Shkollën fillore dhe qytetëse i kreu në vendlindje, kurse shkollën e mesme në Follorinë (Greqi). Kristo ndoqi studimet e larta dhe u specializua për sëmundjet e syrit në Grac të Austrisë, në klinikën e famshme të prof. Françesketit, që ishte një nga figurat më të shquara botërore të kohës në specialitetin e oftalmologjisë. Pasi u pajis me kulturë të gjerë profesionale dhe përvojë të mjaftueshme, vjen në Shqipëri në vitin 1929, kohë që shënon fillimin e përpjekjeve të tij shumëvjeçare në hedhjen e themeleve të shërbimit të okulistikës në vendin tonë.

Gjatë viteve 1929-1931 dr. Kristo Kristidhi shërbeu si mjek privat në Tiranë. Shumë të vështira mbetën në kujtesën e tij vitet e para të punës. Dashuria për profesionin dhe dëshira për të punuar në shërbim të fatkeqëve sfiduan vështirësitë e kohës dhe mundësuan që okulisti i ri, edhe duke qenë fare i vetëm, të hidhte bazat e shërbimit okulistik, i cili me punë dhe përpjekje u rrit dhe u profesionalizua ndër vite, duke u shndërruar në një nga shërbimet më të avancuara në spitalin civil të Tiranës, ku dr. Kristo Kristidhi u emërua përgjegjës i shërbimit të okulistikës gjatë periudhës 1931-1939. Sa të lodhshme, aq edhe motivuese ishin përpjekjet e tij për ta kthyer në art përdorimin e bisturisë e për të mos lejuar që verbimi të triumfonte mbi dritën e syrit. Dr Kristo Kristidhi, tashmë në kushte spitalore, me një pavijon ku shtroheshin të sëmurët dhe me sallën e operacionit në dipozicion, implementoi shumë metoda të reja dhe të përparuara në fushën e trajtimit të sëmundjeve të syrit me metoda kirurgjikale. Veçse më pas, në vitin 1939, pushtuesit italianë e larguan nga spitali duke e zëvendësuar me një mjek italian, për t’u rikthyer edhe një herë si mjek okulist ambulator në qytetin e Tiranës.