Ish-presidenti i Republikës, Bamir Topi ka folur sot në “Këndin e Ekselencës” në News 24 për krizën në marrëdhëniet mes tij dhe ish-kryeministrit Sali Berisha.

Topi theksoi se me Berishën është prishur për arsye shtetërore dhe kjo nisi me ndryshimet kushtetuese të vitit 2008. Ai tha se Edi Rama në atë kohë pati idenë iluzive se mund të vinte në pushtet në 2009-ën, gjë që nuk ndodhi.

“Jam prishur për arsye shtetërore, që përmbledh edhe arsye institucionale. Në prill të 2008, Sali Berisha ishte kryeministër dhe Edi Rama në opozitë kur arritën një akord në dëm të shtetit, që ishin ndryshimet kushtetuese. Gjithë ajo klimë tensioni bëri që unë të krijoja distancimin. Opoizta pati fajin që iu bashkua idesë së kryeministrit për ndryshimet kushtetuese. Në mënyrë iluzive opozita mendoi se do vinte në pushtet në 2009, ndërsa kryeministri e përdori për të ulur kompetencat e presidentit. Unë kam ruajtur një gjuhë institucionale që askush nuk e priste”, tha Topi.

Sa i përket mundësisë për ribashkim me Partinë Demokratike, kreu i FRD-së tha se asgjë në botë nuk mund ta bashkojë me Sali Berishën, duke theksuar se në krye të demokratëve vazhdon të jetë ish-kryeministri dhe jo Lulzim Basha.

“Dëshiroj të rikonfirmoj një deklaratë, me personazhin në fjalë që ishte kryeministër asgjë nuk mund të më bashkojë në botë. Sepse ai doli nga shtrati i marrëdhënimeve normale dhe rrëshkiti totalisht në deklarata që për asnjë arsye nuk mund t’i bëjë”, u shpreh Topi.

Duke u kthyer pas në kohë, Bamir Topi foli edhe për zgjedhjen e tij president me vota të Partisë Socialiste, çka e konsideroi si një kontribut të Fatos Nanos në mënyrë që vendi të mos hynte në krizë.

“Ishte kontributi specifik i Nanos për marrjen e mandatit. Nano ishte kandidat i vetëshpallur për të konkurruar si president, ai arriti të marrë 20 firma dhe nuk gjeti mbështetjen e  subjektit të tij politik. Nano vendosi të mbështesë zgjedhjen e presidentit në mënyrë që vendi të mos shkonte në zgjedhje”, tha Topi.

Topi deklaroi se nuk ka ende asnjë vendim për koalicion me Partinë Socialiste në zgjedhjet e 18 qershorit, megjithatë nuk e konsideroi tabu një bashkim të tillë në të mirë të shtetit.