E veja e gazetarit të vrarë saudit Jamal Khashoggi, mori azil politik në SHBA, njoftoi dje, të enjten, Washington Post.

“Unë me të vërtetë nuk mund ta besoja,” tha Hanan Elatr, sipas gazetës amerikane, pasi lexoi letrën që e informonte për vendimin e autoriteteve amerikane për t’i dhënë azil.

Gazetari i Washington Post Jamal Khashoggi u vra në vitin 2018 brenda konsullatës së Arabisë Saudite në Stamboll. Ai dikur kishte punuar në ambasadën saudite në Uashington, por u bë kritik i princit të kurorës saudit Mohammed bin Salman dhe në vitin 2018 u paralajmërua të mos kthehej në Arabinë Saudite dhe u vendos në Virxhinia.

Hanan Elatr – ishte martuar me Khashoggi në qershor 2018 në një ceremoni islamike në Virxhinian Veriore në fshehtësi nga e fejuara e tij turke e atëhershme, Hatice Cengiz, dhe ata jetonin të ndarë, ai në Fairfax, ajo në Dubai. Që nga vrasja e bashkëshortit të saj ajo thoshte se ishte e rrezikuar dhe vendimi i autoriteteve amerikane konfirmon pretendimet e saj se jeta e saj do të ishte në rrezik nëse do të kthehej në Egjipt, në vendin e saj të lindjes ose në Emiratet e Bashkuara Arabe, ku jetoi për 26 vjet deri në vrasjen e Jamal Khashoggi. Ajo iku pasi Emiratet refuzoi të rinovonte kontratën e saj si stjuardesë dhe për pasojë nuk mund të jetonte më në Dubai, raportoi gazeta amerikane.

Sipas të njëjtit burim, ky mund të jetë një nga aktet e fundit në rastin Khashoggi, i cili në një moment u duk se kërcënonte marrëdhëniet SHBA-Saudite. Këto tensione u hodhën poshtë gjatë administratës së Donald Trump dhe u maskuan nga vendimi i vitit të kaluar nga administrata aktuale e Joe Biden për t’u pajtuar me Arabinë Saudite dhe për t’i dhënë imunitet shtetëror princit të kurorës saudit Mohammed bin Salman, për të cilin CIA arriti në përfundimin se ai urdhëroi vrasjen e Khashoggit.

Në kërkesën e saj për azil, Elatr u tha autoriteteve amerikane se Egjipti ka ndaluar dhe keqtrajtuar familjen e saj dhe ka konfiskuar pasaportat e saj për shkak të marrëdhënies së saj me Khashoggi. Në vitin 2018, katër muaj para vrasjes së tij, Emiratet e Bashkuara Arabe e ndaluan dhe e morën në pyetje teksa zbërthenin telefonat celularë të sekuestruar me spyware të nivelit ushtarak. Ishte një periudhë në të cilën ajo ishte në komunikim të vazhdueshëm me Khashoggi.

Avokatja e Elatrit, Rada Fahmi, i tha Washington Post se klientja e saj po kërkon kompensim nga qeveria saudite për vdekjen e burrit të saj dhe po kërkon që Turqia t’i kthejë telefonat e Khashoggit në mënyrë që të mund të analizohen.bw