Atje ku nuk ka protestë, mendohet se rrjedhimisht “nuk ka” probleme!

Të jetë kjo vërtetë mendësia e të gjithë atyre anëtarëve të Kuvendit të Shqipërisë që e përfaqësojnë Tiranën pavarësisht përkatësisë politike?!

Kryeqyteti i Shqipërisë Tirana përfaqësohet nga 37 deputetë pas zgjedhjeve të 11 Majit, 2025* kjo mbi 1/4 e numrit të përgjithshëm prej 140 përfaqësuesve të popullit në Kuvend.

E shtrojmë këtë shifër krahasuese për të kuptuar se në 11 muaj jetë parlamentare,  ata/ato kanë dalë nga vota edhe e atyre që janë në shesh dhe protestojnë prej dy muajsh.

Po të shkonim sipas kësaj logjike, deputetët e forcave të ndryshme politike nga qarqet ku nuk protestohet (vështirë se do të gjeje ndonjë tani në Shqipëri), do ta shijonin si të zakonshme ditën e tyre të punës në Kuvendin e Shqipërisë që nga mëngjesi i seancave plenare të pa rrethuara me forca policore si dhe nga protestues që hedhin thirrje kundër qeverisë apo hedhin drejt tyre vezë dhe domate si për të treguar vazhdimin e pakënaqësisë prej fundit të muajit Maj.

Janë 13,798 vota që i përkasin subjekteve të tjera politike pa përfaqësim në parlament pas Zgjedhjeve të 2025-ës të cilat nuk besohet se do të përfaqësonin të pakënaqurit protestues. Është provuar se pavarësisht numrave, protesta e pa ndërprerë mbledh në Tiranë, rrethet e diasporën përveç kryeqytetasve çdo ditë.

Ndërsa media shpesh kërkon se kush është lidershipi dhe përfaqësia, akoma pyetja kryesore se sa zëri i protestës ka mbërritur në Kuvend dhe të diskutohet mbi partitë ende nuk është bërë(?).

Atëherë lë ta shtrojmë ndryshe pyetjen.

Kë përfaqëson Kuvendi?

Pas 11 muajsh vetëm dy i ka marrë protesta.

Dëgjojmë në media se “programet prime”, po i mbyllin kohët e tyre për t’u takuar në sezonin e ri të vjeshtës.

Të njëjtën gjë edhe politikanët.

Mirupafshim në Shtator!

Po deputetët e Tiranës që e kanë konvertuar votën në mbijetesë politike, a do bëjnë edhe ata pushime apo përgjegjësia ndaj zgjedhësve do t’i bëjë ata të ngrihen mbi partitë për t’i dhënë një përgjigje protestuesve?

Në qoftë se edhe ata nuk e thonë dot fjalën dhe të mbajnë qendrimin në Kuvend, kjo tregon farsën e kodit zgjedhor dhe efektin e listës së mbyllur. Ligjbërësit janë aty jo për popullin, por për kryetarët.
Gushti njihet dhe si muaji i të ngelurve për vjeshtë.

Politika dhe media po nxitojnë të shkojnë me pushime, ndërsa protestuesit bëjnë të kundërtën duke i treguar se pa këtë provim të dorëheqjes ata janë ngelësa përballë korrupsionit dhe krimit ekonomik.

30 Korrik, 2026