Gjeneral

Në rrugë u ula. Në lis u mbështeta. Librat i mora dëshmitarë të fjalës që sot e the para mediave:

— Hashim Thaçit i asht marrë mandati, ndaj Kurti ban nder me ja kthy mandatin?

Kush ia mori Gjeneral?

E vazhdove me superlativa për Hashimin.

U shtanga.

I hallakata librat. E hoqa plisin e bardhë prej kresë, për me e krue tepën. Pastaj e vuna prapë aty ku rrin ma së miri dhe u ktheva në Strasburg, kur erdha për të dytën herë me t’pa e Remzi Ejupi na çoi me hangër mish.

Aty të pyeta:

— Pse Pal Leka rrin në Swiss Diamond me Presidentin?

Ti m’u përgjigje rreptë:

— Mos fol për Hashimin, se ta hjek kryet! Ju nuk e dini kush asht ai. Më leni mua t’ia nxjerri n’shesh të zezat, se mua s’guxon gja me m’ba!

Më thuej sot, Gjeneral: kur po flet n’superlativë për të dhe po e propozon për President, cili je ti e cili asht ai?

Cili ishte i keqi prej jush atëherë, e cili qenka i miri tash?

Nasimi po don me kallë Kosovën nëse ata dënohen. Edhe do deputet nga partia e tij. Por çështja asht: cilën Kosovë?

Atë Kosovën e partive që votuet që ata të burgoseshin? Apo Kosovën e atyne që nuk votuen, sepse nuk deshtën që krerët e UÇK-së të gjykoheshin për fajet që s’i kan?

M’u kujtuen Rojet e Mjegullës të Rexhep Qosës dhe e pyeta veten:

Kujt i duhet mjegulla në këto ditë me diell?

Po ne që nuk deshtëm me votue as Gjykatën, as Demarkacionin, as Zajednicën, pse u dashka me na i kallë kasollat e zhelet neve, e pallatet tueja milionshe?

Jo

Dilni n’Rashkë e futjani flakën, se aty vinte Vuçiqi e takohej me Radojçiqin për me marrë informata prej kabinetit tand.

Për fund:

Ju kurrë s’keni me u gëzue kur të lirohen Kadriu, Jakupi, Rexha e Hashimi.

Po kemi me u gëzue na.

E familjet e tyne.

Sepse vetëm ne nuk ua dëshiruem burgun.

Ju e keni prej frikës së fjalëve të këqija që keni thanë për pesë vjet. Prandaj po e rrahni tupanin e po luteni ma shumë për veten sesa për ata.

Kur e mbarova shkrimin, e pyeta lisin:

— Pse rrin drejt?

Lisi m’u përgjigj:

— Se i kam rrânjët thellë n’dhe.

Rrini drejt edhe ju.

E mos i koritni rrânjët nëse hala janë të shëndosha.

Prizren, 22.08.2026