Aktivisti Erlind Xhindi tha se ajo që ndodhi ditën e djeshme me protestën, ku situata u tensionua ishte e pritshme. I ftuar në News24, ai deklaroi se tashmë nuk është thjesht një protestë, por një lëvizje që ka marrë edhe rolin e opozitës.

Sipas aktivisti, mbrëmjen e djeshme Rama ka qenë në zyrë dhe ishte ai që ka provokuar turmën duke hapur dhe mbyllur grilat e dritares.

“Dita e djeshme e pritshme, duhet të kishte një përshkallëzim. Hymë në muajin e katërt në shesh dhe protesta tani është një lëvizje që ka marrë përsipër të bëjë rolin e opozitë dhe të tregojë zërin natyral të qytetarëve.  Kryeministri ndodhej në zyrë, nuk e dimë cfarë donte në atë orë. Provokon zakonisht, hap grilat dhe mbyll grilat. Ai provokoi masën e qytetarëve. Ne për herë të parë pas 36 vitesh kemi marrë në dorë armën demokratike që është liria e fjalës. Ne atë armë nuk mund ta keqpërdorim, por nuk mund ta mbajmë të ulur sepse po kërkojmë të drejta tona të mohuara”, tha aktivisti.

Sipas tij, zhurma që ata bëjnë gjatë menaxhimit të protestës me ndalime dhe arrestime është me qëllime për të trembur protestuesit dhe për të tkurrur atë pjesën qytetarë dhe intelektuale.

Xhindi paralajmëroi se protesta do të vazhdojë, duke deklaruar se në datat 12-19 shtator do të presin edhe diasporën.

“Ne jemi futur në një fazë jo vetëm përballje, por për pak ditë presim diasporë në 12-19 dhe sa herë që kanë ardhur vijnë në autokolonë”, tha aktivisti.