Bllokada e Parlamentit nuk është rastësore. Përkundrazi, me fjalë boshe, me gojën plot demokraci, por me veprime moniste dhe kundra demokratike, subjektet politike në Kosovë, kanë degraduar deri në degjenerim të skajshëm. Pushteti bërrylor i komandantëve, me mujshi e përgjakje, qoftë edhe në paqe, rrënoi Sistemin e Drejtësisë, duke shmangur kontrollin shtetëror. Shtetarë e pushtetarë zuzarë, përvetësuan institucionet dhe rrufeshëm privatizuan shtetin, duke zhvatur pasuritë e brezave shqiptarë. Zbatharakët dhe brekëgrisurit e djeshëm, u bënë milionerë të sotëm!

     Nga sistemit monist, komunist kopjuan votimin aklamativ, të hapur, me ngritje dore, për ta vazhduar sundimin, madje deri në ngordhje. Në Kushtetutë dhe akte tjera ligjore, si parësi është kodifikuar e normatizuar -votimi i fshehtë-, i huazuar nga kodi i Napoleonit francez. Por, djallëzisht dhe qëllimshëm, është shoqëruar me një klauzolë: “Bënë edhe me aklamacion, me votim të hapur, siç ta vendosë Kryesia apo Kuvendi, për të gjitha llojet e zgjedhjeve!” Ndërkohë, e tejkaluan monizmin me hajninë zyrtare, duke e modifikuar me një emërtesë “evropiançe” -korrupcion-!

     Sepse në epokën e Titos, di rast dhe raste, kur për disa qindra dinarë, të konvertuar në 400 marka, deficit, mangësi, në një dyqan, njësi tregtare, të kontrollit të inventarizuar, shitësi ka vuajtur plot 4 vjet burg. Ndërsa në Shqipërinë e Enverit, për pak arka me agrume (portokaj, mandarina, limona), të dëmtuara në një magazinë, ministri i Tregëtisë, Kiço Ngjela, (babai i avokatit të njohur, Spartak Ngjela), është dënuar me 25 vjet burg, për sabotim të pasurisë shtetërore, të vuajtur në Burgun sketerrë të Burrelit. Kurse për tri lopë të ngordhura, në shtallën-fermë të Kamzës, lagje e Tiranës, janë pushkatuar dy dhe janë dënuar me shumë vite burg disa blegtorë të shtallës!

     Keni vëmendjen e duhur dhe ngulmoni për një të drejtë unike, absolute: Praktikoni votën e fshehtë, si barometër të demokracisë.

Harrojeni për jetë e mot -aklamacionin-, votimin fiktiv, të hapur, me ngritje dore! Është një metodë tipike komuniste, për ta mbrojtur mashtrimin, gënjeshtrën, falsifikimin, hipokrizinë, servilizmin!

     1) Po të ishte praktikuar vota e fshehtë, krimineli rus-sovjetik, Stalin, nuk do të arrinte ta sundonte, me dajak e plumb, për tej tri dekadave, Bashkimin Sovjetik.

     2) Po të praktikohej votimi i fshehtë, Hitleri nuk do të arrinte të vihej në krye të Gjermanisë Federale dhe ta sundonte dhe përdhoste atdheun e Getës dhe t`i shkaktonte Evropës dhe botës miliona viktima dhe rrënime të qytetërimit evropian dhe botëror.

     3) Po të ishte votimi i fshehtë, kriminelët rusë Putin dhe Medvedev, nuk do të vazhdonin sundimin e tyre kriminal, duke i ndërruar pozitat president-kryeministër, njësoj siç e kishin planifikuar të bënin në Kosovë tandemi Hashimi-Isa, me aklamacionin zgjedhor fiktiv të imponuar. Matematikat ua prishën Amerika, Gjermania…

     4) Po të praktikohej vota e fshehtë e shqiptarëve, që zakonisht e garanton çdo Kushtetutë e Kontinentit Evropian, filosllavi, por edhe kryetradhtari i deritashëm shqiptar, Enver Hoxha, nuk do ta zgjidhnin kolonët malazezë dhe serbë, për të parë të Shqipërisë, në Vitomiricë të Pejës! Dhe, kurrë nuk do të arrinte ta sundonte e “sakatonte” Shqipërinë londineze, për afro gjysmë-shekulli!

     5) Po të praktikohej vota e fshehtë, edhe pse Isa Mustafën e katapultoi Hashim Thaçi, me SHIK-un e tij kriminal, në krye të LDK-së, për ta bërë -bisht e patericë- të PDK-së, të paktën, nuk do t`i vazhdohej mandati i dytë dhe i tretë i kryetarit të LDK-së, pa qenë kurrë anëtar i saj, falë votimit aklamativ, fiktiv, të rrejshëm!

     Si delegatë në 4 (katër) Kuvendet në Zgjedhjet Qendrore të LDK-së, në Prishtinë, më shumë se zgjedhje, ishin një -Maskaradë- zgjedhore. Në sallën zgjedhore kuvendore ishin 359 delegatë. Turpshëm e kriminalisht shkermoçej demokracia dhe partia – njëherësh! Votimi aklamativ, i tufëzuar, blegtoral vazhdonte. Asnjë zë, asnjë debat, asnjë propozim, përveç ata që kishte listuar Shefi Isë me klanin e tij! Delegatëve të Mërgatës u kishin lënë vendin në radhën e fundit të karrikeve kuvendore, edhe pse kishin bërë mijëra km rrugëtim, ardhje-kthim, me shpenzimet e tyre, për të qenë pjesë e Kuvendit Zgjedhor!

     Reagova me zë të lartë. Një gazetar trimosh, (më vjen keq që nuk ia mësova emrin, pres të lajmërohet), më ofroi mikrofonin. Në mes tjerash, shfryva: “O skllevër të shekullit digjital, si nuk keni turp ta vrisni demokracinë, me aklamacionin tuaj të poshtër dhe heshtjen tuaj qyqare e kriminale?! Çfarë fytyre keni të dilni para anëtarësisë dhe elektoratit të LDK-së, për të kërkua sërishmi votën?!” Në sallë pati duartrokitje, por duart zgjedhore u ngritën për Isa Mustafën! Dhe, LDK-ja e pësoi me 10.5 % dhe jo 12.5 %, sepse kishte hisedarë në koalicion.

     6) Po të ishte votimi i fshehtë, shqiptarët londinezë nuk do ta riciklonin karagjozin Ramë, me atë zhargonin pezhoartiv dhe provokimin e shqiptarëve të përbotshëm, i cili me mbështetjen e turpshme të ndërkombëtarëve, rrënoi pluralizmin në Shqipëri, të krijuar me sakrifica e gjak, për gjysmë-shekulli radhazi!

     7) Po të bëhej votimi i fshehtë, Hashim Thaçi, duke qenë agjent i trefishtë:  i Sigurimit të përgjakshëm sekret të Enver Hoxhës; i Shërbimit Informativ DGSE francez; përmes Arnaud Danjear, agjent i Serbisë, nuk do të arrinte kurrë të bëhej president i Kosovës! (Për rekrutimin e Hashimit agjent, lexoni  në -Jou Tube- rrëfimin e kreut të Shërbimit francez, Pierre Siramy).

         Vota e fshehtë është dhuratë e Perëndisë për Demokracinë!

     Shtetarë, pushtetarë, parlamentarë, kuadro partiakë dhe kushdo tjetër, që ka frikë të provohet me votën e fshehtë, ata janë frikacakë, kanë arritur të ngritën në poste me bërryla dhe janë, thjeshtë, brrylaxhi, të cilët duhet të futën sa më parë në testimin e votës së fshehtë. Sepse ajo  do t`i skarconte llumhanen ndotëse të institucioneve të Kosovës, subjektet e kriminalizuara politike dhe Parlamentin e ngulfatur, nga mujsharë e zuzarë të neveritshëm. Për të tillët Akademik Mark Krasniqi thoshte: “Kur të qethën ogiçët, do të shihni çfarë morracakësh janë!”

     Kolapsi kuvendor është sa artificial, aq edhe hiç ligjor. Demokracia e përjashton kushtëzimin, duke i dhënë parësi e hapësirë debatit. Kuvendi nuk guxon të bëhet viktimë e Kadri Veselit, të Vetting-ut, të Byrosë për Verifikimin e Pasurive të pa mbulesë financiare. E gjithë e thëna dhe e bëra e ministres dhe e deputetes luftarake dhe atdhetare, Albulenë Haxhiu, tashmë, të dëshmuar me tej 150 mijë vota të fshehta të qytetarëve të Kosovës, qëndron dhe është super meritore për postin e lartë, kryetare e Kuvendit të Kosovës. Çfarëdo propozimi të dytë, në vend të Albulenës, qoftë edhe ideal, do të përbënte precedent të rrezikshëm, sepse imponohet vullneti i humbësve, për zgjedhjen e kryetarit të Kuvendit, ndërkohë që këtë të drejtë e gëzon vetëm partia fituese.

     Zakonisht, shqiptarët nuk shquhen për sinqeritet. Ndërkohë që hipokrizia është bollshëm e pranishme. Robëria e gjatë, nga pushtues të egër e mizorë, ka ndikuar dukshëm. Andaj, hipokrizia është me tepri e pranishme. Sistemi komunist e ka normë hipokrizinë, servilizmin, gënjeshtrën dhe veset tjera turpëruese. Raporti në mes votës aklamative me atë të fshehtë, e para dominon me negativitet, e shprehur në shifra dhe përqindje: 8 me 2 ose 8 % dhe 2 %! Pra, nga përvoja e votimeve në demokraci, për gjatë këtij çerek-shekulli, bilanci është fatal. Prandaj, harrimi i aklamacionit, votimi fiktiv, i hapur, duhet harruar, për t`i dhënë qytetarinë votimit të fshehtë, si e vetmja votë demokratike, e cila pastron Parlamentin dhe institucionet tjera nga krimi dhe kriminelët.

     Kushtetuta e pranon votimin e fshehtë dhe kjo i demanton belbëzimet e disa ish-kuadrove të Gjykatës Kushtetuese, të emëruar, enkas, nga Hashimi, për t`i shërbyer atij dhe Serbisë, në përpjekjen për t`i shpëtuar penalizimit të bazuar. Disa thonë se kjo duhej propozuar ende pa filluar konstituimi i organeve kuvendore dhe jo në mes, pasi ka filluar prova e konstituimit me aklamacion.

     a) Opozita e bashkuar, duke shtuar edhe Listen Serbe, bëri koalicionin -PLAS-, pas zgjedhor, gjë që e përjashton Kushtetuta. Pra, Kushtetuta njehë vetëm koalicionet parazgjedhore dhe assesi ato pas zgjedhore. Megjithatë, lë të vazhdojë koalicioni -PLAS-, por, pa e penguar votimin e fshehtë kushtetutorë, meqë votimi fiktiv aklamativ, i hapur, ka dështuar në zhbllokimin e punës kuvendore;

    b) Sepse kanë ndodhur gjëra sa të jashtëligjshme, aq edhe të jashtëzakonshme, në pozicionimin bojkotues gruporë të opozitës destruktive dhe koordinuese e drejtpërdrejtë me presidentin serb Vuçiq, për të larguar Albin Kurtin dhe LVV të tij nga pushteti, i fituar me votën e fshehtë të qytetarëve të Kosovë! Dhe, për t`i kthyer në pushtet komandantët e kriminalizuar, në koalicion me Listen Serbe, me njëmijë e një mëkate karshi shtetit të pavarur të Kosovës!

     Thënë troç, qytetarët e Kosovës kanë humbur, tërësisht, besimin në opozitën, kryesisht, PAN-in, kur janë të gatshëm ta pranojnë Asociacionin me çfarëdo përmbajtje qoftë; të pranojnë krijimin e komunave si ajo e Dudisë sot e, ndoshta, nesër edhe të Vetushit dhe Hoxhushit, në përpjekjen e mundimshme, për t`u zvarritur në politikën dështake partizat minore! PAN-istët mbijetojnë nga klientela elektorale, duke pasur të garantuar votat: pjesës më të madhe të armatës të nëpunësve shtetërorë, të stazhionuar për dy dekada radhazi; anëtarësia e organizatave kriminale SHIK me  simotra; të dhjetra-mijëra veteranëve të rrejshëm, të abuzuar me buxhetin e shtetit.

     Opinioni shqiptar është i befasuar me Lidershipin e LDK-së, me bojkotin e shpërfaqur në mënyrë sa të vrazhdë, aq edhe të panatyrshëm, përkrah partive-banda, të koalicionura kundërligjshëm, pas zgjedhjeve të 9 shkurtit 2025?! Opinioni i përbotshëm shqiptar pret reflektimin e partisë Institucionale, LDK, braktisjen e bojkotit dhe ndërprerjen e bashkëpunimit me PAN dhe Lista Serbe, për ta zhbllokuar Kuvendin dhe bërjen e koalicionit qeverisës LVV-LDK.

     Populli i Kosovës është i lodhur dhe i dërrmuar me pehlivanllëqet e politikanëve të papërgjegjshëm. Është shansi i fundit, për të shpëtuar atë çka mund të shpëtohet nga fytyra e tyre.

     Përndryshe, e gjithë kjo lojë e ndyrë, e PAN-it, duke ndërhyrë edhe në drejtësinë e shumëpritur ndërkombëtare, si shpresë e fundit e shqiptarëve, për të vënë dhe bërë drejtësi të pavarur, do të jetë e kushtueshme, për kodoshët dhe zuzarët e politikës kriminale e rrugaçërore, e kufizuar në përfitimet personale e grupore, por gjithnjë kundër dhe në dëm të Kosovës.