Rrjeti publik gjerman, ZDF, publikoi një dokumentar investigativ tronditës, që tregon edhe njëherë se mafia shqiptare po kthehet në një aktor kycc të trafikut të kokainës në botë.

Në pjesën e parë të dokumentarit, gazetari investigativ Matt Shea tregon se si shqiptarët e marrin kokainën direkt në Kolumbi nga Karteli i Golfit, një nga më të rrezikshmit në botë.

Ky kartel është shpallur organizatë terroriste nga administrata e re amerikane.

Drejtuesit e këtij karteli thonë se shqiptarët furnizohen me sasi të mëdha kokaine, deri në 7 ton.

Më pas, Matt Shea udhëton drejte Shqipërisë.

“Ku përfundojnë miliardat? Për të zbuluar këtë, udhëtoj në Shqipëri, ku krimi i organizuar është i ankoruar thellë në Shqipëri. Madje ka politikanë të lartë me lidhje me drogën,” thotë gazetari i njohur.

Ai takohet në Shqipëri me gazetarin Artan Hoxha përpara kompleksit të familjes Hajri.

Hoxha shpjegon se Hajrët kanë dy dekada që merren me trafikun e drogës. Sipas tij, ata rrëmbyen një person, Jan Prengën, pasi një familjar i tij u kishte vjedhur një sasi kokaine.

Droga që u vodh i përkiste Kartelit të Golfos, thotë gazetari shqiptar.

Sipas Matt Shea, rasti i Prengës tregon se kokaina shqiptare shitet në Britani, kurse të ardhurat pastrohen në pasuri të patundshme në Shqipëri.

Hoxha thekson se shqiptarët kanë shkuar direkt në burim për të siguruar kokainën me çmimin me minimal.

“Për herë të parë dëgjoj që Karteli i Golfos dhe shqiptarët janë partnerë të barabartë,” thotë gazetari Shea.

Ai interviston edhe dy eksponentë të rëndësishëm të krimit të organizuar shqiptar. Njërin prej tyre madje e interviston në Mal të Zi, pasi është në kërkim.

Ata pranojnë se drogën e marrin nga karteli famëkeq.

“Kemi marrëdhënie shumë të mira me kartelin. Pa ta, nuk ka drogë. Droga vjen nga Karteli i Golfos në Shqipëri dhe më pas shpërndahet nëpër Europë,” thonë ata.

Dokumentari thekson në mënyrë të përsëritur se sasitë e mëdha të kokainës vijnë fillimisht në Shqipëri.

Kjo fakton edhe njëherë se pavarësisht se përmes Portit të Durrësit futen sasi gjigante kokaine, prej vitesh aty nuk kapet drogë.

Kokaina më pas shpërndahet drejt Europës perëndimore në rrugë të ndryshme. sn