Kalimi i shqiptarëve nëpër territorin e Serbisë,veçanërisht gjatë pushimeve verore, është shndërruar në çështje alarmante që kërkon ndërhyrje të menjëhershme të Bashkësisë Ndërkombëtare.

Qytetarët e Kosovës që prej dekadash jetojnë dhe kontribuojnë në vendet e Evropës Perëndimore, çdo vit përballen me maltretime të padrejta nga autoritetet serbe.

Ata gjatë kalimit nëpër territorin e Serbisë janë arrestuar dhe arrestohen arbitrarisht me akuza të fabrikuara për pjesëmarrje në Ushtrinë Çlirimtare të Kosovës.

Edhe pse shihet qartë që shumica prej tyre kanë lindur në vendet e Evropës Perëndimore dhe nuk kanë asnjë lidhje me konfliktin e viteve ’97- ‘99.

Këto veprime janë manifestim i urrejtjes shekullore që politika zyrtare e Beogradit vazhdon t’i zbatojë edhe sot kur bëhen përpjekje maksimale për integrimin e Ballkanit në Evropë.

Kryeministri i Republikës së Kosovës, Albin Kurti, ka apeluar që bashkatdhetarët të shmangin kalimin nëpër Serbi.

Mirëpo, kjo këshillë apo ky sugjerim nuk mjafton. Duhet veprim i organizuar dhe institucional për të garantuar sigurinë e qytetarëve tanë.

Familjet shqiptare me 6–8 anëtarë shpesh nuk kanë mundësi financiare të përballojnë çmimet e larta të fluturimeve.

Është e papranueshme dhe për t’u dëshpëruar që pas 17 vitesh pavarësi, Kosova ende nuk ka ndërtuar një flotë kombëtare ajrore me kapacitete minimale avionësh për të siguruar transport të sigurt dhe të përballueshëm për qytetarët e saj.

Arrestimet e mërgimtarëve janë pjesë e një strategjie të paramenduar nga Serbia për të krijuar tensione politike dhe për t’i shfrytëzuar financiarisht shqiptarët përmes një sistemi të padrejtë gjyqësor dhe avokatësh të kontrolluar nga shteti.

Pasojat janë të rënda: dhjetëra qytetarë rrezikojnë humbjen e vendeve të punës, dhe pësojnë dëmtime të shëndetit dhe trauma afatgjata për shkak të trajtimit çnjerëzor.

Prandaj, Bashkësia Ndërkombëtare, përfshirë Bashkimin Evropian, OSBE-në, Këshillin e Evropës dhe organizatat ndërkombëtare për të drejtat e njeriut, duhet të ndërhyjë pa vonesë.

Këto institucione kanë përgjegjësi morale dhe ligjore të ushtrojnë presion të drejtpërdrejtë ndaj Serbisë për të ndalur menjëherë burgosjet arbitrare dhe për të respektuar liritë themelore të lëvizjes.

Qeveria e Kosovës, në bashkëpunim me shtetet mike si SHBA-të, Gjermaninë, Britaninë e Madhe, Zvicrën, Francën, Austrinë dhe vendet Skandinave, duhet të ndërmarrë hapa konkretë për të ofruar korridore të sigurta dhe alternativa transporti që i mbrojnë mërgimtarët nga maltretimi.

Koha e reagimeve të buta nuk po jep rezultate, tani nevojitet veprim i fuqishëm dhe i koordinuar ndërkombëtar për të mbrojtur qytetarët tanë dhe dinjitetin e shtetit të Kosovës.

ARIF EJUPI