Spanja vazhdon të mbetet një prej shteteve të Bashkimit Evropian që nuk e njeh pavarësinë e Republikës së Kosovës. Një qëndrim i tillë i Madridit zyrtar kohë më parë është raportuar se mund të pësonte modifikim, meqë flitej për hapje zyrash në Prishtinë, por asgjë s’ka ndodhur.

Çështja e mundësisë që Spanja të ndryshojë pozicion për Kosovën është rikthyer përsëri në vëmendje pasi Pedro Sanchez ka arritur që të mbetet kryeministër edhe për një mandat tjetër falë përkrahjes nga partitë katalunase, mes tyre edhe partia e Carles Puigdemont “Junts per Catalunya”.

Në një përgjigje për Gazetën Express nga zyra e Puidgemont kanë thënë se partia e tyre gjithmonë e ka ndjekur me interes çështjen e Kosovës dhe në vazhdimësi kanë kërkuar nga Qeveria e Spanjës që ta njohë Kosovën plotësisht si shtet të pavarur.

Josep Alay, shef i Stafit të Carles Puidgemont ka thënë një insistim të tillë do ta përsërisin edhe në mandatin e ri të parlamentit të Spanjës, duke sqaruar se “Junts për Catalunya” s’janë pjesë e kabinitetit qeveritar por që vetë do ta përkrahin Qeverinë e Sanchez nga jashtë dhe se s’kanë kapacitet për të vendosur për çështjen e njohjes së Kosovës nga Spanja.

“Si shef i stafit  të tij, mund t’ju them se ne gjithmonë e kemi ndjekur me shumë interes çështjen e Kosovës dhe gjithmonë kemi kërkuar nga qeveria spanjolle që ta njohë plotësisht Kosovën dhe një komb të pavarur. Në këtë mandat të ri parlamentar, ne do të insistojmë edhe një herë që Spanja të njohë Kosovën, por më lejoni të them se partia politike e Presidentit, Junts per Catalunya, nuk është pjesë e kabinetit spanjoll. Ne i japim mbështetje kësaj Qeverie vetëm nga jashtë dhe nuk kemi kapacitet të vendosim për çështjen e njohjes së Kosovës nga Spanja”, ka thënë Alay.

Për mundësinë e ndryshimit të pozicionit të Spanjës ndaj Kosovës shkaku i kataluansve, media gjatë muajit nëntor ka biseduar edhe me analistin politik, Alejandro Esteso Perez, i cili e njeh rajonin dhe është pjesë e “Balkans in Europe Policy Advisory Group”..

Perez ishte shprehur skeptik se Kosova do të ishte çështje prioritare e katalunasve, meqë sipas tij rasti i Kosovës është përdorur nga ta më shumë si një rast apo përvojë mbi të cilën katalunasit kanë argumentuar të drejtën e tyre për pavarësi sesa si një qëllim në vetvete për të përkrahur hapur njohjen e Kosovës.

“Mendoj se çështja e Kosovës ka qenë një kartë madhore për partitë katalane pro-pavarësisë. Por është e nevojshme të theksohet se Kosova është përdorur më së shumti si një mjet, si një “studim rasti”, d.m.th., si një shembull i një përvoje të fundit të pavarësisë/shkëputjes, në të cilën mund të bazohej përvoja katalane (Sllovenia u përdor gjithashtu si një rast studimor), dhe jo aq si një qëllim në vetvete apo si një rast për të mbështetur haptazi njohjen e Kosovës. Në këtë kontekst, nuk mendoj se është ndër prioritetet e Junts të kërkojë njohjen e Kosovës kur ajo ka shumë çështje më kritike për të negociuar me qeverinë (p.sh. zbatimin e Ligjit të ardhshëm për Amnistinë që përfshin shumë renditja e figurave të Junts)”, kishte thënë Perez.

Në çdo vend demokratik, në mënyrë që të ruhen tejkalimet e pushteteve në fushat e njëri-tjetrit, që të mbrohen njerëzit nga abuzimet e pushtetit, që të mos i shtypë arroganca e oligarkisë dhe të mos i dërmojë e vrasë vrazhdësia e paskrupullt e krimit, ajo që bëhet barrierë është drejtësia.

Por në një  regjim, që i ka uzurpuar në sqetullën e vet të gjitha këto pushtete që sapo përmendëm dhe në esencën e vet ka shkrirë të gjithë cilësorët e mësipërm, kush mund të bëhet vallë hendeku që  regjimi nuk duhet ta kalojë për të mos e kthyer vendin në diktaturë, përveçse sistemi i drejtësisë?

Besuam shumë se drejtësia e re do të ishte ndryshimi, por tani çdo ditë e më tepër ajo po shfaq si fytyrë të saj tiparet e njërës palë.

Nuk mund të kishim asnjë pritshmëri të skajshme ose revolucionare prej saj, as që do të katapultonte menjëherë botën shqiptare në barazi, por që të na zhyste akoma dhe më keq në pabarazi dhe të na shërbente përkundrazi, si instrument për mbylljen dhe anashkalimin e dosjeve më të nxehta, këtë jo, nuk na e kishte pritur mendja.

Njëherë filloi të veprojë me avazin e drejtësisë së vjetër, duke i goditur shumë më vonë të akuzuarit, jo atëherë kur duhej, duke u kthyer kështu në shërbimin më të madh të pushtetit, të cilit individi nuk i intereson, por veç mbajtja në këmbë e sistemit. Ky qe rasti i ministrit Tahiri apo i Zv/kryeministrit Ahmetaj, më të lavdëruarit e qeverisë.

Atëherë si mund të qëndrojë propaganda e Kryeministrit se çdo dënim i drejtësisë është çështje individësh?

Si ka mundësi që inceneratorët ku kanë firmosur gati të gjitha ministritë të jetë çështje individesh dhe jo sistemi, qeverisje dhe regjimi?!

Askush me mend në kokë se beson dhe pranon, përveç SPAK që jo vetëm nuk e çon çështjen deri në fund, por bën dhe makinacione për ta mbyllur.

Pse e themi këtë?! – Të mos harrojmë se gjithçka që SPAK bëri për inceneratorët erdhi si pasojë e rrëfimit publik dhe cilësisë së komisionit parlamentar të kryer nga opozita, që ia përplasi faktet në fytyrë të gjithë popullit, për vjedhjen e shekullit nga e gjithë administrata e qeverisë, me Edi Ramën në krye si përgjegjësin kryesor. Po si u soll SPAK? – Si garanti i kryeministrit! Të dënohen të gjithë, përveç tij.

A ka krim më të madh që mund të bëjë drejtësia përveç kësaj?!

Si mund t’i besojmë atëherë kësaj drejtësie, që nuk është hakmarrëse, që nuk sillet si revanshiste e historisë?!

Ka shpërthyer një histeri e tërë, nëpër të gjitha mediat e pushtetit, për të ndryshuar edhe ligjin e komisioneve hetimore( tipike kjo për diktaturat), pikërisht pse kanë frikë një efekt bumerangu, që as drejtësia e re sorosiane nuk do të mund t’i bëhej dot   digë, pa përfshirë nga dallgët e provave dhe fakteve edhe vetë Kryeministrin. Atëherë përse na duhet drejtësia e re, kur ka frikë të dënojë edhe ata që mundet?! Pse, nuk ishte rasti i Beqajt një 2-standardësi arrogante e SPAK kur gjykata ia jep të qartë provën  e zbuluar që duhet të hetojë?!

E si mund të presim ne që ajo të guxojë të godasë të pagoditshmin, kokën e regjimit?

Jo, nuk është tamam kështu. SPAK di të trimërohet e të godasë pabesisht, pamoralisht, veç për shoë, një person që nuk ka kurrfarë me akuzat që po i bëhen  Jo, SPAK di dhe të hiqet si premtimi i madh i drejtësisë së re përpara popullit shqiptar dhe të ndalojë politikisht kryetarin e opozitës Sali Berishën. Pastaj, të gjitha mediat të trumbetojnë pse nuk vepron deri në fund e kështu me radhë  me tam-tamin e gjuetisë së shtrigave.

Pse na duket kështu?

Berisha është vërtet njëra nga figurat qendrore të politikës shqiptare të gjithë këtyre 30 e ca viteve, por ama nuk duhet harruar se ka 10 e ca vjet që nuk ka rol në pushtet.

Çfarë pengonte ai për demokracinë që u godit me “non-grata”?!E

kundërta është në realitet. A nuk është kjo një hakmarrje e pastër  politike  e inskenuar nga Kryeministri shqiptar siç loboi edhe me “non grata”-n për të dobësuar rivalin e tij të frikshëm politik për interesa të pushtetit të tij?!

Po tani, çfarë pengon, kur çdokush  nga pushtetarët, dërdëllit se opozita është e ndarë dhe e copëtuar në katërsh?!

Pse nuk ka ngut SPAK për ngjarjet e mëdha si McGonigal që është thembra e Akilit për përçarjen e opozitës?!

Pse nuk ka ngut SPAK për aferën e inceneratorëve që është gati 1miliard dollarë ose çereku i Buxhetit të Shtetit, për  portin e Durrësit, për “Sky ECC” etj, etj. por  krijon kapituj hakmarrjeje politike për dhëndrin e Berishës, me histori të konfirmuara nga drejtësia shumë vite më pare?!

Akuza ndaj dhëndrit të Berishës,  z. Malltezi, është thjesht një represion politik dhe asgjë më tepër. Nuk do shumë argumente për të kuptuar mjegullën e burgosjes dhe izolimit të tij politik që po të krijon regjimi autokratik me drejtësinë që ka plotësisht nën tutelë, qëllimi e veprimeve të së cilës është të prishë imazhin e mire të luftës politike që ka nisur opozita e vërtetë me  qëllimin final, zgjedhjet e 2025-ës.

Z. Malltezi në këtë histeri hakmarrjeje nuk ka fare dallim nga kundërshtarët politikë që burgos dhe dënon Putini në Rusi apo Llukashenko në Bjellorusi.

Nëse do të kishte goditje bëmash pa alibi në këtë drejtim do të bëheshim të gjithë mbështetës së kësaj drejtësie të re. Por kur shohim shoë për të rënduar njërën anë, opozitën dhe drejtuesit e saj, pa fakte dhe pa prova, kur shohim mbyllje dosjesh aferash të tmerrshme apo dënime njerëzish periferikë,  kur shohim përndjekje të pastra politike të opozitës siç po ndodh hapur me z. Berisha, që  nuk po lënë gur pa lëvizur ta ndalojnë pa ligj dhe në të ardhmen ta bëjnë fajtor pa faj, atëherë  dyfytyrësia e SPAK na kthehet në gjëmë.

Po, po, e madhe është kjo gjëmë e mëkatit që ai po i vendos mbi shpinë, Shqipërisë me këto lloj kallëzimesh dhe moskallzimesh që po bën.

Innstucionet e drejtësisë së re sorosiane po duket qartë se nuk kanë si qëllim shërbimin ndaj popullit, por shërbimin ndaj qeverisë në luftën e pandalshme për shkatërrimin e opozitës.

Dëgjoni pak pafytyrësinë shembullore të Kryeministrit kur pyetet për të. “Unë nuk flas e diskutoj fare për “non gratan” dhe zëdhënësit e tij (zotin Bardhi e me radhë).”

Po mirë, do thoshte ciniku i Ramës,  po Bardhi, “non grata” është që nuk merret me të Kryeministri?! Po kushdo tjetër të zgjidhet në PD  i bie të jetë “non grata”, pavarësisht se përfaqëson 700 mijë votues shqiptarë.

A ka shprehje më cilësuese të regjimit që mbron dhe mbështet drejtësia e re me tollovinë e vulës së PD që ka shpikur e po vazhdon, vetëm e vetëm që të mos ushtrojë opozita  gjithë fuqinë e vet?!

Le të vazhdojmë pak t’i nxjerrim kallajin edhe cinikut të Ramës kur thotë: “Është Basha, kryetari de jure i PD.”

Po çfarë thotë Edi Rama pa: Basha, po ky ku është, ku ka humbur, si mund të bisedohet me të?!

Atëherë çfarë duhet të themi më shumë për këtë lloj shpellari të arrogancës dhe dyfytyrësisë që na ka rënë për hise tash 10 vjet? Vetëm një gjë. Ai e ka frikën në palcë, ka kompleks inferioriteti nga fuqia e Berishës që s’e merr dot peng, ndaj sillet si superior.

Ai trimërohet vetëm nga fuqia që i jep drejtësia e re, me premtimin se do të jetë i dënuari i fundit i saj, në të gjithë klasën politike shqiptare.

Ai shpreson se drejtësia amerikane që do dënojë McGonigal nuk do arrijë të mbërrijë dhe tek ai, po gabohet. Tashmë gjërat kanë dialektikën e tyre dhe në të ardhmen do përmbysen dhe do gjykohen. Po, po do gjykohen! Jo për hakmarrje, por  për ta nxjerrë të keqen jashtë dhe të ecet përpara.

Kështu demokracia e verifikon politikën në rrjedhën e saj.

Këto janë mësime të historisë dhe jo profeci të dikujt.

Askujt nuk duhet t’i shkojë ndërmend se të këqijat që i ka bërë demokracisë do t’i mbulojë brenda karrierës së tij.

Kjo vlen edhe për padrejtësitë e SPAK-ut sot në kurriz të opozitës. Prandaj tani duhet që SPAK duhet të hyjë në rrugën e misionit të taksapaguesëve shqiptarë. Mjaft më me gjueti të specializuar shtrigash dhe përndjekje të qarta politike! Qelbja e kokës së peshkut të pushtetit ka kutërbuar me erën e vet të gjitha kancelaritë perëndimore, përveçse në SPAK nuk ndihet kalbësira e tij.

Sa më shpejt të freskohet drejtësia e re nga ky kutërbim, aq më shpejt do të shpëtojë Shqipëria nga qelbja dhe shkatërrimi i indit të saj social, që po i bën SPAK-u me 2-standardësinë dhe pabarazinë në individë, vepra dhe përmasa ngjarjesh, të dënimeve apo mosdënimeve që ai po jep.

Babai i Naim Murselit, Shaban Murseli, ka folur për krimin e rëndë që bëri i biri i tij, i cili akuzohet se ka organizuar vrasjen e gruas së tij Liridona Ademaj.

Në një intervistë për gazetaren  Blerta Dalloshi Berisha, dhënë për emisionin Opinion, thotë se nuk beson që krimi i rëndë të ketë ndodhur për çështje borxhi.

Ai dyshon që Liridona mund të ketë ditur ndonjë sekret.

Pyetje: Sa i përket financave është në borxhe?

Shaban Murseli: Unë nuk e di të ketë borxhe, e ka patur një presion, por prej kujt nuk e di.

Pyetje: Mund të jetë ndonjë sekret?

Shaban Murseli: Mund të jetë ndonjë sekret dhe është dasht me e eleminu.

Pyetje: Është përmendur si shkak që mund të jetë biseksualizmi për të cilin ka patur informacion Liridona.

Shaban Murseli: Sa i përket gjinisë mashkullore, tregoj të vërtetën, është ndoshta keq me thënë, i ka urrejt.

Pyetje: Po fëmijët, i kërkojnë prindërit?

Shaban Murseli: Po mbrëmë kanë filluar, i kërkojnë dy persona nga dajat.

Pyetje: Keni komunikuar me ta?

Shaban Murseli: Është gjendje e tensionuar, të vetmin komunikim e kam pas, ja dërgova një mesazh kisha dëshirë me marr pjesë në rivarrim, por mora përgjigje negative.

Pyetje: A kanë patur ndonjë herë telashe?

Shaban Murseli: Kurrë në jetën time, as më ka thënë Liridona, as Naimi që kanë patur mosmarrëveshje./ dita

HuffPost Italia i ka kushtuar një artikull trafikimit të drogës nga Shqipëria drejt vendit apenin, duke rikutjuar rastet e ish-ministrit të Brendshëm Saimir Tahiri, por edhe atë të trafikantit Klement Balili.

Në shkrimi ne saj media italiane shprehet se pjesa më e madhe e drogës shqiptare po mbërrin në Itali falë lidhjeve dhe ndërhyrjes së politikës dhe se askush nuk po e ndalon këtë fenomen.

Duke analizuar marrëdhëniet mes krimit të organizuar shqiptar dhe italian në lidhje me trafikun e drogës dhe marrëdhëniet me politikën, del në pah një fakt shqetësues. Falë këtyre lidhjeve një pjesë e madhe e drogës shqiptare mbërrin në Itali. Këtë e vërtetojnë konfiskimet gjithnjë e në rritje të lëndëve narkotike. Në Shqipëri ka ende plantacione kanabisi në ajër të hapur. Droga shqiptare mbërrin në Itali nëpërmjet brigjeve të Adriatikut, një pjesë mbetet në Itali dhe pjesa tjetër shkon drejt shumë vendeve anëtare të Bashkimit Evropian shkruan HuffPost Italia.

Pozita gjeografike midis Italisë dhe Shqipërisë ka lehtësuar ndër vite zhvillimin e kanaleve të drejtpërdrejta midis grupeve kriminale italiane dhe shqiptare, me referencë të veçantë për furnizimin, ruajtjen dhe tregtimin e substancave narkotike. Ka pasur gjithmonë kontakte të vazhdueshme midis grupeve kriminale shqiptare me degë në Itali dhe grupeve kriminale puliane, duke iu referuar veçanërisht atyre që veprojnë në zonën e Foggia-s, në zonën e Barit dhe në zonën e Salentos me degëzime edhe në territorin shqiptar.

Është e vërtetë që në Shqipëri ka ndërlidhje mes trafikantëve të drogës dhe politikës. Fatkeqësisht, Toka e Shqiponjave duhet të përballet me shkallën e lartë të korrupsionit të pranishëm. Kjo ka ndodhur si me qeverinë e djathtë ashtu edhe me atë të majtë. Rasti më përfaqësues i marrëdhënies mes politikës së korruptuar dhe krimit të organizuar është dënimi i ish-ministrit të Brendshëm Saimir Tahiri me pesë vite burg nga Gjykata e Apelit të Tiranës. Tahiri ishte ministër i Brendshëm në Shqipëri në qeverinë e dytë Rama, nga viti 2013 deri në vitin 2017, kur u detyrua të braktiste detyrën për shkak të akuzave për përfshirje në trafik droge, shkruan media italiane më tej.

Ndërlidhjet ekzistojnë edhe me mafiozët italianë. Hetimet e shumta nisin që nga hetimi nga Guardia di Finanza e Katanias, me operacionin e quajtur “Rosa dei Venti”, që çmontoi një rrjet kriminal italo-shqiptar të akuzuar për importimin e tonëve kanabis nga Shqipëria në Itali për mbi 20 milionë. euro. Që atëherë, në vitin 2018, deri më sot kapjet e lëndëve narkotike nga Shqipëria në Itali janë shumëfishuar me shifra eksponenciale.

Në vitin 2023 në Brescia një sekuestrim i madh me vlerë mbi 3 milionë euro i dha një goditje të rëndë një organizate kriminale italo-shqiptare që importonte drogë në Itali. Në Treviso u sekuestruan gjithsej 420 kilogramë drogë me vlerë të shitjes me pakicë që vlerësohet në mbi 34 milionë euro. Në Romë tashmë qarkullon droga kryesisht shqiptare dhe mbizotërojnë kartelet “shqiptare”.

Ka edhe disa trafikantë shqiptarë droge me lidhje në Itali. Moisi dhe Florian Habilaj, të konsideruar si drejtues të kartelit të Vlorës dhe tashmë të njohur për autoritetet gjyqësore dhe policore italiane, rikujton HuffPost. Vëllezërit Habilaj trafikonin drogë drejt Italisë dhe Greqisë. Marrëveshja e fshehtë mes politikës dhe trafikantëve përfshinte edhe Italinë.

Për të kuptuar përfshirjen e politikës mund të marrim si shembull rastin e Klement Balilit të arrestuar për trafik ndërkombëtar droge tashmë në vitin 2006. Pronar i hoteleve të shumta luksoze në bregdetin shqiptar, atij iu besua transporti në rajonin e Sarandës në vitin 2014 edhe pse ai ishte në kërkim për shkak se ndaj tij ishte lëshuar një flet-arrest ndërkombëtar. Sot është i dënuar pasi iu dorëzua drejtësisë shqiptare në këmbim të uljes së madhe të viteve të burgimit.

Fitimet nga trafiku dhe tregtia e drogës janë të mëdha dhe paratë e drogës janë gjithashtu joshëse për politikanët. Në Shqipëri, partitë politike dhe fushatat elektorale shpesh financohen me të ardhura nga trafiku i drogës. Krimi i organizuar, politika dhe ekonomia janë shpesh të ndërlidhura në një rrjet të ndërlikuar interesash të përbashkëta dhe një sërë përfitimesh reciproke, theksohet në artikull.

Ashtu siç ndodhi në Itali, edhe në Shqipëri, organizatat më të rëndësishme kriminale kanë arritur të hyjnë në politikë, ekonomi, financa, media dhe në aktivitete sociale e kulturore. Ata kontrollojnë territorin, krijojnë mirëqenie, prodhojnë investime dhe gjithashtu ndikojnë aktivisht në politikën shqiptare. Qeveria shqiptare duhet të zbatojë ndryshime serioze legjislative në të ardhmen e afërt, duke filluar nga Kodi i Procedurës Penale dhe Penale, për të forcuar masat represive ndaj anëtarëve të organizatave mafioze. Modeli për të frymëzuar është padyshim ai i luftës kundër mafies italiane.

Prandaj do të jetë e nevojshme të forcohet siguria e burgjeve; luftimi i krimit të organizuar dhe lidhjeve me politikën dhe botën ekonomike; të luftohet korrupsionin në mënyrë efektive; të përdoret izolimi total i të burgosurve të rrezikshëm për të parandaluar komunikimin e tyre të jashtëm me organizatat kriminale; dhe të konfiskohen pasuritë e mafias. Një tjetër nga problemet me të cilat do të përballet Shqipëria është sistemi i saj gjyqësor, i cili duhet të reformohet dhe të përmirësohet, duke e mbrojtur mbi të gjitha nga korrupsioni dhe ndërhyrjet politike që cenojnë besueshmërinë dhe efektivitetin e saj, përmbyll shkrimin media italiane./bw

Policia angleze thotë se të paktën 1700 kriminelë nga Shqipëria po ecin të lirë në Britani.

Bosët e drogës, kontrabandistët e njerëzve, mashtruesit dhe trafikantët e seksit besohet të jenë në mesin e individëve aktualisht të arratisur, raporton Daily Mail.

Oficerët e Policisë Metropolitane dhe Agjencisë Kombëtare të Krimit kanë kërkuar të dhëna për secilin prej të dyshuarve nga autoritetet në Shqipëri në një përpjekje për t’i vënë ata para drejtësisë.

Besohet se të gjithë të dyshuarit mbërritën ilegalisht në Mbretërinë e Bashkuar me gomone dhe kamionë.

Shifra u bë publike ndërsa Sekretari i Brendshëm James Cleverly u takua me ministrin e Brendshëm shqiptar Taulant Balla javën e kaluar për të diskutuar mbi trajtimin e imigracionit të paligjshëm dhe krimit të organizuar, shkruan më tej gazeta britanike.

Një burim i brendshëm tha: ‘Policia e Mbretërisë së Bashkuar kërkoi të dhëna për 1,700 emigrantë shqiptarë të dyshuar si kriminelë, të cilët policia shqiptare i furnizoi shumë shpejt. Policia shqiptare ka kërkuar të dhëna për të gjithë shtetasit që janë dënuar për krime në Mbretërinë e Bashkuar, në mënyrë që ata të mund të fillojnë konfiskimin e fitimeve të paligjshme si prona, para, bizhuteri dhe automjete në Shqipëri.’

Në fillim të këtij viti, mbreti i drogës Denis Xhelili, 38 vjeç, një emigrant shqiptar, u burgos me dhjetë vjet pasi dyshohet për trafik kokaine dhe heroine në Britaninë e Madhe.

Zyra e Brendshme tha se Mbretëria e Bashkuar dhe Shqipëria ishin të prirura të synonin ‘financat e paligjshme, korrupsionin, narkotikët dhe krimin e organizuar të imigracionit’.syri.net

Liridona Murseli, 30-vjeçare, është vrarë të mërkurën, më 29 nëntor, në rrugën “Dalip Alshiqi” në Prishtinë, kryeqytetin e Kosovës.

Fillimisht, Policia e Kosovës, e ka raportuar rastin si “grabitje me pasoja të vrasjes”.

Dy ditë më vonë, më 1 dhjetor, Policia ka njoftuar për arrestimin e dy personave: dorasin G.P dhe N.M, bashkëshortin e viktimës, të dyshuar për vrasjen e saj.

Mediat lokale në Kosovë e kanë identifikuar bashkëshortin si Naim Murseli.

Pak orë më vonë, Ministria e Mbrojtjes e Kosovës, ka konfirmuar se në mesin e të arrestuarve për këtë rast, si i dyshuar, është edhe K.K, pjesëtar i Forcës së Sigurisë së Kosovës.

Gjykata Themelore në Prishtinë ka konfirmuar për Radion Evropa e Lirë se seanca e parë për tre të dyshuarit është caktuar për 3 dhjetor, në orën 9:30.

“Murseli e ka porositur vrasjen”

Betimi për Drejtësi – medium i specializuar në fushën e sundimit të ligjit në Kosovë – ka raportuar, bazuar në burime se, i dyshuari Naim Murseli e ka pranuar para hetuesve se e ka porositur vrasjen për bashkëshorten e tij.

“Burime të ‘Betimi për Drejtësi’ bëjnë të ditur se i dyshuari Murseli ia kishte dhënë të dyshuarit G.P., 15 mijë euro para vrasjes, e 15 mijë të tjera do t’ia jepte pas kryerjes së veprës”, është thënë në raportimin e këtij mediumi.

Autoritetet e drejtësisë ende nuk e kanë bërë të ditur motivin e kësaj vrasjeje.

Policia e Kosovës ka thënë se ka kryer bastisje në Gjakovë dhe ka arritur të sekuestrojë armën, me të cilën dyshohet të jetë kryer vrasja.

“Do ta zhvarrosim trupin”

Rasti i vrasjes së 30-vjeçares është dënuar rëndë në Kosovë.

Presidentja e Kosovës, Vjosa Osmani e ka quajtur vrasjen si “krim monstruoz që duhet të marrë dënimin e merituar”.

“Ky krim i tmerrshëm kërkon veprim të shpejtë dhe vendimtar për t`u siguruar që drejtësia të mbizotërojë dhe që autorët ta marrin dënimin, i cili pasqyron peshën e kësaj vepre makabre penale”, ka thënë ajo përmes një postimi në Facebook.

“Ky krim nuk do të mbetet pa u ndëshkuar. Kriminelët do të përballen me drejtësinë”, ka thënë ministrja e Drejtësisë, Albulena Haxhiu.

Rrjeti i Grave të Kosovës (RrGK) ka kërkuar që rasti të trajtohet me urgjencë.

Mllef, posaçërisht, ka nxitur fakti se Naim Murseli është parë duke marrë pjesë në varrimin e bashkëshortes.

Mediat lokale në Kosovë kanë raportuar se familjarë të Liridonës, synojnë ta zhvarrosin trupin e së ndjerës nga Gjakova, ku është varrosur, pas dyshimeve se bashkëshorti ka dorë në vrasjen e saj.

Liridona Ademaj, jo Murseli

Në reagime e sipër në rrjete sociale, disa kanë kërkuar që Liridona të njihet me mbiemrin e vajzërisë, Ademaj, dhe jo Murseli, të familjes së burrit.

Disa janë shprehur të alarmuar me dhunën kundër grave, disa i kanë vënë fajin mendësisë patriarkale për raportimet sistematike për dhunë, dhe kanë kërkuar më shumë siguri për gratë.

Në Tiranë, kryeqytetin e Shqipërisë, më 3 dhjetor është thirrur një protestë pas vrasjes së Liridonës.

Në orën 11:30 është planifikuar të mbahet një marsh drejt Ambasadës së Kosovës në Tiranë, me thirrjet ndal femicidit.

Sipas Agjencisë së Kombeve të Bashkuara për Gratë, UN Women, femicidi përkufizohet si vrasje e qëllimshme që lidhet me gjininë, që mund të jetë e nxitur nga rolet e stereotipizuara gjinore, diskriminimi ndaj grave dhe vajzave, raportet e pabarabarta të pushtetit midis grave dhe burrave, apo normave të dëmshme shoqërore.

Në periudhën janar-nëntor, në Kosovë janë raportuar rreth 2.000 raste të dhunës në familje. Sipas ministres së Drejtësisë, Albulena Haxhiu, 90 për qind e viktimave të kësaj dhune kanë qenë gratë dhe vajzat.

Në Kosovë, më 25 nëntor ka nisur fushata “16 ditët e aktivizmit kundër dhunës me baza gjinore”.

Në aktivitetin e mbajtur më 27 nëntor, të titulluar “Ato janë ne”, Haxhiu tha se dhuna në familje është shndërruar në fenomen në Kosovë.

Vetëm në vitin 2022 në Kosovë janë vrarë tri gra – për të tria rastet, fajtorë ose të dyshuar kanë qenë bashkëshortët e tyre.

Në periudhën 2010-2022 në këtë shtet janë vrarë 50 gra.

Në Kosovë, rastet e dhunës në familje mund të raportohen në numrin 0800 19 999.

Linja telefonike e Mbrojtësve të Viktimave është 0800 11 112.