Në intervistën e ish kryeministrit dhe ish presidentit të Kosovës, shfaqur mbrëmë më 20 Gusht 2026, nga RTV Dukagjini, Hashim Thaçi tregon se Senatori Bob Dole e kishte ftuar në Shkup më 5 Mars 1999, por ai nuk kishte mundur me shku sepse ishte në malet e Kosovës dhe udhëtimi ishte i pamundur për shkak të rrezikut nga forcat serbe.

Por faktet dalin ndryshe.

Duke iu referuar arkivit të Televizionit Klan të Tiranës na del se Hashim Thaçi më 7 Mars 1999 ka qenë në Tiranë dhe nga Ministria e Jashtme bashkë me ministrin e kohës Paskal Milo kanë dhënë intervistë.

Po ju sjellim videon dhe materialin e TV Klan të fotografuar.

Arkiva – Tv Klan 1998-2012;

Gazetarja interviston Hashim Thaçin dhe Ministrin e Jashtëm të Shqipërisë Paskal Milon në lidhje me nënshkrimin e marrëveshjes së Rambujesë.

Gazetarja interviston Hashim Thaçin dhe Ministrin e Jashtëm të Shqipërisë Paskal Milon në lidhje me nënshkrimin e marrëveshjes së Rambujesë.

Hashim Thaçi: Marrëveshja ka hyrë në progres dhe ka marrë kahje pozitive. Ne kemi qënë këmbëngulës dhe jemi këmbëngulës që NATO të vijë në Kosovë nën udhëheqjen e Shteteve të Bashkuara të Amerikës. Por kuptohet edhe Ushtria Çlirimtare e Kosovës duke ruajtur të drejtën e vet si forcë mbrojtëse e Kosovës dhe besojmë në zgjidhjen paqësore, të drejtë, të qëndrueshme dhe të respektueshme nga populli i Kosovës.

Gazetarja: Ndërkohë sipas palës serbe ju jeni person i kërkuar nga ata mos vallë përdoret si një … për më vonë ?

Hashim Thaçi: Kjo s’më brengos fare. Incidente ka dhe tash në Kosovë por ne jemi të interesuar që t’i tejkalojmë këto incidente dhe nuk jemi të interesuar për konfrontime të armatosura, por megjithatë ne jemi të detyruar të vetëmbrohemi.

Gazetari: Kur mund të jeni ju gati për t’a nënshkruar marrëveshjen?

Hashim Thaci: Ne jemi gati atëherë kur do të jetë koha. Faktorët politikë dhe ushtarakë të Kosovës e kanë thënë po-në e tyre parimore në Rambuje, mirëpo procesi vazhdon dhe ka marrë vetëm një kahje shumë pozitive drejt arritjes së marrëveshjes.

Paskal Milo: Ne po përgatitemi për raundin e dytë të bisedimeve dhe ashtu siç bashkëpunuam gjatë takimit të Rambujesë, kështu vazhdojmë të bashkëpunojmë dhe tani, sepse të dy së bashku në emër të institucioneve që përfaqësojmë, përfaqësojmë kombin shqiptar si një të tërë, dhe të gjitha sfidat, të gjitha detyrat që kemi përpara për të realizuar do t’i përballojmë së bashku, prandaj ky bashkëpunim është mëse i natyrshëm, mëse i ligjshëm dhe në emër të këtij bashkëpunimi ne u takuam sot dhe do të vazhdojmë të takohemi me të gjithë përfaqësuesit e shqiptarëve të Kosovës, edhe gjatë ditëve të ardhshme me qëllim që në takimin e ardhshëm në Paris të shkojmë sa më të përgatitur që të ballafaqohemi me një vendim përfundimtar që do të japë zgjidhje politike të konfliktit në Kosovë.