TIRANE- Ashtu siç ishte parashikuar, sot në orën 16:00 në Kryesinë e Kuvendit u zhvillua takimi trepalësh Rama-Meta-Basha për të gjetur një zgjidhje për reformën në drejtësi, por pa 2 ambasadorët Donald Lu e Romana Vlahutin. Takimi zgjati gati dy orë, ndërsa i pari që la Kryesinë, pa bërë asnjë koment për mediat, ishte kryeministri Edi Rama.
Menjëherë pas takimit kryeministri shkroi në Twitter se do flasë për fatin e reformës në drejtësi dhe asaj çfarë u diskutua në takim në orën 19:00. Ndërsa 1 orë pas tij, kryeopozitari Basha do thotë versionin e tij për publikun.
Rreth orës 17:00 ishte kreu i komisionit te posaçëm për reformën në drejtësi, Fatmir Xhafaj që doli nga mbledhja.
TAKIMI
I pari që erdhi në institucionin që ai drejton ka qenë kryepalamentari Ilir Meta, ndërsa fill pas tij ka ardhur i vetëm kryeministri Edi Rama e dy minuta më vonë, kreu i PD-së, Lulzim Basha. Mësohet se Meta ishte i shoqëruar nga kreu i grupit Parlamentar të LSI-së, Petrit Vasili dhe ministri i Drejtësië, Ylli Manjani. Ndërsa kreu i opozitës shoqërohej nga Oerd Bylykbashi, ndërsa Rama me Fatmir Xhafajn.
Ambasadorët kanë konfirmuar se nuk do të marrin pjesë pas deklaratës së kreut të PD-së, Lulzim Basha, që nuk e përmend propozimin hibrid, kusht i Lu dhe Vlahutin për të marrë pjesë në takim. Nga ana tjetër burime nga PD thonë se nuk ka tërheqje pas deklaratës së ambasadorëve. Sakaq, burime nga PS pohuan se u prish formati i takimit 5 palësh.
“Ambasadorët Vlahutin dhe Lu informuan Kryetarin e Kuvendit z. Meta se pas deklaratës së z. Basha, ambasadorët nuk e kanë të mundur të marrin pjesë në negociatat e parashikuara për 18 korrik.
Z. Basha foli për një qeveri teknike dhe nuk e përmendi propozimin hibrid që ai diskutoi me Ambasadoren Nuland më 10 korrik. Nëse z. Basha e rideklaron angazhimin e tij të mëparshëm për të negociuar ekskluzivisht mbi bazën e propozimit hibrid, vetëm atëherë ambasadorët do t’u bashkohen këtyre diskutimeve”, thuhet në njoftimin e ambasadave.
Një ditë më parë kryeparlamentari Meta ftoi zyrtarisht në një takim në kryesinë e Kuvendit për të gjetur konsensus për reformën, Ramën, Bashën dhe dy ambasadorët. E duke qenë republikë parlamentare, nuk mund të mungojë kreu i Kuvendit, Ilir Meta.
Ambasadorët Donald Lu dhe Romana Vlahutin kanë qenë të parët që i janë përgjigjur pozitivisht ftesës e më pas kryeministri Edi Rama, por kushti i tyre ka qenë që në tryezën e debatit të jetë vetëm propozimi hibrid i Nuland dhe jo propozimi i PD.
Ndërsa sot edhe kreu i PD-së, Lulzim Basha iu përgjigj pozitivisht ftesës, duke thënë se takimi duhet të fokusohet tek opinioni i Venecias.
“Partia Demokratike dhe unë e kemi konsideruar dhe e konsiderojmë krijimin e një qeverie teknike si një domosdoshmëri për organizimin e zgjedhjeve të lira e të ndershme dhe për stopimin e krizës së gjithanshme të vendit. PD është e gatshme të marrë pjesë në këtë format takimi, të ekspozojë pa asnjë paragjykim apo prapamendim bazën ligjore të propozimeve të saj për vetingun, të negociojë zgjidhje që mundësojnë plotësisht rolin më aktiv të ndërkombëtareve në përputhje të plotë me rekomandimet e Komisionit te Venecias”, deklaroi Basha.
Komentet