A negocioi Balla për dorëzimin e Agasit? Gazetari-Berishës: Biznesmeni vuri veton që Taulanti të mos ishte më ministër… nuk e shohin dot me sy njëri-tjetrin

Publikuar më 27.08.2026 nga Shek

TIRANË– Ish-kryeministri Sali Berisha komentoi sot arrestimin e biznesmenit Ergys Agasi, duke aluduar se ai ka qenë një ‘dorëzim i kontrolluar’ me urdhër të kryeministrit Edi Rama. Gjatë konferencës nga selia blu, duke iu referuar informacioneve të marra nga qytetarët dixhitalë, Berisha tha se të dielën në Elbasan, ka pasur një takim mes Taulant Ballës dhe Ergys Agasit, në një lokal që sipas tij kontrollohej nga ‘karteli’.

Vetë Balla ka zgjedhur që të mos i përgjigjet akuzave të ish-kryeministrit, që në këtë rast duket se nuk janë të bazuara në fakte reale. Gazetari Arsen Rusta, në një reagim në rrjetet sociale, shprehet se Berisha e di shumë mirë që Taulant Balla dhe Ergys Agasi nuk e shohin dot me sy njëri tjetrin, dhe nuk kanë pasur asnjëlloj marrëdhënie miqësore. Rusta shkon më tej në shkrimin e tij, kur thotë se Agasi ka vendosur veton që Balla të mos ishte më ministër i brendshëm, dhe ka qenë një nga politikanët që nuk e merrte dot në telefon.

SHKRIMI I PLOTË I GAZETARIT

E vërteta që doktori e di më mirë nga të gjithë, por vendos të mos e thotë. Në fakt është përfolur shumë dhe thënë thuajse zero me zë të lartë, ose e bardha mbi të zezë. Doktor, ti e di sa shumë të vlerësoj unë dhe jo vetëm sot, por prej vitesh e në mos dekada. Ndaj më lejo ta them edhe sot publikisht. Ja ke futur kot me versionin “Katunari ka Takuar Ergys Agasin”.

Katunari është Taulant Balla, të cilin po ashtu ti e di që unë s’e fsheh miqësinë (pra vetëm miqësinë) dhe zero interes apo raporte politike me të. E vlerësoj, meqë jemi nga i njëjti qark, ai nga Librazhdi e unë nga Belshi, pra Elbasani.

Zyra e Shtypit e PD-së ka shpërndarë këtë fjalë tuajën: “Berisha: Arrestimi i Agasit ishte arrestim i negociuar. Të dielën u takua me Taulant Ballën në një lokal të kartelit në Elbasan”. Doktor, Katunari IM apo Taulanti, rivali yt politik, ka qenë të dielën në atë mbledhjen me emrin “modern” retreat në Pogradec. Ndoshta dikush tjetër mund ta ketë takuar Agasin, por Katunari JO.

E di pse jo? Ti e di, por ta dijë e mileti. Nëse ka një person që vendosi veton që Balla të mos ishte më ministër i Brendshëm, ishte pikërisht Ergys Agasi. E vërtetë apo JO? Fakt është që pasi Agasi e deklaroi këtë kërkesë të tijën, s’kaloi as 10 ditë dhe Taulant Balla u hoq nga Ministër i Brendshëm.

Nëse ka një politikan me të cilin Agasi nuk arrinte të fliste dot, ishte pikërisht Balla dhe, në bindjen time, po aq jeni edhe JU. Pra, as me ju ai as fliste dot e as ju arrinte dot. Me katunarin, vijoni betejat politike e çdo përplasje, por mos e ngatërro me një gjë të cilën ti e di që e vërteta është ndryshe. Pra, jo që s’kanë qenë miq, por sot as shihen dot me sy mes njëri-tjetrit.

ÇFARË DEKLAROI BERISHA

Ergys Agasi u arrestua dje, pasi lëvizi 8 muaj lirshëm. Në Xhafzotaj tek shtëpia e vet, në Manzë dhe pika tjetër e trekëndëshit në Surrel. Se pse shkonte në Surrel, atë ta hetojnë, por udhëtimet e tij në Surrel janë denoncuar disa herë në këtë platformë. Pra, Agasi në aparencë ishte në kërkim, por de facto ishte i lirë. Lëvizte kudo, natyrisht me shoqërues lëvizte, duhet ta theksoj këtë.

Tani vijmë tek momenti i arrestimit afër shtëpisë së tij me pantallona të shkurtra, me nallane dhe një polic në timon. Çfarë ishte ky arrestim? Nallanet, pantallonat e shkurtra, polici në timon, të gjitha këto flasin për një arrestim të negociuar.

A ju kujtohet ju kur u dorëzua famozi Balili? U kujtohet apo jo? Nxirruani qytetarëve. Cilin pati shofer famëzi Balili? Ardi Veliun. Edhe ky Shpatarakun. Ai Veliun.

Nuk mund të them me siguri, por qytetarët dixhitalë më kanë informuar se sipas burimeve të tyre policore, e theksoj, ditën e diel në një lokal të kontrolluar nga karteli në Elbasan, Taulant Balla ka zhvilluar një takim jo të shkurtër me Gys Agasin.

Vetë qytetari digjital thotë që është mirë të hetohet, por burimi është mjaft serioz dhe i sigurtë. A mori përsipër Taulant Balla negociatat me të në emër të Ramës dhe me porosi të Ramës, nuk mund të them, por qytetari dixhital thotë se është takuar me të.

Agasi është pronar i makinave të blinduara, i makinave më luksoze. Shkoi dhe u gjet në një makinë krejtësisht koti, me shofer policin. Edhe kjo, pra. Janë disa elementë pra, që po t’i lidhësh bashkë, flasin për një arrestim të negociuar.

Ergys Agasi, një prej emrave më të lakuar vitin e fundit, në kërkim prej 8 muajsh për dosjen e AKSHI-t, ra ditën e mërkurë (26 Gusht) në prangat e Policisë, në një operacion që u zhvillua mes BKH-së dhe Forcave Operacionale. Agasi ishte shpallur në kërkim, ndërkohë që dyshohet se përgjatë gjithë kësaj kohe ka qenë brenda vendit, dhe lëvizte nën shoqërinë e ish-zyrtarit të policisë Uljan Shpataraku. Agasi akuzohet nga Prokuroria e Posaçme për 7 vepra penale, përfshirë korrupsionin, shkeljen e barazisë në tendera, dhe pjesëmarrjen në grup të strukturuar kriminal./SHEKULLI