Shtetet e Bashkuara kanë arritur të shkatërrojnë me siguri vetëm rreth një të tretën e arsenalit raketor të Iranit, raportoi agjencia Reuters, duke cituar pesë burime të njohura me çështjen.

Sipas katër prej burimeve, që folën në kushte anonimiteti, një tjetër e tretë e raketave iraniane mbetet me status të paqartë, por besohet se është dëmtuar, shkatërruar pjesërisht ose është varrosur në tunele dhe strehimore nëntokësore pas bombardimeve amerikane. Ndërsa për pjesën e mbetur, vlerësohet se vijon të jetë funksionale.

Burimet theksuan se një vlerësim i ngjashëm vlen edhe për kapacitetet e Iranit me dronë, ku ekziston një shkallë sigurie se rreth një e treta e tyre është shkatërruar.

Megjithëse një pjesë e madhe e arsenalit raketor është dëmtuar ose bërë e paarritshme, vlerësimet tregojnë se Irani vazhdon të ketë një rezervë të konsiderueshme raketash. Sipas ekspertëve, Teherani mund të rikuperojë një pjesë të raketave të dëmtuara apo të fshehura në strukturat nëntokësore sapo të ndalen armiqësitë.

Ky vlerësim bie në kontrast me deklaratat publike të presidentit amerikan Donald Trump, i cili ka pohuar se Irani ka “shumë pak raketa”.

Gjatë një mbledhjeje të kabinetit, Trump pranoi gjithashtu rrezikun që paraqet edhe një pjesë e vogël e arsenalit të mbetur:

“Edhe nëse shkatërrojmë 99%, 1% është e papranueshme, sepse mund të godasë një anije që kushton miliarda dollarë”, deklaroi ai.
Administrata amerikane ka theksuar se objektivi kryesor është dobësimi i kapaciteteve ushtarake të Iranit, përmes goditjes së marinës, neutralizimit të raketave dhe dronëve, si dhe parandalimit të zhvillimit të armëve bërthamore.
Komanda Qendrore e ushtrisë amerikane, CENTCOM, bëri të ditur se operacioni i njohur si “Epic Fury” po përparon sipas planit. Sipas saj, janë goditur mbi 10 mijë objektiva ushtarake dhe është shkatërruar rreth 92% e flotës kryesore detare iraniane.

Megjithatë, autoritetet amerikane nuk kanë dhënë një shifër të saktë për përqindjen e kapaciteteve raketore dhe të dronëve të neutralizuara.
Zyrtarët amerikanë pranojnë se është e vështirë të përcaktohet saktë dëmi real, për shkak të rrjetit të gjerë të tuneleve nëntokësore të ndërtuara nga Irani për ruajtjen e armëve.

Edhe Sekretari i Mbrojtjes Pete Hegseth ka theksuar këtë sfidë, duke e krahasuar sistemin e tuneleve me atë të përdorur nga grupet militante në Lindjen e Mesme.
Pavarësisht sulmeve intensive, Irani ka treguar se nuk i ka shteruar kapacitetet e tij ushtarake. Vetëm së fundmi, sipas autoriteteve, Teherani ka lëshuar 15 raketa balistike dhe 11 dronë drejt Emiratet e Bashkuara Arabe.

Gjithashtu, Irani ka demonstruar aftësi të reja, duke lëshuar për herë të parë raketa me rreze të gjatë drejt bazës ushtarake në Diego Garcia, në Oqeanin Indian.

Ekspertët paralajmërojnë se, pavarësisht dëmeve të shkaktuara, Irani mund të ketë ruajtur deri në 30% të kapaciteteve të tij raketore, duke vënë në pikëpyetje efektivitetin e plotë të operacionit amerikan. bw