Sipas një raportimi të Wall Street Journal, presidenti amerikan Donald Trump u ka bërë të ditur bashkëpunëtorëve të tij se është i gatshëm të përfundojë fushatën ushtarake kundër Iranit, edhe në rast se Ngushtica e Hormuzit mbetet kryesisht e mbyllur.

Duke cituar zyrtarë të administratës, gazeta shkruan se Trump dhe këshilltarët e tij kanë vlerësuar se një operacion për të rihapur me forcë këtë korridor kyç detar do ta zgjeronte konfliktin përtej afatit të parashikuar prej katër deri në gjashtë javësh.

Në vend të kësaj, presidenti amerikan thuhet se po shqyrton mundësinë e përfundimit të luftimeve aktuale, duke argumentuar se infrastruktura detare e Iranit dhe rezervat e tij të raketave janë dëmtuar rëndë gjatë operacioneve të fundit.

Raporti thekson se administrata amerikane synon të vijojë presionin diplomatik ndaj Teheranit për të rikthyer qarkullimin tregtar në këtë rrugë jetike për transportin global të energjisë.

BBC bën të ditur se ka kontaktuar Shtëpia e Bardhë për një koment zyrtar lidhur me këto zhvillime, por deri tani nuk ka pasur një reagim. Panorama