Po u ngritën maqedonasit kundër shqiptarëve, atëherë shteti i vogël nuk ka shans të mbijetojë. Nëse grinden, siç ka ndodhur muajve të fundit, dy kampet politike të kombit maqedonas, atëherë konflikti, herët apo vonë, po ashtu do të shndërrohet në konflikt etnik. Atëherë shqiptarët do të ikin nga shteti pa perspektivë dhe në fundosje e sipër – dhe ata do të ikin duke e marrë me vete territorin ku banojnë, shkruan në komentin e saj gazeta zvicerane «Südostschweiz».

Prej vitesh në Europë jehon vajtimi se sa e tmerrshme është kur vendet hyjnë para kohe në BE – si për shembull Rumania dhe Bullgaria. Maqedonia tregon se çfarë ndodhë nëse një vend e lini të vuajë urie dhe me dorë të shtrirë. Pa perspektivë konkrete të anëtarësimit kombet e vogla në Europën Juglindore e humbin kompasin. Me çdo vit që largohet anëtarësimit proeuropianët humbin terren dhe liderët autoritarë dhe oligarkët kriminelë fitojnë përparësi. Në fund pasojnë kaosi dhe lufta civile. Maqedonia gjendet pak para tyre.

Ky zhvillim fatal i këtij vendi të vogël të Ballkanit na nisur para tamam shtatë vjetësh: në një samit të NATO-s në Bukuresht, kur Maqedonia duhej të bëhej anëtare, delegati grek befasisht ngriti dorën për veto. SHBA-të dhe fuqitë e mëdha perëndimore rrugën supet dhe e harruan këtë. Që nga atëherë e tutje kush thoshte «Europë» në Maqedoni dhe kërkesën e tij për modernizim dhe reforma e arsyetonte me shpresën për hyrje në BE, ai korrte vetëm ngërdheshje cinike. Ata nuk na duan, përgjigjej qeveria.

Ende është e paqartë nëse këto ditë në Maqedoni vërtet po ngre krye ekstremizmi shqiptar apo konflikti është inskenuar nga qeveria. Diçka e tillë mund të pritet prej saj: rrethi më i ngushtë i pushtetit viteve të fundit ka vepruar në mënyrë ekstreme manipuluese. Por, në thelb, për epilogun e konfliktit nuk luan rol nëse pas kësaj qëndron vërtet një «ushtri çlirimtare» apo këtu i ka gishtat e përzier policia sekrete. Qeveria nuk gëzon kurrfarë kredibiliteti dhe nuk do të mund ta luftonte efektivisht ekstremizmin edhe sikur të donte. Po u ngritën maqedonasit kundër shqiptarëve, atëherë shteti i vogël nuk ka shans të mbijetojë. Nëse grinden, siç ka ndodhur muajve të fundit, dy kampet politike të kombit maqedonas, atëherë konflikti, herët apo vonë, po ashtu do të shndërrohet në konflikt etnik. Atëherë shqiptarët do të ikin nga shteti pa perspektivë dhe në fundosje e sipër – dhe ata do të ikin duke e marrë me vete territorin ku banojnë.

VOAL – Njerëzit më të afërt të Kryeministrit të Maqedonisë, Nikolla Gruevski, dhanë dorëheqjen mbrëmjen e së martës. Tre prej tyre kanë qenë edhe personazhet më të akuzuar nga denoncimi i skandalit të përgjimeve që vijon të trondisë vendin prej shumë javësh.

Dorëheqjen e dhanë ministrja e Brendshme, Gordana Jankullovska, ai i Transporteve, Mile Janakievski dhe shefi i Shërbimeve Sekret të Maqedonisë, Sasho Mijallkov.

Dorëheqja e Jankullovskës vjen pas ngjarjes në Kumanovë ku mbetën 22 të vrarë, prej të cilëve tetë pjesëtarë të policisë. Ndërkohë, pas tyre dha dorëheqjen edhe Zoran Stavreski si ministër i Financave dhe zëvendëskryeministër.

Mediat thonë se pritet edhe dorëheqja e Prokurori Publik, Marko Zverlevsk. Ndërkohë Kryeministri Nikolla Gruevski, tashmë ka dorëzuar në Kuvend propozimin për zgjedhjen e anëtarëve të rinj të Qeverisë.

Kryetari i Parlamentit, Trajko Veljanovski ka caktuar për sot në ora 13:00 seancën për zgjedhjen e anëtarëve të rinj të kabinetit qeveritar.

Ndërkohë, mediat maqedonase njoftojnë se në orët në vijim pritet që të ketë të tjera dorëheqje nga anëtarë të Qeverisë, por edhe zyrtarë të lartë të shtetit. Nuk ka asnjë informacion nëse do të ketë dorëheqje të ndonjë prej ministrave shqiptarë të partisë së Ali Ahmetit.

Lideri i LSDM-së, Zoran Zaevi ka komentuar dorëheqjet e para të Qeverisë, ku tha se ky nuk është qëllimi i partisë së tij, por ky është vetëm një hap drejt fundit të Nikolla Gruevskit.

“Çdo gjë që kemi diskutuar është konfirmuar. Kjo është dëshmi e përgjimit dhe për vërtetësinë e bisedimeve. Dorëheqjet e ministrave nuk janë qëllimi ynë përfundimtar. Ky është vetëm një hap drejt fundit të Nikolla Gruevskit”, shkruan Zoran Zaevi, lideri i opozitës maqedonase.

Por nga këto zhvillime duket se një gjë është e sigurt, që vetë Kryeministri Nikolla Gruevski duket se nuk ka asnjë plan për të dhënë dorëheqje, pa të cilin opozita thotë se nuk ka zgjidhje të krizës politike që ka mbërthyer vendin prej kaq kohësh.

VOAL- SHKUP – Dorëhiqen Ministrja e Punëve të Brendshme, Gordana Jankullovska, Ministri i Transportit dhe Lidhjeve, Mile Janakievski si dhe drejtori i drejtorisë për zbulim dhe kundërzbulim, Sasho Mijallkov.

Kryeministri, Nikolla Griuevski për ministër te ri të punëve te brendshme ka propozuar, Mitko Çavkov, aktualisht drejtor i byrosë për siguri publike ndërsa për ministër të transportit, Vllado Misajllovskin.

Dorëheqjet vijnë pas përleshjeve te armatosura në Kumanovë, që lanë pas vetes 22 të vrarë por edhe krizës politike të nxitur nga afera e përgjimeve. rel

Autoritetet maqedonase nuk japin shumë hollësi në lidhje me identitetin e personave të vrarë, të cilët thonë se i përkasin grupit të armatosur, në përleshjet e së shtunës dhe të dielës në Kumanovë, ndërkohë që thonë se tre nga pesë udhëheqësit e grupit janë arrestuar.

Sipas organeve hetuese, sulmuesit synonin, mes tjerash, të minonin Urën e Gurit mbi lumin Vardar. Ndërkohë, qeveria e Maqedonisë ka bërë të ditur se do të dëmshpërblejë pronarët e shtëpive të dëmtuara. Ndërsa, diplomatët perëndimorë po përpiqen të ulin tensionet në Maqedoni.

Autoritetet maqedonase kanë bërë të ditur emrat e disa prej atyre që besohet të ishin pjesëmarrës në përleshjet e së shtunës dhe të dielës në Kumanovë me forcat qeveritare maqedonase.

Autoritetet flasin për një pjesë të drejtuesve të grupit që janë arrestuar dhe, supas tyre, ata janë Muhamet Krasniqi i njohur si komandant Malisheva, Sami Ukshini apo komandant Sokoli dhe Demë Shehu i njohur si komandant Juniku.

Ndërkohë, zyrtarisht nuk thuhet gjë për katërmbëdhjetë trupat e gjetur, sipas policisë, pas operacionit në Kumanovë, por mjete të informimit të afërta me pushtetin spekullojnë se në mesin e të vrarëve të jetë dhe ai, që shërbimet maqedonase të zbulimit e konsiderojnë si udhëheqës të grupit, Mirsad Ndrecaj. Zyrtarët maqedonas thonë se po bëhet identifikimi nga mjeksia ligjore i personave të vrarë.

Nga ana tjetër, në Shkup janë shtuar debatet nëse grupi i armatosur, të cilin zyrtarët e këtushëm e quajnë terrorist, ishte i manipuluar nga qarqe qeveritare të Shkupit për të krijuar një lloj destabiliteti që do të tërhiqte vëmendjen e opinionit publik nga kriza reale politike, apo të ishin mercenarë të paguar nga shërbime serbe dhe ruse, ose luftëtarë të kauzës kombëtare.

Faktori politik shqiptarë, si në Maqedoni dhe rajon, e ka dënuar dhunën dhe përpjekjet për destabilizimin e Maqedonisë që nuk përkon, sipas tyre, me interesin e shqiptarëve.

Ndërkohë, diplomatët me ndikim në Maqedoni janë angazhuar për të qetësuar gjendjen në këtë vend. Pas takimeve të djeshme me presidentin dhe kryeministrin , ambasadorët e SHBA, BE, Gjermanisë, Britanisë së Madhe, Francës dhe Italisë e pritën në zyrat e Bashkimit Evropian në Shkup, Ali Ahmetin, kryetar i Bashkimit Demokratik për Integrim.

Ambasadori italian duke folur në emër të të gjithë kolegëve, tha se BDI-ja mban përgjegjësi për avancimin e vlerave dhe parimeve demokratike. Ambasadori Ernesto Belelli tha se BDI-ja e ka për detyrë të ndihmojë institucionet e vendit dhe të sigurojë hetimin e plotë, transparent dhe të besueshëm mbi manipulimet e zbuluara nga përgjimet.

“Tani, më shumë se kurdoherë BDI duhet të marrë qëndrim dhe të shfrytëzojë ndikimin e saj për të mirën dhe ardhmërinë e të gjithë qytetarëve të Maqedonisë”, theksoi ambasadori italian në Shkup.

Kryetari i Bashkimit Demokratik për Integrim Ali Ahmeti iu shmang gazetarëve pas takimit. Drejtuesit e dy partive kryesore shqiptare nuk kanë shkuar për t’i parë banorët e dëmtuar në Kumanovë, ndërsa në Kumanovë dje shkoi Zoran Zaev i Lidhjes Social Demokrate maqedonase, i cili u mirëprit nga banorët shqiptarë të lagjes.

Ndërkohë, qeveria e Maqedonisë ka premtuar se do të dëmshpërblejë pronarët e shtëpive që u dëmtuan gjatë operacioneve në Kumanovë. Është formuar një komision qeveritar për vlerësimin e dëmeve dhe premtimet janë që dëmshpërblimi i pronave të paluajtshme dhe të luajtshme të bëhet njëqind për qind.

VOAL – BEOGRAD – Gazetat kryesore të Beogradit sot në faqet e para të tyre janë marrë me atë që ndodhi në Kumanovë, duke mëtuar se kanë informacione që lufta e vërtetë në Maqedoni do të fillojë më 12 maj (nesër) dhe se ajo po bëhet me mbështetjen e Shteteve të Bashkuara të Amerikës. Gazeta serbe ‘Kurir’, e cila njihet për afërsinë e saj me shërbimin sekret (BIA), në ballinën e saj shkruan se ‘Lufta e vërtetë fillon më 12 maj’. Ajo i referohet burimeve të saj dhe në deklaratat publike të saj dhe në në deklaratat publike të pjesëtarëve të armatosur që morën pjesë në përleshjen e Kumanovës e që veten po e quajnë UÇK se lufta e vëtetë e cila ka për qëllim krijimin e Shqipërisë së Madhe, fillon nesër.

Ndërsa gazeta tjetër ‘Informer’, gjithashtu e njohur për afërsinë me pushtetin në Serbi, shkruan se shqiptarët që u përleshën me policinë maqedonase në Kumanovëkëtë po e bëjnë me mbështetje të Shteteve të Bashkuara të Amerikës, dhe kjo me qëllim pengimin e projektit rus të gazsjellësit, i cili kalon përmes Turqisë, Greqisë, Maqedonisë dhe Serbisë, për të dalë më pas në Evropën Perëndimore, transmeton lajmi.net.
Kjo gazetë duke iu referuar burimeve diplomatike shkruan se zyrtarët e inteligjencës amerikane u kanë dhënë sinjal pjesëtarëve të UÇKsë për të filluar sulmet.

‘Ky sulm ishte mesazh që kishte për qëllim t’i dërgohej kryeministrit maqedonas Gruevski dhe homologut të tij serb Vuçiç. Mos harroni se në ditën e sulmit në Maqedoni, në Moskë ushtria serbe marshoi në paradë ushtarake së bashku me rusët,” citon kjo gazetë një prej ambasadorëve të Serbisë, të cilit nuk ia përmend emrin.

Derisa maqedonasit prodhojnë mbi 100 mijë letranjoftimi fantome (sipas bombave të fundit të kryetarit rë opozitës) dhe shfrytëzojnë mbi 200 mijë votues fiktivë në zgjedhje, përfaqësuesit tanë në Parlament rrahin ujë në havan. Në Parlament ka mbëri një ligj, me të cilin, të gjithë qytetarët që janë mbi tre muaj jashtë vendit, fshihen nga Lista e zgjedhësve, kurse të gjithë ata qytetarë që jetojnë jashtë vendit mbi një vjet, fshihen nuk quhem më shtetas të Maqedonisë. Pavarësisht pronave që kanë, për të cilat paguajnë taksa dhe tatime.

Këtë propozim ligj, gjoja e pengon partia shqiptare në pushtet. Tashti paraqitet e gjallë edhe partia «opozitare» e Menduh Thaçit. Që të dyja deklarojnë se, do ta bllokojnë këtë ligj në Parlament pasi duhet të praktikohet Parimi Badinterit, sipas të cilit ky lloj ligji duhet të votohet edhe nga më shumë se gjysma e deputetëve shqiptarë. Të gjithë deputetët shqiptarë ngrejnë pluhur pasi, ky ligj i ka kaluar të gjitha fazat e parapërgatitjes së ligjeve. Propozimligji ka kaluar në Qeveri dhe në Komisionin për Sistem Politik, i cili është organ i Parlamentit. Ku ishin këta «patriot» derisa Propozim ligji ishte në procedure? Përse që atëherë nuk e informuan opinionin shqiptar, i cili duhej që mospajtimin e vet ta shprehë edhe në rrugë? Të gjithë ligjet antishqiptare që miratohen në Parlamentin e vendit, populli shqiptar i kupton pasi ato të dalin në seancë plenare. Të gjitha partitë maqedonase, mospajtimin e vet me politikën e pushtetit e shprehin në rrugë, si një mjet shumë i fuqishëm i demokracisë parlamentare.

Maqedonasit, pothuajse çdo ditë janë në rrugë. Partitë shqiptare dhe populli shqiptar i tremben rrugës. I tremben njëlloj sikurse dreqi temjanit. Shqiptarët e ngratë mendojnë se një parti politike e keqe mundet të rrëzohet me krijimin e një partie tjetër. Këto parti politike nuk mundet të rrëzohen duke krijuar parti të reja politike. Këta dy parti (BDI-PDSH) mundet të rrëzohen vetëm pasi të jenë rrëzuar shërbimet sekrete të vendit.
Ligji i ri për kartat e identitetit nuk do të kalojë në parlament por, do të kalojë mashtrimi i rradhës i përfaqsuesve, «tanë» se ata po i bllokojnë ligjet antishqiptare. Ky është një pazar i ri dhe turpshëm i Ali Ahmetit, i njëjtë me pazarin e kishës në Kalanë e Shkupit. Ligjin për Branitelat… Ndërtimin e kishës në Kalanë e Shkupit e «pengoi» partia e Ahmetit, edhe pse çështja e ndërtimit të asaj kishe kishte kaluar të gjitha procedurat në kohën kur PDSH ishte në pushtet. Pengimi i ndërtimit të kishës në Kala, ishte një marëveshje BDI-VMRO. Ti bën sikur ndërton, kurse unë do të bëj sikur të pengoj. Ndërtimi i Kishës u «ndërpre». Të dyja partitë dolën të fituara, vetëm populli ngeli i humbur. VMRO fitoi përpara elektoratit të vetë me arsyetimin se po e ndërtonte kishën, mirëpo shqiptarët e këqinj po më pengojnë. «Fitoi» edhe Ahmeti duke i thënë elektoratit të vetë: «A jeni duke parë? Ne jemi të fuqishëm, ne i mbrojmë interesat e shqiptarëve.» Dhe si rasti i kishës në Kala, janë edhe mbi dhjetë raste të tjerë të mashtrimit të qytetarëve.

«Humbja» e tre deputetëve shqiptarë në diasporë, nuk ishte dështim i shqiptarëve që jetojnë në Europë, Amerikë dhe në Australi. Humbja e tre deputetëve ishte pjesë e pazarit të Aliu Ahmetit, për t’u futur në grazhdin e turpshëm të Qeverisë pa asnjë kusht.
Në të ashtuquajturat bomba të kryetarit të opozitës, Zaev, nuk ngacmohet aspak partia e Ahmetit. Nuk del në shesh asnjë e dhënë komprometuese për të, edhe pse mund të jenë qindra të tilla. Zaev do ta mbrojë Ali Ahmetin deri në pikën e fundit, pasi partner më të dëgjeshëm, më të shërbyeshëm dhe më servil nuk do të mund të gjejë. Kryetarit të opozitës mqaedonase i nevojitet një partner shqiptar që, përveç të qenit në Qeveri, nuk kërkon asgjë dhe, për këtë Ali Ahmeti është i përkryer.

Në këto momente, kur Gruevski ka rënë në qarkun e përgjimeve të mbi 25 mijë qytetarëve – e kanë zënë me presh në dorë edhe Ali Ahmetin duke përsëritur fjalët NATO dhe BE, që ma kujton atë somnabulistin, i cili sheh nga hëna dhe, nuk thotë asgjë tjetër vetëmse «Hëna..hëna..hëna…», apo një të pirë, i cili vetëm mërmërit dhe rrotullohet rreth një bendere.

Për fat të keq shqiptarët janë duke pritur shumë nga «bombat» e Zaevit. Do të dëshpërohen shumë, kur do të shohin se ato nuk janë kurgjë tjetër, përveçse, fushqeta (fishekzjarre). Të mos harrojmë se ish kryetari i partisë së Zaevit, Cërvenkovski, u dhuroi nga një revolver Colt, të gjithë atyre forcave peciale, të cilët i masakruam pesë qytetarë të pafajshëm gjatë protestave të Gostivarit dhe, gjatë arrestimit të Rufi Osmani në vitin 1998. Të mos harojmë, pasi, si duket, jemi harrues të mëdhenj dhe, ky është shkaku që ne po na përsëritet historia, herë si tragjedi e herë si farsë…

Vetëm rinia në rrugë mundet ta rrëzojë këtë klasë të mykur e të korruptuar politike – në Shqipëri, Kosovë e Maqedoni. Shqiptarët, gjithandej ku janë, duhet që këtë pranverë ta kenë pranverën e rilindjes. Politika e Berishës, Nanos, Ramës, Thaçëve e Alive, i dëboi rrugëve të botës mbi një million e gjysmë shqiptarë. Thaçi i Kosovës po i dëbon me shumicë, nga 50 mijë në javë. Aliu është duke e zgjidhur problemin me shqiptarët. Do ta zgjidhë në atë mënyrë që një ditë shqiptarët nuk do të jenë më problem. Në zgjedhjet e ardhshme lokale, shqiptarët do ta kenë problem të madh që prefekti i Strugës dhe i Kërçovës të jenë shqiptarë. Strategjia e mësimit të integruar është duke na e futur ujin nën rrogoz, njëlloj sikurse dikur në komunizëm.

Në të gjithë këtë katrahurë politike ka një gjë të mirë: Të gjithë e dimë se nuk jemi mirë. Kur një i sëmurë e din se e ka një problem, ai e gjen një çare. Populli ynë ka djem që i dalin zot atdheut, si gjithnjë kur e ka dashur historia.

*Autori është kryetar i Shoqatës së të Burgosurve Politikë në Maqedoni

Nga përplasjet me armë mes policisë dhe luftëtarëve guerilas në veri të Maqedonisë kanë vdekur rreth 40 persona. Rrezikon të ketë një tjetër konflikt mes sllavëve dhe shqiptarëve- si në vitin 2001. Një rol këtu luan edhe Rusia

Pas luftimeve në fundjavë mes forcave të sigurisë maqedonase dhe shqiptarëve të armatosur, qarqet e sigurisë në Kosovë presin një konflikt më të gjatë dhe më të madh në vendin fqinj- nëse liderët e rajonit nuk mblidhen menjëherë për të gjetur një zgjidhje politike, tha një burim i mirëinformuar në kryeqytetin kosovar, Prishtinë.

Luftimet në Kumanovë kanë sjellë rreth 40 viktima dhe dhjetëra të plagosur. Shumica e viktimave ishte nga njësiti “Tigri” i Ministrisë së Brendshme.

Sipas të dhënave nga njohës të mirë të situatës në Prishtinë, shqiptarët e kapur nga njësitë speciale maqedonase janë keqtrajtuar rëndë në qeli. Disa prej tyre dhe janë të plagosur rëndë. Edhe civilë janë arrestuar, mes tyre një familje me tre fëmijë.

Që në vitin 2001 ka pasur një konflikt të armatosur mes shqiptarëve dhe sllavëve të Maqedonisë, me 200 viktima dhe rreth 1 mijë të plagosur. Konflikti përfundoi me një marrëveshje paqeje në Ohër. Udhëheqja maqedonase premtoi më shumë të drejta kolektive për shqiptarët. Rreth një e treta e popullsisë në Maqedoni janë shqiptarë etnikë, të cilët jetojnë pranë kufirit me Kosovën dhe Shqipërinë.

Qeveria në Shkup bëri të ditur të dielën se një pjesë e luftëtarëve shqiptarë kanë ardhur nga një vend fqinj- duke nënkuptuar Kosovën.

Këtë pretendim e kanë rrëzuar autoritetet në Prishtinë.

Një burim nga qarqe të sigurisë në Prishtinë tha për gazetën Welt se mund të ketë edhe kosovarë të implikuar në luftime. Edhe në vitin 2001, një pjesë nga klani kosovar ishte pjesë e luftimeve.

“Ka një lidhje më të ngushtë mes nesh dhe shqiptarëve të Maqedonisë, shumë më e ngushtë se mes atyre dhe Shqipërisë vetë,” tha ky burim.

Edhe pretendimet e Shkupit se luftëtarët shqiptarë duan një konflikt të ri, ka gjasa të jetë i vërtetë.

“Duket kështu, sikur një pjesë e shqiptarëve, që sulmuan me armë në vitin 2001, duan ta bëjnë sërish këtë, për shkak se qeveria në Shkup nuk ka zbatuar Marrëveshjen e Ohrit”.

Konflikti mund të zgjerohet nëse nuk ndërhyjnë qeveritë e rajonit, por edhe SHBA dhe BE.

Qeveria e Maqedonisë është nën presion të brendshëm politik prej muajsh, pasi ka përgjuar mbi 20 mijë persona, mes tyre politikanë dhe gazetarë. Prej javësh në vend ka protesta masive.

Mundet që aktivistët shqiptarë e kanë zgjedhur këtë moment dobësie për të nisur një konflikt. Por është e mundur edhe që qeveria ka vendosur të shpërthejë këtë konflikt, duke devijuar vëmendjen nga problemet e saj të brendshme. Opozita ka deklaruar se do vazhdojë protestat deri në rrëzimin e Gruevskit.

E gjitha kjo ka shkaktuar edhe valë në politikën e jashtme. Qeveria ruse mbështet Gruevskin dhe ka dënuar betejën dhe protestat ndaj tij. Ministria e Jashtme foli qartë për një përpjekje të qarqeve perëndimore për të destabilizuar Maqedoninë.

Kosova dhe Shqipëria kanë marrëdhënie të ngushta me SHBA dhe po përpiqen për një integrim të shpejtë dhe të plotë në BE- ndërsa Serbia, ish- kundërshtare e luftës në Kosovë- ka po ashtu simpatinë e Moskës.

Nëse nuk ka një zgjidhje të shpejtë politike, qarqet e sigurisë në Prishtinë shohin se shteti maqedonas do jetë në rrezik të madh. Ai është vendi më i paqendrueshëm në Europë, pa një ushtri të vërtetë, me vetëm dy milionë banorë, por me një pakicë të madhe shqiptare. Bullgaria po ashtu pretendon se maqedonasit janë bullgarë në thelb. Edhe Ministria e Jashtme në Sofje ka bërë thirrje për një hetim të plotë të ngjarjeve.

Serbia i sheh maqedonasit si serbë dhe ka pozicionuar ushtrinë në kufirin me Maqedoninë. Greqia e konsideron emrin Maqedoni si grek. Pastaj janë shqiptarët që ëndërrojnë një ndryshim kufijsh- në fakt ëndërrojnë një Shqipëri të Madhe- atdheun e tyre me Maqedoninë verilindore dhe Kosovën si pjesë.

VOAL – Mediet ndërkombëtare janë përgjithësisht të një linje kur i referohen dhunës së përshkallëzuar në Maqedoni, duke bërë fajtore krizën politike që ka përfshirë vendin.

Ato i kanë kushtuar një vëmendje të veçantë situatës së krijuar atje, duke e cilësuar si një përleshje ndërmjet një grupi të armatosur dhe policisë e ndërsa disa media të tjera i kanë cilësuar si ‘aktivistë terroristë’, ashtu sikurse ministrja e Brendshme e Maqedonisë, Jankullovska.

Prestigjiozja “Washington Post” shkruan se aktet kriminale të Kumanovës, përveçse kanë alarmuar Maqedoninë, kanë rritur edhe shqetësimin për destabilitet në rajonin e Ballkanit.

Skenari i një krize të madhe në Maqedoni ishte parashikuar deri diku nga “New York Times”, e cila i ka dhënë tepër peshë edhe më herët aferës së përgjimeve.

Në një artikull tjetër të saj “New York Times” shkruan se Maqedonia ka bërë hapa prapa, duke iu referuar BE-së, e cila vitin e kaluar ka shprehur shqetësime serioze në lidhje me politizimin në rritje të institucioneve shtetërore dhe kontrollit të qeverisë mbi mediet. Prestigjiozja shkruan se Unioni duhet të ishte treguar më i ashpër me qeverinë e Shkupit, transmeton TCH. Sipas saj, duheshin qartësuar gjërat se Maqedonia nuk ka një demokraci funksionale dhe se autoritetet e bllokut 28 vendesh duhet të bashkëpunojnë më tepër me institucionet shtetërore, me qëllim që të sigurojnë një hetim të pavarur të akuzave mbi çështjen e përgjimeve. “New York Times” e mbyll duke thënë se kriza që ka kapluar vendin është një dështim i Europës që duartrokiti aq shumë nga Maqedonia më herët.

Ndërkohë që buja e dhunës në Maqedoni ka shkuar deri në Australinë e largët, ku një media vendase shkruan se shumë njerëz në Maqedoni, pavarësisht nga përkatësia etnike, janë të mërzitur me ritmin e ngadaltë të integrimit me Perëndimin, duke u përballur kështu edhe me një krizë të madhe ekonomike, si dhe të një papunësie që kap shifrën e 28 %. Po ashtu, liderët perëndimorë janë alarmuar gjithnjë e më shumë për atë që e cilësojnë si një rritje të autoritarizmit në Maqedoni.

VOAL – SOFJE – Kryeministri bullgar Boyko Borisov e këshillon kolegun e vet maqedonas Nikolla Gruevski që të japë dorëheqje, në mënyrë që të pushojnë protestat dhe përçarjet në vend, shkruan gazeta bullgare “24 Çasa”.

“Unë kam dhënë shembull se si e bën këtë një kryeministër nëse nuk e ka besimin për ndonjë arsye. Pastaj populli do ta kthejë besimin”, ka deklaruar Borisovi, transmeton kp, i cili në mandatin e vet të parë dha dorëheqje pas protestave për shkak të çmimeve të larta të gazit.

Ai ka shfaqur shpresën se situata në Maqedoni do të vihet nën kontroll dhe se shteti do të rregullohet.

“Maqedonia është një vend shumë i rëndësishëm për ne dhe shërbimet në çdo moment më informojnë se si po zhvillohet situata”, ka thënë mbrëmë Borisovi, duke vlerësuar se viktimat që ranë në Kumanovë janë pasojë e përçarjeve dhe problemeve në Maqedoni.

VOAL – KUMANOVË – Banorët e Kumanovës apelojnë që partia shqiptare në pushtet më në fund të flas dhe të thyejë heshtjen.

Kjo thirrje bëhet nga Këshilli emergjent për ndihma që është formuar për t`i dalë në ndihmë banorëve të Lagjes së Trimave ku ndodhën përleshjet dhe terrori i paparë për banorët.

“Përveç një komunikate të lëshuar në mëngjesin e parë të së shtunës, kur kishin filluar krismat në Lagjen e Trimave, partia shqiptare në pushtet është mbyllur në heshtje. Pse heshtin, pse nuk dalin të flasin dhe të sqarojnë çfarë është puna, çfarë ka ndodhur. Ata janë njerëzit që i njohin që ishin këtu si pjesëtar të grupit të armatosur. Është e pafalshme kjo që po ndodhë dhe turp për politikën shqiptare. Ata duhet të japin sqarime dhe llogari, përfshirë edhe do parti tjera”, theksoi për INA, një aktivistë i këtij Këshilli për emergjencë për të ndihmuar banorët e Lagjes së Trimave.

Në lagjen ku ndodhën luftimet është një fotografi rrënqethëse. Banorët nuk shpresojnë shumë se do të ndodhë diçka e mirë për ta pas gjithë këtij terrori dhe dëmeve shpirtërore dhe materiale që kanë përjetuar. Ata apelojnë që bashkësia ndërkombëtare të përfshihet në hetimin e plotë të gjithë asaj që ndodhi dhe të ndihmojë në revitalizimin e kësaj lagje.

Asan.S nga Kumanova thekson se faktori ndërkombëtarë është e vetmja garancë që mund të bëj hetim transparent dhe të na tregojë se çka në të vërtetë ka ndodhur, por edhe të sigurohen mbështetje dhe ndihma për gjithë popullatën që ka përjetuar dëme të mëdha.

Dy përfaqësuesit shqiptarë të partive kryesore politike BDI dhe PDSH ishin në Këshillin e Sigurisë Kombëtare tek presidenti Gjorgje Ivanov, por ata nuk janë deklaruar as para dhe pas takimit, për të dhënë vlerësimet për situatën e krijuar.

VOAL – LAGJIA E TRIMAVE, KUMANOVË – Pamje të tmerrshme në Lagjen e Trimave në Kumanovë, pas përleshjeve dyditëshe, sjell sot ina.

Rrugët e lagjes me shtëpi të rrënuara, dëme të mëdha, por edhe banorë me lot në sy, që nuk mund të shohin shtëpitë e tyre.

Një pjesë e tyre akoma nuk kanë mbërritur, për shkak ishin strehuar në vende më të largëta. Pamjet janë rrëqethëse me një kaos të tmerrshëm, shtëpi të rrënuara, rrugë me përplot gëzhoja plumbash, kabllo të energjisë të shpërndara rrugëve, makina të djegura, kafshë të ngordhura dhe pamje tjera rrëqethëse.

VOAL – TIRANË – Dhjetëra të rinj të Tiranës dhe shoqëria civile u solidarizuan mbrëmë me shqiptarët e Kumanovës, në një protestë paqësore.

Ata u mblodhën në orën 18:30 para Piramidës me parulla në duar ku shkruanin, “Kumanovë nuk je vetëm” dhe flamuj kombëtarë. Protestuan paqësisht për disa minuta me radhë fillimisht para Piramidës dhe më pas u zhvendosën përballë Ambasadës maqedonase në vendin tonë.

Thirrjet në kor ishin një: “O çohuni burra, o çohuni gra, për Kumanovën duhet me ra!”.

Autoritetet maqedonase e kanë quajtur operacionin e së shtunës dhe të dielës në Kumanovë kundër një grupi të armatosur, si më të vështirin ndonjëherë për forcat e sigurisë së vendit. Kryeministri maqedonas Nikolla Gruevski tha se aksioni nuk u zhvillua kundër popullatës shqiptare, ndërsa shprehu mirënjohje për pjesëtarët e të gjitha komuniteteve etnike në radhët e policisë. Policia speciale u tërhoq mbrëmë nga Kumanova, ku mbetën të vrarë 14 pjesëtarë të grupit të armatosur dhe tetë policë.

Autoritetet maqedonase thanë të dielën se është neutralizuar, sipas tyre, plotësisht grupi terrorist më i rrezikshëm në Ballkan, ndërkohë që radhitën emrat e pesë shtetasve të Kosovës si drejtues të grupit.

Sipas organeve të rendit ata jane: Sami Ukshini i njohur si komandant Sokoli, Beg Rizaj, Demë Shehu, Muhamet Krasniqi si komandant Malisheva dhe Mirsad Ndrecaj. Zëdhënësi i policisë, Ivo Kotevski u tha gazetarëve se katërmbëdhjetë trupa janë gjetur gjatë operacionit, në mesin e të cilëve ai i Xhafer Zymberit nga Gjakova.

Organet shtetërore thonë se tridhjetë terroristë u janë dorëzuar forcave policore, të gjithë shtetas të Maqedonisë dhe një shtetas i Shqipërisë.

Kryeministri maqedonas, Nikolla Gruevski e quajti një aksion heroik atë të policisë speciale maqedonase kundër atyre që mendohet të ishin një grup i armatosur në Kumanovë, të cilëve autoritetet maqedonase u referohen me termin “terroristë”.

Zoti Gruevski duke folur në një konferencë për mjetet e informimit tha të dielën se operacioni ishte një ndër më të vështirët për forcat policore të vendit. Gjatë aksionit kanë marrë pjesë të gjitha bashkësitë etnike, tha ai. Për jetët e humbura të tetë policëve, njëri prej të cilëve i përkatësisë etnike shqiptare, kryeministri maqedonas tha se ata ndoshta penguan vdekjen e tetë mijë njerëzve!

Për personat e arrestuar si pjesëtarë të grupit të armatosur, zoti Gruevski tha se do të gjykohen në bazë të ligjeve të Maqedonisë. Sipas kryemnistrit, disa nga personat që ishin të përfshirë në përleshjet me policinë, kishin marrë pjesë edhe në incidentin e fshatit Goshincë, para pak javësh. Autoritetet maqedonase vlerësojnë se synimi i këtij grupi ishte destabilizimi i Maqedonisë dhe sulmet kundër institucioneve të saj.

Ndërkohë presidenti i vendit, Gjorgje Ivanov, mblodhi Këshillin e Sigurisë, ku bëjnë pjesë drejtuesit më të lartë shtetërorë dhe ministra të resorëve të sigurisë,  si dhe anëtarë të zgjedhur nga presidenti. Gjithashtu të ftuar ishin drejtuesit e partive kryesore. Ali Ahmeti i BDI-së dhe Menduh Thaçi i PDSH-së dërguan përfaqësues të tyre, ndërsa Zoran Zaev i Lidhjes Social Demokrate të opozitës mori vetë pjesë në takim.

Policia me autoblindat dhe armatimin e saj u tërhoq pak para mbrëmjes së djeshme nga Lagja e Trimave në Kumanovë. Rezultati i përleshjeve është 22 të vrarë, sipas të dhënave zyrtare, mes tyre tetë policë dhe 14 pjesëtarë të grupit kundërshtarë.

Ndërkohë, në lidhje me zhvillimet në Kumanovë, është mbledhur në një takim Këshilli i përbashkët i misioneve të jashtme diplomatike, që përfshin ambasadorët e BE-së, SHBA-së, OSBE-në dhe përfaqësues të NATO-së, për të vlerësuar gjendjen e krijuar.

Këshilli shprehu keqardhje për jetët e humbura gjatë operacionit në Kumanovë, ndërsa e dënoi fuqishëm dhunën.

Në emër të këtij Këshilli foli ambasadorja Marijan Berezc, e OSBE-së në Shkup, duke theksuar besimin se ky është çasti kur drejtuesit politikë duhet të përfshihen në dialog për të gjitha çështjet me të cilat ballafaqohet vendi, përfshi edhe krizën e stërzgjatur politike dhe reformat e nevojshme. “Besojmë fort se nuk guxohet që të lejohet prishja e marrëdhënieve në shoqëri”, tha ambasadorja.

Zhvillimet në Kumanovë, kanë nxitur, nga ana tjetër, dyshime te një pjesë e opinionistëve, për shkak të kohës që ndodhi e që përputhet me krizën politike dhe me skandalin e madh të përgjimeve.

Opozita maqedonase sidomos, por dhe mjaft analistë shqiptarë janë të prirur të besojnë se ngjarjet në Kumanovë janë sajuar për të tërhequr vëmendjen e opinionit publik nga kriza reale që ka përfshirë vendin dhe për të futur frikën tek popullata që të mos dalë në protestat, të cilat synojnë rrëzimin e pushtetit.

VOAL – TIRANË – Qeveria e Shqipërisë i bëri sot në mbrëmje thirrje autoriteteve maqedonase që të bëjnë transparencë të plotë dhe një hetim të thellë bazuar në fate e prova të besueshme për ngjarjet e dy ditëve të fundit në Kumanovë, ndërsa theksoi se kriza politike në Maqedoni nuk duhet të konvertohet në një krizë ndëretnike.

Qeveria shqiptare deklaron se ka ndjekur me vëmendje të veçantë dhe shqetësim të madh zhvillimet tragjike të orëve të fundit në Kumanovë. “Duke shprehur keqardhjen më të thellë për humbjen e jetëve njerëzore, Qeveria e Shqipërisë mbron bindjen se në asnjë rrethanë nuk mund të lejohet që kriza në Maqedoni të përshkallëzohet. Zhvillimet dramatike të ditëve të fundit në Kumanovë kanë cenuar normalitetin dhe marrëdhëniet ndëretnike, të cilat mbeten ende të brishta për shkak të moszbatimit të plotë të Marrëveshjes së Ohrit, por pa dyshim janë jetike për ekzistencën e shtetit maqedonas. Në këto kushte është më shumë rëndësi mbrojtja e jetës, pronës dhe lirive e të drejtave të çdo qytetari të Maqedonisë, pavarësisht, përkatësisë së tij etnike. Më shumë së asnjëherë, kjo vlen aktualisht për Kumanovën e banuar kryesisht nga shqiptare”.

Tirana shpreh shqetësim për mungesën e informacioneve të plota mbi ngjarjen. “Reja e paqartësisë mbi të gjitha orët e rënda të Kumanovës, të cilat u përjetuan me ankth nga shqiptaret kudo ku jetojnë, duhet t’ia lerë vendin sa më parë, transparencës së plotë për këtë ngjarje”, thekson deklarata ndërsa vë në dukje se “përveçse policëve të vrarë dhe të plagosur, ende nuk është thënë asgjë për jetët e qytetarëve të pa mbrojtur të Kumanovës, për arratinë e tyre, për pronën e tyre të bastisur, djegur dhe shkatërruar. Padyshim kjo paqartësi shqetësuese nuk ndihmon në kthimin e plotë të normalitetit. Por po ashtu kjo e bën edhe më imediate nevojën për kthjelltësi, qartësi dhe durim për t’i shkuar të vërtetës deri në fund”.

Qeveria shqiptare nënvizon se autoritetet ligjzbatuese në Maqedoni duhet “të mundësojnë dhe kryejnë një hetim të thellë, të shpejtë, të plotë e transparent, në funksion të së vërtetës dhe vet stabilitetit të Maqedonisë e rajonit. Vetëm transparenca e thellë dhe e plotë, nëpërmjet paraqitjes së fakteve e provave të besueshme për qytetarët, do të shërbente në rikthimin e besimit në institucione dhe do të shmangte përsëritjen e këtij precedenti aq të padëshirueshëm nga popullata civile të një ngjarjeje të tillë”.

Qeveria shqiptare deklaron se “dënon çdo akt dhune, duke e konsideruar atë të papranueshëm për një shoqëri demokratike që aspiron integrimin euro-atlantik”, duke shtuar gjithashtu se “do ta konsideronte jo vetëm kundër produktive po edhe të papranueshme për ambicien europiane të rajonit, çdo paragjykim mbi baza etnike të çdo personi apo grupi personash të armatosur”.

Tirana “thekson me forcë po ashtu se do të ishte e papranueshme humbja e drejtpeshimit në raport me këtë ngjarje dhe kurrsesi nuk duhet lejuar që kriza politike e Maqedonisë të konvertohet në një krize ndëretnike, e cila do të ishte shkatërrimtare për Maqedoninë”, ndërsa “bën thirrje për qetësi, vetëpërmbajtje dhe një zgjidhje të duhur të krizës në shërbim të qytetarëve dhe aq të domosdoshme në funksion të stabilitetit”, përfundon deklarata e Qeverisë së Shqipërisë. za

VOAL – KUMANOVË – Më shumë se 50 shqiptarë që kanë banuar në lagjen e Trimave në Kumanovë gjenden në stacionet policore në bisedë informative bëjnë të ditur informacione jozyrtare nga terreni. Në mesin e tyre gra, pleq dhe fëmijë.

Informacionet jozyrtare flasin se këta persona janë marrë nga policia në bisedë informative për kinse a kanë dijeni me grupin e armatosur që dje u përleshë me policinë maqedonase ku 5 pjestarë të njësiteve speciale humbën jetën, ndërsa më shumë se 20 policë u plagosën.

Familjarët e këtyre mbi 50 personave kërkojnë ndihmë nga institucionet përgjegjëse dhe OSBE-ja që të dinë më shumë për fatin e tyre, pasi në mesin e tyre ka fëmijë , grad dhe pleq./zhurnal.mk/

VOAL – SHKUP – Vala e fundit e incidenteve të dhunës në Maqedoni duke e përfshirë eshte këtë në Kumanovë, ku janë shkaktuar dëme të mëdha dhe pasoja katastrofale, ka shkaktuar reagime të shumta nga analistë maqedonas dhe ndërkombëtarë.

Ekspertë të mirënjohur maqedonas dhe ndërkombëtare dyshojnë se incidentet e dhunës në Maqedoni mund të jenë përpjekje e qeverisë maqedonase për të devijuar vëmendjen nga kriza e brendshme politike duke synuar që ta shndërrojnë atë në krizë ndëretnike e cila implikon tërë rajonin.

Gazetarja e mirënjohur maqedonase, Tanja Milevska, e cila aktualisht punon si korrespondente e “Huffington Post” në Bruksel, është shprehur se “në thelb, qëllimi është për të shpallur një lloj gjendjeje emergjente me synim ndalimin e protestave të planifikuara. Së këndejmi, terrorizmi del të jetë një justifikim ideal”.

Hulumtuesi dhe analisti i shquar britanik pranë universitetit prestigjioz “London School of Economics”, James Ker-Lindsay, thotë se “pas zbardhjes së skandaleve të qeverisë nga ana e opozitës, opinioni reagoi ashpër dhe tani vendi përnjëherë përballet me tensione të reja etnike”.

Maqedonasi Goran Peoski nënvizoi faktin që disa njerëz në Maqedoni druajnë se qeveria ka inskenuar akte “terroriste” dhe tani po i përgatitë anëtarët dhe përkrahësit e saj që t’i djegin pronat e shqiptarëve që situata të eskalojë.kp

VOAL – SHKUP – Ministria e Punëve të Brendshme e Maqedonisë tha se pesë policë janë vrarë dhe 30 të tjerë janë plagosur gjatë përleshjeve të së shtunës në Kumanovë. Ministrja e Punëve të Brendshme Gordana Jankullovska tha se nuk ka informacione për pasoja në mesin e civilëve dhe nuk nuk ka njohuri të sakta për  numrin e viktimave nga radhët e grupit të armatosur me të cilin pothuajse gjatë tërë ditës kishte shkëmbim zjarri.

Qyteti i Kumanovës, në veri të Maqedonisë, rreth 40 kilometra larg Shkupit, u gdhi të shtunën nga të shtëna të fuqishme. Sipas autoriteteve, një grup prej dhjetëra personash të armatosur mirë, kanë ndërmarrë sulme me pushkë automatike dhe me bomba, që përbën, sipas tyre, një akt terrorist. Krismat kanë vazhduar deri në orët e mbrëmjes.

Forca të shumta policore kanë ndërmarrë aksion kundër këtij grupi që nuk eshtë parë nga burime të pavarura.

Nga ana tjetër, banorë të qytetit flasin për pasoja në njerëz, por nuk ka asnjë konfirmim zyrtar mbi numrin e viktimave eventuale, apo dhe të të plagosurve.

Ministria e Punëve të Brendshme tha se grupi i armatosur, i veshur me uniforma të zeza, synonte të kryente sulme kundër institucioneve shtetërore. Zëdhënësi i ministrisë Ivo Kotevski tha se bëhet fjalë për një grup të stërvitur mirë që kreu sulme me armë automatike dhe me bomba.

Polica ka bllokuar rrugët e qytetit për orë të tëra. Ka shtëpi që u dogjën nga artileria, ndërsa disa familje me fëmijë të vegjël janë parë duke u larguar nga zona me valixhe.

Lagja e njohur si Divnaselë ose së fundmi si Lagja e Trimave është e banuar kryesisht nga shqiptarë.

Ekipe të gazetarëve janë penguar nga policia që të afrohen tek vendi i ngjarjes. Madje, një televizion që transmeton në gjuhën shqipe, ka njoftuar se ekipi i tij është kërcënuar nga pjesëtarët e policisë dhe se i është marrë video-materiali i regjistruar.

Lidhur me zhvillimet kanë reaguar partitë politike dhe komuniteti ndërkombëtar.

Bashkimi Demokratik për Integrim, përmes një komunikate u bën thirrje banorëve që të jenë të përmbajtur, të ruajnë gjakftohtësinë dhe që të mos bien pre e provokimeve.

BDI konsideron që zhvillimet e së shtunës në Kumanovë janë veprime që bien ndesh me përcaktimet strategjike të kombit shqiptar si në Maqedoni, Kosovë, Shqipëri dhe në Luginën e Preshevës.

Me thirrjen për qetësi ka dalë edhe Partia Demokratike Shqiptare, e cila kërkon nga Ministria e Rendit që të mos cenojnë jetët dhe pronat e qytetarëve.

Ndërkohë, Lidhja Social Demokrate e opozitës u bën thirrje banorëve që të mos bien nën ndikimin e skenarëve të errëta për nxitjen e konfliktit dhe destabilizimit të Maqedonisë. Kryetari i kësaj partie, Zoran Zaev u bëri thirrje kryeministrit Gruevski dhe Ali Ahmetit të BDI-së që t’u shpjegojnë qytetarëve të Maqedonisë se ç’farë po ndodh, se kush dhe pse po përpiqet ta destabilizojë vendin. Pse grupe kriminale nga vendet fqinje hyjnë në Maqedoni, kush i organizon dhe për çfarë qëllimi, shtroi pyetjen shefi i opozitës, duke thënë se viktima të këtyre zhvillimeve janë qytetarët maqedonas dhe shqiptarë, policë dhe banorë civilë. Ai bëri thirrje që banorëve t’u garantohet siguria.

Ndërkohë ka reaguar edhe Ambasada amerikane në Shkup e cila përmes një deklarate, shpreh keqardhje të thellë për humbjen e jetëve në aksionet në Kumanovë dhe përreth, dhe u shprehë ngushëllime familjeve të personave të vrarë dhe të plagosur. Ambasada njofton se po e ndjek nga afër situatën dhe se është në kontakt të vazhdueshëm me autoritetet dhe drejtuesit politikë, ndërkohë që u bën thirrje qytetarëve që të ruajnë qetësinë dhe të lejojnë mbledhjen e fakteve.

Edhe zyra e Bashkimit Evropian në Shkup njofton se është në komunikim të vazhdueshëm me autoritetet dhe me drejtuesit politik.

Bashkimi Evropian bëri thirrje për qetësi, ndërsa shpreson në shmangien e acarimit të tensioneve në këtë vend. Edhe OSBE-së ka lëshuar një reagim të ngjashëm.

Kjo gjendje e acaruar padyshim është rrjedhojë e krizës politike në Maqedoni, të shkaktuar nga skandali i madh i përgjimeve. Fshatrat shqiptare të Kumanovës ishin skenë e përleshjeve të armatosura në vitin 2001 midis kryengritësve shqiptarë, të cilët luftonin për të drejta më të mëdha dhe forcave qeveritare ushtarake-policore maqedonase, një konflikt që përfundoi me Marrëveshjen e Ohrit në gusht të atij viti. za

VOAL – KUMANOVË – Vazhdon aksioni policor në Kumanovë. Nga të dhëna jo zyrtare ALSAT mëson se numri i të plagosurve është në rritje, 13. Ministria e Punëve të Brendshme, deri në këto momente nuk ofron asnjë informacion zyrtar për ngjarjen në Kumanovë.

Në pyetjet e televizionit ALSAT për informacione mbi atë që po ndodh realisht në Kumanovë, numrin e të plagosurve apo viktimave të mundshme, zëdhënësi i policisë Ivo Kotevski, thjesht u përgjigj se “Aksioni është në vijim e sipër. Në momentin më të parë që do të përfundojë, ne do të dalim me deklaratë zyrtare.” Për momentin, ALSAT nuk mundi të arrinte për përgjigje as zëdhënësin e Sektorit për Punë të Brendshme të Kumanovës.

Ndërkaq, në spitalin shtetëror në Shkup, sapo ka mbërritur edhe ministri i shëndetësisë Todorv.

VOAL – Shkup, 8 maj – Grupa të armatosura vazhdojnë të sillen dhe grumbullohen sërish në fshatrat e rrethinës së Kumanovës. Siç mëson ekskluzivisht agjencia e lajmeve “Zhurnal”, grupe të armatosura ekzistojnë dhe po lëvizin në Malësinë e Karadakut të Kumanovës.

Jozyrtarisht këta persona po bëhen gati të kryejnë ndonjë sulm më serioz se sa incidenti që kishte ndodhur ditë më parë në Gushincë.

Policia e Maqedonisë nuk ka konfirmuar e as mohuar një gjë të tillë.

Por a ka nevojë për një konflikt të ri nga shqiptarët?

Të gjithë miqtë ndërkombëtarë të shqiptarëve, duke përfshirë SHBA, BE dhe vendet anëtare të NATO-s, janë kundër një dhune dhe nxitje të ndonjë konflikti nga shqiptarët në Maqedoni.

Porosia e të gjithë diplomatëve të huaj që vizituan Maqedoninë gjatë ditëve të krizës politike ishte se nuk ka nevojë për konflikt të aramatosur dhe se pushteti duhet të bie me mjete demokratike.

“Të gjitha palët duhet të sillen me përgjegjësi, të tentojnë të gjejnë mënyrë që ta zgjidhin krizën. Maqedonia të progresojë drejt anëtarësimit në BE dhe NATO. Fuqimisht besojmë se ka mundësi për integrim të mëtejshëm të Maqedonisë në institucionet evropiane dhe euroatlantike dhe ky duhet të jetë qëllimi primar edhe i opozitës dhe partisë qeveritare dhe Qeverisë”, theksoi zëvendës-ndihmës sekretari amerikan i shtetit Hojt Ji gjatë qëndrimit të tij në Shkup.

Në Maqedoni qëndruan edhe ambasadorë të pesë shteteve më me ndikim që qëndrojnë në qendrën e misionit të OSBE-së në Vjenë, të cilët gjithashtu theksuan se duhet të ruhet paqja dhe stabiliteti i këtij shteti.

Edhe politika zyrtare e Kosovës dhe ajo e Shqipërisë, si dy shtete të shqiptarëve thanë në mënyrë të prerë se një konflikt i ri nuk është në interes të shqiptarëve.

Shqipëria akuzoi dhe i kërkoi llogari Rusisë për veprimet e fundit pas rastit të Gushincës, ndërsa Kosova tha se në asnjë mënyrë nuk do të lejojë që çfarëdo grupe të prishin imazhin e Kosovës për të cilin shtet u dhanë me qindra mijë jetë të shqiptarëve.

Banorët e fshatrave të Karadakut të Kumanovës thanë se s’ka nevojë askush të vijë e të bëjë luftë në vatrat e tyre, pasi ende nuk i kanë shëruar plagët e luftës së 2001. Ata qartë thanë se çdo kush që tenton për çfarëdo interesi të dëmtojë banorët e kësaj ane nuk do të gjejë përkrahjen e banorëve.

Edhe ish komandantë të UÇK-së qartë thanë se nuk është koha të ketë luftë pasi ajo tani shkon vetëm në dobi të maqedonasve dhe interesave sllave.

VOAL – Shkup, 8 maj – Prezenca e madhe e forcave policore mbrëmë në rajonin e Kumanovës dhe dyshimet për gjoja prezencën e grupeve të armatosura në Malësinë e Karadakut bëhet me skenar të pregaditur që beteja të bëhet edhe një herë në terren shqiptar, vlersojnë analistët për Zhurnal.

Ndryshe, Maqedonia po përballet me një krizë të madhe politike e cila është intensifikuar muajin e fundit me publikimin e bombave të Zaevit që kanë të bëjnë me keqpërdorimet që i ka bërë kryeministri Nikolla Gruevski dhe shefi i policisë sekrete Sasho Mijallkov.

Për të shpëtuar nga kjo pozitë i gjithë pushteti i udhëhequr nga partia maqedonase VMRO-DPMNE po bën skenarë të ndryshëm me qëllim që të defokusojë vëmendjen dhe betejën ta bëjë në terrenin shqiptar.

Incidenti në Goshincë, një fshat malor i banuar me shqiptarë në Karadakun e Kumanovës dhe incidenti i djeshëm në Bashkësinë Fetare Islame (BFI) ishte vetëm një tentativë e strukturave të dyshimta të cilat kishin plan që ta destabilizojnë vendin mirëpo beteja të bëhet në terren shqiptar.

Alarmi i rrejshëm i MPB-së të udhëhequr nga ministrja Gordana Jankullovska se kinse policia e Maqedonisë ka vërejtur një grup prej 50 personash të cilët kanë hyrë nga Kosova në fshatrat e Komunës së Sarajit.

Mirëpo, menhëherë u demantua nga policia kosovare. Edhe ky rast ishte një përpjekje që beteja të bëhet në terren shqiptar. Analistët janë të mendimit se shqiptarët çdo herë kanë paguar çmimin më të lartë duke derdhur edhe gjak.

Sipas tyre, ende janë të freskëta në kujtime ngjarjet e Bit Pazarit, në Gostivar, aksionet e ndryshme policore, dhe në fund konflikti i armatosur në vitin 2001 i cili u bë kryekëput në rajonet shqiptare në Tetovë dhe Karadak të Kumanovës e jo në Strumicë e Gjevgjeli.

Sipas analistëve pushteti në mënyrë maestrale po bën kurthin në vendbanimete shqiptare me qëllim që shqiptarët para bashkësisë ndërkombëtare t’i akuzojë si fajtor kujdestar.

Analisti politik Alajdin Demiri për Zhurnal deklaroi se ka tendencë për destabilizimin e faktorit shqiptar në Maqedoni duke u nisur nga fakti se në Malinë dhe Goshincë filluan persekutimet apo ndjekjet e njerëzve, hedhja e bombës para selisë së BDI-së në Reçicë, agresiviteti i paparë i armatosur në selinë e BFI-së etj.

“Kjo do të thotë se duhet të projektohet dhe kërkohet një përgjigje që të ngritet dhe shqetësohet faktori shqiptar në Maqedoni. Krejt kjo bëhet në vigjilje të ndryshimeve që priten në pjesën maqedonase, protestat që do të organizojë LSDM-ja. Kjo do të thotë se llogaria e tyre është që edhe shqiptarët në një mënyrë të drejtpërdrejtë të inkuadrohen por në sikletin e vetë, përsëri të jenë objekt trajtimi, përsëri të jenë objekt destabilizimi dhe përsëri t’u jepet argument partive maqedonase dhe politikën që udhëheqin ndaj shqiptarëve”, deklaroi për Zhurnal, analisti politik Alajdin Demiri.

Ai potencoi se natyrisht se kësaj politike i ndihmojnë shumë partitë shqiptare duke u pozicionuar fort pas Gruevskit dhe kjo është arsyeja pse shqiptarët duhet të destabilizohen në këtë situatë.

Që nga dita e shpërthimit të bombave të Zaevit opinioni në Maqedoni asnjëherë nuk regjistroi ndonjë incident në Veles, Prilep, Ohër dhe vende të tjera. Por, të gjitha u realizuan në vendbanimet shqiptare.

Ditë më parë opozita maqedonase ka paralajmëruar se nga 5 -10 maj të gjitha bombat do të prekin shqiptarët e Maqedonisë. Ky paralajmërim sa është i dobishëm është edhe i rrezikshëm, pasi vetë fakti se komuniteti shqiptar në bazë të temperamentit të vrullshëm, gjaknxehtë mund të manipulohet lehtë andaj edhe opozita maqedonase dëshiron që shqiptarët ti bëjë për vete dhe ti orientojë aty ku ajo ka nevojë.

Rasti i dhimbshëm ‘Monstra’ dhe rastet të tjera duhet të shqyrtohen në mënyrë të hollësishme por jo në këtë kohë, në këto çaste kur edhe opozita maqedonase tenton që të manipulon me shqiptarët dhe gjithë problem do të hudhet në terren shqiptar.

Sipas kësaj Gruevski përsëri do të shpëtonte, pasi beteja dhe fokusi do të ishte te shqiptarët, të cilët dinë vetëm të hapin problem por assesi të trajtojnë dhe të mbyllin me sukses, ku historikisht përvoja tregon se shqiptarët çdo herë kanë qenë të manipuluar.

Mijëra protestues sot, për të tretën herë me radhë, janë mbledhur në Shkup, për të protestuar kundër regjimit diktatorial të kryeministrit, Nikolla Gruevski, siç janë shprehur ata.

Meqë, policia nuk ka lejuar që protestuesit t’i afrohen ndërtesës së qeverisë, ata janë nisurdrejt ndërtesës së prokurorisë, e pastaj janë ndalur para Kuvendit të Maqedonisë.

Protestuesit kanë kërkuar dorëheqjen e qeverisë së udhëhequr nga Nikolla Gruevski, dhe e kanë mbështetur kërkesën e sotme të liderit opozitar, Zoran Zaev, për hetime të reja për rastin e vdekjes së gazetarit, Nikolla Mlladenov.

Raportohet se protesta po kalon e qetë. rel

Opozita maqedonase publikoi të enjten, biseda të përgjuara telefonike, ku thotë se dëgjohet Ministrja e Rendit, Gordana Jankullovska duke folur me bashkëpunëtorë të saj dhe me zyrtarë qeveritarë mbi vdekjen e një gazetari të njohur, para dy vjetësh, një rast që vazhdon të shikohet me mosbesim nga një pjesë e opinionit publik, për shkak të rrethanave të pasqaruara të aksidentit ku humbi jetën Nikolla Mlladenov.

Personat në audio-regjistrime dëgjohen, mes tjerash, duke u tallur me rastin dhe me gazetarët e tjerë të cilët shfaqnin interesim për këtë.

Ajo që duket më misterioze në këtë rast është çështja e telefonit celular të gazetarit; autoritetet në fillim patën njoftuar se me anë të lokalizimit të telefonit ishte gjetur trupi i gazetarit Mlladenov, por asnjëherë nuk e përmendën më telefonin që të dihej me kë, eventualisht, kishte komunikuar ai.

Nikolla Mlladenov njihej për qëndrimet e tij kritike, jo vetëm ndaj pushtetit aktual, ndërsa shquhej edhe si veprimtar për liritë dhe të drejtat e njeriut.

Kryetari i Lidhjes Social Demokrate të opozitës, Zoran Zaev tha në një konferencë shtypi se dëshmitë tregojnë që procedura është zhvilluar qëllimisht, ose rastësisht, në mënyrë joprofesionale dhe të papërgjegjshme. Ai tha se me ndërrimin e pushtetit do të rihapet çështja “Mlladenov” në një proces të drejtë dhe transparent gjyqësor.

Nikolla Mlladenov kthehej me makinë nga qyteti i Velesit për në Shkup. Trupi i tij u gjet të nesërmen, pas aksidentit, vetëm pasi bashkëshortja e tij kishte njoftuar policinë. za

VOAL – SHKUP – Kriza politike në Maqedoni, ka kaluar në krizë të sigurisë me tendencë të përkeqësimit me pasoja të paparashikueshme për vendin, thonë njohësit e çëshjeve politike dhe të sigurisë, duke komentuar protestat e dhunshme para Qeverisë dhe Kuvendit të Maqedonisë.

Protestat u përshkallëzuan pas konferencës së fundit për media të liderit të opozitës, Zoran Zaev, i cili publikoi audio-incizime të reja nga ajo që njihet si aferë e përgjimeve, e që kishte të bëj me vrasjen e një të riu në një miting të partisë së kryeministrit, Nikolla Gruevski, por që ishte fshehur nga qeveria për shkak të përfshirjes në këtë krim të pjestarëve të sigurimit të kreut të qeverisë maqedonase.

“Në Maqedoni po ndodhë diçka shumë serioze në planin e sigurisë. Protestat e ditëve të fundit dhe ato që paralajmërohen në të ardhmen, janë dëshmi se vendin e pret një krizë serioze në planin e sigurisë nëse nuk ndërmerren masa urgjente për kapërcimin e mosmarrëveshjeve”.

“Se a do të ketë zgjidhje politike të krizës, është shumë vështirë të pritet duke marrë parasysh faktin se qëndrimet mes palëve janë aq të kundërta, sa që vështirë është të pritet ndonjë epilog. Pra, vendi ndodhet në krizë jo vetëm politike, por edhe institucionale dhe të sigurisë“, thotë Bllagoja Markovski, ekspert i çështjeve të sigurisë dhe epror i lartë i Armatës së Maqedonisë, në konfliktin e vitit 2001.

Naser Zyberi, njohës i çështjeve politike thotë se Maqedonia thashmë nga kriza politike ka hyrë në krizë të sigurisë.

Protestat, sipas tij, nuk do të ndalen nëse merren parasysh paralajmërimet e opozitës së në ditët në vijim do të publikojnë dëshmi edhe për rastet më sensitive, siç është rasti “Monstra“, ai i vdekjes misterioze të gazetarit, Nikolla Mlladenov, për çështjen e emrit, e të tjera, të cilat sipas Lidhjes Social-Demokrate, “nxjerrin në dritë fakte të tmerrshme për përfshrjen e zyrtatëve në veprime kriminale dhe inskenime të rasteve për qëllime politike“.

“Atmosfera skajshmërisht është e tensionuar, ajo tanimë ka eskaluar në protesta, të cilat shpesh herë janë edhe të dhunshme nga ana e policisë e cila me çdo kusht tenton ngulfatjen e tyre, apo të protesutesve që dëshirojnë të shprehin revoltën e tyre”.

“Intensiteti i protestave mendoj se do të vjen duke u rritur e jo duke u zvogëluar pasi opozita paraljmëron se do të publikojë përgjimet më sensitive, siç është rasti i gazetarit Mlladenov, rasti i Smillkovskit por ndoshta edhe ndonjë rast tjetër“, thotë Zyberi.

Bllagoja Markovski, ekspert i çështjeve të sigurisë, thotë se zgjidhja e krizës mund të shihet në dorëheqjen e qeverisë dhe formimin e një qeverie kalimatare, e cila do të përgadiste terrenin për zgjedhje të lira dhe demokratike.

“Zgjidhjen e vetme të krizës e shoh në gjetjen e mundësinë për dorëheqjen e qeverisë aktuale dhe formimin e një qeverie teknike e cila do të organonte zgjedhje të lira dhe demokratike, alternativë tjetër nuk ka“, thotë Markovski.

Edhe Naser Zyberi mendon njejtë, por ai thotë se kjo nuk do të mund të arrihet pa një presion shumë të fuqishëm nga bashkësia ndërkombëtare.

“Kjo garniturë politike nuk do të dorëzohet vetvetiu, pra nuk do të bindet me faktin se duhet të jep llogari për gjithë këto ngjarje. Në një situatë të tillë mendoj se faktori ndërkombëtar do të bëj presione të fuqishme që të ndërpriten të gjitha manifestimet e pakënaqësisë dhe të arrihet një marrëveshje politike për formimin e një qeverie kalimtare, apo të tranzicionit“,thotë Zyberi.

Dorëheqjen e qeverisë e kërkon edhe opozita dhe protestuesit, por nga qeveria kanë hedhur poshtë kërkesat e tilla duke drejtuar akuzat ndaj opozitës për skenar për destabilizimin e vendit dhe se përgjimet janë të montuar me ndihmën e shërbimeve të huaja sekrete.

Ndryshe, në protestat e dy ditëve të fundit para Qeverisë dhe Kuvendit janë plagosur dhjetëra qytetar dhe pjesëtarë të forcave të sigurisë. rel

Policia maqedonase përdori gazin lotsjellës dhe “topat e ujit” për të shpërndarë rreth dy mijë protestues në Shkup që po kërkonin dorëheqjen e kryeministrit Nikola Gruevski.

Ministria e Brendshme tha se të paktën dhjetë pjesëtarë të policisë janë lënduar gjatë përplasjeve me protestuesit që ndezën zjarre dhe hodhën gurë dhe vezë mbi ndërtesën e qeverisë në Shkup. Tash për tash nuk ka të dhëna për numrin e protestuesve të lënduar dhe të arrestuar.

Protestat shpërthyen të martën në mbrëmje para selisë së qeverisë, pas publikimit nga opozita të bisedave të përgjuara të zyrtarëve qeveritarë lidhur me vrasjen e një të riu maqedonas, para katër vjetësh.

Të martën opozita e drejtuar nga Zoran Zaev publikoi biseda të përgjuara të Ministres së Brendshme Gordana Jankullovska me drejtorin e Shërbimit Sekret, me shefin e kabinetit të kryeministrit si dhe me vetë kryeministrin Nikolla Gruevski, për mbulimin e gjurmëve të vrasjes së të riut Martin Neshkovski nga një ish-truprojë e kryeministrit, gjatë një tubimi të partisë VMRO-DPMNE në Shkup.

Rasti në atë kohë pat nxitur mjaft protesta, ndërkohë që autoritetet dhe mjetet e informimit të afërta me pushtetin nuk raportonin ose njoftonin fare pak mbi mënyrën se si kishte humbur jetën 21 vjeçari maqedonas.

Pretendimet e udhëheqësit të opozitës janë kundërshtuar nga partia e kryeministrit, Nikolla Gruevski, VMRO DPMNE, e cila sërish e akuzoi zotin Zaev për destabilizim të vendit.

Në protestën e së martës mbrëma morën pjesë pjesëtarë të të gjitha komuniteteve, ndërsa veçohet për herë të parë valëvitja së bashku e flamurit shtetëror maqedonas dhe atij shqiptar.

Një lidhje jashtëmartesore mes ambasadorit maqedonas dhe diplomates shqiptare, pritet të sjellë së shpejti në jetë një fëmijë.

Lidhja e dashurisë mes dy “kolegëve” nuk ka asgjë të keqe, por ambasadori rezulton se është i martuar, ndërkohë që gruaja e tij gjithashtu është në pushtet.

Sipas gruaja e tij gjithashtu është në pushtet ambasadori maqedonas është një person i afërt me Nikolla Gruevskin.

Skandali është “zgjidhur” në atë mënyrë që dyshja e dashuruar është e ndarë në dy qytetet të ndryshme, edhe pse vazhdojnë të punojnë në shtetin e njëjtë europian.

Ndërkohë, portali maqedonas domkaz.mk ka publikuar një fotografi të një djali dhe një vajze dhe shtron pyetjen nëse ata janë ambasadori dhe diplomatja shqiptare të përfshirë në këtë histori.

“Sasho dhe Blerta janë dyshja e përfshirë në skandalin e lartpërmendur, duke u bazuar në burimet brenda MPJ”, njofton dokazi.mk.

Dhjetra persona kanë hyrë me dhunë në Qendrën e Bashkësisë Islame në Shkup të hënën.

Bëhet e ditur se ish-sekretari i Bashkësisë Fetare Islame, Afrim Tahiri është vetëshpallur kryetar i kësaj Bashkësie.

Polica maqedonase e ka siguruar objektin për të penguar dhunën eventuale fizike midis grupeve të konfliktuara të besimtarëve.

Incidenti është rezultat i një përplasjeje të pak ditëve më parë midis kryetarit të Bashkësisë Islame Sulejman Rexhepi dhe myftiut të Shkupit Ibrahim Shabani, pas shkarkimit nga detyra të këtij të fundit.

Ndërkohë, një tjetër incident ka ndodhur të dielën para mesnate në Tetovë. Një sasi lënde eksplozive ka shpërthyer në afërsi të selisë së partisë Bashkimi Demokratik për Integrim.

Organet e hetimit kanë dalë në terren për të analizuar ndodhinë, ndërkohë që nuk ka pasoja në njerëz, e as nuk dihen motivet e shpërthimit.