VOAL – Ekipet e shpëtimit arritën dhe kapën njeriun që u ngjit me Kullën Eifel me duart bosh dje pasdite dhe pothuajse arriti majën e monumentit parizian.
Një njeri që rri pezull mbi Kullën Eifel
Individi, një 40 vjeçar, i cili qëndroi pezull në zbrazëti për orë të tëra dhe kërcënoi të bënte vetëvrasje, tani është “nën kontroll” dhe është “marrë nga ekipet e ndërhyrjes”, sipas një burimi policor të raportuar mbrëmë nga kompania e menaxhimit të monumenteve, e cila u rihap për vizitorët të martën në mëngjes në orën 09.30.
Shpëtuesit në veprim
Alarmi, i shkaktuar rreth orës 15.00, u ndoq në pak minuta nga ndërhyrja e zjarrfikësve e forcave të policisë dhe nga evakuimi i plotë i kullës.
Presidenti amerikan Donald Trump tha të shtunën se ai nuk ka thënë ndonjë gjë të gabuar gjatë një bisede telefonike që ka patur me presidentin e ri të Ukrainës. Sipas njoftimeve në media zoti Trump i ka kërkuar Presidentin ukrainas Volodymyr Zelenskiy të hetojë djalin e ish-nënpresidentit amerikan Joe Biden, i cili po konkuron për të qenë kandidati i demokratëve për zgjedhjet e vitit 2020.
Ndërkohë demokratët i kanë përforcuar kritikat ndaj presidentit për atë që ata e shohin si një përpjekje për të përfshirë një udhëheqës të huaj në një skemë për të dëmtuar kandidaturën e rivalit kryesor të zotit Trump në fushatën presidenciale.
Në një postim në twitter të shtunën në mëngjes zoti Trump shkruante se ai kishte zhvilluar një “bisedë normale e rutinore” më 25 korrik me Presidentin ukrainas Volodymyr Zelenskiy dhe se “nuk kishte thënë asgjë të gabuar”.
Zoti Trump akuzoi demokratët dhe median se kanë injoruar pretendimet kundër zotit Biden dhe se kanë krijuar një histori të rreme për të.
Sipas njoftimeve në media që i referohen personave që kanë dijeni mbi çështjen zoti Trump i kërkoi zotit Zelenskiy rreth tetë herë gjatë bisedës, që të hetohet djali i zotit Bidenit. Të njëjtat burime thonë se qëllimi i zotit Trump ishte që zoti Zelenskiy të bashkëpunonte me avokatin e tij, Rudolph Giuliani për një hetim që mund të minonte zotin Biden.
Ministri i Jashtëm ukrainas Vadym Prystaiko i mohoi shtunën njoftimet në media se zoti Trump i kishte bërë presion zotit Zelenskiy gjatë bisedës telefonike. Ai tha rrjetit televiziv ukrainas Hromadski se Ukraina nuk mban anë në politikën amerikane.
Zoti Trump dhe zoti Guiliani kanë kërkuar me javë të tëra një hetim të zotit Biden bazuar në njoftimet në shtyp gjatë këtij viti, që pretendojnë se një kompani energjitike ukrainase është përpjekur të sigurojë ndikim në SHBA, duke punësuar djalin e vogël të Bidenit, Hunter.
Demokratët e kanë dënuar atë që ata e shohin si një përpjekje të bashkërenduar për të dëmtuar zotin Bidenin. za
Historiani gjerman: Enver Hoxha e shndërroi Shqipërinë në vend invalid, por për krimet e regjimit të tij s’flet askush, as nuk dënohet askush
Së fundi kanë qëndruar për vizitë në Shqipëri 20 shkencëtarë gjermanë, të cilët merren me trajtimin e së kaluarës. Qëllimi i vizitës ka qenë që me palën shqiptare të krijohen kontakte për bashkëpunim. Shkencëtarët kanë vizituar kampet e internimit në Spaç dhe Tepelenë, kanë qëndruar në Shkodër dhe kanë diskutuar me të mbijetuar të diktaturës së Enver Hoxhës. Pas kësaj vizite historiani Christoph Dieckmann ka shkruar një tekst të gjatë në gazetën DIE ZEIT të Hamburgut mbi historinë e Shqipërisë në shekullin e XX dhe trajtimin e së kaluarës komuniste – ose thënë më mirë: mungesën e gatishmërisë për të trajtuar krimet e komunizimit.
Dieckmann përshkruan fillimisht një vizitë në Spaç, dikur minierë e bakrit dhe qendër e kampit më të tmerrshëm të shfarosjes të ndërtuar më 1968 nga regjimi i Enver Hoxhës. Dieckmann e quan Spaçin «kamp përqendrimi». Në minierën e Spaçit punonin 1400 të burgosur. Më 1973 dhe 1985 në Spaç u shtypën dy kryengritje të të burgosurve. Shtatë udhëheqës të revoltës u vranë. Në vitin 1990 kampi u mbyll, më 2009 qeveria vendosi që në Spaç të hapë një muze. As sot e kësaj dite ky muze nuk është hapur. Fabian Kati, njëri nga të burgosurit në Spaç, thotë se shoqëria shqiptare nuk e sheh të domosdoshme të merret me trajtimin e diktaturës komuniste. Përse ishte dërguar në burgun e Spaçit Fabian Kati? Sepse me një antenë «kundërrevolucionare kishte dëgjuar pop-muzikë», e cila nga regjimi konsiderohej armike e klasave. Kati kishte përkthyer edhe tekste të këngëve, ky ishte mëkati i tij i radhës.
Historiani gjerman Christoph Dieckmann citon ish të burgosur të cilët thonë se një e treta e shqiptarëve janë përndjekur nga regjimi, Spaçi ka qenë Auschwitzi ynë, thotë një tjetër, dhe njëri shton: Auschwitzi u çlirua pas tri vitesh, Spaçi tek pas disa dekadave. Dieckmann përshkruan me ton telegrafik vërtitjen e Shqipërisë komuniste nga aleanca me Bashkimin Sovjetik te thellimi i raporteve me Kinën. Më 22 nëntor 1967 Radio Tirana njoftoi se Shqipëria ishte shpallur shteti i parë ateist në botë. 2035 objekte kulti u shkatërruan apo iu ndërrua destinimi, dinjitarët fetarë u vranë apo internuan, lutjet dënoheshin me masa drakonike. Mes alpeve shqiptare dhe Detit Jon u ndërtuan 173 mijë bunkerë. Shërbimi sekret Sigurimi nuk ndalej së zbuluari armiqtë klasorë, më 17 dhjetor 1981 kryeministri Mehmet Shehu u gjet i vdekur në shtratin e tij. «Kur vdiq Enver Hoxha më 1985, ai la pas vetes një vend invalid, krejtësisht të izoluar. Pas autokratit pushtetin e mori zëvendësi i tij Ramiz Alia, pas diktaturës personale erdhi oligarkia partiake», shkruan Dieckmann.
Pushkatimi i Nikolai Çausheskut dhe gruas së tij në Rumani më 1989 i frikësoi komunistët shqiptarë, të cilët lejuan themelimin e partive politike. Më 1990 u themelua Partia Demokratike. Dieckmann shkruan: «Demokratët e rinj nuk kishin një Havel apo një Valensë. Ata nuk rridhnin nga skena e disidentëve, as nga lëvizja sindikale, as nga kisha e distancuar nga regjimi, as nga grupi i kuadrove të ekzilit. Të gjithë vinin nga sistemi i mbyllur, të gjithë ishin edukuar në frymën komuniste. Ky është totalitarizëm. Sot të dy partitë funksionojnë si sisteme klanore dhe klienteliste. Në Shqipëri qarkullon një maksimë: të majtit janë më të djathtë se të djathtit dhe e kundërta».
Historiani gjerman Christoph Dieckmann tregon hollësisht vrasjen e murgeshës Marije Tuci. Ajo vdiq më 1950, ishte 22-vjeçare – vdiq për shkak se refuzoi të shtrihet në shtrat me shefin lokal të Sigurimit. Marije Tucin e futën në një thes, bashkë me një mace të egër, dhe e mbytën duke e goditur me shufra. Ajo sot është martire e kishës, martirë janë edhe 36 priftërinj dhe një imam. Vetëm në Shkodër regjimi burgosi 2890 njerëz, 601 i vrau, 136 vdiqën nga torturat. Në Shqipërinë diktatoriale u vranë 6000 njerëz. Pjerin Mirdita, i cili drejton një qendër memoriale në Shkodër, thotë se vrasësit e kohës së diktaturës as nuk përmenden, as nuk ndiqen penalisht. Nga vullneti i arsimtarëve varet nëse ata e tematizojnë diktaturën e Hoxhës në shkolla. Sipas Pjerin Mirditës shumë njerëz në Shqipëri kanë qejf të flasin për të arriturat e vendit në periudhën e Luftës së ftohtë. Pleqtë duan të harrojnë.
Rrugës për në Tepelenë, shkruan Dieckmann, shihen gra me shami të bardha duke punuar arat, burra me gomarë duke medituar, djem mbi mure duke përshëndetur me dorë, minare dhe një pikë karburanti, ku mes pastës së dhëmbëve dhe marmelatës së fikut gjenden CD me këngë që e lavdërojnë Enver Hoxhën. Tepelena, sipas historianit gjerman: para muzeut një përmendore e Ali Pashë Tepelenës, në muze kiç partizan, përfshirë një dhomë në kujtim të diktatorit Hoxha. Një pikturë revolucionare e paraqet atë duke e edukuar popullin, lart mbi luginë dhe lumë. Në Tepelenë Simon Mirakaj tregon historinë e tij: si u internua si fëmijë në kampin e Tepelenës, si pa dhe përjetoi vuajtje, vaj e vdekje – dhe Ilda Themeli, përkthyesja e shkencëtarëve gjermanë, kërkon një pauzë, sepse duhet të qajë.
Shumica e të internuarve në Tepelenë nuk kanë marrë asnjë dëmshpërblim, nuk ka dokumente për kampin e Tepelenës, s’ka as fotografi, ekzistojnë vetëm disa vizatime dhe tregime të të burgosurve. «Arkivi i diktaturës së Shqipërisë janë kujtimet e familjeve. Organizatat e viktimave punojnë të ndara në rajone, janë të fragmentuara, nuk janë të lidhura me njëra-tjetrën. Nuk ka diskurs kombëtar mbi diktaturën ose konsenzus mbi historinë», shkruan Dieckmann.
Në fund të vizitës Dieckmann flet edhe në emër të kolegëve të tij gjermanë, kur thotë: jemi të tronditur kur shohim se deri më sot në Shqipëri autoriteti i dosjeve të Sigurimit ka përpunuar dhe miratuar vetëm 1500 kërkesa për zbardhjen e dosjeve. Ligjin përkatës e ka miratuar qeveria socialiste e Edi Ramës, opozita demokrate nuk ka votuar, shoqatat e viktimave e quajnë ligjin «demagogji». Shqipëria, shkruan Dieckmann, është planet tjetër, s’mund të krahasohet me Gjermaninë e cila pas bashkimit është ballafaquar me të kaluarën komuniste të Gjermanisë Lindore./Përktheu Enver Robelli
Presidentja e zgjedhur e Komisionit Evropian, Urusla von del Leyen, e mbrojti vendimin e saj për të emëruar në mesin e anëtarëve të rinj të KE-së një zyrtar përgjegjës për, siç thuhet, Mbrojtjen e Mënyrës Evropiane të Jetesës, edhe pse kritikët e cilësuan këtë si slogan të ekstremit të djathtë.
Von der Leyen reagoi pasi udhëheqësja e ekstremit të djathtë në Francë, Marine Le Pen, e cilësoi emërimin e ri si “fitore ideologjike”.
Von der Leyen postoi në Twitter një pjesë nga Traktati i Lisbonës, i cili thotë se Bashkimi Evropian është i bazuar në vlera që përfshijnë respektimin e dinjitetit njerëzor, lirinë, demokracinë, barazinë, sundimin e ligjit dhe të drejtat e njeriut.
“Mënyra evropiane e jetesës gjithashtu nënkupton të dëgjoni dhe debatoni me njëri-tjetrin për të gjetur zgjidhje për të mirën e përbashkët. Kjo është ajo që unë dua që ne të bëjmë së bashku”, tha ajo.
Von der Leyen e emëroi grekun Margaritis Schinas, ish-anëtar i Parlamentit Evropian, komisionar për Mbrojtjen e Mënyrës Evropiane të Jetesës.
Italia pranoi të lejojë anijen e shpëtimit “Ocean Viking” të zbarkojë 82 emigrantë në portin e Lampeduzës. Megjithatë, autoritetet italiane kërkojnë garancë që këta emigrantë të mos kenë Italinë si destinacionin e tyre të fundit, por të shpërndahen në vende tjera evropiane.
Ministri i ri i jashtëm italian dhe udhëheqësi i subjektit politik “Lëvizja Pesë Yjet”, Luigi Di Maio, theksoi se Italia ofroi ambient zbarkimi për anijen shpëtuese “Ocean Viking” vetëm pasi Evropa pranoi të marrë emigrantët afrikanë që ndodhen në anije.
“Është e qartë se edhe në të kaluarën, me qeveritë e mëhershme, qëllimi ynë ishte të sigurojmë që emigrantët që vijnë në Itali të shpërndahen në vende të tjera të Evropës. Tani është krijuar mekanizmi dhe kjo na mundëson të sigurohemi që kur një i huaj mbërrin në Itali me anije, të mund të dërgohet në vende evropiane”, tha ministri i jashtëm italian, Luigi Di Maio.
Anija shpëtuese “Ocean Viking” ishte në misionin e saj të dytë dhe po endej për dy javë mes Maltës dhe Italisë, duke kërkuar një port për të zbarkuar emigrantët.
Organizata “Mjekët Pa Kufij” e cila e drejton anijen bashkë me organizatën “SOS Mediterranee”, thanë se grupi i emigrantëve përbëhet nga 58 burra, 6 gra dhe 18 fëmijë.
Në misionin e saj të parë “Ocean Viking” shpëtoi 365 emigrantë.
Burime diplomatike thanë së fundmi se Italia është duke u munduar të krijojë një formë automatike të shpërndarjes së emigrantëve të shpëtuar në Mesdhe, drejt vendeve evropiane.
Sipas shtypit në Itali, Franca dhe Gjermania i dhanë dritën e gjelbër sistemit të ri, sistem ky që do ta përfshinte edhe Luksemburgun, Maltën, Portugalinë, Rumaninë dhe Spanjën.
Një votim në asamblenë e një qarku të Pragës për të hequr një statujë të mareshalit sovjetik Ivan Konev shkaktoi përplasje diplomatike midis Rusisë dhe Republikës Çeke.
Ministria e Jashtme e Çekisë thirri të premten në bisedë informative ambasadorin rus, për shkak të komenteve të një ligjvënësi në Moskë, të cilat e krahasonin kryetarin e qarkut Praga 6 – që ka votuar për heqjen e statujës – me nazistët.
Ministria e Jashtme e Rusisë e kundërshtoi këtë vendim, duke thënë se “nuk do të kalojë pa përgjigje”.
Disa e shohin Konevin, forcat e të cilit kanë çliruar pjesën më të madhe të territorit të Çekosllovakisë në Luftën e Dytë Botërore, si zbatues të rregullave sovjetike në Evropën lindore dhe qendrore, për shkak të rolit që ka luajtur pas konfliktit.
Statuja e komandantit ushtarak sovjetik është përdhosur disa herë – herën e fundit më 21 gusht, në përvjetorin e pushtimit sovjetik të Çekosllovakisë, më 1968.
Por të tjerë e respektojnë dhe shpesh vendosin lule pranë saj.
Presidenti çek, Millosh Zeman, i cili ka marrëdhënie të ngushta me kreun e Kremlinit, Vladimir Putin, tha se statuja duhet të mbetet në vend dhe e kritikoi propozimin e kryetarit të qarkut Praga 6, Ondrej Kolar, për largimin e saj.
Me 200 pikat e reja të karikimit të shpejtë, numri i stacioneve të karikimit të automjeteve elektrike ka arritur në 400 në rrugët kryesore të distancave të gjata në Itali dhe Austri, njoftoi Enel, operatori i pikave të karikimit, transmeton Anadolu Agency (AA).
Nga pikat e reja, 180 janë të vendosura në Itali dhe 20 në Austri.
Pikat e reja të karikimit me kapacitet prej 50 kilovat do të jenë në gjendje të karikojnë plotësisht dy automjete njëkohësisht duke marrë rreth 30 minuta.
Stacionet e karikimit të shpejtë janë pjesë e një rrjeti të gjerë në Itali dhe Austri që “u mundëson shoferëve të udhëtojnë nga Siçilia në Austri me automjetet e tyre elektrike me vetëm ndonjë ndalesë të shkurtër dhe pa frikën se mos mbeten pa energji”, tha Enel.
Pikat e karikimit u instaluan si pjesë e programit “Arteriet e Automjeteve Elektrike”, projekt evropian për zhvillimin e lëvizshmërisë elektrike të nisur në vitin 2016.
Në aeroportin ndërkombëtar Schwechat të Vjenës nga bagazhi i një australiani që jetonte në Filipine zbulohen 88 zvarranikë të gjallë, transmeton Anadolu Agency (AA).
Sipas një deklarate nga Ministria e Financave, një ditë më parë oficerët doganorë në aeroport gjatë kontrollit të ushtruar në bagazhet e një udhëtari konfiskuan 88 zvarranikë të gjallë nga të cilët 43 prej tyre gjarpërinj helmues.
Po ashtu në deklaratë bëhet e ditur se 20 nga kafshët ishin gjallesa të rrezikuara nga zhdukja të cilët vinin nga Filipinet për t’u shitur në mënyrë të paligjshme në Gjermani.
Kafshët u dërguan në kopshtin zoologjik Schönbrunn në Vjenë dhe në qendrën e zvarranikëve në Klagenfurt. Ndaj personit që kryente trafikimin e kafshëve u hap hetim me akuzat për trafikim dhe tregti në mënyrë të jashtëligjshme të llojeve të kafshëve që jetojnë në natyrë.
Kryeministri i Kosovës, Ramush Haradinaj, tha të enjten, se nuk mori pjesë në takimin e Vishegradit që i zhvilloi punimet në kryeqytetin e Republikës Çeke, për shkak të angazhimeve rreth zgjedhjeve në Kosovë.
Takimi i vendeve të Vishegradit ku bëjnë pjesë Çekia, Polonia, Hungaria dhe Sllovakia me kryeministrat e vendeve të Ballkanit Perëndimor, është pjesë e përpjekjeve për të ndihmuar vendosjen e paqes së qëndrueshme në rajonin e Evropës juglindore dhe afrimin e tyre me Bashkimin Evropian.
Vendimi i zotit Haradinaj për të mos marrë pjesë në këtë takim u publikua një ditë pasi që presidenti çek, Milosh Zeman, tha në Beograd se do të diskutojë me zyrtarët e lartë të vendit të tij për mundësinë e tërheqjes së njohjes së Kosovës, të cilën Çekia e ka njohur në maj të vitit 2008.
Por zoti Haradinaj në një postim në rrjetet sociale as që e përmendi këtë çështje si arsye për mospjesëmarrje.
“Kosova ka hyrë në një cikël të zgjedhjeve të parakohshme dhe angazhimet në këtë kohë të rëndësishme për vendin, kanë pamundësuar pjesëmarrjen time në punimet e Samitit të V4 (grupi i Vishegradit) dhe WB6 (vendet e Ballkanit Perëndimor), nën kryesimin e Republikës së Çekisë. Përmes kësaj letre i kam shprehur falënderimet e sinqerta Kryeministrit të Republikës së Çekisë, z. Andrej Babis, për ftesën drejtuar Kryeministrit të Kosovës për të marrë pjesë në Samit, dhe çmojmë lartë përkushtimin e Republikës së Çekisë ndaj Ballkanit Perëndimor dhe perspektivës evropiane të rajonit. Si Kosovë do të vazhdojmë të jemi kontribuues serioz për paqe dhe stabilitet në rajon dhe ndaj dialogut me Serbinë, i cili do të përfundoj me njohje reciproke, në kufijtë ekzistues”, shkroi ai.
Deklaratat e presidentit çek nxitën shumë reagime në Çeki, ku zyrtarë të qeverisë dhe senatit thanë se ideja e tij është joreale.
Të enjten kryeministri çek, Andrej Babish tha se “nuk sheh asnjë arsye që qeveria çeke të ndryshojë qëndrimin e saj” ndaj Kosovës.
Edhe presidenti i Serbisë, Aleksandër Vuçiç, e cilësoi joreale mundësinë që Çekia të tërheqë njohjen e pavarësisë së Kosovës.
Të enjten ambasadori amerikan në Çeki, Stephen B. King, takoi në Pragë të ngarkuarin me punë në ambasadën e Kosovës, Arbër Vllahiu, sic shkroi ai në rrjetet sociale “për të ritheksuar mbështetjen e palëkundur të Shteteve të Bashkuara për një Republikë sovrane e të pavarur të Kosovës, të integruar plotësisht në bashkësinë ndërkombëtare”.
Në takimin e sotëm të grupit të Vishegradit, kryeministrat e vendeve anëtare të grupit miratuan një deklaratë në mbështetjen të zgjerimit të Bashkimit Evropian duke përfshirë vendet e Ballkanit Perëndimor. Kryeministri çek tha se politika e zgjerimit është “instrumenti më efektiv për nxitjen e qëndrueshmërisë, sigurisë, demokracisë dhe përparimit në Ballkanin Perëndimor. Siguria në Ballkan gjithashtu nënkupton sigurinë në Evropë”, tha ai.
Të gjashtë vendet e Ballkanit Perëndimorë synojnë integrimin në Bashkimin Evropian. Tashmë Mali i Zi dhe Serbia i kanë të hapura negociatat, ndërsa Shqipëria dhe Maqedonia presin që kjo të ndodhë muajin e ardhshëm.
Rruga evropiane e Kosovës që shpalli pavarësinë në vitin 2008 dhe Serbisë që vazhdon ta kundërshtojë atë, varet nga normalizimi i marrëdhënieve ndërmjet tyre. Por procesi i bisedimeve është pezulluar që nga viti i kaluar kur Kosovës vendosi tarifa prej 100 për qind ndaj mallrave serbe në shenjë kundërshtimi ndaj qasjes së Serbisë ndaj shtetësisë së saj.
Presidenti i Çekisë, Milos Zeman, tha të mërkurën në Beograd se do të diskutojë me ekspertët kushtetues të vendit të tij, mundësinë e tërheqjes së njohjes së pavarësisë së Kosovës, një veprim që nuk përkon me postin kryesisht ceremonial të tij.
Presidenti çek i cili po viziton Serbinë, tha një ditë më parë se nuk i pëlqen Kosova, pavarësia e së cilës është njohur nga mbi 100 vende të botës, përfshirë edhe 23 vende anëtare të Bashkimit Evropian.
Çekia e ka njohur Kosovën në maj të vitit 2008.
“Nuk jam diktator, Por ajo që mund të bëj është se pas një muaji mblidhet këshilli kushtetues dhe unë do të shtrojë çështjen nëse është e mundur të tërhiqet njohja e pavarësisë së Kosovës”, tha presidenti çek gjatë një konference me gazetarë bashkë me presidentin e Serbisë Aleksandër Vuçiç.
Ddeklaratat e presidentit 74 vjeçar, që është i njohur për qëndrime kundërthënëse, nxitën reagime në Çeki.
Presidenti i senatit çek, Jaroslav Kubera, u tha medieve në Çeki se presidenti Zeman bëri deklarata të tilla vetëm për t’u bërë qejfin serbëve, por ideja e tij është joreale. “Presidenti mund të thotë çfarë të dojë, por nuk është ai që mund të bëjë diçka. Do të ishte debat i madh për asgjë”, cituan mediet çeke presidentin e senatit.
Shefi i diplomacisë çeke Tomáš Petříček, tha se nuk sheh asnjë arsye për një debat të tillë dhe se kjo nuk do të ishte në interes të Republikës Çeke.
Në një postim në rrjetin social twitter ai shkroi se “qeveria çeke, që është përgjegjëse për politikën e jashtme, nuk e ka ndryshuar qëndrimin ndaj Kosovës apo cilitdo vend të Ballkanit Perëndimor. Ne vazhdojmë të mbështesim bisedimet ndërmjet Serbisë dhe Kosovës dhe rrugën e tyre drejt Bashkimit Evropian”.
Duke i bërë jehonë këtij postimi, ministri i Jashtëm në detyrë i Kosovës, Behgjet Pacolli shkroi se “Miqësia dhe partneriteti ynë është i fortë si guri. Ju bëj thirrje të gjithëve që të mos bien në grackën e Beogradit për të përhapur lajme që nuk kanë asnjë lidhje me realitetin. Nuk ka asnjë ç’njohje të Kosovës, vetëm rruga përpara për ta bërë Kosovën më të fortë dhe pjesë si e barabartë e bashkësisë ndërkombëtare. Unë i jam mirënjohës homologut tim Ministrit të Jashtëm Tomáš Petříček për mbështetjen e tij dhe të popullit dhe qeverisë së Republikës Çeke”.
Përfaqësues të opozitës në Çeki i dënuan deklaratat e presidentit Zeman duke theksuar se nuk është punë e tij të përzihet në vendimet e qeverisë.
Presidenti çek ishte kryeministër në vitin 1999 kur NATO-ja bombardoi Serbinë për t’u dhënë fund mizorive të forcave serbe në Kosovë.
Presidenti serb, Aleksandër Vuçiç, tha se Serbia ka marrëdhënie të mira me NATO-n.
“Do të përpiqemi gjithmonë të kemi marrëdhënie të tilla në të ardhmen në mënyrë që viti 1999 të mos ndodhë më. Plagët e popullit serb nga vitit 1999 ende nuk janë shëruar dhe sot është vështirë të gjesh dikë që ta kuptojë atë që NATO-ja ka bërë në vitin 1999”, tha presidenti serb.
Kosova shpalli pavarësinë e saj nëntë vjet pas ndërhyrjes së NATO-s që i dha fund luftës gati dyvjeçare. Serbia vazhdon të kundërshtojë shtetësinë e Kosovës, por aspiratat e të të dyja vendeve për anëtarësim në Bashkimin Evropian janë të kushtëzuara me një marrëveshje normalizimi marrëdhëniesh ndërmjet tyre.
Presidenti çek Milos Zeman u dëgjua duke thënë se “nuk i pëlqen” Kosova, ndërsa takohej me Presidentin serb Aleksandër Vuçiç pas mbërritjes në Beograd të martën.
Zeman ndodhet në Serbi për një vizitë dy-ditore që pritet të përqendrohet në përmirësimin e lidhjeve tregtare midis dy vendeve.
Ai i tha zotit Vuçiç në aeroportin e Beogradit se “më pëlqen Serbia dhe populli serb”, duke shtuar më pas me zë të ulët: “dhe nuk më pëlqen Kosova”.
Serbia nuk e njeh deklaratën e pavarësisë së Kosovës, por Republika Çeke është ndër 22 vendet anëtare të Bashkimit Evropian që e kanë njohur Kosovën.
Vuçiç nuk iu përgjigj drejtpërdrejt komentit të Presidentit Zeman, por u përgjigj “faleminderit shumë”.
Më vonë ata morën pjesë në një ceremoni për vendosjen e kurorës në Monumentin e Mbrojtësve të Beogradit 1914-1918. za
Zyrtarë të lartë të partive qeverisëse në Gjermani shprehën zemërimin e tyre për, siç thanë, zgjedhjen e një neo-nazisti kryetar i një qyteti në shtetin Hese.
Stefan Jagsch, nga Partia Kombëtare Demokratike e ekstremit të djathtë, u zgjodh kryetar i qytetit Valdzidlung – pranë Frankfurtit – i cili ka rreth 2,650 banorë.
Jagsch nuk pati asnjë kundërkandidat dhe këshilltarët lokalë, që përfaqësojnë Demokristianët e kancelares Angela Merkel, partnerin e tyre qeverisës, Partinë Social-Demokrate, dhe Partinë e Demokratëve të Lirë, votuan për Jagschin.
Udhëheqësja e Demokristianëve, Annegret Kramp-Karrenbauer, kërkoi anulimin e zgjedhjeve.
Sekretari i saj i përgjithshëm, Paul Ziemiak, tha se “zgjedhja e një anëtari të një partie që ndjek synime antikushtetuese, është turp”.
Sekretai i përgjithshëm i Social-Demokratëve, Lars Klingbeil, tha se partia e tij ka qëndrim të qartë dhe se “nuk bashkëpunon me nazistët”.
Jagsch premtoi se “do të punojë për interesat e qytetit”.
Partia kryesore e ekstremit të djathtë në Gjermani është Alternativa për Gjermaninë.
Partia Kombëtare Demokratike është shumë më e vogël dhe ka fituar vende vetëm në asambletë rajonale.
Në vitin 2017, Gjykata Kushtetuese e Gjermanisë ka vendosur kundër ndalimit të Partisë Kombëtare Demokratike, duke thënë se ajo është “antikushtetuese”, porse nuk është në gjendje të rrëzojë rendin demokratik të Gjermanisë.
Komentet