Ish-deputeti i Partisë Demokratike, Lefter Maliqi, tha sot se të gjitha akuzat që ka bërë ish-zv/kryeministri socialist Arben Ahmetaj nga arratia për pasardhësen e tij Belinda Balluku po dalin të gjitha.

Ai komentoi hetimet e SPAK ndaj Ballukut për abuzimet në detyrë me tenderët, duke e cilësuar edhe si një “lufte të brendshme” të Partisë Socialiste. Por ai e lidh këtë me publikimin e raportit të OSBE/ODIHR dhe qëllimi është të tërhiqet vëmendja me zhurmë.

“Për rastin e Belinda Ballukut, mendoj se u bë një zhurmë pas raportit të OSBE-së. Ka një indicie dhe kam dëgjuar Arben Ahmetajn me akuza të shumta ndaj Ramës dhe Ballukut dhe që tani po dalin. Është një luftë brenda llojit në PS”, tha ai mes të tjerash për “News 24”.

Maliqi deklaroi se vetë ka bërë 11 kallëzime në SPAK dhe prokurori, duke kujtuar edhe rastin e kryebashkiakut të Kuçovës. Ai shprehu kritika ndaj institucionit të akuzës, duke e cilësuar institucion të orientuar politikisht.

“Kam bërë 11 kallëzime penale, të gjitha të provuara me fakte. Që nga korrupsioni elektoral dhe deri te krimet e tjera. Do të shkoj përsëri në SPAK për të bërë kallëzim dhe madje do i drejtohem edhe me një memo zotit Dumani”, u shpreh ish-ligjvënësi.

Ish-deputeti tha se Rama pasi i përdor njerëzit që i ka afër, i burgos, duke përmendur precedentët Saimir Tahiri, Erjon Veliaj dhe Arben Ahmetaj.

“Edhe Tahiri dhe Veliaj ishin të rëndësishëm si Balluku, por përfunduan në burg, vetëm Ahmetaj shpëtoi. Por këta nuk po hetohen për krimet që kanë bërë. Në PS ka klane. Janë gjithë ato skandale, si rasti i McGonigalit apo tenderave korruptivë, por Rama nuk është thirrur asnjëherë në SPAK. Ka prova nga inceneratorët dhe deri te abuzimet, por nuk thirret dhe përsëri drejton vendin”, shtoi ai.

Kurse për zgjedhjet e 11 majit, Maliqi u shpreh se ato u manipuluan nga partia shtet dhe raporti i OSBE/ODIHR i rrëzoi ato.

“Sipas raportit të OSBE/ODIHR zgjedhjet janë të rëna. De fakto ajo i rrëzoi ato. Çështja është se çfarë do të bëjë opozita, duhet një reagim i fortë pas gjithë këtyre skandaleve”, u shpreh ai.

Dhe më tej ai komentoi më tej zhvillimet brenda shtëpisë së socialistëve:

“Mendoj se shprehja e Ramës, që nuk vendos dot rend e siguri në Shqipëri, ku thoshte se ‘kriminelët të hanë kokën’, tani po ndodh brenda vetë Partisë Socialiste, po hanë kokat mes tyre.”

Maliqi mendon se hetimet ndaj Ballukut mund të mos lidhen drejtpërdrejt me veprimet për të cilat ajo duhet të mbahet përgjegjëse.

“Besoj se nuk po akuzohet për veprat penale që kanë bërë. Balluku është për gjëra të tjera nga ato që ka bërë, nuk është thënë siç duhet për veprat që ka kryer. Ta shikojmë si do dalë në fund”, u shpreh ai./Panorama