“Shikues të nderuem të ktij emisioni

sonte nji rast t’rrallë ju ftoj të shijoni,

t’veçantë padyshim,

rastin e nji çifti që n’pesdhet vjet martesë

asnjiherë nuk ka pasë shamatë as ngatrresë

e madje as ferkim!

Fillimisht ftojmë zojën që t’na tregojë

diçka ma shumë rreth kësaj përvojë

gjysëmshekullore,

diçka që t’ju vlejë edhe çifteve të ri,

si lindi e si u forcue kjo harmoni

n’jetën bashkëshortore”.

“Em shoq -tha grueja -e ka për detyrë

me ditë gjithçka, porse si natyrë

ky flet krejt rrallë,

nji herë n’jetë e ndiva t’numrojë deri n’tri

e shpresoj që mâ mos t’kem rast m’e ndi

deri sa t’jem gjallë.

Qysh n’ditën e tretë, pa hjekë mirë duvakun,

me tri fjalë të vetme ky ma diftoi cakun

kjartë e me qetsi,

atë mbasdite t’vonë lamë punën në arë

veglat edhe strajcat ngarkuem mbi gomar

për me kthye në shpi.

“Ush” i tha gomarit me zâ e me dajak,

por hajvani vendit nuk luejti aspak

taman kryeshkam!

“Deri n’tre numroj” i tha, por ai në t’vetën,

ky fill sa i tha “tre” nxori pistoletën

…e t’ja krisi “bam”!

“Tashti -m’u kthye mue -rrezik e ke pasë

ktij që na lá shndetin për samar e thasë

me i xanë vendin ti”.

“Ndoshta je tu’ u tallë?”-kceva unë përpjetë,

por ky, pa nerva hiç, m’shikjoi krejt i qetë

e tha vetëm “nji”!

“S’m’ke marrë për gomaricë”-i fola ndër sy

porse ky, krejt shkurt, më tha vetëm “dy”;

unë nisa tuj mardhitë,

tuj e pa se ç’ e zezë e gjeti gomarin

hodha fill mbi shpinë veglat e samarin

“tri” s’ndeja me pritë”…

“Tashti -tha gazetarja -po i çoj mikrofonin

zotnisë, që edhe ai të na japë opinionin

diçka ma shumë me shtue…”

“Grueja -tha ai -gjithçka t’skjaroi mirë

e unë s’kam çka shtoj mâ, pra je e lirë

ka erdhe me shkue”.

“Unë s’jam jote shoqe, as si t’gjitha gratë…”

por si përgjigje mori veç nji “Nji” të thatë,

çka n’ftyrë e ka terë.

“Kjo sjellje -shtoi ajo -asht e pakuptim…”

por kur ndigjoi “Dy” ndërpreu çdo diskutim

e u zhduk menjiherë.

“Çou e na shtro bukën” -tha burri me ton.

“Po njiky avaz, gjithnji veç urdhnon!”

tha grueja ndër dhamë.

“Nji” -foli ai. “Çka m’ka gjetë me ty!”

u ankue ajo, por sa ndjeu fjalën “dy”

brofi fill e n’kamë…