Në Prishtinë u mbajt një protestë me moton “Kundër padrejtësisë”, organizuar nga organizatat e dala nga lufta, në shenjë kundërshtimi ndaj trajtimit të ish-krerëve të Ushtrisë Çlirimtare të Kosovës (UÇK) nga Dhomat e Specializuara në Hagë.

Kryeministri Edi Rama reagoi përmes një postimi në Facebook, ku ndau një foto nga protesta dhe shprehu habinë pse Kuvendi i Kosovës nuk ka miratuar ende një rezolutë për të denoncuar shkeljet në procesin gjyqësor ndaj ish-ushtarëve të UÇK-së.

“Vazhdoj pyes veten pse Kuvendi i Kosovës nuk e ka ngritur ende zërin përmes një rezolute pa dallime partish, ku të rreshtohen sa e sa shkeljet faktike të normës elementare demokratike të procesit të rregullt ligjor nga ana e Tribunalit të Hagës, ku të drejtat e Hashim Thaçit e shokëve të tij të izoluar nga bota prej vitesh të tëra tanimë, janë shqelmuar si hiçasgjë?!

Natyrisht që në rast se Kuvendi i Kosovës do ta bënte këtë rezolutë të vonuar, ne do ta angazhonim menjëherë Kuvendin e Shqipërisë, për ta votuar të njëjtin tekst dhe për ta përcjellë zërin e krejt shqiptarëve në çdo shtet demokratik që e sponsorizon Tribunalin, e që nuk duhet të tolerojë asnjë cenim e jo më asgjësimin e procesit të rregullt ligjor me kontributin financiar të taksapaguesve të vet”, shkroi Rama. bw