Ministri i Mbrojtjes së Kosovës, Ejup Maqedonci, ka deklaruar se ekziston rreziku që grupe të armatosura, të cilat mbështeten nga strukturat në Beograd, mund të përsërisin sulmin terrorist në Kosovë, me synime politike si ai i Banjskës së viti të kaluar.

Maqedonci u shpreh se grupet terroriste me në krye Milan Radoiçiçin, që kryen sulmin terrorist në Kosovë, enden të lirë, trajnohen e zhvillojnë aktivitete në Serbi.

Megjithatë ai vuri theksin në faktin që Kosova ka marrë masa dhe ka krijuar kushte për të parandaluar këto rreziqe, duke shtuar këtu edhe prezencën e forcave të KFOR përgjatë vijës kufitare me Serbinë.

“Duke pasur parasysh shtrirjen administrative të vendit tonë tani më edhe në katër komunat veriore të vendit tonë, gjithashtu prezencën e shtuar të Policisë së Kosovës në atë pjesë, ndalimin e aktiviteteve të ndryshme ilegale duke përfshirë edhe zyrat ilegale që funksionin në pjesën veriore të vendit tonë. Duke pasur parasysh që pas sulmit të 24 shtatorit pjesa më e madhe e grupit që drejtohej nga Radoiçiq janë larguar për në Serbi, normalisht rreziku brenda territorit tonë është zvogëluar. Por gjithmonë mbetet rrezik mundësia që grupe si grupi Radoiçiq, dhe vetë grupi Radoiçiq të zhvilloj ndonjë aktivitet të ngjashëm terrorist me synime politike, gjithmonë i mbështetur nga strukturat në Serbi. Përderisa grupi i Radoiçiqit dhe grupet tjera kriminale dhe terroriste qarkullojnë të lira në Serbia, për më tepër trajnohen dhe zhvillojnë aktivitetet atje, vlerësojmë që prapë mund të ketë rreziqe të ngjashëm. Por gjithashtu duhet theksuar edhe fakti që tani më janë krijuar shumë parakushte që kjo të mos ndodh dhe këto parakushte janë krijuar nga institucionet tona por edhe nga prezenca e shtuar e trupave të KFOR përgjatë vijës kufitare me Serbinë. Kohët e fundit është vërejtur një shtim i numrit të KFOR sidomos në brezin kufitar. Kjo është bërë pikërisht për të penguar futjen grupeve të tilla në Kosovë”, ka thënë ai.bw

Prishtinë, 17 shtator 2024

Organizuar nga Ministria e Industrisë, Ndërmarrësisë dhe Tregtisë, sot u mbajt në ceremonia e nënshkrimit të marrëveshjeve për mbështetje financiare të 167 bizneseve vendore, përfituese të skemës së përkrahjes financiare për ndërmarrjet mikro, të vogla e të mesme, për blerjen e makinerive prodhuese dhe përpunuese. Në këtë ngjarje të rëndësishme morën pjesë Kryeministri i Republikës së Kosovës, Albin Kurti, së bashku me ministren e Industrisë, Ndërmarrësisë dhe Tregtisë, Rozeta Hajdari.

Me një vlerë prej 4.4 milionë eurosh, prej të cilave përfituese janë përzgjedhur 167 biznese prodhuese, kryeministri Kurti tha se po ofrojmë mbështetje direkte për blerjen e makinerive dhe pajisjeve, të cilat do të ndihmojnë që ndërmarrjet të zhvillohen, modernizohen dhe kontribuojnë në zhvillimin e mëtutjeshëm të ekonomisë së vendit tonë.

Në fjalën e tij hyrëse, kryeministri Kurti, theksoi se me vizionin për qeverisje të mirë demokratike, zhvillim të qëndrueshëm ekonomik, mirëqenie me siguri dhe barazi, krijimin e një mjedisi të favorshëm të të bërit biznes dhe rritja e konkurrueshmërisë së ndërmarrjeve tona mbeten prioritete të pandryshuara.

Me qëllim të transformimit në fushën e industrisë në vendin tonë, Qeveria e Kosovës, për herë të parë që nga periudha e pas luftës, ka miratuar Politikën Industriale 2030, e cila synon që industria e Kosovës të transformohet në një industri e cila është integruar globalisht, që prodhon produkte me vlerë të shtuar të lartë, të cilësisë në ngritje dhe me punësim dinjitoz për qytetarët.

Në këtë ngjarje kryeministri përmendi edhe përkrahjen për industrinë prodhuese e cila sa i përket potencialit në eksport është rritur ndjeshëm vitet e fundit, në radhë të parë ai përmendi mbështetjen ndaj Fondit Kosovar Garanci Kreditore me 36 milionë euro, nga ana e Qeverisë së Kosovës. Tutje, ai shtoi se janë krijuar instrumente financiare për garantimin e investimeve të bashkatdhetarëve tanë, kjo është arritur nëpërmjet Dritares për Investime të Diasporës. Po ashtu, vetëm në këto tri vitet e fundit, përfshirë edhe këtë vit, 706 ndërmarrjeve mikro, të vogla dhe të mesme, u është dhënë mbështetje financiare në rritjen e konkurrencës në vlerë prej mbi 20 milionë euro, përmes Agjencisë për Investime dhe Përkrahjen e Ndërmarrjeve (KIESA).

Ndërkaq, në anën tjetër, bazuar në raportet e fundit të Bankës Qendrore të Kosovës, vlerësimet për vitin 2024 kanë treguar se Kosova ka pasur një rritje ekonomike prej 3.9% në Kosovë, si dhe rënie të inflacionit që natyrisht është kundrejt importit, i cili ndikon negativisht në bruto produktin vendor. Ndërkaq, sa i përket raporteve ndërkombëtare nga Banka Botërore, Fondi Monetar Ndërkombëtar, dhe Organizata për Bashkëpunim dhe Zhvillim Ekonomik, parashihet që sektori industrial në vendin tonë të rritet me 3.6%, me çmime bazë konstante për vitin 2024, pasi që sektori industrial përbën rreth 13.2 % e BPV-së.

“Kosova ka shënuar zhvillim dhe rritje të shpejtë, duke shënuar një normë mesatare vjetore të rritjes së PBB-së prej 6.2% në bazë vjetore gjatë këtyre tre viteve të fundit mesatarisht. Prej vitit 2021 deri në këtë vitin 2024 Bruto produkti vendor i vendit tonë ose ekonomia e Kosovës është rritur për 33%”, potencoi kryeministri Kurti para të pranishmëve.

Në përmbyllje kryeministri deklaroi se me qëllim të mbështetjes se sektorit privat si dhe reformat e krijuara tregojnë se Qeveria është e angazhuar dhe e përkushtuar maksimalisht në krijimin e mundësive të reja të punësimit si dhe më anë të kontributit dhe punës në ndërmarrje e tyre të shpalosin potencialin e ndërmarrjeve në Kosovë si shtytës kryesor për zhvillim të qëndrueshëm ekonomik, social dhe mjedisor.

Në lidhje me këtë ngjarje edhe Ministrja e Industrisë, Ndërmarrësisë dhe Tregtisë, Rozeta Hajdari tha se vërtet sot është një ngjarje e veçantë dhe e rëndësishme për ne pasi kemi përfunduar publikimin e listës përfundimtare të 167 bizneseve prodhuese që do të përfitojnë nga mbështetja e grantit për blerjen e makinerive prodhuese, përpunuese. ‘Urime të gjithëve në këtë ngjarje të veçantë”, u shpreh ajo.

Fjala e plotë e kryeministrit Kurti:

E nderuara znj. Rozeta Hajdari, Ministre e Industrisë, Ndërmarrësisë dhe Tregtisë,
I nderuari z.Resul Makreshi, zëvendësministër në Ministrinë e Industrisë, Ndërmarrësisë dhe Tregtisë,
I nderuari z.Zef Dedaj, ushtrues detyre i Drejtorit të Përgjithshëm të KIESA-s,
Të nderuar deputetë të Kuvendit të Kosovës,
Të nderuar përfaqësues të bizneseve nga industria prodhuese, përpunuese në vendin tonë
Të nderuar të pranishëm,
Zonja dhe zotërinj,

Është kënaqësi e veçantë të ndodhem sot këtu, në ceremoninë e nënshkrimit të marrëveshjeve për mbështetje financiare të 167-të bizneseve vendore, përfituese të skemës së përkrahjes financiare për ndërmarrjet mikro, të vogla e të mesme, për blerjen e makinerive prodhuese dhe përpunuese.

Me përkrahjen financiare prej mbi 4.4 milionë euro po ofrojmë mbështetje direkte për blerjen e makinerive dhe pajisjeve. Ato do të ndihmojnë që ndërmarrjet të zhvillohen, të modernizohen dhe të kontribuojnë në zhvillimin e mëtutjeshëm të ekonomisë sonë të gjithmbarshme vendore, por edhe të rritjes së bizneseve individuale.

Me vizionin tonë për qeverisje të mirë demokratike, zhvillim të qëndrueshëm ekonomik mirëqenie me siguri dhe barazi, krijimi i një mjedisi të favorshëm të të bërit biznes dhe rritja e konkurrueshmërisë së ndërmarrjeve tona mbeten prioritete të pandryshuara.

Për herë të parë që nga periudha e pas-luftës, Qeveria e Republikës së Kosovës e ka miratuar Politikën Industriale 2030. Kjo me qëllim që të transformojmë industrinë e Kosovës në një industri e cila është integruar globalisht, që prodhon produkte me vlerë të shtuar të lartë, të cilësisë në ngritje dhe me punësim dinjitoz për qytetarët.

Me politikat tona zhvillimore, po e rrisim ekonominë e vendit dhe po i mbështesim si asnjëherë më parë edhe qytetarët dhe ndërmarrësit e industrisë prodhuese gjithashtu në rritje. Gjatë tri viteve të fundit, përkrahja për industrinë prodhuese me potencial eksporti është rritur ndjeshëm dhe unë këto do ti përmend disa prej veprimeve kryesore:

Së pari, Qeveria e Republikës së Kosovës ka mbështetur Fondin Kosovar për Garanci Kreditore me 36 milionë euro përgjatë vitit 2023 dhe këtij vitit 2024 në të cilin ndodhemi. Nga ky Fond janë garantuar 1,222 kredi të 1,074 bizneseve, në vlerë prej 82 milionë euro kredi të disbursuara nga garantimi prej këtij Fondi, të mbështetur vetëm nga kapitali i dhënë nga Qeveria në këtë Fond, gjatë këtyre dy viteve të fundit. Nga këto kredi janë shtuar 2,230 vende pune.

Së dyti, nëpërmjet Dritares për Investime të Diasporës, dhe garantimin e investimeve të diasporës, kemi krijuar instrumente financiare për garantimin e investimeve të bashkatdhetarëve tonë. Përmes kësaj dritareje, mundësohet garantimi i kredive investuese deri në 3 milionë euro, ndërkaq e tërë dritarja parashihet që të arrijë deri në 100 milionë euro. Bashkatdhetarët nga kudo në botë, e kanë mundësinë që të investojnë edhe në Kosovë.
Së treti, përmes Agjencisë për Investime dhe Përkrahjen e Ndërmarrjeve (KIESA), gjatë tri viteve të fundit përfshirë këtë vit, kemi dhënë mbështetje financiare në rritjen e konkurrencës së 706 ndërmarrjeve mikro, të vogla dhe të mesme, në vlerë prej mbi 20 milionë euro. Këtë mbështetje e kemi shpërndarë përmes skemave të granteve për avancim të teknologjisë, me qëllim rritjen e prodhimit dhe rritjen e eksportit të produkteve vendore, certifikimin e produkteve, trajnimin, digjitalizimin e ndërmarrjeve, si dhe mbështetje financiare për zejtarët artizanë, me synim krijimin, zhvillimin dhe forcimin e mëtejshëm të artizanateve.

Për ndërkombëtarizim të ndërmarrjeve tona dhe rritje të eksporteve, që këto tre vite janë dyfishuar kemi mbështetur rreth 400 biznese vendore për pjesëmarrjen në mbi 50 panaire ndërkombëtare për mallra, shërbime dhe aktivitete të turizmit, duke promovuar mbi 1500 produkte në vlerë prej 3.2 milionë euro.

Me qeverisjen e mirë, besueshmërinë dhe kënaqëshmërinë e lartë të qytetarëve, reformat ekonomike, përgjegjshmërinë fiskale, mbështetjen e investimeve përmes garantimit të kredive, dhe krijimin e skemave të granteve për sektorin e biznesit, Kosova po bëhet çdo herë e më shumë vend që siguron prosperitet ekonomik e mirëqenie për të gjithë.

Andaj edhe nuk është e befasishme që ashtu siç janë dyfishuar eksportet, janë dyfishuar edhe investimet e huaja direkte përmes investimeve të ndërmarrjeve të cilat vijnë nga jashtë dhe në këtë mënyrë kanë përfituar për vete sepse jemi vend i leverdishëm për të investuar, por gjithashtu edhe ka ndihmuar në rritjen e punësimit tek ne, i cili është rritur gjithashtu në masë përmbajtjesore gjatë këtyre tri viteve.

Kosova ka shënuar zhvillim dhe rritje të shpejtë, duke shënuar një normë mesatare vjetore të rritjes së PBB-së prej 6.2% në bazë vjetore gjatë këtyre tre viteve të fundit mesatarisht. Prej vitit 2021 deri në këtë vitin 2024 Bruto produkti vendor i vendit tonë ose ekonomia e Kosovës është rritur për 33%.

Me një normë të inflacionit prej vetëm 1.4% për muajin gusht, pra muajin që lamë pas sivjet. Kosova ka pasur gjithashtu edhe borxhin e përgjithshëm më të ulët krahasuar më shtetet e Ballkanit Perëndimor, me vetëm 17.3% në vitin 2022.

Raportet e fundit të Bankës Qendrore të Kosovës vlerësojnë për vitin 2024 një rritje ekonomike prej 3.9% në Kosovë, si dhe rënie të inflacionit që natyrisht është kundrejt importit i cili ndikon negativisht në bruto produktin vendor.

Raporte të rëndësishme ndërkombëtare përfshirë ato nga Banka Botërore, Fondi Monetar Ndërkombëtar, dhe Organizata për Bashkëpunim dhe Zhvillim Ekonomik, parashohin rritje të sektorit industrial në vendin tonë me 3.6%, me çmime bazë konstante për vitin 2024. Sektori industrial përbën rreth 13.2 % e BPV-së.

Të gjitha këto reforma, dhe progresi në mbështetje të sektorit privat, tregojnë se jemi të përkushtuar e të angazhuar maksimalisht për juve si biznese, si dhe krijimin e mundësive të reja të punësimit.

Duke ndihmuar bizneset ne ndihmojmë edhe shoqërinë tonë meqenëse ju bartni barrën kryesore të punësimit në vendin tonë. Dhe për këtë ju jemi falënderues e mirënjohës sepse qytetarët e Republikës tonë duke u bërë punëtorë në ndërmarrjet e juaja edhe kontribuojnë në ato ndërmarrje edhe në ekonominë e vendit por gjithashtu edhe lartësohen për veten e tyre individualisht e familjarisht.

Me bashkëpunimin dhe përkushtimin e të gjithëve, edhe të Qeverisë edhe të sektorit privat jam i bindur se do ta shpalosim potencialin e ndërmarrjeve tuaja e tonat në Kosovë si shtytës kryesor për zhvillim të qëndrueshëm ekonomik, social dhe mjedisor.

Prishtinë, 16 shtator 2024

Kryeministri i Republikës së Kosovës, Albin Kurti bashkë me ministrin për Komunitete dhe Kthim, Nenad Rashiq, mirëpriten në Prishtinë për një mëngjes pune bashkëthemeluesin dhe ish-udhëheqësin e Lidhjes së Social Demokratëve të Vojvodinës, Nenad Çanak, i shoqëruar nga Mitropoli i Kishës Ortodokse të Malit të Zi, Boris Bojoviq. Në takim ishte edhe Mark Baskin, profesor dhe këshilltar i lartë në Qendrën për Dialog Humanitar.

Gjatë bisedës u diskutua mbi çështje aktuale, zhvillimet në rajon, pasojat e vazhdueshme të agresionit ushtarak rus në Ukrainë dhe rrezikun që lufta atje vazhdon të paraqes për sigurinë e kontinentit të Evropës dhe rajonin e Ballkanit. Millan Çanak, djali i Nenad Çanak, që po ashtu ishte në këtë takim e i cili së fundmi është kthyer nga një mision humanitar në Ukrainë, ndau nga përvoja e tij atje dhe foli për gjendjen në terren, trimërinë dhe moralin e lartë të ushtrisë ukrainase në fushëbetejë dhe për mobilizimin qytetar për rezistencë. Në takim u diskutua edhe për raportet e Kosovës me Serbinë, për historikun, aktualitetin dhe perspektivën e tyre, dhe për gjendjen e pakicës serbe në Kosovë.

Kryeministri Kurti theksoi se agresioni i Rusisë ndaj Ukrainës ka shpërfaqur qartë rreziqet që regjimet autoritare paraqesin për shtetet fqinje, përveçse për të drejtat e njeriut dhe mirëqenien e popullatës vendëse. Ai veçoi rëndësinë që demokratizimi i shoqërive, pluralizmi partiak, sundimi i ligjit, mbrojtja dhe promovimi i të drejtave të njeriut dhe bashkëpunimi rajonal kanë në përballje me këto rreziqe, krahas mbështetjes të vazhdueshme ndaj Ukrainës në luftën e saj çlirimtare – të cilën Republika e Kosovës po e mbështetet fuqishëm me gjithë kapacitetet e saj.

Zyra e Kryeministrit

Policia e Kosovës ka bastisur dje disa degë të Bankës Popullore të Serbisë, dega në Kosovë, dhe Drejtorisë së Thesarit në Leposaviç.

Policia njofton se ka sekuestruar mijëra dinarë serb, dollarë amerikan, franga zvicerane dhe mijëra euro gjatë bastisjes.

Gjithashtu, janë sekuestruar edhe disa pajisje tjera, që dëshmojnë operimin e kundërligjshëm të këtyre institucioneve.

“Lidhur me rastin, me 12.09.2024 njësitet policore kanë kryer kontroll në dy lokacione, nën dyshimin se institucionet financiare kanë kryer veprat e cekura. Gjatë bastisjes janë sekuestruar; 5,772 313.00- dinarë serb, 57,626.00-dollarë amerikan, 10,835.00-euro, 2,790.00 franga zvicerane, dy shtëpiza kompjuteri dhe dy DVR të kamerave të sigurisë. Po ashtu janë sekuestruar edhe disa vula dhe dokumente të ndryshme që dëshmojnë operimin e kundërligjshëm të këtyre institucioneve”, thuhet në raportin e policisë.

Të enjten zëvendësdrejtori i policisë për veriun, Veton Elshani tha për median kosovare Telegraf, se operacioni është pjesë e një hetimi në vazhdim për krime ekonomike, konkretisht për pastrim parash.

“Me urdhëresë të Gjykatës në Mitrovicë, po bastisen lokalet e Bankës Popullore të Serbisë, dega në Kosovë dhe Drejtoria e Thesarit, Ministria e Financave në Leposaviq. Krimet Ekonomike janë duke hetuar një rast të pastrimit të parave që ka pasur lidhje me bankat më herët,” tha Elshani.

Hetimet për këtë rast janë në vazhdim, dhe më shumë detaje priten të dalin nga autoritetet përgjegjëse.bw

Banovdo (Zveçan), 10 shtator 2024

Kryeministri i Republikës së Kosovës, Albin Kurti, i shoqëruar nga ministri i Administrimit të Pushtetit Lokal, Elbert Krasniqi dhe ministri i Punëve të Brendshme, Xhelal Sveçla, vizitoi nga afër punimet që po zhvillohen në aksin rrugor që lidh zonat e Mitrovicës së Jugut me qarkoren Zubin Potok – Zveçan, me gjatësi 6.5 kilometër.

Rruga që lidh zonat e Mitrovicës së Jugut me qarkoren Zubin Potok – Zveçan, do të lehtësojë jetesën dhe qasjen e banorëve duke ndihmuar në ndërveprimin dhe ndërlidhjen e komunave veriore me komunat e tjera të vendit.

Kryeministri Kurti nënvizoi rëndësinë e kësaj rruge për thjeshtimin e lëvizjes së qytetarëve nga veriu në jug e anasjelltas, lirinë e lëvizjes dhe zhvillimin e komunave në veri të vendit, me qëllim përmirësimin e jetesës së të gjithë qytetarëve pa dallim.

Prishtinë, 9 shtator 2024

Kryeministri i Republikës së Kosovës, Albin Kurti, ka vazhduar takimet me kryetarët e komunave veriore të vendit dhe drejtorët komunalë. I shoqëruar nga ministri për Komunitete dhe Kthim, Nenad Rašić dhe ministri i Administrimit të Pushtetit Lokal, Elbert Krasniqi, kësaj radhe mirëpritën për mëngjes pune në kryeministri, Kryetarin e Komunës së Leposaviqit, Lulzim Hetemi, nënkryetaren, Marina Bogojević dhe drejtorë komunalë.

Gjatë takimit u diskutua gjerësisht mbi qeverisjen komunale në 15 muajt e fundit, shërbimet e reja, përfshirë ato që ofrohen nga agjencitë qendrore, sikurse Agjencia e Punësimit dhe Agjencia për Regjistrimin e Bizneseve, dhe praktikat e mira të vendosura me udhëheqjen aktuale. U diskutua edhe rreth sfidave të trashëguara dhe nevojën për investime kapitale për qasje në ujë të pijshëm, ndriçim publik dhe infrastrukturë, veçanërisht në fshatra dhe zona të thella të komunës.

Kryetari Hetemi, nënkryetarja Bogojević dhe drejtorët veçuan rëndësinë e dëgjimeve buxhetore që kanë mbajtur deri më tani me qytetarë nga radhët e komunitetit serb, boshnjak dhe shqiptar, me qëllim adresimin e kërkesave të tyre dhe planifikimit të projekteve dhe përgatitjet e kërkesave për mbështetjet nga niveli qendror.

Kryeministri Kurti i falënderoi drejtuesit dhe stafin e Komunës së Leposaviqit për punën dhe angazhimin e përditshëm dhe për bashkëpunimin e ngushtë me ministritë dhe Zyrën e Kryeministrit në realizimin e projekteve në interes të komunës. Bashkë me ministrat në takim, ai i ofroi kryetarit Hetemi dhe nënkryetares Bogojević, mbështetjen e tij dhe gatishmërinë për të punuar sa më afër në adresimin sa më të shpejtë të kërkesave të kësaj komune që burojnë nga nevojat e qytetarëve për vitin e ardhshëm buxhetor.

Ministria e Mbrojtjes së Shqipërisë ka bërë të ditur se kontingjenti shqiptar që sapo mori detyrën në misionin e KFOR në Kosovë, u angazhua menjëherë në stërvitjen për menaxhimin e trazirave dhe turmave të dhunshme.

Në një postim në Facebook, thuhet se trupat shqiptare janë në gatishmëri.

“Trupat shqiptarë, përkrah kolegëve nga vendet aleate, janë në gatishmëri 24h për ruajtjen e një mjedisi të sigurt dhe lirisë së lëvizjes në të gjithë territorin e Republikës së Kosovës, për të gjithë qytetarët”, thuhet në njoftim.bw