Fajësia e përgjithësuar, është ikje nga emërtimi i fajtorit. Edhe mos konstituimi i organeve të Kuvendit, pas 50 herë të vazhdimit të një seance të vetme, ka një fajtor faktik: Dhe kjo është opozita, humbëse e përsëritur të zgjedhjeve parlamentare. Opozita kishte humbur shpresën për fitore, qysh kur LVV, edhe pse rrezikoi shumë, ngulmërisht, arriti të marrë një seri veprimesh, për ta zhbërë pushtetin paralel në veriun e Kosovës. “Komandantët” e shantazhuar të PAN-it, kryesuar nga Hashim Thaçi, në këmbim të lirisë personale e grupore, kishin lejuar dualizimin të pushtetit me Serbinë në veri, madje për ta zyrtarizuar tradhtinë e tjetërsimit të një pjese të territorit, filluan lobimin e paguar. Për këtë janë zbuluar, madje edhe me fatura të nënshkruara. Ishte një tradhti e ngeshme, me një angazhim zyrtar të kupolës shtetërore, unike në botë!

     Bllokda nuk ka lindur në Kuvend. Përkundër, bojkoti është planifikuar ende pa filluar fushata parazgjedhore. Koalicioni PDK-AAK-NISMA, pothuaj se, e legalizoi koalicioni pas zgjedhor, duke bërë shkelje të Kushtetutës, sepse të ligjshme janë vetëm koalicionet parazgjedhore. LDK-ja u pozicionua si neutrale, por klani Mustafa, gjithnjë aktiv, përtëriu miqësinë e vjetër, për t`u bërë sërishmi -bisht e patericë- e persekutorës të saj PDK. Kjo shokoi jo vetëm anëtarësinë dhe elektoratin e saj, por edhe shqiptarët e përbotshëm. LDK-ja me Listen Serbe, janë përcaktuese të rikthimit të PAN-it kriminal në pushtet. Dhe, kjo penalizon dhe do ta godiste, me fund, partinë zëmadhe të Presidentit Rugova.

     II. Kosova nuk ka kurrfarë krize objektive. Kjo e ashtuquajtur “krizë”, është e stisur, e shpikur, e shpifur. Sepse zgjedhjet e lira dhe demokratike, të 9 shkurtit 2025, kanë përcaktuar fituesin bindshëm, pothuaj se, plebishitar, Lëvizjen Vetëvendosje. Dhe, rezultati është pranuar pa asnjë mëdyshje. Kjo është e mjaftueshme, për të vazhduar me proceset tjera, të krijimit të organeve kuvendore dhe të institucioneve tjera qeveritare.

     Pesë muaj të kaluar nga zgjedhjet e shkurtit, ishte kohë e humbur, kot se koti. Mohimi i votimit të fshehtë nga opozita, edhe pse i parashikuar nga Kushtetuta, ka bllokuar punën normale të Kuvendit. Kjo “krizë vazhdon të dëmtojë Kosovën, e cila ka procese të bollshme, që presin zgjidhje. Njëri nga dëmet është edhe pamundësia e shfrytëzimit të donacioneve ndërkombëtare, të destinuara për Kosovën. Por që rregullat dhe ligjet përkatëse e kushtëzojnë me krijimin e institucioneve kuvendore dhe qeveritare. Pra, destinimi kërkon adresim dhe nënshkrime valide, nga përfaqësues qeveritar dhe shtetëror. Kjo është në aspektin politik, aq më parë kur Kosova është në thjerrëzën monitoruese ndërkombëtare.

     Gjithçka varet nga partitë politike. Ato janë çelësi i zgjidhjes të “krizës”. Opozita pranoi humbjen e zgjedhjeve juridikisht, ligjërisht, por jo edhe faktikisht, konkretisht! Pranimi i humbjes u bë lehtësisht, por zbatimin ligjor, obligativ po e mohon, duke luajtur “kartën” e bojkotit, për krijimin e institucioneve, fillimisht, kuvendore, në plan, për të vazhduar me ato qeveritare, madje në pritje për bllokadë presidenciale, bazuar në një -palo- Kushtetutë, të imponuar nga Serbia dhe BE-ja! Ironikisht dhe cinikisht, shteti feston datën Kushtetuese, huazuar nga qeveria moniste e filosllavit Enver Hoxha!

     Opozita e koalicionuar e PAN-it, përkatësisht, subjektet politike PDK-AAK-NISMA, është mërdhezur, për ta rikthyer pushtetin e uzurpuar, me dhunë e gjak, për dy dekada radhazi. Ajo, falsifikueshëm, përvetësoi luftën e pa bërë, për të justifikuar tenderimet korruptive e privatizime të egra e grabitçare, zhvati Kosovën me hajni zyrtare, duke uzurpuar fabrika, ndërmarrje shtetërore, ferma bujqësore, toka e troje, ndërtesa shtetërore dhe banesa të braktisura të qytetarëve të Kosovës, pavarësisht përkatësive etnike, nga disa “komandantë” mujsharë e kriminelë, me bandat e tyre të harlisura dhe jashtë çdo norme njerëzore e morale.

     Ndërkombëtarët, kryesisht, miqtë e pakët të Kosovës, për ta futur Kosovën në organizmat e ndryshme evropiane e botërore, sugjeruan reforma të thella, me theks të veçantë luftimin e krimit të organizuar dhe korrupsionit industrial, hajnisë zyrtare. Shtetarë e pushtetarë, kryesisht, “komandantët” hileqarë dhe cuba klasikë, kishin rrënuar, qëllimshëm, Sistemin e Drejtësisë”, duke kapur e korruptuar Prokurorinë dhe Gjykatat, gjithnjë në bashkëpunim me Serbinë dhe aleatët e saj, Rusinë dhe të tjerët. Krerët shtetërorë dhe pushtetarë, me shantazhimet me dosjet penalizuese të luftës dhe të pas luftës, kryesisht, për vrasje të paligjshme, ndalime arbitrare dhe torturë çnjerëzore, të kundërshtarëve politikë shqiptarë, opozitës PAN-iste , e bëri të “heshtnin si peshqit!”

     Qeveria e LVV e gjeti Kosovën “hallakamë”, me veriun e saj “mollë e ndaluar” për shqiptarët. Parësi e saj ishte çarje e bllokadës në veriun e Kosovës. Përmes pengesave shumëpalëshe: Serbisë, me aleatët e saj besnike, Rusinë, një pjesë e BE-së, me Borellët e Lajçakët, argatë të Serbisë, arriti të bëjë mrekullinë, shtrirjen e sovranitetit në veri, qoftë edhe të brishtë. Në këto veprime të Kurtit, opozita e Kosovës po e kundërshton atë, madje edhe për ndërtimin e urave të reja mbi Lumin Ibër, është bërë palë me armiqtë të Kosovës. Kjo është kulmore, që dëshmon se opozita e Kosovës, është bërë “përrallë me tupan”, që kalon nga përralla në tradhti kombëtare. Megjithatë, provoni të reflektoni, qoftë edhe në prag të fundosjes politike e morale.

      Për ndryshim nga “kriza” që është e stisur, bllokada është faktike. Arsyeja bazë është kërkesa juridike për bërjen e Vetting-ut dhe të Byrosë për verifikimin e pasurive të paligjshme. Kjo i prekë, pashmangshmërisht, subjektet politike PDK-AAK-NISMA, të strehuara në akronimin PAN, përkatësisht, eksponentët e tyre, të zhytur  në krime vrastare dhe hajni zyrtare e private. Andaj, rezistenca për pengimin e veprimit ligjor, është e madhe sa bjeshka! Sepse zbatimi i Vetting-ut dhe Byrosë në fjalë, i lakuriqëson “komandantët” dhe eksponentët e partive-banda të koalicionuara në PAN, si kriminelë vrastarë e hajna zyrtarë, deri te rrezikimit të zhbërjes të shtetit, duke tjetërsuar pjesë të tokave, për tri shtetet fqinjë.

     Prandaj bllokada është e çimentuar, e korracuar rëndshëm, ngaqë koalicioni i madh është i çeliktë: Serbia me aleatët sllavë; disa shtete nga BE-ja dhe opozita aktuale PAN, janë të gatshëm të bllokojnë dhe ta dështojnë çdo skenar, që do të provojë zhbllokimin e punës normale të Kuvendit të Kosovës.

     Citojmë falsifikimin e Kushtetutës, nga kreu zyrtar i PDK-së, Memli Krasniqi, i cili thotë: …të bie poshtë insistimi i turpshëm dhe jo kushtetues për votim të fshehtë…”, shpërfaqë frikën e partisë së tij, nga votimi i fshehtë! Skenari bazë, madje i vetëm, për daljen nga kjo bllokadë, është zbatimi i Kushtetutës të Republikës të Kosovës, ku shkruhet se “zgjedhja e kryetarit të Kuvendit bëhet me votim të hapur, të fshehtë dhe në forma të tjera”. Dhe, përqendrimi i LVV, në zbatimin e Kushtetutës, përfshi edhe të votimit të fshehtë, është tërësisht, i drejtë dhe ligjor, andaj duhet të jetë skenari i vetëm, që, në asnjë rast e rrethanë, nuk duhet anashkaluar dhe as braktisur.

     Shqiptarët nuk mund të krenohen për sinqeritet, aq më pak, për ta shprehur mendimin e vetë publik, për të qenë sovran dhe me integritet. Pra, ta thotë mendimin hapur në sallën e Kuvendit. Prandaj, është votimi i fshehtë, me mendje dhe votë të lirë e demokratike. Votimi i hapur, që përjashton votimin e fshehtë, si në rastin bllokues në Kuvendin e Kosovës, është huazuar nga mendësia kriminale e diktatorëve: Stalin, Hitler, Enver Hoxha, Pol Poti dhe soji i tyre kriminelë e rrugaçerorë.

    Votimi i fshehtë është kupolë dhe shenjtëri e Demokracisë. Me këtë sentencë, absolutisht të saktë dhe të provuar në praktikë, madje katërçipërisht, pajtohen mendjet e ndritura të njerëzimit dhe bota demokratike.

     Anakronisht dhe tupërisht votimin e fshehtë e kundërshton bota obskure, e errët, e cila i pengon në mbijetesën pushtetare të përjetshme.