Kur një pacienti nuk i funksionon një pjesë e trupit, në gjuhën mjekësore identifikohet si paralizë e pjesshme, kurse në rastin kur pacientit nuk i funksionon truri, atehërë kemi të bëjmë me paralizë të trurit apo vdekje klinike të pacientit.

Dështim skandaloz i seancës së nëntë ple(h)nare

Për të vazhduar me terminologjinë mjekësore, Kuvendit i është paralizuar truri dhe deputetët janë shndërruar në kufoma të gjalla apo në vdekje klinike politike.

Deputetët pengje të liderëve partiakë, pas seancës së sotme nuk e meritojnë më që të ulen më në ulëset e Kuvendit të Kosovës!

Tendenca për ndryshim të mënyrës së votimit në mënyrë të jashtëligjshme brenda një seance të filluar, e paraqet dështimin më skandaloz të kësaj legjislature.

Ndryshe, ky duhet të jetë fundi i kësaj legjislature dhe fillimi i një epoke të re në politik-bërjen kosovare me një alternativë të re politike, për t’i larguar komplet nga skena politike këtë klasë kusarësh politikë, që për interesa personale e kanë paralizuar jetën instititucionale të vendit tonë.

Nga sot, qytetarët që ia duan të mirën këtij vendi, duhet t’i bllokojnë të gjitha hyrjet e Kuvendit dhe të Qeverisë së Kosovës, për t’ua bërë të qartë këtyre partive politike dhe politikanëve matrapaz se nuk e meritojnë as të jenë më pjesë e listave zgjedhore.

Thirrje bashkësisë ndërkombëtare

Deri në arritjen e këtij qëllimi, ne qytetarët e Kosovës i kemi ndërkombëtarët që janë drejtuesit faktik të shtetit dhe mbrojtësit e sigurisë së vendit tonë. Këto figurat politike të skenës politike duhet t’i hudhim në koshin e mbeturinave!

Situata e krijuar e vdekjes klinike të Kuvendit është duke ju konvenuar të gjitha partive politike, me shpresën e shkuarjes në zgjedhje!

Nuk duam zgjedhje, por zgjidhje!

Në rastin konkret zgjidhjen mund ta bëjnë vetëm ndërkombëtarët!

I ftojë SHBA-të dhe shtetet e Bashkimi Evropian që t’na i dërgojnë 120 deputet në zarf, po ashtu në zarf le t’na i dërgojnë edhe organet drejtuese të Kuvendit dhe kryeministrin e ardhshëm, përkatësisht ‘Qeverinë Teknike’ në zarf deri në ngjizjen e një alternative të re politike.

Miq të dashur ndërkombëtarë, ju lutem na ndihmoni t’i largojmë këto banda partiake, se edhe juve ju kemi bërë barrë në qafë tani e 26 vite më parë, e në veçanti që 17 vite me shtet të pavarur dhe sovran!

Florim Zeqa, 1 Maj 2025