musaj u mbajt Akademi Përkujtimore për veprimtarin e madh të çështjes kombëtare, Arif Musaj.

Ndjenja të thella pikëllimi dhe krenarie kombëtare

Takmin e hapi moderatorja Etleva Petriti, e cila i përshendeti të gjithë të pranishmit për pjesëmarrjen, për ta ftuar më pas për një fjalë përshendetëse bashkëshorten e Arifit, zonjen Fatmira Hysenaj-Musa, e cila, edhe pse me zemër të thyer për mungesën e bashkëshortit dhe bashkëveprimtarit, e gjeti forcën e shpirtit për të kujtuar disa nga momentet më të veçanta që kishte për Arifin gjatë jetës dhe veprimtarisë së përbashkët atdhetare.

Më pas, moderatorja për një fjalë rasti në emër të familjes Musaj, e ftoj mbesën e Arifit (vajzën e motrës) Arta Ramaj, e cila përmes emocionesh të mëdha na përloti të gjithëve për jetën plot mynzyra dhe vështirësi të Arifit, por asnjëherë të dorëzuar në përballje me sfidat e kohës.

Me fjalë rasti prezantuan edhe shokë dhe miq të Arifit, si: Mardena Kelmendi (poete dhe veprimtare nga Trieste), Artan Shyti nga shoqata “Albabel” (Belluno), Ndriçim Kërçuku kryetar i shoqatës “Krenaria Shqiptare” (Azzano Decimo), Eduard Jakaj nga shoqata “Zeri i Atdheut” (Montebelluna), z. Ervin Ramaliu (veprimtar i shquar dhe Këshilltar Komunal në Azzano Decimo), Hida Musaj (përfaqësuese e shoqatës së gruas “Kuq e Zi “ së bashku me bashkëshortin Agim Musaj), këngetarët Sevdat Bullatovci dhe Ali Kurti, z. Niko Veselaj, zonjat Madjana Nuredini, Valbona Nikollaj, Elona Zefi Prela (shoqata “Emigrantët pa Kufij” nga Padova), Muamer Murtezani (bashkëveprimtar i Arifit) dhe Florim Zeqa (gazetarë dhe publicist) i cili përmes emocioneve të mëdha i evokoj disa nga momentet e veprimtarisë së përbashkët me Arifin, ndërsa më pas i dhuroj librin e fundit “MËRGATA SHPIRTI I ATDHEUT” zonjes Fatmira Hysenaj-Musaj në shenjë kujtimi dhe respekti për bashkëveprimtarin e tij.

Vlenë për t’i theksuar disa nga momentet tejët emocionuese të kësaj akademie përkujtimore: videoinçizimi me përmbledhje fotografike të aktiviteteve të Arifit ndër vite dhe dekada në mërgatë si dhe pjesa e rritës, edukimit dhe punës në vendlindje (Bajram Curr-Shqipëri).

Emocionues ishte edhe video-inçizimi me vargjet e Arif Musajt kushtuar Nënës së tij, interpretuar nga Lumturie Plaku, mike e familjes Musaj.

Po ashtu, emocione të veçanta na dhuroj paraqitja në skenë e grupit të valleve “Arif Musaj”, përkatësisht e vajzave të grupit: Anesa Villaku nga Drenica dhe Eleonora Madani nga Tropoja, të cilat përmes lotësh evokuan kujtimet nga hapat e parë të vallezimit që kishin mësuar nga Arif Musaj.

Se vërtetë ka lënë gjurmë të pashlyrea veprimtari, poeti dhe koreografi Arif Musaj, u dëshmua gjatë paraqitjes së oratorëve, të cilët e patën të pamundur që t’iu ikin emocioneve gjatë fjalimeve plot ndjenja, respekt dhe dashuri për të madhin Arif Musaj.

Në këtë Akademi Përkujtimore ishin prezent një numër i madh i bashkatdhetarëve, të ardhur nga e gjithë pjesa veriore e Italisë dhe Austria!

Në veçanti vlen për të cekur prezencën e të gjithë prindërëve të fëmijëve të Grupit Artistik “Arif Musaj”. Kur jemi në këtë segment, vlen për të permendur kontributin e çmuar të nënave të fëmijëve në organizim.

Nga pjesëmarrësit vlen për të permendur: Veli Sinani, Valon Halabaku, Rajmonda Deda, Arjana Danaj, Adrian Resuli, Gerta Ramaliu (bashkëshortja e Ervinit), Mumin Brezaliu, Feriz Hysenaj (vëllau i Fatmira Hysenaj-Musa), Rita Dunga, Teuta Halimi-Halabaku, çifti nga Padova, Roland dhe Fiqirete Resuli e shumë të tjerë, vargu i të cilëve është i gjatë dhe i pambarim!

Kërkojë ndjesë, nëse dikush ka mbetur i papërfshirë në tekst! Por, gjithsesi blici i aparatit është më besnik sesa fjalët, i cili i përmbledhë të gjithë në një vend!

Pjesëmarrës në këtë Akademi Përkujtimore ishin dy familjet emblematike, Musaj dhe Hysenaj me nipa dhe mbesa, të cilat treguan mirënjohje dhe respekt për të gjithë që ishin prezent në këtë ngjarje, për të cilët kishin përgatitur edhe një koktej me pije freskuese dhe ushqime tradicionale shqiptare.

Në fund, ia vlen për ta përgëzuar z. Etleva Petri (aktiviste e shoqatës “Tingujt e Zemrës” në Treviso) për moderimin e shkëlqyer të kësaj Akademie përkujtimore.

Fjala e autorit:

Në 1 vjetorin e shkuarjes në amshim të mikut, Arif Musaj

E nderuara motermira Fatmira bashkë me çunat tuaj të mrekullueshëm Elvi dhe Enrico, familje e respektuar Musaj, miq dhe shokë të Arifit që jeni prezent në këtë ngjarje përkujtimore!

Ky është një moment kujtese dhe mallengjimi, por edhe një moment dhimbje dhe krenarie kombëtare!

Ikja nga kjo botë e njerëzve të mëdhenj edhe pse e lë një boshllëk të madh dhe të pakompensueshëm, nuk është fjala e tyre e fundit!

Nga ai moment fillon epoka e përjetësisë në mendjet dhe zemrat e më të dashurve të tij, duke filluar nga bashkëshortja Fatmira dhe çunat Elvio dhe Enrico, vëllëzerit Maxhuni, Tahiri dhe Hamdiu, motrat Rushja dhe Zoja, nipat dhe mbesat e deri tek farefisi i gjerë dhe miqtë e shumtë që ishin prezent në këtë tubim përkujtimor!

Arifi ishte fjalë e pak, i urtë dhe vlerëmadh në aktivitetet e mërgatës sonë! Ishte i dashur dhe i harreshëm, i cili çdo herë rrezatonte shpresë dhe unitet në mesin e mërgimtarëve.

Arifi ishte i veçantë nga të tjerët, reflektonte dashuri dhe respekt për njerëzit, në veçanti për bashkëpunëtorët e tij!

Arifi asnjëherë nuk ka lënduar njeri, ai ishte shumë i afërt i dhe komunikues me të gjithë pavarësisht situatave nganjëherë të pakëndshme që krijoheshin mes nesh, siq ishte rasti i disa shpirtëzinjve dhe qyqarëve që u munduan të pengojnë aktivitetin tim publicistik dhe atdhetar në shërmbim të kombit dhe bashkatdhetarëve!

Ishte miku im Arifi i pari, por jo i vetmi që i kundështoj shpirtëligët dhe qyqarët, që u rreshtua krahë meje me tërë qenjen e tij fizike dhe shpirtërore siq e mbron miku-mikun në momentet e vështira, duke qëndruar vertikalisht dhe i pathyeshëm në qëndrimet burrërore dhe atdhetare!

Ne shokët e Arifit, sadoqë mundohemi ta përjetësojmë veprimtarinë e tij, atë më së miri e bëri dhe po e bën me kurajo dhe vendosmëri bashkudhëtarja dhe bashkëveprimtarja e tij besnike, zonja Fatmira Hysenaj-Musaj, me aktivizimin dhe emërtimin e Grupit të Valleve nga “Bajram Curri në “Arif Musaj”!

Djemve të Arifit dua t’ua lë këtë porosi: “Zoti ua ka lënë Nanën, ta keni me jetë të gjatë, ta respektoni dhe ta duani pafundësisht, ngase, përderisa ta keni Nënën, edhe prezenca e Arifit do të mbetët përherë e gjallë në rrugëtimin e juaj jetësorë.

Ju djemtë e Arifit duhet të ndjeheni krenarë me veprimtarinë e prindërve tuaj atdhetarë!

Të ndjeheni krenar me babain tuaj, i cili në radhë të parë ishte njeri i mirë dhe i sinqertë, i dashur dhe i respektuar nga të gjithë bashkatdhetarët.

Arifi do të mbetët sinonim atdhedashurie dhe udhërrëfyes për brezat e rinj se si duhet punuar për atdhe dhe çështje kombëtare pa kërkuar asgjë në këmbim, duke prezantuar me dinjitet vlerat tona kulturore në organizimet e mërgatës shqiptare jo vetëm në lokalitetin tonë, por gjithandej shtetit italian dhe përtej në shtetet evro-perëndimore.

Pra, Arif Musaj do të mbetet një personalitet i veçantë dhe i papërsertshëm i mërgatës sonë!

Arifi ashtu siq ishte në tokë, u ngrit Shqiponjë në lartësitë qiellore për të ndriçuar madhështinë e një familje bujare dhe atdhetare siq është Familja Musaj!

Krenarë që e kisha Arifin bashkëpunëtorë dhe mik të sinqertë!

Arifi u prehtë i qetë në mirësinë e Parajses ashtu siq ishte shpirti i tij për Ju dhe për Ne bashkëveprimtarët në këtë botë!

Lavdi jetës dhe punës vlerëmadhe të Arif Musajt!

Të jetoni gjatë me kujtimet dhe krenarinë e përhershme për më të dashurin tuaj, Arif Musaj!

Florim Zeqa, 13.10.2026

Dardania jonë e dashur,

vend i shenjtë i lirisë,

e bukur dhe krenare,

xhevahir i historisë.

Jeta ecën dhe nuk ndalet,

mijëra vjet në këtë tokë,

me dëshmorë dhe heronj,

vaditur me gjak dhe lot.

Dardania fitoi lirinë,

i gjithë populli luftëtarë,

atdheu është më i shtrenjti,

liria, fjala e parë.

Pas betejave për liri,

erdhi puna për zhvillim,

punojnë edhe drejtojnë,

burra, gra me përkushtim.

Çojnë përpara amanetet,

edhe gratë presidente,

me zemra të zjarrta,

trimëresha në kuvende.

Justina e sapo zgjedhur,

presidente e Dardanisë,

simbol i bashkimit,

shqiponjë e lirisë.

Të udhëheq si dijetare,

me guxim e përkushtim,

Dardania të ecë përpara,

të ndrit atdheu im!

Unë një bijë mërgimtare,

e uroj nga Norvegjia:

Punë të mbarë presidente!

Rroftë përjetë, Dardania!

SHOQATA E SHKRIMTARËVE DHE ARTISTËVE SHQIPTARË
“PAPA KLEMENTI XI ALBANI” – SUEDI

Suedi / Förslöv, 8 tetor 2026

Për:              E nderuara znj. Justina Pula Shiroka
Presidente e Republikës së Kosovës

LËNDA: URIM ME RASTIN E ZGJEDHJES SUAJ NË DETYRËN E PRESIDENTES SË REPUBLIKËS SË KOSOVËS

E nderuara Presidente, znj. Justina Pula Shiroka,

Në emër të Shoqatës së Shkrimtarëve dhe Artistëve Shqiptarë “Papa Klementi XI Albani” – Suedi, si dhe në emrin tim personal, kam nderin dhe kënaqësinë t’ju përcjell urimet më të përzemërta me rastin e zgjedhjes suaj në detyrën e lartë të Presidentes së Republikës së Kosovës. Kjo detyrë e lartë shtetërore përbën një përgjegjësi të veçantë dhe një mision të rëndësishëm në shërbim të Republikës së Kosovës, të qytetarëve të saj dhe të perspektivës euroatlantike të vendit.

Jemi të bindur se, me përkushtim, urtësi, integritet dhe përgjegjësi institucionale, do ta ushtroni këtë detyrë në funksion të forcimit të shtetit të së drejtës, zhvillimit dhe përparimit të Republikës së Kosovës, si dhe të thellimit të marrëdhënieve me partnerët ndërkombëtarë dhe institucioneve euroatlantike, veçanërisht në rrugën drejt NATO-s, Bashkimit Evropian dhe mekanizmave të tjerë ndërkombëtarë.

Shoqata jonë, e cila prej vitesh vepron në shërbim të kulturës, letërsisë, artit, gjuhës dhe identitetit shqiptar në mërgatë, do të vazhdojë të jetë një zë i angazhimit kulturor dhe qytetar të mërgatës shqiptare në Suedi.

Në këtë frymë, ju sigurojmë se do të keni mbështetjen dhe bashkëpunimin tonë institucional në çdo nismë që synon promovimin e vlerave të Republikës së Kosovës, të kulturës shqiptare dhe të arritjeve të saj në arenën ndërkombëtare. Përmes veprimtarisë sonë botuese dhe kulturore, do të vazhdojmë të evidentojmë dhe të përcjellim me përgjegjësi historike e kulturore sukseset dhe të arriturat e Republikës së Kosovës gjatë mandatit tuaj.

Duke ju uruar shëndet, suksese dhe mbarësi në ushtrimin e kësaj detyre të lartë shtetërore, ju dëshirojmë një mandat të suksesshëm, në shërbim të paqes, demokracisë, zhvillimit dhe forcimit të Republikës së Kosovës.

Me respekt dhe konsideratë të veçantë,

Në emër të Kryesisë së Shoqatës së Shkrimtarëve dhe Artistëve Shqiptarë
“Papa Klementi XI Albani” – Suedi

Hysen Ibrahimi
Kryetar

KOSOVË- Mërgimtarët kanë dërguar në Kosovë 984.1 milionë euro vetëm gjatë tetë muajve të parë të vitit 2026, ndërsa investimet direkte në patundshmëri deri në fund të korrikut kanë arritur në 379.81 milionë euro, pjesa më e madhe e të cilave lidhet me diasporën.

Paratë që hyjnë nga jashtë vazhdojnë të përbëjnë një burim të rëndësishëm të të ardhurave për ekonominë e Kosovës. Gjatë vitit 2026, remitancat e dërguara nga diaspora kanë shënuar rritje, ndërsa një pjesë e konsiderueshme e kapitalit të ardhur nga jashtë është orientuar drejt blerjes së patundshmërive.

Të dhënat e Bankës Qendrore të Kosovës tregojnë se gjatë periudhës janar-gusht 2026, remitancat kanë arritur në 984.1 milionë euro. Në të njëjtën periudhë të vitit 2025, diaspora kishte dërguar 922 milionë euro, që paraqet një rritje vjetore prej 6.74 për qind, apo rreth 62.1 milionë euro më shumë.

Ndërkohë, të dhënat për investimet direkte tregojnë se deri në fund të korrikut 2026, investimet direkte në Kosovë kanë arritur në 587.26 milionë euro.

Nga kjo shumë, 379.81 milionë euro janë investuar në patundshmëri, kryesisht nga diaspora. Kjo do të thotë se rreth 64.7 për qind e investimeve direkte të regjistruara deri në fund të korrikut janë përqendruar në sektorin e patundshmërive.

Sipas BQK-së, nga totali prej 587.26 milionë eurosh të investimeve direkte, 442.89 milionë euro përbëjnë kapital të ri, 64.05 milionë euro fitim të riinvestuar, ndërsa 80.33 milionë euro janë kredi ndërmjet kompanive investuese.

Në strukturën e investimeve direkte, patundshmëritë kanë një diferencë të madhe në raport me sektorët e tjerë të ekonomisë.

Për gjashtëmujorin e parë të vitit 2026, vetëm 9.6 për qind e investimeve të huaja direkte janë përqendruar në sektorin prodhues, 2.8 për qind në tregti, ndërsa vetëm 2 për qind në energji.

Kështu, nga investimet direkte të regjistruara deri në fund të korrikut, pjesa më e madhe është orientuar në patundshmëri, ndërsa sektorët prodhues, tregtia dhe energjia kanë marrë pjesë dukshëm më të vogla të kapitalit.

Gati 1 miliard euro remitanca në tetë muaj

Pesha e diasporës në ekonominë e Kosovës shihet edhe përmes shumës së remitancave të dërguara gjatë këtij viti.

Sipas të dhënave preliminare të BQK-së, 984.1 milionë euro kanë hyrë në Kosovë përmes remitancave vetëm në tetë muajt e parë të vitit 2026.

Në periudhën e njëjtë të vitit paraprak, kjo shumë ishte 922 milionë euro. Rritja prej 6.74 për qind nënkupton se në Kosovë kanë hyrë rreth 62 milionë euro më shumë nga remitancat krahasuar me janar-gushtin e vitit 2025.

Këto mjete përbëjnë një nga burimet kryesore të të ardhurave që vijnë nga jashtë vendit dhe përdoren nga familjet për nevoja të ndryshme, përfshirë shpenzimet e përditshme, blerjen e banesave e pronave të tjera, kursimet dhe investimet.

BQK-ja ka bërë të ditur se remitancat në vitin 2025 përbënin rreth 13 për qind të Produktit të Brendshëm Bruto nominal të Kosovës, duke treguar peshën që kanë transfertat e diasporës në ekonominë vendore.

Megjithatë, BQK-ja nuk disponon të dhëna të detajuara që tregojnë saktësisht se sa nga remitancat përdoren për konsum, sa për kursime dhe sa për investime nga familjet.

Gjermania dhe Zvicra, burimet kryesore të parave

Pjesa më e madhe e remitancave që vijnë në Kosovë vazhdon të jetë e lidhur me diasporën në Gjermani dhe Zvicër.

Sipas BQK-së, Gjermania mbetet burimi kryesor i remitancave, me një pjesëmarrje që gjatë viteve ka lëvizur kryesisht ndërmjet 35 dhe 44 për qind të totalit të remitancave.

Pas Gjermanisë renditet Zvicra, e cila gjatë viteve ka përbërë rreth 16 deri në 24 për qind të remitancave të pranuara në Kosovë.

Përveç këtyre dy shteteve, kontribute të rëndësishme vijnë edhe nga Shtetet e Bashkuara të Amerikës, Austria, Belgjika, Franca, Italia, Suedia dhe Mbretëria e Bashkuar.

Sipas BQK-së, nuk janë vërejtur ndryshime të mëdha në renditjen e vendeve kryesore prej nga vijnë remitancat. Gjermania dhe Zvicra vazhdojnë të mbeten dy burimet kryesore të parave të dërguara në Kosovë.

Agjencitë për transferimin e mjeteve vazhdojnë të jenë kanali kryesor përmes të cilit diaspora dërgon para në Kosovë.

Gjatë periudhës janar-gusht 2026, 56 për qind e remitancave janë dërguar përmes agjencive për transferimin e mjeteve.

Kanalet bankare janë renditur të dytat, me 18 për qind të totalit të remitancave gjatë kësaj periudhe.

Pjesa tjetër e mjeteve është dërguar përmes kanaleve të tjera, ku përfshihen transfertat informale, remitancat në mallra dhe forma të tjera të dërgimit të mjeteve.

Të dhënat tregojnë se, përveç remitancave të regjistruara në sistemin financiar, një pjesë e mjeteve të diasporës arrin në Kosovë edhe përmes formave të tjera, të cilat BQK-ja i përfshin në kategorinë e kanaleve të tjera.

Patundshmëritë marrin pjesën më të madhe të investimeve direkte

Përderisa diaspora vazhdon të dërgojë shuma të mëdha parash në Kosovë, një pjesë e rëndësishme e kapitalit të ardhur nga jashtë është orientuar drejt patundshmërive.

Nga 587.26 milionë euro investime direkte të regjistruara deri në fund të korrikut 2026, 379.81 milionë euro janë investuar në patundshmëri.

Kjo shumë është rreth 64.7 për qind e të gjitha investimeve direkte të regjistruara gjatë kësaj periudhe.

Sipas BQK-së, këto investime janë kryesisht të lidhura me diasporën.

Në raport me sektorët e tjerë, diferenca është e theksuar. Sektori prodhues ka tërhequr 9.6 për qind të investimeve të huaja direkte gjatë gjashtëmujorit të parë, tregtia 2.8 për qind, ndërsa energjia vetëm 2 për qind.

Sipas standardeve ndërkombëtare të statistikave të Bilancit të Pagesave, BQK-ja i regjistron remitancat si transfere personale ndërmjet ekonomive familjare rezidente dhe jorezidente. Për nga natyra, këto mjete mund të përdoren për konsum, investime, kursime ose nevoja të tjera individuale, por BQK-ja nuk ka të dhëna statistikore të detajuara për destinimin përfundimtar të tyre në nivel të familjeve.

Ndërkohë, shifra prej 379.81 milionë eurosh të investuara në patundshmëri paraqet vlerën e regjistruar të investimeve direkte në këtë sektor deri në fund të korrikut 2026, ku sipas BQK-së pjesa kryesore e investimeve lidhet me diasporën./Monitor