Mazhoranca dhe kryeministri Edi Rama po kërkojnë të fitojnë sa më shumë kohë me çështjen e Zv/kryeministres Belinda Balluku, fillimisht me kërkesën në Kushtetuese për interpretimin ligjor të pezullimit të një personi me imunitet nga GJKKO dhe tjetra me zvarritjen e çështjes në Kuvend.

Por të dyja rrugët në fund janë me kosto, pasi ose do mbrojë numrin dy të qeverisë, ose do krijojë përplasje me SPAK dhe kjo përcillet si një mesazh i keq në BE, me të cilën ka shpallur synimet për integrimin evropian të Shqipërisë.

Kështu u shpreh sot në “Kjo Javë” në studion e “News 24”, gazetarja e politikës Fatjona Mejdini, duke komentuar zhvillimet e fundit në vend dhe seancën e Kushtetueses për kërkesën e kryeministrit Edi Rama.

“E kuptoj se ku është një veprim për të fituar kohë. Por Gjykata Kushtetuese duhet të tregohet në lartësinë e detyrës dhe t’i tregojë kryeministrit edhe kufirin se ku është dhe kjo vendos e një vendim të unifikuar edhe për çështje të tjera, të mos kemi raste të tjera. Nuk e shoh si diçka të keqe që Kryeministria e kërkon këtë interpretim, nuk ka asgjë të keqe, kërkon interpretimin e rastit kur bëhet fjalë për pezullimin e një ministri. E kuptoj që kjo është një taktikë për të fituar kohë”, tha ajo.

Por ajo mendon se testi i vërtetë i kryeministrit nuk është Kushtetuesja, por 28 janari në Kuvend, ku do shihet vendimi i mazhorancës nëse do pranojë kërkesën e SPAK për heqjen ose jo të imunitetit të ministres Belinda Balluku. Por cilado të jetë zgjedhja, kjo do jetë një kosto për liderin e shumicës, pasi do krijojë përplasje me BE dhe SPAK.

“Edhe seanca plenare sot ishte një mundësi e mirë për të dëgjuar të gjithë atë që thuhej. Por testi i Ramës është 28 janari në Kuvend. Ky është testi i vërtetë, jo ai i Gjykatës Kushtetuese. Rama i ka sulmuar institucionet e drejtësisë indirekt, por nuk kemi parë një sulm të drejtpërdrejtë. Por heqja apo jo e imunitetit të Ballukut më 28 janar do ndajë çështjen dhe do tregojë pozicionin e mazhorancës. Thuhet se ai po kërkon ta mbajë zonjën Balluku. Ky është një test shumë i madh për Ramën, nuk parashikoj se çfarë do bëjë, do e lëshojë apo do e mbajë. Mendoj se të dyja rrugët për Ramën janë me kosto. Unë mendoj se ai kërkon të fitojë kohë”, u shpreh gazetarja.

Dhe sipas Mejdinit, kostoja që do marrë do të jetë politikisht e madhe dhe vetë kryeministri e di këtë fakt, ndaj përpiqet të fitojë sa më shumë kohë.

“Rama ka integrimin në BE si çështjen më të rëndësishme të tij, dhe një përplasje me SPAK dhe mbajtjen e Ballukut do i krijojë atij një kosto shumë të madhe edhe në lidhje me BE dhe ai e di shumë mirë këtë, të dyja rrugët kanë kosto dhe do presim se çfarë do të ndodhë”, përfundoi ajo komentin e saj.