Në ditën e 98-të të protestës përpara godinës së Kryeministrisë, aktivisti Arben Kola ka lëshuar akuza ndaj enteve rregullatore dhe agjencive kryesore të shtetit. Ai ka kërkuar që zyrtarët përgjegjës të shpallen tradhtarë të kombit, duke i cilësuar këto institucione si organizata terroriste përgjegjëse për vëllavrasjet, helmimin e popullatës dhe grabitjen ekonomike në vend.

Më tej, aktivisti u ndal te kapja e enteve financiare dhe energjetike nga klika politike. Enti Mbikëqyrës i Bankës së Shqipërisë u cilësua prej tij si fole pazaresh mes PS, PD dhe LSI, që lejon grabitjen e qytetarëve përmes rënies së valutave të huaja pa u reflektuar në uljen e çmimeve të konsumit.

Në të njëjtën linjë, Enti i Hidrokarbureve u akuzua për lejimin e shkatërrimit të rafinerisë së Ballshit dhe çmimin më të lartë të naftës në Europë, ndërsa OSHEE dhe KESH u denoncuan për burgosjen e qytetarëve të thjeshtë për fatura 1 milion lekësh. Në përmbyllje, Kola denonsoi Ministrinë e Bujqësisë për shkatërrimin e sektorit që prej vitit 2014 dhe dëbimin e fermerëve të rikthyer nga emigracioni, duke theksuar se përballë këtij rrjeti korruptiv reagimi qytetar në rrugë mbetet e vetmja rrugëdalje. gsh

Dje intervistova eurodeputetin Sandro Gozi në emisionin “Review”, ku diskutuam për bllokimin e llogarive të shqiptarëve dhe për shqetësimin që ai e kishte ngritur edhe në Komisionin Evropian…

“Shqiptarët kërkuan ndihmën tonë, ndihmë edhe nga Komisioni Evropian!” – u shpreh ai.

Sot, vetëm pak orë pas kësaj interviste, përballemi me një fakt shqetësues: faqja zyrtare e Instagramit të Euronews Albania është mbyllur.

Në një kohë kur transparenca dhe liria e informimit janë më të rëndësishme se kurrë, ky zhvillim ngre pikëpyetje serioze që meritojnë përgjigje.

Faqja e Euronews Albania në Instagram nuk është më e aksesueshme, duke ngritur edhe më shumë alarmin mbi atë që po ndodh ditët e fundit me llogaritë shqiptare në rrjetet sociale.

Pa asnjë njoftim, pa asnjë masë, sot faqja e Euronews Albania

Vetëm mbrëmjen e kaluar, Euronews Albania unë kisha të ftuar në emisionin “Review” eurodeputetin Sandro Gozi, i cili foli pikërisht për mbylljen e llogarive shqiptare në Instagram dhe kërkoi transparencë nga Meta.

Gozi ngriti pyetjen: çfarë po ndodh dhe përse po mbyllen këto llogari?

Eurodeputeti kërkoi që Meta të japë një përgjigje të qartë nëse kemi të bëjmë me probleme teknike, shkelje të rregullave të platformës apo abuzim të koordinuar me sistemin e raportimeve.

Më pak se 24 orë pas kësaj interviste, vetë Euronews Albania nuk e ka më të aksesueshme faqen e saj në Instagram.

Ky fakt nuk provon një lidhje mes intervistës dhe mbylljes së faqes dhe, pa një shpjegim nga Meta, çdo përfundim i tillë do të ishte spekulim. Por rasti e bën edhe më aktuale pikërisht pyetjen e ngritur një natë më parë në studion e Euronews Albania.

Gjatë ditëve të fundit janë raportuar dhjetëra raste të llogarive shqiptare të mbyllura, në Instagram.

Meta ka pranuar se disa prej llogarive janë hequr gabimisht, ka nisur rishikimin e masave dhe disa profile janë rikthyer.

Megjithatë, kompania nuk ka dhënë ende një shpjegim të plotë mbi atë që ka shkaktuar këtë seri problemesh.

Çështja tashmë shkon përtej një profili të vetëm.

Një shqiptar që jeton në Athinë ishte pjesë e protestës së 97-të sot para Kryeministrisë teksa paralajmëroi Ramën dhe qeverinë e tij se mosbindja qytetare do vijojë edhe më shumë.

Ai u shpreh se shqiptarët duhen zgjuar dhe të vijnë të gjithë në shesh.

“Vij nga Athina përsëri dhe do të vij përsëri. Përshëndetje me një respekt të veçantë për ju që jeni këtu. Afro 100 mijë! Ju përgëzoj në gjunjë! Nuk dua, nuk dua të numëroj 1000 e 1000 të zeza që ka bërë ky kryeministër. Por dua të bëj thirrje. Të bëj thirrje nënës time që nuk i del pensioni dhe ne kemi për detyrë t’i ndihmojmë. Vëllezërve të mi, shokëve të mi, profesorëve të mi, të jenë këtu në shesh dhe të mbështesin… mos të rrinë në shtëpi sepse është moment historik, që duhet të jenë sa më shumë.

Kjo fitore do të vijë dhe pa ju, ndoshta dhe pa mua, por do të vonojë. Të gjithë së bashku, këtë qelbësirë do ta zhdukim, një orë e më parë. Dhe rasti më jepet dhe emigrantët në Greqi dhe kudo në diasporë, ata që nuk kanë mundësi të punojnë, njerëzit e tyre në Shqipëri t’i zgjojnë, ata që janë në gjumë, të zgjohen dhe të vijnë këtu në shesh”, tha protestuesi.

Sakaq shtoi, se kryeministria nuk i përket më Ramës, teksa ai paralajmëroj atë se godina do rrethohet pasi pushteti i tij ka abuzuar ndaj qytetarëve të lirë të vendit, duke dhunuar edhe prindër në sy të fëmijëve.

“Ajo video që u transmetua dhe e kanë dëgjuar dhe parë me zë dhe me figurë gjithë shqiptarët… ai fëmijë i vogël fliste “Jo xhaxhi polic, jo xhaxhi polic”, kur shihte prindin e tij që po e masakronin, sepse kishin stërkatuar shtëpinë e tij në fshat. Këto pamje duhet t’ju sjellin këtu, sepse vetëm ky shesh do t’i japë zgjidhje këtyre problemeve. Edi Rama, ti je i shkolluar. E ke kuptuar që ne e kemi kuptuar, që na ke vjedhur, që na ke zhvatur, që ke bërë krime. Ka ardhur ora, mikrofoni dalëngadalë do të bjerë dhe ne do të rrethojmë atë kryeministri që nuk është më e jotja, por është e jona.

Dhe ti s’ke si të dalesh më, dhe s’do të futesh dot më! Po bëj thirrje të gjithëve që kjo protestë të përshkallëzohet, të rrethojmë në mënyrë paqësore Parlamentin, Kryeministrinë dhe unë jam i bindur që Evropa do të ofrojë, në qoftë se nuk do të kemi kryeministër të drejtojë këtë vend. Shqipëria po bën revolucion! Shqipëria po bën revolucion! Shqipëria po bën revolucion! Dhe kush nuk e dëgjon, duhet të zgjohet. Ka ardhur momenti historik. Ju faleminderit dhe njëherë për këtë qëndresë, ju 100 mijë”, tha me tej protestuesi. gsh

Aktivistja Arilda Lleshi komentoi protestën qytetare kundër qeverisë së Edi Ramës, dhe bllokimin e profileve sociale.

Në një intervistë për Neqs24, ajo deklaroi se sulmi ishte i organizuar duke drejtuar gishtin nga qeveria, ndërsa shtoi se Meta, kompania mëmë e Instagramit, ka kthyer përgjigje dhe disa faqe janë rikthyer, ndërsa disa të tjera janë në shqyrtim.

“Shumë aktivistë kanë pasur këtë problem por sot disa profile u rikthyen dhe disa janë në proces shqyrtimi. Meta tha se kemi bërë një gabim dhe po i shqyrtojmë rastet e tjera. Pati edhe ndërhyrjen e Demokratëve Evropianë që ngritën këtë çështje dhe kjo na tregon rëndësinë e ndërkombëtariuzimit të çështjes. Padyshim që është sulm i organizuar sepse profili mbyllet vetëm kur ka një numër të madh njerëzish që raportojnë. Dukshëm ka pasur një fushatë të qëllmshe për t’i mbyllur këto llogari dhe kjo vjen nga pushteti.”, tha ajo.

Më pas, ajo foli për nevojën për të kaluar në përshkallëzim të protestës. Sipas saj, qytetarët duhet të bllokojnë institucionet, ndërsa studentët të bojkotojnë auditorët.

“Protesta duhet të kalojë në një lëvizje të organizuar. Personat duhet të koordinohen më mirë dhe të ketë përshkallëzim, bllokim të institucioneve. Parlamenti fillon punën, diaspora ka njoftuar se do të qëndrojë. Shpresojmë që rikthimi i studentëve të rigjallërojë protestën.

Gjithashtu po hidhen ide të ndryshme që të bojkotojnë universitetet. Mendoj se është hap i nevojshëm. Studenti ka statusin e veçantë që nuk është në punë. Ka kohë pak më shumë se ata që punojnë. Kështu që e ka më të lehtë në shumë aspekte që të organizohet. “, shtoi ajo.

Ish- ministri Ditmir Bushati, është shprehur se vdekja e Ratko Mlladiç dhe mënyra se si ajo po trajtohet nga Beogradi, tregon se Serbia nuk pranon të njohë pasojat e luftës së ndodhur në Kosovë në vitet 1990.

Në një postim në rrjetet sociale, Bushati shprehet se me ndarjen nga jeta të Mlladiç, nuk ka mbaruar ideologjia që e trajtonte si hero dhe jo ashtu siç ishte në të vërtetë, një kriminel lufte.

“Ceremonia shtetërore për sjelljen e trupit të vdekur të Ratko Mlladiçit në Serbi, tregon se vdekja e tij nuk po trajtohet si ikja nga jeta e një krimineli lufte të dënuar nga drejtësia ndërkombëtare. Përkundrazi, vdekja e tij ka nxjerrë në pah edhe njëherë refuzimin e Serbisë për t’u përballur me politikat që çuan në luftërat e viteve ’90, dhe me pasojat e tyre. Në vend që të pranojë përgjegjësitë, Serbia flet për ‘padrejtësi historike ndaj serbëve’.
Është e qartë se kjo qasje politike nuk mori fund me Sllobodan Millosheviçin, e as me vendimet e drejtësisë ndërkombëtare. Serbia nuk mund të ndërtojë një identitet demokratik të qëndrueshëm e as të konsiderohet faktor stabiliteti në rajon pa pranuar përgjegjësië për luftërat e viteve ’90. Ato nuk ishin rezultat i padrejtësive historike, por pasojë e politikave të ndjekura nga Beogradi. Prandaj, demokratizimi dhe europianizimi i Serbisë dhe rajonit kërkon një shkëputje rrënjësore nga ideologjia që justifikon krimet e luftës dhe gjenocidit.
Mlladiç vdiq, ndërsa ideologjia që e shndërroi atë në hero vazhdon të jetojë. Prandaj, pyetja nuk është më se deri ku mund të shkojë mohimi i krimeve të luftës apo glorifikimi i kriminelëve. Pyetja është: Ku është fundi? Dhe një pyetje po aq e rëndësishme duhet t’i drejtohet komunitetit ndërkombëtar: Edhe për sa kohë do të trajtohen glorifikimi i kriminelëve të dënuar të luftës, si dhe mohimi e relativizimi i gjenocidit, thjesht si një tjetër mosmarrëveshje politike në Ballkan?”, shkruan Bushati. bw

Protestuesit e kanë nisur ditën e 97 të revoltës duke u mbledhur paraditen e së premtes para Gjykatës Penale.

Protestuesit kanë paralajmëruar dje se do të kërkojnë lirimin e të arrestuarve, ndërsa kanë ripërsëritur kërkesat e protestës që po shkon drejt ditës së 100.

Kërkesa kryesore dhe e pa negociueshme e tyre mbetet dorëheqja e kryeministrit Edi Rama dhe largimi i qeverisë.

Ndërkohë si çdo mbrëmje, qytetarët do të mblidhen fillimisht në sheshin “Skënderbej”, për të marshuar më pas drejt Kryeministrisë, aty ku edhe do të mbahen fjalimet, për të vijuar më pas me marshimin drejt rrugëve të kryeqytetit.

Protesta e mbrëmshme shënoi ditën e 96-të të mobilizimit. Qytetarët u mblodhën fillimisht përpara Kryeministrisë dhe më pas marshuan në rrugët e Tiranës, me flamuj kombëtarë dhe flakadanë. “Rama në burg, Berisha në burg”, “Ju erdhi fundi” dhe “Shqipëri e Re” ishin ndër thirrjet e përsëritura gjatë tubimit. gsh

Protestuesit janë zhvendosur te Komisariati nr. 3, në ditën e 96-të të protestës antiqeveritare, duke kërkuar lirimin e aktivistëve dhe qytetarëve të arrestuar dy ditë më parë gjatë përplasjeve te Kryeministria dhe para komisariatit.

Para ambienteve të komisariatit, qytetarët kanë shoqëruar protestën me thirrje në mbështetje të personave të ndaluar, duke u përcjellë mesazhin se nuk janë vetëm.

“Lironi qytetarët!” dhe “Nuk jeni vetëm!”, janë ndër thirrjet e protestuesve gjatë tubimit para komisariatit.

Në vijim të marshimit, protestuesit kanë adresuar edhe thirrje ndaj efektivëve të policisë, duke i akuzuar se mbrojnë krimin dhe jo qytetarët.

“Polici, këtu na ke, ti mbron krimin dhe jo ne!”, kanë thirrur protestuesit. bw

Deputetja e pavarur Marjana Koçeku ka denoncuar atë që e cilëson si një valë sulmesh në rrjetet sociale ndaj figurave të opozitës dhe personave që kanë mbështetur protestat. Në një reagim të publikuar në rrjetet sociale, Koçeku pretendon se gjatë ditëve të fundit janë mbyllur më shumë se 200 llogari në Instagram që publikonin materiale dhe përmbajtje të lidhura me protestat. Sipas deputetes, mes llogarive të mbyllura janë edhe faqja zyrtare e deputetit Agron Shehaj, ajo e aktivistit Gent Progni, si dhe disa faqe të tjera të njohura për publikimin dhe mbështetjen e protestës.

Koçeku e ka lidhur këtë situatë me debatin për lirinë e shprehjes dhe sigurinë në internet, duke akuzuar qeverinë shqiptare për standarde të dyfishta. Ajo pretendon se ndërsa përfaqësuesit e qeverisë mbështesin në forumet ndërkombëtare mbrojtjen e të drejtave dhe lirisë së shprehjes online, në Shqipëri, sipas saj, po ndodh e kundërta. Deputetja bëri të ditur gjithashtu se për këtë çështje ka raportuar pranë institucioneve të Bashkimit Europian.

Reagimi i Marjana Koçekut

Nji valë sulmesh online ka nisë veçanërisht që ditën e djeshme kundër disa figurave opozitare me ndikim politik dhe publik. Mbi 200 faqe Instagrami me përmbajtje nga protestat janë mbyllë, përfshi këtu faqen zyrtare të deputetit Agron Shehaj, aktivistit Gent Progni dhe faqeve të njoftuna në Instagram që e kanë mbështetë vazhdimisht protestën.

Këto ditë në Forumin e Bled-it, siguria online dhe sulmet kibernetike ndaj lirisë së shprehjes ishin kryefjala e diskutimit të Komisionerëve Europianë. Qeveria jonë në Forume Ndërkombëtare e mbron këtë të drejtë me fanatizëm, por tenton me çdo kusht e çdo mjet ta shembë në shtëpinë e vet. Për këtë edhe kam raportu tashmë në institucionet e Bashkimit Europian. bw

Çështja e Erion Veliajt hyn në një fazë vendimtare, ndërsa debati për ligjshmërinë e paraburgimit dhe standardet e reja të vendosura nga Gjykata e Lartë pritet të rikthehen në qendër të vëmendjes. Avokati Alban Duraj e konsideron këtë një nga çështjet më komplekse të drejtësisë shqiptare, ku përplasen jo vetëm aspektet penale, por edhe pavarësia e pushtetit vendor dhe garancitë kushtetuese të individit. Sipas tij, praktika e re unifikuese e Gjykatës së Lartë, e cila vendos barrën e provës mbi Prokurorinë dhe kërkon shqyrtim real të alternativave ndaj “arrestit në burg”, mund të ndikojë drejtpërdrejt në vendimmarrjen e 15 shtatorit për fatin e Veliajt. Duraj shkon më tej, duke parashikuar lirimin e tij dhe rikthimin në zyrën e Kryetarit të Bashkisë së Tiranës.

AVOKATI ALBAN DURAJ

Sipas mendimit tim, çështja e Erion Veliajt përfaqëson një nga rastet më komplekse dhe simbolike që sistemi ynë i drejtësisë dhe i politikës ka pasur për të trajtuar në këto 35 vjet demokraci, jo vetëm për shkak të peshës politike të Kryetarit të Bashkisë së kryeqytetit shqiptar, por sepse ajo prek drejtpërdrejt ekuilibrin delikat mes tri kolonave: pavarësinë e pushtetit vendor, funksionimin e administratës vendore dhe garancitë themelore kushtetuese të individit.

Z. Erion Veliaj ndodhet në gjendje paraburgimi që prej 10 shkurtit 2025. Fillimisht, kompetencat e tij si kryetar bashkie iu suspenduan nga qeveria. Kujtojmë këtu mitingun madhështor të organizuar nga kryeministri Edi Rama me punonjësit e Bashkisë, ku, përmes atij mitingu, ai u tregoi se ishte vetë ai Kryetari i Bashkisë së Tiranës. Kjo shfaqje e tij vërtetoi atë që kishte diskutuar në nje nga mbledhjet me socialistët, ku u shpreh se: grupet armiqësore brenda Partisë Socialiste do të merrnin goditjen e merituar, dhe se Erion Veliaj mund të mbillte pemë sa të donte, por nesër do të varej pikërisht tek ato pemë. Te gjithë ne jemi habitur kur me ze dhe figure e kemi dërgjuar në tv ku mos të harrojmë se kronikat e mbledhjeve të kryeministrit Rama bëhen në zyrën e tij të shtypit dhe më pas u jepet mediave.

Pas ndalimit të zotit Veliaj, fillimisht u emërua si kryetare e Bashkisë Anuela Ristani, e cila ishte e preferuara e kryeministrit Edi Rama, por pas pak kohësh u shkarkua dhe u emërua si zëvendëskryetare Sara Goxhaj, krahu i djathtë i Kryetarit të Bashkisë, Erion Veliaj. Menjëherë, pas disa orësh, u rikthye sërish Anuela Ristani, e cila u komandua si kryetare në detyrë. Pas këtij veprimi të z. Veliaj, dhe pas fitimit të zgjedhjeve të 11 prillit 2025, kryeministri Edi Rama mblodhi këshilltarët socialistë të Bashkisë së Tiranës, ku kërkoi shkarkimin e Kryetarit të Bashkisë së Tiranës, gjë të cilën e kishte paralajmëruar në ditën kur prezantoi kabinetin e ri qeveritar, ku, si kryetare të Bashkisë së Tiranës, prezantoi Ogerta Manastirliun. U zhvillua kështu një betejë ligjore dhe një revansh ndaj z. Veliaj, i cili u trajtua si armik i partisë, ndërkohë që u sulmuan edhe bashkëpunëtorë, të cilët ai vetë i kishte mbështetur politikisht dhe i kishte promovuar.

Vlen të theksohet se as prokuroria e posaçme (SPAK) dhe as kryeministri Rama nuk kanë ndjekur të njëjtin standard me z. Veliaj sa me z. Beqaj, z. Ahmetaj, z. Tahiri dhe shumë zyrtarë të tjerë të nivelit të lartë, prej të cilëve kryeministri është distancuar publikisht, duke kërkuar që drejtësia të bëjë punën e saj, ndërsa ai do të bënte punën e tij. Të njëjtën gjë nuk bëri për zonjën Balluku, rasti i së cilës u investua nga Këshilli i Ministrave në Gjykatën Kushtetuese; për zonjën Spiropali është paralajmëruar përjashtimi, dhe ndaj zonjës Balluku u zhvillua një betejë ligjore në sallën e Kuvendit, ku mospranimi për heqjen e imunitetit pengoi rrjedhën normale të drejtësisë. Edhe pse Gjykata Kushtetuese e riktheu Veliajn si kryetar të njohur ligjërisht të bashkisë, pavarësisht paraburgimit, ai e humbi kontrollin efektiv të Bashkisë së Tiranës, ku zonja Ristani drejtonte bashkinë dhe nuk pranonte të merrte këshilla nga kryetari i mandatuar, z. Erion Veliaj. Jo vetëm kaq, por ajo nuk zbatoi as vendimin e gjykatës për rikthimin në detyrë të sekretarit të përgjithshëm të Bashkisë së Tiranës, z. Alban Dokushi. Këto elemente tregojnë persekutimin politik të ushtruar ndaj Kryetarit të Bashkisë së Tiranës, i cili kishte personalitetin e tij politik dhe ishte konkurrenti kryesor i kryeministrit Edi Rama për drejtimin e Partisë Socialiste, por edhe për shkak të marrëdhënieve që kishte krijuar me ndërkombëtarët.

Çështja që mua më shqetëson nuk është individi Veliaj, por fenomeni Veliaj, ku vazhdon e njëjta metodë si në diktaturë: nëse shpallesh armik i partisë, nuk ke kundër vetëm partinë, por edhe të gjitha instrumentet e saj, të cilat, edhe pa marrë urdhra, bëhen automatikisht kamikaze të liderit politik. Por mbi të gjitha, ajo që më shqetëson është standardi që po ndiqet nga drejtësia me z. Veliaj dhe me shumë qytetarë të këtij vendi: standardi i burgosjes pa prova, ndërkohë që për të tjerë provat nuk ekzistojnë fare.

Gjykata Kushtetuese e ka trajtuar mandatin e tij si të vlefshëm juridikisht, ndërkohë që statusi i tij penal mbetet krejt i ndarë dhe ende i pazgjidhur në themel. Duhet theksuar, që në krye, se kjo seancë nuk është thjesht një “rishqyrtim” në kuptimin e zakonshëm administrativoprocedural. Gjykata Kushtetuese, me vendimin e saj, ka bërë diçka disi të pazakontë në praktikën tonë: nuk e ka anuluar thjesht vendimin e mëparshëm të Gjykatës së Lartë, por i ka dhënë asaj një detyrim të qartë motivimi, atë të arsyetimit specifik se pse asnjë nga masat alternative të parashikuara në nenin 237 e vijues të Kodit të Procedurës Penale (arrest në shtëpi, ndalim daljeje nga banesa, garanci pasurore, urdhër mbrojtjeje) nuk është e mjaftueshme për të zëvendësuar arrestin në burg. Ky është, në thelb, një kërkim për atë që në gjuhën e së drejtës procedurale evropiane quhet “arsyetim i individualizuar dhe i përditësuar”, pra jo thjesht rikonfirmim automatik i vendimeve të mëparshme, por një analizë e freskët e proporcionalitetit, e cila merr parasysh edhe kohën e re të kaluar në paraburgim.

Në planin e parimeve themelore, e drejta shqiptare, në linjë të plotë me nenin 53 të Konventës Evropiane të të Drejtave të Njeriut, kërkon që çdo person i mbajtur në paraburgim të ketë të drejtën për një gjykim brenda një afati të arsyeshëm, ose për lirim gjatë procesit. Standardi i vendosur nga Gjykata e Strasburgut, veçanërisht në jurisprudencën e saj mbi “arsyet përkatëse dhe të mjaftueshme” (relevant and sufficient reasons), është i qartë: sa më e gjatë periudha e paraburgimit, aq më rigoroz duhet të jetë kontrolli gjyqësor, dhe aq më bindëse duhet të jenë arsyet konkrete, jo abstrakte, që justifikojnë vazhdimësinë e tij.

Rreziku i arratisjes apo i ndikimit te provat nuk mund të supozohet automatikisht nga natyra e akuzës apo nga funksioni publik i të pandehurit; ai duhet të mbështetet me fakte konkrete e të përditësuara, jo me të njëjtat argumente të përsëritura muaj pas muaji, pa asnjë evolucion.

Këtu ka edhe një element specifik që e bën këtë rast interesant nga pikëpamja doktrinare: ndryshe nga rastet “standarde” të paraburgimit, Veliaj, deri para pak kohësh, mbante ende titullin formal të kryetarit të bashkisë, gjë që teorikisht i jepte akses simbolik apo indirekt në strukturën institucionale. Me shkarkimin e fundit të kompetencave të deleguara dhe krijimin e distancës administrative, ky argument specifik i “rrezikut institucional” mund të jetë dobësuar objektivisht, çka mund të jetë pikërisht një nga elementët që gjykata duhet ta rivlerësojë më 15 shtator. Nga këndvështrimi i pastër juridik, dua ta ndaj shumë qartë këtë çështje nga procesi penal. Kompetenca e kryetarit të bashkisë për të deleguar, dhe rrjedhimisht për të revokuar delegimin e funksioneve drejtuese, bazohet në ligjin nr. 139/2015 “Për vetëqeverisjen vendore” dhe përbën një të drejtë organizative të brendshme, e ushtrueshme pavarësisht nga statusi procedural penal i titullarit, për sa kohë që mandati i tij si kryetar i zgjedhur vazhdon të njihet ligjërisht gjë që, sipas vetë urdhrit të Veliajt, mbështetet edhe në dy vendimmarrje të Gjykatës Kushtetuese që kanë konfirmuar vazhdimësinë e mandatit të tij. “Shkarkimi” i dytë i zonjës Ristani brenda pak muajsh, i shoqëruar me dorëheqjen e saj pas njëmbëdhjetë vitesh në atë funksion, krijon një pasiguri reale mbi atë se kush ka sot autoritetin e nënshkrimit për akte, kontrata dhe marrëveshje financiare të Bashkisë së Tiranës, një boshllëk që prek drejtpërdrejt funksionimin ditor të një institucioni me buxhet dhe kompetenca të konsiderueshme, siç e ka theksuar edhe opozita në kërkesën e saj zyrtare për seancë të Këshillit Bashkiak. Kriteret ligjore që rregullojnë vendimmarrjen për masën e sigurisë janë shprehimisht të përcaktuara nga Kodi i Procedurës Penale: rreziku i arratisjes, rreziku i përsëritjes së veprës penale, rreziku i ndikimit te provat ose dëshmitarët dhe jo gjendja administrative e bashkisë apo perceptimet publike rreth saj. Çdo përzierje e këtyre dy niveleve do të përbënte një gabim themelor metodologjik dhe do të cenonte rëndë besueshmërinë e vendimit, pavarësisht drejtimit që do të marrë ai. Nëse ndaj anëtarëve të gjykatës së lartë si ekspert i ligjit dhe me koptence të plotë profesionale them se 15 shtatori do t’a çoj Erion Veliaj në zyrën e kryetarit të bashkisë së Tiranës për të vijuar punën e tij dhe për ven në jete planin e tij për të realizuar ambicjet e tij politike të ideuar në IEVP e Durrësit. Zoti Veliaj do lirohet nga burgu edhe për shkakë të praktikës unifikuese që vet anëtarët e gjykatës së lartë kanë ndryshuar dhe publikuar në fletoren zyrtare në korrik të vitit 2026 ne të cilën për masën e sigurimit personal, prokuroria merr barrën e proves.

Kolegjet e Bashkuara të Gjykatës së Lartë kanë bërë publik vendimin e plotë unifikues, i cili sjell ndryshime të rëndësishme në mënyrën se si caktohen masat e sigurimit personal në Shqipëri. Me këtë vendim, Gjykata e Lartë ka prekur pjesërisht praktikën e mëparshme të vitit 2011, duke vendosur kritere të reja që i japin më shumë mbrojtje lirisë së individit dhe kufizojnë përdorimin automatik të masës “arrest në burg”.

TRI SHTYLLAT E VENDIMIT TË RI

Rishikimi i praktikës gjyqësore mbështetet në tre parime thelbësore, të cilat gjykatat duhet t’i zbatojnë tashmë detyrimisht:

1. Detyrimi për një shqyrtim real të alternativave. Gjykata nuk mund të kënaqet më me arsyetimin se “arresti në burg” është masa e duhur. Ajo është e detyruar të shpjegojë qartë pse masat më të buta, si arresti në shtëpi ose detyrimi për paraqitje, nuk mjaftojnë në rastin konkret.

2. Rrezikshmëria nuk merret e mirëqenë nga vetë vepra. Kolegjet e Bashkuara hodhën poshtë praktikën si pas së cilës “arresti në burg” vendosej automatikisht për vepra të rënda, ose kur dënimi i parashikuar ishte i lartë. Tani, rreziku i posaçëm duhet të provohet përmes një vlerësimi individual, ku merren parasysh personaliteti i autorit, sjellja e tij, si edhe rrethanat familjare dhe shëndetësore.

3. Barrën e provës e ka Prokuroria. Ndryshe nga më parë, i hetuari nuk ka më detyrim të sjellë “prova pozitive” për të merituar lirinë. Tashmë është organi i akuzës ai që duhet të mbështesë, me fakte konkrete, pse liria e personit paraqet rrezik dhe pse asnjë masë tjetër nuk e shmang këtë rrezik.

Ky vendim unifikues u mor në kuadër të shqyrtimit të çështjes së shtetasit Begtash Zeneli, në banesën e të cilit, gjatë kontrollit, u zbuluan 7 kilogramë e 350 gramë lëndë narkotike cannabis sativa. Edhe pse Prokuroria kërkoi me këmbëngulje “arrest në burg”, Gjykata e Apelit caktoi “arrest në shtëpi”, duke marrë parasysh moshën e tij 63- vjeçare, faktin se ishte i rehabilituar ligjërisht dhe gjendjen e rëndë shëndetësore të bashkëshortes. Pasi shqyrtoi rekursin e prokurorit, Gjykata e Lartë vendosi të lërë në fuqi masën e “arrestit në shtëpi”. Sipas kolegjeve, edhe pse vepra ka një shkallë të lartë rrezikshmërie, kjo nuk mund të mbizotërojë automatikisht mbi rrethanat konkrete njerëzore të të dyshuarit, nëse nuk provohet rreziku i vërtetë i largimit apo i përsëritjes së veprës penale.

Në argumentimin e saj, Gjykata e Lartë nënvizoi se ky drejtim i ri është i nevojshëm për ta afruar drejtësinë shqiptare me standardet e Gjykatës Evropiane për të Drejtat e Njeriut (GJEDNJ). Sipas vendimit, “arresti në burg” duhet të mbetet gjithmonë “ultima ratio” (masa e fundit), pasi prezumimi duhet të jetë, në çdo rast, në favor të lirisë.

/Gazeta Panorama