Tri vite pas sulmit të 7 tetorit, lufta mes Izraelit dhe Hamasit ka lënë pas një bilanc të rëndë humanitar në Rripin e Gazës. Pas sulmit të Hamasit ndaj Izraelit, ushtria izraelite nisi një ofensivë të gjerë ushtarake në Gaza, duke shkaktuar shkatërrime të mëdha dhe zhvendosjen e miliona njerëzve.

Sipas të dhënave të Ministrisë së Shëndetësisë në Gaza, të drejtuar nga Hamasi, të paktën 74,200 persona janë vrarë në territor që nga fillimi i ofensivës izraelite.

Organizata e Kombeve të Bashkuara vlerëson se nevojat humanitare në Gaza mbeten jashtëzakonisht të mëdha. Miliona njerëz përballen me vështirësi për të siguruar ujë të pijshëm, ushqim dhe ilaçe.

Sipas të dhënave të OKB-së, rreth 80% e strukturave në Gaza janë shkatërruar ose dëmtuar gjatë konfliktit. Më shumë se 1.9 milionë njerëz, ose rreth 90% e popullsisë së territorit, janë detyruar të largohen nga banesat e tyre, ndërsa shumë prej tyre janë zhvendosur disa herë.

Rreth 1.2 milionë persona aktualisht jetojnë në tenda ose strehimore të improvizuara, sipas raportit të OKB-së.

Ndërkohë, vitin e kaluar, shoqata kryesore botërore e studiuesve të gjenocidit deklaroi se veprimet e Izraelit në Gaza përbënin gjenocid. Izraeli e ka kundërshtuar vazhdimisht këtë akuzë, duke deklaruar se operacionet ushtarake janë pjesë e së drejtës së tij për vetëmbrojtje. bw