Hetimi zbulon se pozicionet kyçe, kontratat shtetërore dhe ndikimi politik në Rusi nuk shpërndahen në bazë të kompetencës profesionale, por sipas lidhjeve familjare.

Lista e njerëzve që kanë përfituar nga marrëdhënia e tyre me presidentin përfshin ish-gruan e tij, vajzat e tij, partnerët, dhëndurët, kushërinjtë – madje edhe fëmijët e tyre. Siç vihet re, kjo është tani brezi i tretë i Putinëve që mbajnë pushtetin.

Në total, 24 të afërm të presidentit rus mbajnë poste të larta ose kontrollojnë kompani shtetërore.

Hulumtimi më i gjerë nga ‘Proekt’ (i themeluar në vitin 2018 nga gazetari Roman Bandanin, me përvojë të konsiderueshme në mediat kryesore ruse si gazeta Izvestia dhe faqja e internetit e Forbes në Rusi), tregon se rrjeti i të afërmve dhe bashkëpunëtorëve të Putinit është përhapur në të gjithë ekonominë ruse – nga energjia dhe minierat te financat dhe mbrojtja – në një mënyrë që të kujton, siç u tha, nivelet e nepotizmit të epokës së Carit Nikolla II, i cili sundoi deri në vitin 1917.

“Duke monitoruar” 1,329 individë që mbanin pozicione kyçe në shërbimin civil rus dhe kompanitë më të mëdha shtetërore, ‘Proekt’ zbuloi se 76% (1,012 persona) kanë të afërm të punësuar në sektorin publik. “Ky është një përqindje e madhe – tre nga katër zyrtarë rusë ose e kanë trashëguar pozicionin e tyre ose u kanë siguruar fëmijëve të tyre një jetë me privilegje shtetërore”, thuhet në raport.

Anna Tsiviliova dhe klani i saj

Një shembull tipik është Anna Tsiviliova, një e afërme e Putinit dhe psikiatre me profesion, e cila u emërua zëvendësministre e mbrojtjes. Fondacioni i saj merr miliarda nga buxheti i shtetit, bashkëshorti i saj, Sergei Tsiviliov, drejton ministrinë e energjisë, dhe vëllai i saj mban një pozicion të lartë në Gazprom. Sipas shërbimit të inteligjencës ushtarake ukrainase, emërimi i saj mund të lidhet edhe me çështjet e kundërzbulimit, pasi ajo dyshohet se e ka informuar drejtpërdrejt Putinin për çështjet e besnikërisë dhe korrupsionit.

Familja Tsiviliov ka grumbulluar pushtet të konsiderueshëm financiar. Djali 27-vjeçar i Annës nga një martesë e mëparshme, Dmitry Loginov, menaxhon disa kompani të lidhura me Kolmar, kompaninë minerare të kontrolluar nga familja.

Vëllai i saj, Mikhail Putin, është një drejtues i lartë në Gazprom, ndërsa djali i tij, 28-vjeçari Denis Putin, është i listuar si aksionar në kompleksin e biznesit Sheremetyevo pranë Moskës, ku ndodhen shumë kompani shtetërore.

Anëtarët e familjes së zgjeruar të Putinit kanë siguruar gjithashtu pozicione të privilegjuara. Dy kushërinjtë e tij, Igor Putin dhe Lyubov Kruglova, mbajnë pozicione të larta në organizata të lidhura me shtetin, ndërsa djali i Kruglovës, Viktor Khmarin, është drejtor ekzekutiv i RusHydro, një nga kompanitë më të mëdha të energjisë në Rusi.

Bëjeni si Kadyrov

Hetimi krahason rrjetin e Putinit me atë të udhëheqësit çeçen Ramzan Kadyrov, i cili, sipas gjetjeve, ka emëruar 96 të afërm në pozicione qeveritare dhe korporatash. Djali i tij 17-vjeçar, Adam Kadyrov, mban të paktën shtatë tituj, përfshirë postin e kreut të Këshillit të Sigurisë rajonale, të cilin e mori në prill.

Në të njëjtën kohë, dy vajzat e rritura të Putinit, Maria Vorontsova dhe Katerina Tikhonova, morën pjesë në Forumin Ekonomik Ndërkombëtar të Shën Petersburgut, një nga tubimet më të larta të elitës politike dhe të biznesit të Rusisë. Në një intervistë të rrallë, Vorontsova tha se “jeta njerëzore ka vlerën më të lartë në Rusi”, megjithëse presidenti nuk i ka njohur kurrë publikisht dy gratë si bijat e tij.

Sipas Proekt, dhe siç është raportuar shumë herë në të kaluarën, Putin thuhet gjithashtu se ka dy djem të vegjël me ish-gjimnasten ritmike olimpike Alina Kabaeva dhe një vajzë me Svetlana Krivonogik, një ish-pastruese që u bë milionere përmes pronësisë së një resorti luksoz skish pranë Shën Petersburgut dhe aksioneve të saj në një bankë të lidhur me Kremlinin.

Ndërsa nepotizmi është një tipar i përhershëm i qeverisjes ruse, Proekt vëren se nën Putinin, lidhjet familjare janë bërë një shtyllë themelore e sistemit politik dhe ekonomik të Rusisë.