Presidenti i Komisionit Evropian, Jean-Claude Juncker, i ka tërhequr vërejtjen Britanisë se votimi për largim nga Bashkimi Evropian, do të jetë “një akt i vetëdëmtimit”, që do t’i rrezikoj përfitimet reciproke në disa dekada.

Këtë thirrje emocionale për votuesit britanikë, zoti Juncker e ka bërë para referendumit të nesërm, në të cilin vendoset se a do të mbetet Mbretëria e Bashkuar në BE apo jo.

“Ta ktheni shpinën ndaj fqinjëve tuaj dhe të tërhiqeni në izolim është kundër çdogjëje që Evropa dhe Britania qëndrojnë”, tha Juncker në një tubim biznesor mbrëmë në Athinë të Greqisë.

“Largimi do të thotë vetëdëmtim”, tha Juncker.

Ministri i Jashtëm i Gjermanisë, Frank-Walter Steinmeier, i ka kritikuar ushtrimet stërvitore të NATO-s në pjesën lindore të Evropës, duke i cilësuar si “luftënxitëse”.

“Ajo që ne duhet ta evitojmë sot është provokimi i situatës me luftënxitje dhe me ecje të fuqishme”, i tha Steinmeier gazetës gjermane, Bild am Sonntag”, në një intervistë.

Sipas tij, është e gabueshme të mendohet se “ju mund ta shtoni sigurinë në aleancë me parada simbolike të tankeve afër kufijve lindorë”.

Më 13 qershor NATO-ja ka shpallur se do të vendos batalione të reja në Estoni, Letoni, Lituani dhe Poloni, për zbutjen e shqetësimeve të këtyre vendeve për agresionin rus, pasi Moska e ka aneksuar ilegalisht Krimenë e Ukrainës në vitin 2014 dhe i ka mbështetur separatistët në pjesën lindore të Ukrainës.

Sekretari i përgjithshëm i NATO-s, Jens Stoltenberg, tha para dy ditësh, se Rusia po synon krijimin e “zonës së influencës me mjete ushtarake” dhe theksoi se Rusia po kryen “militarizim masiv” përgjatë kufijve të vet me vendet e aleancës ushtarake.

Rusia e ka kundërshtuar zgjerimin e NATO-s me ish-vendet sovjetike dhe tha se do të reagoj ndaj çfarëdo hapi të NATO-s për t’i shtuar kapacitetet ushtarake afër kufijve rusë.

Zyrtarët e NATO-s do të takohen muajin e ardhshëm në samitin në Varshavë të Polonisë, që for

Bashkimi Evropian është pajtuar që të zgjasë ndalesat në investime dhe sanksione të tjera ndaj gadishullit ukrainas të Krimesë, e cila është aneksuar me forcë nga Rusia në vitin 2014.

Pako e sanksioneve të BE-së ndaj Krimesë përfshijnë edhe ndalesat në importimin e mallrave nga Krimea, me përjashtim të atyre që janë të pajisura me certifikatë ukrainase; ndalesa në eksportime drejt Krimesë, ndalesa që kanë të bëjnë me transport, telekomunikim dhe sektorin e energjisë.

Kompanitë e BE-së gjithashtu e kanë të ndaluar të investojnë në Krime apo të financojnë kompani nga ky territor.

Ndalesa fillimisht është vendosur kur Rusia e ka aneksuar në mënyrë të paligjshme gadishullin ukrainas para dy vjetësh, dhe më pas sanksionet janë zgjatur nga blloku i 28 shteteve evropiane.

Ambasadorët e BE-së pritet të diskutojnë një list më të zgjeruar të sanksioneve ekonomike që tashmë e ka ndaj Rusisë më 21 qershor.

Shefi i NATO-s, Jens Stoltenberg i ka bërë thirrje Rusisë që të tërheqë forcat e saj dhe pajsijet ushtarake nga Ukraina dhe të ndaloj përkrahjen e dhënë separatistëve në Ukrainën lindore.

Stoltenberg i ka bërë këto sit pas takimit të ministrave të mbrojtjes së NATO-s, në Bruksel ku mori pjesë edhe ministri i mbrojtjes së Ukrainës, Stepan Poltorak.

Zyrtarët rusë rregullisht e kanë hedhur poshtë akuzën se trupat e saj janë të përfshirë në konfliktin e Ukrainës.

Stoltenberg ka thënë se aleanca do të vazhdoj ta përkrah qeverinë në Ukrainë dhe nuk do ta njoh “aneksimin ilegal dhe të paligjshëm të (gadishullit ukrainas) të Krimesë”.

Ai ka shtuar se në përgjigje të veprimeve ushtarake ruse në Ukrainë, NATO e ka rritur përkrahjen e saj për Ukrainën.

Stoltenberg, ka thënë se Rusia vazhdon të përkrahë separatistët në pjesën juglindore të Ukrainës duke iu ofruar pajisje dhe këshilla.

Ai ka thënë se Marrëveshja e Minskut është e vetmja mënyrë për t’i dhënë fund luftimeve në Ukrainën lindore që deri më tash ka marrë jetën e 9300 personave prej vitit 2014.

Liderët e 28 shteteve anëtare të NATO-s do të takohen më 8 dhe më 89 korrik në Varshavë, kur pritet të miratojnë planin për vendosjen e batalioneve ushtarake në tri shtete baltike dhe Poloni.

Një oficer i lartë i policisë franceze dhe partnerja e tij janë therur për vdekje në lagjen Magnanville, në periferi të Parisit, natën e kaluar.

Sulmuesi është vrarë nga policia, ndërsa një djalë i vogël është shpëtuar në vendin e ngjarjes.

Një agjenci lajmesh e lidhur me të ashtuquajturin Shtet Islamik ka thënë se grupi militant është përgjegjës për sulmin.

Prokurorët francezë kanë nisur hetimet.

Zyra e presidentit të Francës, Francois Hollande, ka njoftuar se do të mbajë një takim mëngjesin e sotëm për të diskutuar incidentin.

Franca është në gjendje të jashtëzakonshme që prej sulmeve të 13 nëntorit në Paris, të cilat kanë lënë të vrarë 130 veta.

Përgjegjësinë për këto sulme e ka marrë grupi militant Shteti Islamik.

Sekretari i përgjithshëm i NATO-s, Jens Stoltenberg, tha se aleanca ushtarake do të pajtohet këtë javë për dërgimin e katër batalioneve shumëkombëshe në Poloni dhe në shtetet e Baltikut, me qëllim forcimin e mbrojtjes së tyre.

Stoltenberg tha se planet e reja do të miratohen zyrtarisht në një takim të ministrave të mbrojtjes të NATO-s, i cili nis të martën në Bruksel.

“NATO ka ndërmarrë veprime të fuqishme për të mbrojtur vendet tona dhe për t’i kontribuar stabilitetit. Por, sfidat vazhdojnë, andaj duhet të përgatitemi për ngarkesa më të gjata”, tha Stoltenberg.

Ai tha se batalionet do të vendosen me rotacion.

Vendet lindore të NATO-s, Estonia, Letonia, Lituania dhe Polonia kanë thënë se ndjehen të kërcënuara nga Rusia, pasi kjo e fundit ka aneksuar në mënyrë të paligjshme gadishullin ukrainas të Krimesë, në vitin 2014, dhe mbështet separatistët në lindje të Ukrainës.

Zyrtarë të NATO-s thanë se rreth 4,000 trupa do të jenë të përfshira në batalionet e reja.

Polonia ka bërë të ditur se në shtator do të nisë të rekrutojë një forcë të re paraushtarake të mbrojtjes, prej 35 000 vetash, për shkak të tensioneve me Rusinë.

Ministri i Mbrojtjes, Antoni Macierewicz, ka thënë se pozitat e larta në Forcën e Mbrojtjes Territoriale tashmë janë vendosur.

Forca do të ketë vullnetarë civilë, me aftësi ushtarake.

Forca synon t’i kundërvihet Rusisë, nëse ajo tenton të ndërhyjë sikurse në Ukrainë.

NATO po ashtu planifikon të përforcohet në Poloni, por detajet do të bëhen të ditura gjatë samitit të aleancës në Varshavë, më 8 dhe 9 korrik.

Parlamenti i Gjermanisë do të votojë sot për një rezolutë, që i njeh vrasjet masive të armenëve nga turqit otomanë si gjenocid.

Ligjvënësit gjermanë pritet të mbështesin rezolutën simbolike mbi masakrimin e 1.5 milion armenëve nga forcat otomane, një shekull më parë.

Presidenti i Turqisë, Recep Tayyip Erdogan, ka paralajmëruar Gjermaninë se miratimi i rezolutës do t’i dëmtojë marrëdhëniet midis dy vendeve.

Turqia refuzon fuqishëm idenë se vrasjet përbëjnë gjenocid.

Megjithatë, vrasjet dhe dëbimi i armenëve nga turqit otomanë konsiderohet gjenocid nga shumë historianë dhe nga së paku 20 shtete.

Turqia thotë se armenët kanë vdekur për shkak të konfliktit civil dhe jo përpjekjeve të planifiuara të Qeverisë otomane për të asgjësuar pakicën e krishterë.

Pilotja ushtarake ukrainase, Nadia Savchenko, e cila i ka kaluar gati dy vjet në burg në Rusi, e ka dhënë betimin si anëtare e Parlamentit të Ukrainës.

Në vitin 2014, derisa ishte në burg në Rusi, ajo është zgjedhur anëtare e Parlamentit të Ukrainës.

Pilotja Savchenko është liruar nga burgu në Rusi javën e kaluar.

Gjatë fjalimit të saj sot në parlament, ajo tha se prioritet i saj do të jetë përpjekja për lirimin e ukrainasve të tjerë që mbahen në Rusi, e të cilët nga Ukraina përshkruen si të burgosur politikë.

Nadia Savchenko është kthyer në Ukrainë me ç’rast është pritur si hero. Ajo ishte amnistuar nga presidenti i Rusisë, Vladimir Putin, në kuadër të një këmbimi të të burgosurve.

Savchenko ishte zënë në pjesën lindore të Ukrainës nga separatisitët e mbështetur nga Rusia, në qershor të vitit 2014, kur ajo ishte duke shërbyer në një njësi të vullnetarëve të Ukrainës.

Sekretari i përgjithshëm i NATO-s, Jens Stoltenbergu, ka thënë se në samitin e ardhshëm të aleancës do të vendoset për shtimin e pranisë së NATO-s në aspektin mbrojtës dhe të zmbrapjes në Poloni dhe në vendet e tjera të krahut lindor.

Këto komente ai i bëri mbrëmë në Varshavë të Polonisë, ku në korrik mbahet samiti.

“Do të ketë më tepër trupa të NATO-s në Poloni pas samitit të Varshavës, për të dërguar sinjal të qartë se një sulm kundër Polonisë do të konsiderohet sulm në gjithë aleancën”, tha Jens Stoltenberg.

Kjo lëvizje pritet që edhe mëtutje do ta armiqësoj Rusinë, e cila thotë se zgjerimi lindor i NATO-s e kërcënon sigurinë e saj kombëtare.

Raportet ndërmjet aleancës veriatlantike dhe Rusisë kanë arritur në pikën më të ulët prej Luftës së Ftohtë, për shkak të aneksimit të Krimesë së Ukrainës nga ana e Rusisë dhe mbështetjen e Moskës për separatistët në pjesën lindore të Ukrainës.

Presidenti i Komisionit Evropian, Jean-Claude Juncker, thotë se vizita e planifikuar e tij në Rusi ka për qëllim ta mbajë dialogun, e jo të sinjalizojë rishqyrtim të sanksioneve të imponuara nga ana e Bashkimit Evropian.

Zoti Juncker e ka pranuar ftesën e Rusisë për të marrë pjesë në Forumin Ndërkombëtar Ekonomik në Shën Petersburg më 16 qershor, që do të jetë udhëtimi i parë në Rusi i një zyrtari të lartë të BE-së, prej se Moska e ka aneksuar Krimenë e Ukrainës, në vitin 2014.

Kjo vizitë po bëhet vetëm disa javë para se 28 vendet anëtare të BE-së duhet të vendosin nëse do t’i zgjasin sanksionet kundër Rusisë për shkak të agresionit të saj në Ukrainë.

“Ne nuk do të shohim zbutje të pozicioneve evropiane”, u tha mbrëmë Juncker gazetarëve në Luksemburg, dhe ka shtuar se “ne do t’i vazhdojmë sanksionet kundër Rusisë dhe do ta bëjmë të qartë se ne në asnjë mënyrë nuk pajtohemi me aksionet e Rusisë në Ukrainë dhe Krime”.

Presidenti i Francës, Francois Hollande, dhe kancelarja e Gjermanisë, Angela Merkel, sot e shënojnë 100 vjetorin e betejës në Verdun, që ishte beteja më e gjatë në Luftën e Parë Botërore.

Gjatë kësaj ofensive në këtë qytet në verilindje të Francës, në vitin 1916, e cila zgjati 300 ditë, janë vrarë më se 300 mijë vetë.

Të dy zyrtarët e lartë të Francës dhe Gjermanisë pritet ta shfrytëzojnë këtë ditë të përkujtimit për të shprehur nevojën për unitet, në kohën kur Bashkimi Evropian është nën presion për shkak të krizës së emigrimit dhe rrezikut që Britania të largohet nga BE-ja.

Duke folur para ceremonisë së përkujtimit, kancelarja Merkel ka theksuar se “të jesh e ftuar në këto përkujtime tregon se në çfarë shkalle raportet ndërmjet Francës dhe Gjermanisë janë të mira sot”, dhe ka shtuar se “Evropa ballafaqohet me detyra të vështira dhe për këtë nuk ka dilema”.

Së paku 45 emigrantë kanë vdekur dhe dhjetëra të tjerë janë zhdukur pasi anija e tyre është fundosur dje në Detin Mesdhe, ka njoftuar roja bregdetare e Italisë.

Anija e Marinës italiane, Vega, i ka shpëtuar afro 135 njerëz nga anija e madhe e gomës “gjysmë e fundosur”, në njërin prej 17 operacioneve të koordinuara nga roja bregdetare gjatë ditës së djeshme.

Ekuipazhi i anijes Vega i ka gjetur 45 trupa të pajetë dhe ende po kërkohet për të zhdukurit.

Raportohet se kjo është dita e tretë e njëpasnjëshme e vdekjeve të migrantëve në det.

Roja bregdetare tha se moti më i nxehtë dhe deti më i qetë ka ndikuar në rritjen e numrit të njerëzve që përpiqen të kalojnë nga Libia, ku trafikantët me njerëz veprojnë të papenguar.

Migrantët, shumica prej të cilëve nuk dijnë të notojnë dhe nuk janë jelekë shpëtimi, kanë paguar qindra ose mijëra dollarë për të kaluar nëpër det në Evropë.

Parlamenti i Suedisë ka votuar mbrëmë për t’i dhënë më tepër qasje NATO-s për stërvitje dhe për rast të ndonjë lufte.

Për këtë masë në parlamentin e këtij vendi neutral nordik kanë votuar 291 deputetë, ndërsa 21 ishin kundër.

Suedia nuk është anëtare e NATO-s por aktualisht ka lëvizur më afër aleancës për shkak të rritjes së tensioneve me Rusinë.

Stokholmi bashkëpunon me vendet anëtare të NATOs, Danimarka, Norvegjia dhe Islanda, ndërsa merr pjesë edhe në operacionet në Afganistan.

“Kjo marrëveshje nuk do t’i ndryshoj raportet tona me NATO-n e as politikën tonë të sigurisë, pasi ne do të mbesim të painkuadruar”, tha ministri iMbrojtjes i Suedisë, Peter Hultqvist, dhe ka shtuar se “nuk do të ketë ushtarë të NATO-s në Suedi pa ftesë”.

Aktualisht, afërsia e Suedisë me NATO-n e ka zemëruar Rusinë.

Kryesuesi i Komitetit ushtarak të NATO-s, Petr Pavel, i tha Radios Evropa e Lirë se planifikimi i grumbullimit të aleancës në krahun lindor të saj është përgjigje direkte ndaj aksioneve ushtarake ruse në Gjeorgji, Ukrainë dhe Rusi.

Gjenerali Petr Pavel, nga Çekia, tha se “nëse nuk do të kishte rritje të këmbëngulësisë së Rusisë të demonstruar në aksionet në Gjeorgji, Ukrainë, Krime dhe Siri, atëherë nuk do të kishte nevojë për reagim nga ana e NATO-s”.

Mëtutje, ai ja theksuar se NATO-ja, e veçanërisht pjesa më e madhe e anëtarëve lindorë, “ndjehen të kërcënuar nga këmbëngulësia e Rusisë, nga agresioni rus, në disa hapësira”.

Sipas tij, vendet që në mënyrë direkte kufizohen me Rusinë “dëshiruan të jenë më tepër të siguruara për praninë e NATO-s dhe për vullnetin dhe gatishmërinë e NATO-s për të vepruar”.

Komiteti ushtarak i NATO-s është autoritet i lartë ushtarak i aleancës dhe është burim kryesor i këshillave ushtarake për trupat civile vendim-marrëse të NATO-s.