Deputeti shqiptar në Kuvendin e Serbisë, Shaip Kamberi, ka vlerësuar si shumë të rëndësishëm takimin e zhvilluar në Preshevë me kongresistët amerikanë Keith Self dhe Suhas Subramanyam, duke theksuar se ky takim vjen në një kohë kur shqiptarët e Luginës së Preshevës vazhdojnë të përballen me politika diskriminuese nga regjimi në Beograd.

Kamberi ka theksuar se për vite me radhë shqiptarët në Preshevë, Bujanoc dhe Medvegjë janë përballur me margjinalizim sistematik, përfshirë pasivizimin e adresave, përjashtimin nga institucionet shtetërore, diskriminimin ekonomik dhe mohimin e të drejtave kombëtare e gjuhësore.

Ai ka kritikuar politikën e Beogradit, duke thënë se Serbia kërkon standarde të larta për serbët në Kosovë, ndërsa të njëjtat standarde refuzon t’i zbatojë për shqiptarët në Luginën e Preshevës.

Sipas Kamberit, bashkë me kryetarin e Këshillit Kombëtar Shqiptar, Enkel Rexhepi, kanë ngritur vazhdimisht zërin kundër diskriminimit dhe kanë kërkuar barazi reale, përfaqësim proporcional dhe respektim të marrëveshjeve të arritura.

Ai ka përshëndetur gjithashtu angazhimin amerikan dhe iniciativën për Ligjin HR 6411 në Kongresin Amerikan, duke e cilësuar atë si një mesazh të qartë kundër diskriminimit, autoritarizmit dhe standardeve të dyfishta.

“Në Preshevë sot nuk kemi folur vetëm për problemet e shqiptarëve të Luginës, por edhe për nevojën që Ballkani Perëndimor të ndërtohet mbi drejtësi, barazi dhe standarde të njëjta për të gjithë qytetarët. Simetria në të drejta është koncepti politik që garanton paqe afatgjate”, ka deklaruar Kamberi.

Në fund, ai ka theksuar se “koha e standardeve të dyfishta duhet të marrë fund”. /rtvpresheva.com