Të dashurat tona s’dalin jashtë mode- Poezi nga FATBARDH AMURSI

October 19, 2025

Versnikët e mi,

shokë të rinisë kur miqtë kishin duk,

që u rritëm para se atdheu të hidhte shtat.

Që t’mos na hedhin bashkë me shtatoren

hajd të bëhemi si dikur bashkë!

.

Bashkë,

në mbrojtje të dashurive tona,

që sot po i quajnë demode,

Të dashurat,

që u kushtuam lirikat me dell romantikë,

S’është rastësi

që në sarhosh janë kthyer sot

poetët e dikurshëm lirikë.

.

U tallëm me shkesët,

që sot janë kthyer në sekserë,

Me prepotentët që tridhnin në zyra të pabindurit

dhe sot kërkojnë favore seksuale,

Na quajtën vagabondë eunukët,

na akuzuan për aventurierë karieristët,

gagarelë në modë,

Por të dashurat tona

na shihnin si princër të kaltër

përkundër gardistëve të kuq,

që bënin ligjin si të fortët sot.

.

Përkundër impotentëve,

që hiqnin të puthurat në kinostudio,

erotikën na e kyçnin në sirtarë redaksish,

Ku s’munguan asnjëherë ca kuçka,

që mburreshin me djersën proletare

duke zbuluar me erën e parfumit armiq.

.

Bukuroshet tona zbutën diktaturën,

mos ia njihni shkrimtarëve këtë atribut,

Falë aromës së tyre dehëse

brezi ynë s’ra era barut.

Me këna i lyenin flokët

erë mollë binte dollapi,

era borzilok oda,

Ndonëse u veshën me basme kombinati

ato ditën të dukeshin si zonja.

.

Fatbardh Amursi

• twitter

  Follow
• facebook
• linkedin

Fjalë kyçe: Fatbardh Amursi