Sot shënohet Dita Ndërkombëtare e Personave të Zhdukur me Dhunë. Mbi 27 vjet pas përfundimit të luftës në Kosovë, zyrtarisht rreth 1 600 persona figurojnë ende si të zhdukur, ndërsa familjet e tyre vazhdojnë të presin përgjigje për fatin dhe vendndodhjen e më të dashurve të tyre.

Në shënim të kësaj dite, më 30 gusht do të zhvillohen një sërë aktivitetesh përkujtimore dhe sensibilizuese.

Nën patronatin e përbashkët të ushtrueses së detyrës së presidentes së Kosovës, Albulena Haxhiu, dhe kryeministrit në detyrë, Albin Kurti, Komisioni Qeveritar për Persona të Zhdukur, në bashkëpunim me Këshillin Koordinues të Asociacioneve Familjare të të Zhdukurve të Kosovës, shoqatat e familjeve dhe organizatat vendore e ndërkombëtare të angazhuara në procesin e ndriçimit të fatit dhe vendndodhjes së personave të zhdukur, organizon aktivitetin qendror përkujtimor dhe homazhe pranë Përmendores së Personave të Zhdukur me Dhunë.

Në kuadër të aktiviteteve, ushtruesja e detyrës së presidentes, Albulena Haxhiu, në orën 09:30 do të bëjë homazhe te Monumenti i Personave të Zhdukur, ka njoftuar Zyra e Presidencës.

Ndërkaq, në Kompleksin Memorial në Krushë të Madhe, në orën 19:00, do të organizohet tubim sensibilizues dhe ndezja e flakadanëve, në nderim dhe kujtim të personave të zhdukur me forcë.

Aktivitete në kuadër të shënimit të 30 Gushtit do të zhvillohen edhe në Gjenevë, të dielën.

Ndërkohë, më 28 gusht, Komisioni Qeveritar për Persona të Zhdukur, Policia e Kosovës – Drejtoria për Hetimin e Krimeve të Luftës dhe Instituti për Mjekësi Ligjore, në bashkëpunim me shoqatat e familjeve të personave të zhdukur, organizuan një vizitë përkujtimore në lokacionin e varrit masiv në Kalludër të Zubin Potokut.

Vizita u zhvillua në shenjë respekti dhe nderimi për viktimat e zhdukjeve me forcë dhe familjet e tyre, pas gjetjes së mbetjeve mortore në këtë lokacion javë më parë.

Kryeministri në detyrë i Kosovës, Albin Kurti, kishte deklaruar më herët se mbetjet mortore të gjetura në Kalludër të Vogël mund t’u përkasin grupit të 23 shqiptarëve të zhdukur në atë pjesë të Kosovës në vitin 1999.

Ky grup, i njohur si “grupi i intelektualëve të Mitrovicës”, është i zhdukur që nga 19 prilli i vitit 1999. Në mesin e tyre kishte mjekë, profesorë, avokatë dhe profesionistë të profileve të tjera.

Pas përfundimit të luftës në Kosovë, në vitin 1999, rreth 6,500 persona ishin raportuar të zhdukur. Që nga ajo kohë janë kryer disa zhvarrime në varreza masive në Kosovë dhe Serbi dhe deri më tani janë gjetur rreth 70 për qind e personave të zhdukur.

Megjithatë, rreth 1,600 persona nga lufta e Kosovës vazhdojnë të mbeten të pagjetur, ndërsa familjet e tyre ende presin përgjigje për fatin dhe vendndodhjen e më të dashurve të tyre./ RTK.