Sot shënohet 37 vjetori i ekzekutimit për motive politike i poetit dhe mësuesit Havzi Nela.

Më 10 gusht të vitit 1988 me firmën e xhelatëve të diktaturës hoxhiste, Ramiz Alia dhe Kristaq Rama, babait biologjik të kryeministrit Edi Rama, Havzi Nela u ekzekutua me varje në sheshin kryesor të qytetit të Kukësit, vetëm dy vjet para shembjes së diktaturës.

E pikërisht sot Partia Demokratike – Dega Kukës do të nderojë me respekt figurën e poetit dhe intelektualit të shquar.

Në ora 10:30 do të zhvillohet një ceremoni përkujtimore në nder të sakrificës dhe veprës së tij, që mbeti një simbol i qëndresës ndaj persekutimeve dhe shprehjes së mendimit të lirë, informon PD, dega Kukës.

Ceremonia do të mbahet tek Busti i Havzi Neles, para Gjimnazit “Havzi Nela”, Kukës ku do të zhvillohen dhe homazhe

PD fton të gjithë qytetarët e Kukësit, intelektualë, studentë dhe të gjithë ata që e kanë pasur Havzi Nelen një burim frymëzimi dhe simbol të guximit intelektual të jenë të pranishëm në këtë ceremoni.

Pjesëmarrësit do të kenë mundësinë të kujtojnë kontributin dhe mesazhet që ai ka lënë pas, për luftën për liri, drejtësi dhe të drejtat e njeriut.

Ekzekutimi i poetit 

Havzi Nela u burgos 21 vjet nga regjimi komunist dhe në fund u dënua me vdekje, sepse fliste hapur kundër ndalimit të fesë, kundër kolektivizimit dhe kooperativave në fshat. Në dokumentet për vrasjen e tij nënvizohet se ai “ishte armik i betuar i pushtetit komunist”.

Regjimi komunist e mbylli dosjen e Havzi Nelës me urrejtje, gjak dhe terror.

Udhëheqësi i fundit i diktaturës komuniste, Ramiz Alia, i refuzoi kërkesat për falje jete. Ekzekutimi u krye më 10 gusht 1988 në Kukës, trupi i poetit qëndroi në qytet për të frikësuar njerëzit.

Ai u varros pa asnjë shenjë dalluese në një gropë të hapur për shtylla elektrike, madje u gjet pa kokë pas shumë vitesh. Ai u shpall “Nderi i Kombit” nga Presidenti i Republikës dhe një gjimnaz në vendlindje mban emrin e tij.