Të dielën e 25 prillit rreth 3 milionë e 600 mijë shqiptarë me të drejtë vote janë thirrur në votime për të zgjedhur 140 deputetët e Parlamentit të ardhshëm. Për të ushtruar të drejtën e votës, zgjedhësit do të duhet të paraqiten në 5199 Qendra Votimi.
Kushtetuta dhe Kodi Zgjedhor përcakton se Shqipëria ka një sistem zgjedhor proporcional rajonal, ku në secilin prej 12 qarqeve të vendit prodhohen mandate, bazuar në popullsinë e secilit Qark. Qarku Kukës është ai që nxjerr më pak deputetë, vetëm 3. Ndërkohë që nga Tirana, e cila ka dhe numrin më të madh të popullsisë në vend, përftohen 36 mandate ligjvënësish.
Në këto zgjedhje parlamentare, do të garojnë 1841 kandidatë për deputetë, që përfaqësojnë 12 parti, koalicione zgjedhore e kandidatë të pavarur.
Pas ndryshimeve në Kodin Zgjedhor, zgjedhjet e 25 Prilli, sjellin risi. Në të njëjtën Fletë Votimi Zgjedhësit do të duhet të votojë për partinë dhe kandidatin preferencial për deputet, që në Fletën e Votimit do të identifikohet nga një numër e jo emri i tij.
Ligji saktëson se së pari numërohen votat për subjektet zgjedhore e më pas, për kandidatët për deputetë. Lista fituese e kandidatëve për deputetë pas numërimit të votave për partitë, mund të thyhet vetëm nëse një kandidat që renditet poshtë vijës së kuqe ka marrë më shumë preferenca se mesatarja e votave të partisë.
Për herë të parë në Shqipëri do të aplikohet teknologjia në zgjedhje. Në çdo Qendër Votimi do të jenë të instaluara pajisje elektronike, të cilat do të kryejnë identifikimin elektronik të zgjedhësve. Një mjet ky i cili do të mundësojë shmangien e votimit të dyfishtë, votimit familjar apo votimit për një person tjetër. Ndërkohë në Zonën Administrative Zgjedhore Nr. 40, e cila përkon me Njësinë Administrative Nr. 10 në Tiranë, do të zbatohet projekti pilot për votim dhe numërim elektronik. Votuesit do të votojë në pajisjen elektronike si për subjektin politik, ashtu edhe për kandidatin preferencial.
Zgjedhjet e së dielës kanë tërhequr vëmendjen e faktorit ndërkombëtar, që do të jenë të angazhuar në vëzhgimin e tyre. Vëmendja do jetë kudo, por të ashtuquajtura zona të nxehta do tërheqim më shumë syrin e vëzhguesve ndërkombëtarë, për të cilët standardet e zgjedhjeve mbizotërojnë mbi gjithçka.
Zgjedhjet e 25 Prillit do të zhvillohen në kushte tejet të veçanta, për shkak të pandemisë së COVID-19. E për këtë çdo votues do të duhet të jetë iu pajisur me mjetet mbrojtëse. Ndërkohë që çdo pjesëtar i Qendrave të Votimit apo edhe ata gjatë numërimit, do duhet të jetë i pajisur me këto mjete mbrojtëse.
As në këto zgjedhje, qytetarët shqiptarë që jetojnë jashtë vendit nuk do të mund të votojnë. Votimin e tyre, politika ia la në dorë të Komisionit Qendror të Zgjedhjeve. Por ky mbeti vetëm një projekt në letër dhe faji për dështimin mbeti rrugëve.
KQZ: Në 230 Qendra Votimi problematika me aparaturat, procesi në dinamikë
Ora 09:30- Komisioni Qendror i Zgjedhjeve ka deklaruar se deri tani procesi i votimit po vijon normalisht.
Zëdhënësja e KQZ Drilona Hoxha tha se nuk ka pasur asnjë problem për shpërndarjen e bazës materiale, teksa në 230 qendra votimi ka pasur problematika me aparaturat.
“Nuk kemi pasuar një problem, as për bazën materiale. Qendrat e Votimit kanë qenë të pajisura me bazën materiale. Lidhur me numrin e operatorëve që do të përdorin pajisjen e identifikimit elektorin, ka pasur disa QV që nuk kanë qenë të pajisura me operatorë, në zona të thella, ku infrastruktura ka qenë e vështirë. Në këto QV nuk ka ndonjë problematikë sa i përket procesit të votimit. Pasi procesi i votimit në këto raste vijon sipas procedurave manuale. Procesi është në dinamikë. Ka pasur disa problematika në disa QV, nga 5199, 230 QV që ka pasur problematika ndoshta dhe për shkak të presionit, ndoshta dhe për shkak të mosardhjes në trajnime të komisionerëve për përdorimin e aparaturave.
Ambasadori britanik vëzhgon zgjedhjet në Durrës: Thirrje qytetarëve të votojnë
ORA 09:27 Të gjithë ambasadorët e akredituar në Tiranë janë shpërndarë në rrethe të ndryshme të vendit për të vëzhguar procesin zgjedhor.
Ambasadori i Britanisë së Madhe Dunkan Norman ndodhet në Durrës, në Qendrën e Votimit 1494 tek Pallati i Kulturës për të parë nga afër votimin.
Ai iu ka bërë thirrje qytetarëve të votojnë atë që ata mendojnë. Dunkan tha se grupet e vëzhguesve janë në teren dhe po operohet siç është vendosur më herët. BE ka 60 grupe vëzhguesin në terren.
Ambasadorja Yuri Kim thirrje qytetarëve nga Shkodra: Sot është dita juaj, shkoni dhe votoni të lirë
ORA 09:21 Nga Shkodra, ku ka shkuar për të monitoruar procesin e votimit, Ambasadorja Amerikane Yuri Kim, ka bërë thirrje për qytetarët. “Çdo qytetar shqiptarë të ketë mundësinë të votojë i lirë. Kjo është dita juaj”, tha ambasadorja amerikane. Sakaq, pritet që Ambasadorja Yuri Kim, të monitorojë procesin e votimit në Shkollën e Mesme “28 Nëntori” në qytetin e Shkodrës.
Albin Kurti voton për herë të parë në Shqipëri: Dita e zgjedhjeve është ditë e demokracisë
ORA 09:06 Kryeministri i Kosovës Albin Kurti ka votuar sot për herë të parë për zgjedhjet parlamentare në Shqipëri. Kurti votoi në kopshtin 31, në zonën e ish-Bllokut në Tiranë. Në qarkun e Tiranës, nga radhët e Lëvizjes Vetëvendosje kandidon si i pavaruar, Bojken Abazi. Po ashtu, LVV ka garues edhe në Gjirokastër e Lezhë.
“Dita e zgjedhjeve është ditë e demokracisë, i ftoj qytetarët që të respektojnë Atdheun duke votuar dhe duke bërë zgjedhjen më të mirë sipas parimeve. Dita është e bukur, me diell, e diel dhe do jetë deri në mbrëmje.” u shpreh Kurti në një prononcim për mediat.
Basha thirrje qytetarëve: Sot ditë historike për kombin. Dilni e votoni masivisht për fëmijët dhe familjen!
ORA 09:05 Fill pasi votoi në Njësinë numër 8 në kryeqytet, në prani të votuesve për herë të parë, kryedemokrati Lulzim Basha u ndal për një prononcim për gazetarët e pranishëm. Basha tha se dita e sotme është historike për vendin. Ai i bëri thirrje qytetarëve të dalin e të votojnë masivisht, për kombin dhe demokracinë.
“Sot është një ditë e mrekullueshme për vendin tonë, është një ditë historike, është dita kur të gjithë ne kemi fuqinë në dorën tonë, të gjithë shqiptarët kanë fuqinë në dorën e tyre, të gjithë ju keni në dorë fuqinë tuaj, për fëmijët tuaj, për familjet tuaj, për vendin, për kombin. Sot është dita të dilni dhe të votoni masivisht. Të dilni dhe të bëni me votën tuaj, të mundur të ardhmen që dëshironi për familjen, për vendi tuaj dhe për veten tuaj.
Sot është dita e Shqipërisë, është dita e demokracisë. Dilni masivisht dhe hidhni votën tuaj. Jam i lumtur që votën time e kam hedhur sot, në praninë e votuesve për herë të parë këtu në lagjen ku kam lindur dhe ku jam rritur dhe i bëj thirrje çdo djali dhe çdo vajze, çdo burri dhe çdo gruaje. Dilni masivisht dhe votoni! Kjo është dita juaj, është dita e demokracisë, është dita e Shqipërisë. Faleminderit! Zoti e bekoftë Shqipërinë!”, tha Basha.
Soreca ndjek nga afër procesin në shkollën Dora d’Istria në Tiranë: Ka shumë njerëz që po ndjekin zhvillimet nga jashtë Shqipërisë
ORA 08:53 Ambasadori i BE-së në Tiranë Luigi Soreca ka qenë sot në shkollën “Dora d’Istria” në kryeqytet për të parë nga afër procesin e votimit. Ambasadori Soreca ka pyetur komisionerët për procesin e deritanishëm dhe iu ka uruar punë të mbarë. Ndërkohë ai iu kujtoi se ka shumë njerëz nga jashtë Shqipërisë që po ndjekin zhvillimet duke iu kërkuar të bëjnë sa më mirë punën e tyre.
“Ne do të jemi të pranishëm në të gjithë Shqipërinë por do doja ta fillonim ditën këtu me një këtë sistem të ri votimit. Ne do të shikojmë punën tuaj. Dëshiroj që ta dini që ka shumë njerëz që po ndjekin zhvillimet nga jashtë Shqipërisë. Nuk është se dua t’ju vë në presion, por pak që ta kuptoni që punën tuaj ta bëni sa më mirë”, deklaroi Soreca.
Voton famullitari i Kishës Ortodokse në Shkodër, mesazh për qytetarët: Dilni masivisht, vota është e shenjtë. Lus Zotin të mos ketë incidente!
ORA 08:30 Drejt Qendrave të Votimit, për të votuar për qeverinë e re, është drejtuar famullitari i Kishës Ortodokse në Shkodër, Atë Nikolla Petani. Pas hedhjes së votës në kuti, në Shkollën 9-vjeçare “Mati Logoreci”, Atë Nikollë Petani ka dhënë një mesash për të gjithë qytetarët e Shkodrës, e më gjerë. Ai ka thënë që në votime të marrin pjesë masivisht dhe të ruhet qetësia.
Atë Nikolla Petani e ka ndaluar kategorikisht fenomenin e shit-blerjes së votës, duke thënë që është e papranueshme. “Edhe unë si qytetar i Shqipërisë, erdha shpreha mendimin tim për sa i përket zgjedhjeve të reja që po bëhen në Shqipërinë tonë të dashur. I bëj thirrje popullit të Shkodrës të dalin sa më shumë në votime, sepse vota është e shenjtë, është diçka personale.
Kemi ndjekur këto ditë shit-blerje të votës, nuk besoj që populli i Shkodrës e ka në gjak një gjë të tillë. E lusim Zotin të mos ketë incidente dhe të mbarojë sa më shpejt e të fitojë ai që është më i miri. Ky është një mesazh paqja, sepse jemi të gjithë vëllezër e kjo duhet të shkojë sa më mirë”, u shpreh Atë Nikolla Petani.
Ruçi voton tek Liceu Artistik: Sot është dita e qytetarëve, jo e politikanëve. Nesër fituesi të administrojë fitoren pa eufori, humbësi pa panik
ORA 08:13 Kryeparlamentari Gramoz Ruçi ka votuar në qendrën e votimit pranë Liceut Artistik. Në orën 08:00 fiks, Ruçi është paraqitur në Qendrën e Votimit, ku ka ka votuar qetësisht. Në një mesazh për mediat pas votimit, ai tha se sot është dita e qytetarëve dhe jo e politikanëve dhe shprehu bindjen se sot do të fitojë qytetaria.
“Sot nuk është dita jonë, e politikanëve, sot është dita e qytetarëve. Unë kam bindjen se sot do të fitojë qytetaria e qytetarëve shqiptarë. Ne politikanët duhet të heshtim, të ndjekim procesin dhe t’i nënshtrohemi verdiktit që do japë sovrani. Nga nesër e tutje do ketë një fitues dhe një humbës. Nga nesër, fituesi të administrojë fitoren pa eufori dhe humbësi të administrojë humbjen pa panik”, deklaroi Ruçi.
Kryemadhi thirrje qytetarëve: Votoni për t’u afruar sa më pranë Evropës. Fitorja e LSI e pa tjetërsueshme!
ORA 08:20 – Kryetarja e Lëvizjes Socialiste për Integrim, Monika Kryemadhi, pasi votimit, u ndal në një prononcim për mediat. Para gazetarëve, Kryemadhi i bëri thirrje qytetarëve që të marrin pjesë në votime për t’u afruar sipas saj më pranë Evropës. Ndër të tjera, Kryemadhi theksoi se fitorja e LSI do të jetë e pa tjetërsueshme.
“I bëj thirrje të gjithë qytetarëve të drejtohen drejt Qendrave të Votimit, të qetë, të bindur, të realizojnë nëpërmjet votës, vullnetin e tyre. Vota e qytetarëve është një votë e fshehtë, që për hir të së vërtetës do të japin mundësi dhe të rinjve dhe të rejave, të gjithë qytetarëve që përmes verdiktit të tyre, të afrohemi më shumë drejt Evropës. I uroj suksese të gjithë kandidatëve, sidomos atyre të LSI. Jam i bindur që fitorja do të jetë e pa tjetërsueshme për LSI”, u shpreh Kryemadhi.
“Komunikimi i paprecedentë”/ Presidenti Meta thërret me ‘videocall’ Sokol Ballën në transmetim ‘live’, ja biseda (VIDEO)
ORA – 08:17 Një risi ka ndodhur në studion maratonë të lajmeve në “News 24”, në këtë ditë, ku e gjithë Shqipëria është duke votuar për qeverinë e re.
Presidenti i Republikës, Ilir Meta, nëpërmjet një lidhje direkte me gazetarin Sokol Balla dha mesazhe të qarta për zgjedhjet.
Ai tha se 2 gishtat që bëri teksa votoi, janë një tregues për dy marsin e një viti më parë, ku presidenti zhvilloi në manifestim mbarëkombëtar në Tiranë. Ai tha se procesi deri më tani po ecën shkëlqyeshëm sepse dhe presidenti është në krye të detyrës.
Meta deklaroi më tej, se të gjithë sytë e Evropës janë në Shqipëri në këto zgjedhje.
Biseda:
Sokol Balla: Mirëmëngjesi!
Ilir Meta: Lidhje live?!
Sokol Balla: Po.
Ilir Meta: Procesi po ecën shkëlqyeshëm, sidomos në Elbasan. Dy gishtat janë dy marsi, Kushtetuta.
Sokol Balla: Pse pikërisht në ato tre qarqe?
Ilir Meta: Nuk presim situata. Sepse presidenti është në krye të detyrës në zyrë. Suksese në punën tuaj. Me dashuri e qetësi si Evropianë, të gjithë Evropa i ka sytë këtu sot. Sot qetësi, dashuri për Shqipërinë.
Një mesazh nga fëmijët, kryedemokrati Basha publikon videon: Votoni për ne! Ora 07:43- Kryedemokrati Lulzim Basha ka shpërndarë një video në rrjete sociale, me protagonistë fëmijët.
Këta të fundit, bëjnë thirrje që në këto zgjedhje për të votohet për ta, nëpërmjet numrit 9.
Kujtojmë se lideri demokrat Basha pritet të votojë në orën 09:00, në Qendrën e Votimit në Njësinë numër 8, në kryeqytet.
Situatë e çuditshme në Vlorë, komisioneri paraqitet në QV, por detyrohet të largohet Ora 07:30- Një komisioner i dyshuar si me COVID është paraqitur në një nga Qendrat e Votimit në qytetin e Vlorës.
Gazetari Enrik Mehmeti, raporton për “BalkanWeb”, se komisoneri është paraqitur që në mëngjes herët në Qendrën e Votimit ku është caktuar, por ka qenë nëna e tij, e cila ka paraqitur një dokumentacion që tregon se është me COVID, që ka bërë të mundur largimin e tij nga Qendra e Votimit.
Gazetari raporton se komisioneri fillimisht ka refuzuar të largohet, por me insistimin e komisionerëve të tjerë, ai është larguar, ku pritet që të kryejë një tampon e të paraqitet përsëri në QV.
“Qytetarët janë paraqitur që në orët e para të mëngjesit. Kjo është dhe situata e çuditshme, është paraqitur e ëma dhe i ka kërkuar që të largohet, ka paraqitur dhe një dokumentacion që është me COVID.
Ai është larguar, me insistimin e të tjerëve, do të kryejë tamponin dhe më pas do të kthehet përsëri në QV. I ka kërkuar vetë familjari që të largohet nga QV”, tha gazetari.
Policia e Shtetit kalon në gatishmëri, 5200 efektivë pranë QV-ve, plan me 4 faza për procesin zgjedhor Ora 07:34- Me urdhër të drejtorit të përgjithshëm të policisë Ardi Veliu, policia e shtetit ka kaluar në gatishmëri. 5200 punonjës policie janë pranë qendrave të votimit për ruajtjen e rendit dhe sigurisë në to.
7519 punonjës policie janë trajnuar që prej dhjetorit për t’u angazhuar në këto zgjedhje. Policia po ndjek një plan me 4 faza për të garantuar një proces zgjedhor të qetë.
Rëndësi i është kushtuar ruajtjes së personaliteteve dhe institucioneve ku koordinohen forcat e policisë dhe ato komando.
Policia e shtetit ka referuar në prokurori më shumë se 30 raste që lidhen me krimet zgjedhore.
Në ndryshim nga vitet e tjera KQZ ka kërkuar nga policia të mos lejojë grumbullime 150 metra afër qendrave të votimit si edhe të mos angazhojë punonjës policie me më pak se 4 muaj eksperiencë.
Zgjedhjet, KQZ: Nis normalisht procesi thuajse në të gjithë Qendrat e Votimit në vend Ora 7:25- Gazetarja e “News 24”, Marsela Karapanço, e vendosur në selinë e Komisionit Qendror të Zgjedhjeve dha detajet e para në lidhje me çeljen e procesit të votimit në vend.
Gazetarja theksoi se burime për KQZ kanë raportuar se thuajse në të gjithë vendin janë hapur qendrat e votimit, ndërsa në disa zona të vendit, ka vonesa. KQZ ka theksuar se procesi i votimit ka nisur në normalitet.
“Sot shqiptarët vendosin kush do ti drejtojë në katër vitet e ardhshme, pranë burimeve të KQZ, procesi i hapjes së votimit është kryer në të gjitha qendrat e votimit. Raportimi i orës 08:00 që do të jetë komunikimi i parë i KQZ do të jepen detajet e tjera, procesi do të përfundojë në orën 19:00. Ka disa risi sa i përket këtyre zgjedhjeve, që nga votimi elektronik që do të implementohen në Njësinë 10 në Tiranë. Tirana ka dy mandate më shumë, risi ka pasur dhe procesi sa i përket qendrës së votimit. Do të votohet për kandidatin, jo me emër, por me numër”, tha Karapanço.
Zgjedhjet/ Rama mesazh shqiptarëve: Ta tregojmë të gjithë së bashku se përtej partive e dasive për ne është Shqipëria, bindjet t’i shprehim me votë Ora 07:15- Kryeministri Edi Rama iu ka drejtuar një mesazh qytetarëve shqiptarë mëngjesin e sotëm duke iu bërë thirrje të gjithëve të vënë Shqipërinë të parën. Rama e cilëson një ditë të shënuar të bashkëjetesës sonë demokratike.
“MIRËMËNGJES 🇦🇱
le ta tregojmë sot të gjithë së bashku, se përtej partive e dasive për ne është Shqipëria dhe le t’i shprehim bindjet e ndryshme me votë, por duke e respektuar Shqipërinë me mirësjellje shembullore ndaj njëri-tjetrit, në këtë ditë të shënuar të bashkëjetesës sonë demokratike, ku çdonjëri duhet ta gëzojë i patrazuar të drejtën e votës së lirë e të fshehtë, e prej ku Shqipëria duhet të dalë kryelartë për ne të gjithë👐🏿”, shkruan Rama.
Voton Presidenti Meta dhe përshëndet me dy gishta: Për Kushtetutën, për demokracinë, për Shqipërinë në Europë (Video) Ora 07:10- Presidenti i Republikës Ilir Meta ka votuar pak minuta pas orës 7:00, ora zyrtare e hapjes së qendrave të votimit.
Meta është shfaqur i buzëqeshur në qendrën e votimit të vendosur në kopshtin numër 31, në njësinë 5. Ndërsa pas votimit ka pasur dhe një mesazh të shkurtër fillimisht.
“Për Kushtetutën, për demokracinë, për Shqipërinë në Europë”, tha Meta teksa ka përshëndetur me dy gishta.
E para politikane, kryetarja e LSI-së Monika Kryemadhi voton në kopshtin 31: Qytetarë të votojnë të qetë Ora 07: 03- Kryetarja e LSI-së Monika Kryemadhi është politikania e parë që ka votuar mëngjesin e sotëm. Kryemadhi ka votuar në Qendrën e Votimit në Njësinë numër 5, në kopshtin 31. Kryemadhi iu bëri thirrje qytetarëve të votojnë të qetë dhe të bindur për atë që duan të realizojnë.
“Dua t’ju bëj thirrje sot të gjithë qytetarëve që t’ju drejtohen qendrave të votimit të qetë, të bindur, për atë që duan të realizojnë nëpërmjet votës së tyre.
Vota e qytetarëve është një votë e shenjtë, është një votë që për hir të së vërtetës do t’i japë mundësinë dhe shansin të rinjve dhe të rejave, të gjithë qytetarëve, që nëpërmjet verdiktit të tyre të çojmë Shqipërinë më shumë se kurrë drejt Evropës.
Unë ju uroj suksese të gjithë kandidatëve, sidomos kandidatëve të LSI-së, siç ndodh gjithmonë, kështu që jam e bindur që fitorja do të jetë e patjetërsueshme për LSI-në”, deklaroi Kryemadhi.
Hapen qendrat e votimit, qytetarët votojnë për partitë dhe kandidatët për deputetë Ora 07:00- Janë hapur 5199 Qendrat e Votimit në të gjithë vendin. Komisionerët kanë nisur punën për të pritur votuesit e parë.
Pak çaste para çeljes së votimit, Meta publikon foton: Drejt zyrës në krye të detyrës. Sot dita e sovranit!
Ora 6:50- Ashtu siç e kishte lajmëruar një ditë më parë, Presidenti i Republikës, Ilir Meta, do të votojë ditën e sotme në orën 07:00, orar ky që përkon dhe me hapjen e procesit të votimit.
Me anë të një fotoje në rrjete sociale, Meta, e ka cilësuar ditën e sotme si një ditë të mrekullueshme dhe thekson se do të jetë dita e sovranit.
“Drejt zyrës në krye të Detyrës! Ditë e mrekullueshme sot. Dita e SOVRANIT”, shkruan Meta.
KORÇË- Qytetarë dhe aktivistë janë mbledhur në protestë në Korçë, duke kërkuar anulimin e projektit në Zvërnec. Mes pankartave të mbajtura nga protestuesit nuk munguan as mesazhet që lidhen me vrasjen e efektivit të policisë Enea Mekolli për të cilin u mbajt 1 minutë heshtje.
Protesta u zhvillua në pedonalen e qytetit të Korçës e cila u mbush plot me qytetarë. Ata bënë thirrje për protesta masive edhe në ditët në vijim, ndërkohë kërkuan edhe shfuqizimin e Paketës së Maleve. “Qoftë e bekuar pika që mbush gotën”, “Ti dogje rininë, sot të djeg rinia ty,” ishin disa nga pankartat që mbanin qytetarët në duar./Dosja.al
Aktivisti Joni Vorpsi, i ftuar në studion e News24, ka lëshuar alarmin mbi dëmin e pariparueshëm ekologjik që po i shkaktohet zonës së mbrojtur të Zvërnecit dhe Lagunës së Nartës nga projekti i ri turistik.
Vorpsi solli të dhëna nga terreni, duke zbuluar se makineritë e rënda kishin rrethuar një hapësirë prej kilometrash, pranë habitateve unike ku çiftohen lloje të rrezikuara të kafshëve. Sipas tij, ky nuk është thjesht një kompleks i zakonshëm, por një projekt me përmasat e një qyteti të tërë që kërcënon të zhdukë ekosistemin.
Aktivisti shpjegoi me detaje pasurinë e jashtëzakonshme të faunës në këtë zonë, duke theksuar se Laguna e Nartës shërben si një pikë kyçe dhe e papërsëritshme në rajon për disa lloje të veçanta shpendësh dhe kafshësh ujore.
“Aty ka mbi 200 lloje shpendësh. Është pelikani kaçurrel që rrezikohet, si dhe flamingot që janë lloj i veçantë, dhe ky është vendi i vetëm në lagunën e Nartës ku ato çiftohen. Vitin e kaluar ishin 500 fole të tyre, kolonia më e madhe në Ballkan! Po ashtu janë breshkat e detit. Kemi zbuluar një fole të tyre shumë pranë kantierit, vetëm 100 metra larg. Ato çiftohen në gjithë hapësirën nga Zvërneci në Vjosë,” deklaroi Vorpsi.
Ndryshe nga tentativat për ta minimizuar ndikimin e ndërtimit, Vorpsi konfirmoi se në terren ka nisur puna dhe se shifrat e bëra publike që në fillim nga investitorët tregojnë një betonizim masiv.
“Nëse ne e trajtojmë atë si një projekt të thjeshtë gabojmë, ajo që po bëhet është diçka gjigante. Është një qytet i vogël, me 10 mijë dhoma që planifikohen të ndërtohen. Projekt patjeter që ka, sepse tashmë kanë sjellë edhe makineritë në terren. Deklarata se do të ketë 10 mijë dhoma është bërë që në fillim vetë nga Jared Kushner dhe Ivanka Trump. Gjatësia që do të zërë ky investim është e gjithë ajo pjesë që u rrethua nga kantieri, që shkon në plot 6 kilometra,” përfundoi aktivisti.
Enea Mekolli, efektivi i forcave “Shqiponja”, i cili u vra dje në mënyrë tragjike, në krye të detyrës është përcjellë për në banesën e fundit,
Një numër i madh të afërmish, miqsh e kolegësh, së bashku me qytetarë dhe figura të policisë kanë marrë pjesë në lamtumirën e fundit për Mekollin, i cili është shpallur “Dëshmor i Atdheut”.
Ai mbeti i vrarë gjatë aksionit për kapjen e të 43-vjeçarit të shpallur në kërkim Violand Braçellari.
Autori i krimit ka hapur zjarr ndaj policisë pasi ata i kanë bërë thirrje për t’u dorëzuar, duke i marrë jetën 34-vjeçarit, ndërsa i plagosur rëndë mbeti edhe efektivi 36-vjeçar. bw
Deputeti i partisë Demokratike, Tomor Alizoti, ka mbështetur hapur protestat e qytetarëve për Zvërnecin, edhe pse është një lëvizje kundër direktivës së partisë.
Nga foltorja e Parlamentit dje ai mbështeti lëvizjen qytetare në mbrojtje të mjedisit dhe territorit shqiptar, duke i nxitur që të vazhdonin protestat edhe nëse ai personalisht nuk do kishte bindjet e tyre.
Sepse, siç nënvizoi, qëllimi i qeverisë është ndarja e Shqipërisë”.
“Ka shqiptarë që nuk e di këtë që misioni i kësaj qeverie është ndarja e Shqipërisë! Pse është ndarja e Shqipërisë? Sepse autokracia funksionon së bashku me oligarkinë. Me një grup të vogël që mban pushtetin ekonomik dhe ushtron atë politik nëpërmjet autokratit dhe autokrati ka ikur! I cili bredh nëpër botë dhe jep misionin”, tha ligjvënësi opozitar, duke nënkuptuar kryeministrin Edi Rama.
Më tej ai shpjegoi edhe atë që ndodhi me dhunën ndaj qytetarit në Zvërnec dhe sjelljen e pushtetit, duke lënë të kuptohet se pas ishin interesat ekonomike dhe të pushtetit.
“Tani ju akuzuar drejtorin e Policisë dhe atë privat. Pse nuk e preku Policia atë rojën private, sepse ata janë pushteti! Po të guxonte të prekej dikush tjetër, Policia e gllabëronte. E dyta, pse tentoi drejtori i policisë të manipulonte? Sepse e dinte që ishte pushteti. Tani meqë kjo u bë publike dhe doli në sy të njerëzve, tani kanë dalë njerëzit në rrugë”, tha ai.
Në fund të fjalës së tij nga foltorja e Kuvendit, Alizoti mbështeti publikisht protestën dhe deklaroi se kjo është mënyra e vetme, sepse autokratët kanë frikë.
“Ndaj të nderuar njerëz, protestoni, protestoni, protestoni, edhe sikur personalisht të mos kem bindjet tuaja. Protestoni sepse autokratët kanë vetëm një element, ata kanë frikë”, përfundoi deputeti demokrat. gsh
Në mesin e personazheve të famshëm që iu janë bashkuar qytetarëve kundër qeverisë dhe ndërtimeve në Zvërnec është edhe Alban Skënderaj.
Këngëtari shumë i dashur për publikun është parë mes qytetarëve në protestën e një dite më parë. Ndonëse ai nuk e ka treguar këtë publikisht, artisti ka preferuar që të ‘flasë’ me prezencën e tij.
Kujtojmë që këngëtari ka bërë më herët një reagim në lidhje me dhunimin e protestuesit të shtunën e kaluar nga rojet e kompanisë së sigurisë private në Zvërnec, e cila ishte edhe “shkëndija” e reagimit qytetar në Tiranë.gsh
Partia Demokratike Dega Vlorë ka njoftuar se do të organizojë një takim me Kryesinë dhe drejtuesit e strukturave, në lidhje me protestën që do të organizojnë nesër.
Njoftimi i plotë:
Te nderuar gazetare!
Uroj te jeni mire!
Sot ne oren 20.00 ne seline e saj, PD, dega Vlore organizon nje takim me Kryesine dhe drejtuesit e strukturave, ne lidhje me Protesten qe do te organizoje neser. Pasqyrimi i ketij takimi sot do ti sherbente sensibilizimit qytetar per pjesemarrje!
TIRANË- Protesta e sotme kundër qeverisë po shoqërohet me pankarta pikante nga qytetarët. Teksa protestuesit marshojnë, disa nga pankartat që bien në sy janë: “A je shqipe, a je pulë”.
Postera të tjera i referohen shembjes së ndërtesave në Theth vitin e kaluar, ku shkruhet: “Dje Thethi, sot Rrjolli, Zvërneci, nesër Skavica”. Aktivistët kanë zgjedhur edhe karikaturat me krerët e partive kryesore, si formë për të shprehur pakënaqësinë ndaj politikës në vend./Dosja.al
Një skenë simbolike u shënua gjatë protestës së zhvilluar këtë të enjte në Tiranë, ku një qytetar u shfaq me një karton të kuq në duar, duke përcjellë një mesazh kritik ndaj deputetëve të Kuvendit.
Me këtë veprim, protestuesi krahasoi politikën me një ndeshje futbolli, duke kërkuar “përjashtimin nga loja” të përfaqësuesve aktualë në Parlament.
“Ky karton i kuq është për të gjithë deputetët. Duhet të dalin jashtë Parlamentit, jashtë lojës”, deklaroi ai gjatë protestës. gsh
Teksa protesta masive e qytetarëve kundër projektit në Zvërnec vijon prej disa ditësh, edhe reagimi i qytetarëve në rrjetet sociale ka qenë i ashpër kundrejt kryeministrit Edi Rama.
Në momentin që ky i fundit ka vazhduar reagimet në Facebook, duke mbajtur qëndrimin e tij për situatën, qytetarët e thjeshtë dhe jo vetëm janë revoltuar dhe kanë shpalosur qartë kritikat.
Ajo që bie në sy në seksionin e komenteve të kryeministrit janë reagimet nga personazhet e njohur të rrjeteve sociale dhe artit, të cilët i janë drejtuar kreut të qeverisë me shprehje si “nuk na manipulon” dhe “nuk na hedh dot hi syve”.
Një tjetër koment pyeste kryeministrin se ku shkojnë taksat e qytetarëve, në videon ku ai shprehej se Zvërneci është ndotur. bw
Grupi i njohur i muzikës, Shkodra Elektronike, të cilët përfaqësuan Shqipërinë në festivalin europian Eurovision vitin e kaluar, kanë reaguar zyrtarisht në lidhje me kauzën e Zvërnecit dhe protestat qytetare që kanë përfshirë vendin.
Përmes një mesazhi të shkurtër por mjaft domethënës, artistët kanë shprehur mbështetjen e plotë për mbrojtjen e kësaj pasurie natyrore, duke njoftuar se do t’i bashkohen lëvizjes.
“Nji SHOK na thotë që këtë mrekulli s’e ka pa kurrë! E po niset njitesh! EDHE NA PO ÇOHENA!” – shkruan grupi në reagimin e tyre.
Me këtë qëndrim, Shkodra Elektronike rreshtohet krah zërave të shumtë të artit, kulturës dhe shoqërisë civile që po kërkojnë me ngulm anulimin e projekteve që prekin zonën e mbrojtur të Zvërnecit, duke treguar se kauza tashmë ka marrë një dimension të gjerë kombëtar.bw
Në Zvërnec, fshat pranë qytetit bregdetar të Vlorës, në Shqipëri, punimet përgatitore për një projekt turistik, të lidhur me planet e shpallura më herët nga Jared Kushner, dhëndër i presidentit amerikan Donald Trump, për ndërtimin e hoteleve dhe vilave, nxitën protesta dhe një varg shqetësimesh.
Banorë, aktivistë mjedisorë dhe përfaqësues të shoqërisë civile përmendën tri kryesore: ndikimin në mjedis, paqartësitë mbi pronësinë e tokës ku planifikohet ndërtimi, dhe mungesën e transparencës për projektin.
Më 30 maj, protesta në Zvërnec u shoqërua me përplasje të dhunshme me punonjës të sigurimit privat. Protestat më pas u bartën edhe në kryeqytetin shqiptar, Tiranë, ku u kërkua anulimin i projektit dhe dorëheqja e kryeministrit Edi Rama.
Çfarë tha Rama?
Kreu i ekzekutivit shqiptar po e mbron projektin. Ai tha se investimi në Zvërnec mund të arrijë vlerën prej 4 miliardë eurosh, dhe se mund ta vendosë Shqipërinë në “listën e kampionëve” të turizmit.
Sipas Ramës, projekti do të zhvillohet vetëm në pronë private, laguna nuk do të preket dhe investitorët kanë premtuar se gjithçka do të bëhet sipas ligjit.
“Nuk ka asnjë shans që investimi të ndalojë për aq kohë sa unë do të jem këtu”, u shpreh ai.
Por, kryeministri i Shqipërisë tha se për Zvërnecin ende nuk ka një projekt konkret, por vetëm një koncept të miratuar me kushte, ndërsa studimi mjedisor ende nuk është përfunduar.
Zvërneci, afër Vlorës i fotografuar më 2024.
Përfshirja e prokurorisë speciale
Struktura e Posaçme kundër Korrupsionit dhe Krimit të Organizuar – SPAK konfirmoi më 1 qershor se ka nisur një hetim lidhur me Zvërnecin. Rama tha më pas se SPAK-u kishte bllokuar një transaksion prone, të lidhur me projektin.
Më 3 qershor, ai tha se SPAK-u ka verifikuar pronësinë e investitorëve të huaj mbi tokën ku është planifikuar projekti turistik. Sipas tij, është sqaruar origjina e fondeve të kaluara përmes bankës, ndërsa fondet janë mbajtur të ngrira dhe nuk i janë kaluar shitësit, për të cilin ka një proces hetimor.
SPAK-u, ndërkaq, i tha Radios Evropa e Lirë (REL) se çështja ndodhet në një fazë procedurale, dhe se hollësitë nuk mund të bëhen publike tani për tani.
Flamingo duke notuar në zonën e mbrojtur në Zvërnec, afër Vlorës. 10 maj 2026.
Kush janë blerësit e tokës?
Pronare e zonës së rrethuar në Zvërnec rezulton të jetë kompania Albania Land Development.
Të dhënat e Qendrës Kombëtare të Biznesit tregojnë se pronarë të kësaj kompanie janë vëllezërit nga Katari, Mohamadmoataz Mhd Ruslan Alkhayat dhe Ramez Mhd Ruslan Alkhayyat.
Më 29 prill, Këshilli Kombëtar i Territorit dha leje për rrethimin dhe për punime përgatitore për rrugët e qasjes brenda pronës. Leja iu dha shoqërisë Zvërnec South Adriatic Development, në cilësinë e zhvilluesit të punimeve përgatitore.
Banorë të Zvërnecit i kanë thënë REL-it se janë të përfshirë në një kontest gjyqësor për pronësinë e tokës, që ata pretendojnë se u është marrë padrejtësisht.
Zvërnec, 9 maj 2026.
Pse përmendet Kushner?
Në mars të vitit 2024, Kushner tha se synon të ndërtojë hotele dhe qindra vila në Zvërnec.
Sipas gazetës New York Times, ai do të përfshihej përmes firmës së tij investuese, Affinity Partners, e mbështetur nga fonde saudite dhe investitorë të tjerë të huaj.
REL-i iu drejtua Affinity Partners lidhur me investimet e parapara në Shqipëri dhe protestat që po zhvillohen. Përgjigjja erdhi nga Sazan Real Estate Development LLC, e cila tha se i respekton “proceset e vazhdueshme publike dhe institucionale” dhe është e gatshme të ecë përpara ndërsa ato zhvillohen.
Kompania figuron në regjistrin e pronarëve përfitues si një nga personat juridikë indirektë në strukturën e pronësisë së kompanisë Albania Land Development.
Një veturë duke kaluar pranë zonës së mbrojtur Pishë Poro-Nartë më 10 maj 2026.
Kërkesa për transparencë
Përfaqësues të shoqërisë civile dhe analistë në Shqipëri konsiderojnë se pikërisht mungesa e transparencës është në qendër të debatit për Zvërnecin.
Rigels Xhemollari, nga organizata Qëndresa Qytetare, tha për REL-in se çështja mund të zgjidhet vetëm nëse bëhen publike dokumentet kryesore. Sipas tij, nëse nuk ka transparencë, projekti do të mbetet i kontestuar.
Politologu Ermal Hasimja beson se zgjidhja duhet kërkuar te zbatimi i ligjit, por mendon se problemi është bërë më i madh për shkak të ndryshimeve ligjore që, sipas tij, kanë hapur rrugë për abuzime në zona të tilla.
“Nëse do të ketë transparencë të plotë mbi ata që kanë pronat, si i kanë marrë, mbi ata që do të investojnë, duke parë edhe aspektin e lejeve mjedisore dhe duke respektuar në të gjitha rastet ligjin, besoj se do të gjendet rruga e duhur”, tha Hasimja për REL-in.
Për gazetarin dhe analistin Ben Andoni, “projekte të tilla nuk mund të kalojnë thjesht nëpërmjet protagonizmit të kryeministrit Rama dhe të disa individëve”.
Ai tha për REL-in se çështja e Zvërnecit ka nxjerrë në pah një problem më të madh: atë të pronësisë, “që është gati një ‘kancer’ për zhvillimin e Shqipërisë”.
Protestuesit duke u përleshur me policinë gjatë protestës kundër ndërtimit të resortit në Zvërnec. Tiranë, 3 qershor 2026.
Efekti i protestave
Xhemollari kujton se protesta ka sjellë më shumë vëmendje mediatike, ndërkombëtarizim dhe ndërgjegjësim qytetar për Zvërnecin.
Hasimja i sheh protestat si shenjë pozitive të aktivizimit qytetar, sidomos të të rinjve, ndërsa Andoni e cilëson pjesëmarrjen e gjeneratës Z risinë më të madhe.
Po pretendimet për ndikime të huaja? Xhemollari i hedh poshtë ato, duke thënë se “pas tyre nuk ka as grekë, as serbë, as izraelitë, as agjentë”.
Edhe Andoni konsideron se pretendimet e tilla janë të zmadhuara dhe se protesta është më shumë rezultat i pakënaqësive të grumbulluara.
BIRN/ Në studion e emisionit “Real Story” në ABC News, të hënën më 1 qershor, debati për protestën e banorëve të Zvërnecit kundër ndërtimit të një resorti mori një kthesë të pazakontë, kur i ftuari Arben Meçe paraqiti si provë një fotografi. Imazhi tregonte një autobus të rrethuar nga njerëz – disa të veshur me xhupa dhe pallto dimri – si dhe flamuj grekë në një pikë kufitare. Meçe tha se fotografia i ishte dërguar nga persona të pranishëm në vendngjarje dhe pretendoi se ajo dokumentonte mbërritjen e protestuesve nga Greqia për të marrë pjesë në protestën e zhvilluar në Tiranë.“Nga njerëz që janë prezent atje ma dërguan,” tha Meçe. Drejtuesi i emisionit, Sokol Balla, mbështeti interpretimin e tij, ndërsa Meçe këmbënguli se në protestë kishin mbërritur “tetë autobusë”. Analisti Skënder Minxhozi, duke vëzhguar fotografinë, sugjeroi se bëhej fjalë për linjën Athinë-Vlorë.
Por fotografia, e trajtuar në studio si dëshmi e një ndërhyrjeje të organizuara nga jashtë, rezultoi më pas të ishte një imazh i krijuar me inteligjencë artificiale, që sipas autorit – të intervistuar nga BIRN – ishte frymëzuar nga deklaratat e një deputeti të Partisë Socialiste.
Ky imazh është pjesë e një fushate me narrativa dezinformuese në media – e udhëhequr nga kryeministri Edi Rama dhe Partia Socialiste – sipas të cilave Greqia po nxit kritikat ndaj projektit të lidhur me Jared Kushner, dhëndrin e presidentit amerikan, Donald Trump.
Fushata nuk përfshin vetëm foto të krijuara me IA dhe deklarata spekulative nga kryeministri dhe zyrtarë socialistë, por edhe keqpërdorim të pamjeve nga kamerat e Policisë së Shtetit, si dhe ‘lajme të pakonfirmuara’.
Sipas ekspertëve, kjo fushatë është një përpjekje për të manipuluar opinionin publik, ndërsa prej tre ditësh, mijëra qytetarë janë ngritur në protesta në Tiranë, duke kërkuar anulimin e projektit dhe dorëheqjen e kryeministrit Edi Rama.
“Për mendimin tim, këto përmbajtje nuk synojnë vetëm të dezinformojnë, por edhe të ndikojnë mënyrën se si qytetarët interpretojnë një ngjarje apo një kauzë,” thotë Erlis Çela, pedagog i komunikimit në Western Balkans University në Tiranë.
Analisti Arben Meçe i qëndroi deklaratës së tij se fotografia është origjinale.
“E kam testuar me tre mjetet më të fuqishme të inteligjencës artificiale të kohës,” pretendoi ai.
Kolegu i tij, Skënder Minxhozi theksoi se ishte e pamundur ta verifikonte vërtetësinë e fotos gjatë një transmetimi të drejtpërdrejtë.
“Unë s’kam mundësi që ta verifikoj në kohë reale nëse fotoja është e vërtetë,” tha ai.
Drejtuesi i emisionit “Real Story” në ABC News, Sokol Balla, nuk iu përgjigj kërkesave të BIRN-it për një qëndrim.
Protesta dhe narrativa e rreme me IA
Kompania që po zhvillon resortin, Zvërnec South Adriatic Development, është regjistruar offshore në formën e një trusti në Holandë, ndërsa pronarët përfitues të saj mbeten anonimë.
Ajo ka marrë disa leje zhvillimi nga KKTU dhe sipas Ramës, do të investojë 4 miliardë euro, por asnjë nga lejet dhe as dokumentet shoqëruese, përfshi Vlerësimin e Ndikimit në Mjedis nuk janë zbardhur.
Në fund të prillit, kompania vendosi të rrethonte zonën e mbrojtur duke përdorur si shkresë një letër nga AZHT, e cila e njoftonte për miratimin e një leje punimesh kantieri ende të pafirmosur.
Rrethimi, i cili u bë fillimisht edhe me tela me gjemba, solli protesta nga aktivistë të mjedisit dhe banorë të zonës që pretendojnë toka brenda tij.
Në 30 maj, banorë e Zvërnecit – një pjesë e të cilëve jetojnë prej vitesh në emigracion në Greqi – dhe aktivistë, u përplasën me punonjës të një kompanie sigurie të punësuar nga zhvilluesi.
Dhunimi i i një prej banorëve nga rojet private të sigurisë dhe përdorimi i lakrimogjenëve kundër protestuesve – në sy të Policisë së Shtetit që qëndroi apatike, shërbyen si shkëndijë për protesta masive në Tiranë, të cilat kanë tërhequr dhjetra mijëra qytetarë.
Kryemnistri Edi Rama reagoi duke pretenduar se protesta po nxitej nga Athina.
“Si mund të jenë gazetat e Greqisë aleatët tuaj në mbrojtjen e mjedisit të Shqipërisë? Gazetat greke që janë mbushur sot të gjitha me kauzën tuaj. Ka diçka këtu që nuk shkon?” tha ndër të tjera lideri jetgjatë socialist, ndërsa u përfshi në një debat në distancë me ish-kryeministrin grek, Alexis Tsipras.
Fjalët e Ramës u kthyen në “projekt” politik nga deputetë dhe mbështetës të tij në përpjekje për të lidhur protestën me Athinën zyrtare. Një prej tyre ishte deputeti i Partisë Socialiste, Ardit Bido, i cili mbajti një qëndrim të ashpër në Kuvend ndaj protestës dhe aktorëve sipas tij të përfshirë në të.
“Tre autobuzat që erdhën nga Greqia pse nuk i deklarojnë,” pyeti Bido nga podiumi i Kuvendit. “Kush i nxiti këto autobuza,” shtoi ai, duke pretenduar se ato lidheshin me eurodeputetin greko-shqiptar, Fredi Beleri, një figurë kontraverse politike.
Fjalët e Bidos shërbyen si frymëzim për Marjus Seitin, gazetar lokal në Vlorë dhe administrues i faqes “Vlora” në Facebook, i cili shpesh mbështet socialistët lokalë në faqen që administron. Në mungesë të një ilustrimi për fjalët e deputetit të zonës, Seiti thotë se përdori ChatGPT për të prodhuar një imazh, i cili më pas u qarkullua nga ABC News dhe medie të tjera pro-qeveritare.
“Pamja është ilustruese e krijuar me ChatGPT, bazuar në ato që tha deputeti Ardit Bido dje në Parlament,” shpjegoi Seiti për BIRN.
Ai theksoi se e kishte bërë të qartë në komente origjinën e fotos, e cila ka detaje absurde që tradhtojnë natyrën e saj artificiale: tabela që qëndrojnë në ajër pa u mbajtur nga askush, njerëz të veshur me xhupa dimërorë jashtë sezonit, dhe një targë autobusi që nis me ‘AL’ që përfundon si targë greke.
Seitaj tha se fiktiviteti qe i dukshëm dhe nuk është përgjegjësia e tij që kjo u përdor në lajme.
“Ata në studio duhet të jenë profesionistë dhe të jenë në gjendje të dallojnë se një foto me 500 pixel nuk mund të jetë reale dhe nuk merret për bazë,” tha ai. “Duhen ftuar në studio njerëz që janë në gjendje ta verifikojnë informacionin,” shtoi Seitaj, duke nënvizuar se ai vetë është pro projektit të Kushner.
Kjo foto nuk qe e vetmja e prodhuar kështu për këtë çështje. Më herët para protestës, burime anonime që u shumëfishuan më pas në rrjete sociale nga profile pro iraniane dhe të ngjashme, postuan foto të rreme të flamurit izraelit në rrethimin në Pishë Poro – Nartë.
Këto foto më pas u përdorën në narrativën e qeverisë për të sulmuar protestuesit si ekstremistë dhe të painformuar.
Pedagogu i komunikimit, Erlis Çela thekson se transmetimi i imazheve me IA si të vërteta, zhvendos debatin nga kauza reale te pretendime pa bazë faktike.
“Nëse media publikon materiale që sugjerojnë se protestuesit po veprojnë në emër të interesave të huaja pa prova të qarta dhe të verifikuara, ajo rrezikon të ndikojë në mënyrën se si publiku i sheh këta qytetarë,” thotë Çela.
Deputeti Ardit Bido e sheh ndryshe. Ai i tha BIRN se banorët e Zvërnecit kishin të drejtë për të protestuar, por insistoi se kishte edhe instrumentalizim politik nga jashtë.
“Banorët kanë ardhur në të drejtën e tyre dhe për një kauzë, që për mua qëndron dhe është e drejtë. Mes tyre, ka pasur së paku një individ, i cili sipas informacioneve nga vetë banorët, u instrumentalizua me argumentin se “Greqia nuk më lë të kthehem pas”,” tha Bido për BIRN.
Ai shkoi edhe më tej, duke pretenduar se kushdo që nuk ndante qëndrimin e Partisë Socialiste, punonte kundër interesit kombëtar.
“BIRN dhe kushdo që sheh interesat ekonomike të fqinjëve që kanë investime miliardëshe në turizëm, po merr pjesë haptazi në një luftë hibride,” akuzoi ai.
Hetim nga SPAK?
Përtej imazhit të krijuar me inteligjencë artificiale dhe deklaratave politike spekulative, BIRN gjeti se disa media të tjera prodhuan një mori lajmesh që promovonin narrativën e qeverisë se pas protestave fshihej Greqia.
Protestuesi që u dhunua nga rojet e sigurisë në Zvërnec u cilësua “greku” në lajm të televizionit kombëtar Top Channel. ABC News, megjithatë, duket se shkoi një hap më tej.
Në përpjekje për të mbështetur narrativën e autobusëve të shfaqur në emisionin kryesor të së hënës, televizioni raportoi të martën se SPAK kishte nisur procedim penal lidhur me autobusët dhe mënyrën se si protestuesit kishin mbërritur në protestë.
Pamjet që shoqëronin kronikën tregonin autobusë të linjës Vlorë–Athinë, të identifikuar me elementë grafikë – katrorë të gjelbër dhe shënues semantikë – që ngjajnë me ato të Sistemit të Monitorimit të Trafikut të Policisë së Shtetit.
Pronari i linjës së autobusëve që shfaqet në pamjet televizive, Xhorxhi Ruci, u tall me pretendimet për financime të huaja.
“Nuk u çmend Greqia të na japë para neve,” deklaroi Ruçi në një bisedë telefonike, ndërsa shtoi se prej 35 vitesh kryen linjën Athinë–Vlorë.
“Nuk i di hallet e pasagjerëve; kush vjen për mort, kush vjen për dasmë,” shtoi ai.
Ministri i Brendshëm dhe Drejtori i Përgjithshëm i Policisë së Shtetit nuk iu përgjigjën pyetjeve të BIRN-it në lidhje me mënyrën se si pamjet e sistemit shtetëror të monitorimit u përdorën në media për të identifikuar mjetet me të cilat u pretendua se udhëtuan qytetarët protestues.
Struktura e Posaçme Kundër Korrupsionit dhe Krimit të Organizuar (SPAK) e përgënjeshtroi zyrtarisht pretendimin se po hetonte të ashtuquajturit “autobusë nga Greqia”.
“Nuk ka procedim apo hetim,” tha SPAK.
Sipas aktivistit Rigels Xhemollari nga organizata “Qëndresa Qytetare”, përdorimi i pamjeve nga kamerat e sigurisë synonte frikësimin e qytetarëve që protestojnë.
“Asnjë shtetasi shqiptar, për asnjë arsye, nuk mund t’i mohohet e drejta kushtetuese e protestës,” tha Xhemollari, i cili kërkoi hetime mbi rrjedhjen dhe publikimin e pamjeve.
Edhe Erlis Çela tha se publikimi i këtyre materialeve ngre shqetësime serioze për privatësinë dhe etikën mediatike.
“Publiku ka të drejtë të dijë se si janë siguruar këto pamje, për çfarë qëllimi janë përdorur dhe nëse publikimi i tyre përbën shkelje të privatësisë,” tha ai.
“Media dhe gazetarët që kanë përdorur këto të dhëna kanë detyrimin të bëjnë transparencë për marrëdhënien me institucionin që ka përgjegjësinë për ruajtjen e tyre,” shtoi Çela.
Kompania që po zhvillon resortin, Zvërnec South Adriatic Development, është regjistruar offshore në formën e një trusti në Holandë, ndërsa pronarët përfitues të saj mbeten anonimë.
Komentet