Këshilli i Evropës ka vendosur t’i heqë imunitetin ish-Sekretarit të Përgjithshëm, Thorbjørn Jagland, pas një kërkese nga autoritetet norvegjeze, të cilat kanë nisur një hetim për dyshime korrupsioni në lidhje me marrëdhëniet e tij me financierin e ndjerë Jeffrey Epstein, i dënuar për krime seksuale.

Vendimi për heqjen e imunitetit u mor unanimisht nga Komiteti i Ministrave i Këshillit të Evropës gjatë një mbledhjeje të zhvilluar të mërkurën në mëngjes.

‘Me kërkesë të autoriteteve norvegjeze, organi vendimmarrës statutor i Këshillit të Evropës vendosi të heqë imunitetin e Thorbjørn Jagland në cilësinë e tij si ish-Sekretar i Përgjithshëm’, thuhet në njoftimin zyrtar të institucionit.

Sipas Këshillit të Evropës, vendimi vjen pas zbulimeve mediatike të publikuara që nga nëntori 2025, të cilat raportuan për komunikime dhe kontakte mes Jagland dhe Epstein.

Hetimi pritet të përqendrohet në verifikimin e pretendimeve nëse Jagland ka përfituar dhurata, udhëtime të paguara apo favore të tjera nga Epstein.

Në media është publikuar gjithashtu një email i datës 25 maj 2012, në të cilin Jagland i shkruan Epstein-it: ‘Kam qenë në Tiranë. Vajza të jashtëzakonshme’.

Jeffrey Epstein, sipas prokurorëve amerikanë, kishte krijuar një rrjet të gjerë shfrytëzimi seksual të të miturve dhe kishte mbajtur kontakte me figura me ndikim në vende të ndryshme të botës, përfshirë Evropën.