Janë përmbysur dhe shkatërruar të pesta rastet e dialogut nga kryeministri prej protestave duke treguar një provokim të vazhdueshëm nga ana e shtetit i cili ka shtuar presionin, dhunën dhe përndjekjen e qytetarëve.

Rastet e incidenteve rrumbullakosen në dyert e urgjencave ku shfaqen më shumë policë dhe raste të rënda nga protestuesit pasi pjesa më e madhe e tyre trajtohen nën fshehtësi për të mos u bërë preha e identifikimit në sistem i cili lehtësisht kthehet në përndjekje dhe raste të tilla janë bërë shpesh herë të ditur.

Kulmi ka arritur me plagosjen në sy të një qytetari protestues i cili është dërguar me urgjencë në një spital italian për një shërbim më të specializuar.

Tek sa qeveria, media dhe protestuesit po bëjnë një luftë kapitalizuese për rastin se kush goditi (pra kush e ka fajin) dhe kush po i jep ndihmën e parë (u dha nga Tirana, gjindet në Itali tani dhe fluturoi me avion të posaçëm), të gjitha këndvështrimet dhe lutjet bashkë mbajnë ankthin e ‘dritës së syrit’, traumë dhe vuajtje me të cilën lufton tani dhe do ta shoqërojë për gjithë jetën 28 vjeçarin Erjon Vishkulli.

Pikërisht këtë përshkallëzim të dhunës nuk e mendon kryeministri kur nuk peshon dëmin shëndetësor, moral dhe monetar?

Kush goditi?

Sa më shumë vonon ekspertiza, aq më e rrënuar del drejtësia dhe zinxhiri komandues policor.

Sa do t’i kushtojë goditësit dhe familjes së tij (policit), moralisht dhe ekonomikisht kjo masë?

Po ai që u godit?

Shëndeti, shërimi, qëndrimi spitalor, riaftësimi, familja, puna të gjitha këto janë kosto të rënda për cilindo.

Për çdo qytetar, për çdo civil apo me veprues me uniformë, për çdo politikan apo shtetar, për çdo prind dhe mësues, e sa për kryeministrin të gjitha këto janë një fjalë goje në mos retorikë politike dhe kalkulime për të mbajtur me dhunë pushtetin.

A mendon se me këtë mënyrë ai do të shkojë në zgjedhjet e ardhshme?

Ndërsa kjo mbetet për t’u diskutuar ajo që lidhet me sa më sipër parashtruam është kosto morale dhe ekonomike në shikimin e masave ose “Paketa anti Anarki”* që frymëzimi nga dhuna i dikton kryeministrit për kontroll dhe pushtet absolut me goditje dhe nënshtrim absolut të lirive qytetare. Pra pas 13 ditësh ushtrim dhune nxjerr ligje dhe vendos gjoba pikërisht ndaj kësaj krize që e prodhoi vetë duke futur vëllavrasjen. Në një shënim të dy ditëve më parë UGSHPD pikërisht tërhiqte vëmendjen mbi Kodin penal, Neni 84 mbi Kanosjen ku kërkohej që drejtësia dhe SPAK të veprojnë.*

Sot ATSH-ja publikoi sipas një video të lëshuar në media:-“Rama: Gjashtë ndërhyrje kundër anarkisë urbane, godina e PD-së u kthye në strehim politik të dhunës“ duke e vënë theksin si kryesore nga goja e tij dhe mediat që i shërbejnë çka përbën një taktikë nxitëse antiprotestë në një shkallë të re, ku gjoja duke ju kundërvënë dhunës dhe distancimit prej saj, kryeministri kërkon të përçajë frontin e përbashkët padallim të qytetarëve në qëndresë, “Shqipëria e Shqiptarëve, jo e tradhtareve”.

Kur i lexon të gjashtë masat, kupton qartë gërryerjen morale dhe financiare që korrupsioni i këtij kryeministri mbulon.

Asgjë për qytetarin.

Asgjë për debatin politik.

Asgjë për ekspertët.

Veç vendime autoritare të njëanshme fashiste.

Nuk do të humbim kohë për t’i analizuar ato sepse janë vepra që i ngjajnë dialogut imagjinar që ai ka në mëndje. Të gjitha çmimet ndëshkuese në para karshi veprave që i ruajnë kryeministrit pushtetin janë një shpërqendrim nga thelbi i asaj që ai deklaron po aty përmes ATSH-s:-“Në këtë drejtim, kryeministri theksoi se projektbuxheti i vitit 2027, i cili do të prezantohet në ditët e para të kësaj jave, vjen me plot risi pozitive në drejtim të familjeve të zakonshme, të shërbimeve për qytetarët dhe të rinjve e studentëve”.

Kujt i kujtohet vepra përsëritëse e grabitjes nga kryeministri është BUXHETI. Ai u a thotë në sy shqiptarëve planin e tij se do të “prezantohet në ditët e para të kësaj jave”.

A e imagjinojmë dot dëmin që ky aventurier i shkakton vendit në këto kushte?

Dialog?!

Dhunë?!

Vjedhje?!

Apo kartonë që do ta votojnë?

Situata është shumë e rëndë, ndaj thirrjet për dialog që kryeministri e quan sofër dhe që digjet nga qytetarët protestues në ditët e ardhshme do t’i drejtohet KUVENDIT, ku sherri e degjeneron votimin në pak minuta dhe shembujt i kanë dhënë vit pas viti kryetarët e nënshtruar Nikolla, Spiropali e Peleshi. Jo vetëm në tre vitet e fundit, por deri tek ky buxhet rekord që do të ketë rreth 10 miliardë lekë ku qeverisja ka treguar se nuk e frenon dot korrupsionin dhe krimin.

Ai buxhet janë taksat e mirëqenies së shqiptarëve dhe për shqiptarët e jo për pushtetarët e pangopur që kur vjen koha një pjesë e tyre për ta lypur votën “përulen duke thënë shërbëtorë të popullit”.

Ky teatër dhe kjo formë dialogu me protestuesit e zhgënjyer në 36 vitet e tranzicionit, ndalet këtu dhe ka mbaruar.

Pyetja që po shtrohet sot ndër të tjera është se:- A kanë integritet personal veç atij politik deputetët që një autoriteti që frymëzon dhe ushtron dhunë t’i japin edhe buxhet?

Pra nuk janë vendimet ndëshkuese kryesorja tek kryeministri.

Ato janë frika dhe presioni për qytetarët që po i drejtohet kuvendit dhe sidomos rradhëve të socialistëve që ende se kanë kuptuar fundin e ‘Besës’, ‘Pranisë Besnike’, ‘Pasqyrën’, ‘Dëmi im‘ dhe së fundi ‘Paketën anti Anarkisë‘.

Java e ardhshme qoftë e arsyes, qoftë e dialogut i ka mbetur në derë Kuvendit të Shqipërisë për ta thelluar krizën ose për ta qetësuar atë duke e larguar kryeministrin ende pa përvetësuar paratë e 2027-ës.

________

*”Paketën anti Anarkisë”– paketa e re ligjore kundër dhunës urbane

*SPAK TË THËRRASË ME URGJENCË KRYEMINISTRIN-https://www.voal.ch/608091-2/aktuale/fokus/