Maja Kocijançiq, zëdhënëse e shefes së BE-së për Politikë të Jashtme dhe Siguri, Federica Mogherini, ka njoftuar se sot në Bruksel, delegacionet e Prishtinës dhe Beogradit, kanë zhvilluar bisedime për zbatimin e marrëveshjeve të arritura në dialogun e ndërmjetësuar nga Brukseli.

Kocijançiq ka thënë se dy palët, në dialogun teknik, kanë biseduar për marrëveshjen për lëvizjen të lirë, atë për drejtësi dhe marrëveshjen për Menaxhimin e Integruar të Kufirit (IBM).

“Në dialogun e ndërmjetësuar nga Brukseli, sot është diskutuar për zbatimin e marrëveshjes për lëvizje të lirë, drejtësi dhe Menaxhimit të Integruar të Kufirit (IBM). Bisedimet do të vazhdojnë nesër për Asociacionin e komunave me shumicë serbe, energjinë, urën në Mitrovicë. Bisedime në atmosferë konstruktive”, ka shkruar ajo në Twitter.

🇪🇺 facilitated #dialogue: @markodjuric & Avni #Arifi discussed today in Brussels implementation of agreements on Freedom of Movement, Justice, IBM. Discussions continue tmrw w Association/Community, Energy, Mitrovica Bridge. Cordial, result oriented, constructive atmosphere.

— Maja Kocijančič (@MajaEUspox) February 26, 2018

Dialogu, në nivelin teknik, ndërmjet Kosovës dhe Serbisë ishte ndërprerë më 16 janar, nga delegacioni i Serbisë, pas vrasjes, në rrethana ende të pasqaruara, të njërit prej përfaqësuesve politik të serbëve të Kosovës, Oliver Ivanoviq.