SAN JUAN – Byroja Federale Amerikane e Hetimit (FBI) ka arrestuar një senator të Porto Rikos me akuzat për korrupsion.
Zëdhënësi i FBI-së, Carlos Osorio, ka theksuar se senatori Abel Nazario akuzohet për përvetësim të fondeve federale gjatë periudhës kur ai ka qenë kryetar bashkie në rajonin Yauco, në jugperëndim të vendit.
Ndërkohë bëhet e ditur se FBI-ja ka kaluar në veprim pas një ankese të bërë nga Departamenti Amerikan i Punës.
Senatori Nazario kryente detyrën e ndihmës kryetarit të përgjithshëm të Partisë së Re Progresiste të Guvernatorit të Porto Rikos, Ricardo Rossello.
Vendi i Karaibeve, Porto Riko ndodhet në statusin e “territorit të pavarur të SHBA-ve”. aa
John Bolton, këshilltar për siguri kombëtare i presidentit amerikan, Donald Trump, kërcënoi të hënën se Uashingtoni do të vendosë sanksione kundër gjykatësve dhe prokurorëve të Gjykatës Ndërkombëtare Penale nëse ata nisin të hetojnë krimet e dyshuara të luftës, të kryera në Afganistan nga amerikanët.
“Do t’i ndalojmë gjykatësit dhe prokurorët (e Gjykatës Ndërkombëtare Penale) të hyjnë në SHBA. Do t’i sanksionojmë fondet e tyre në sistemin financiar të SHBA-së dhe do t’i persekutojmë ata në sistemin penal të SHBA-së. Do të bëjmë të njëjtën gjë me çdo kompani apo shtet që ndihmon hetimet e amerikanëve nga gjykata”, tha Bolton.
Sekretarja për media e Shtëpisë së Bardhë, Sarah Sanders, tha se Bolton i bëri deklaratat pasi Gjykata Ndërkombëtare Penale i tha Uashingtonit se është “në prag” të njoftimit të një vendimi për hetimet e mundshme në Afganistan.
“Po ua bëjmë me dije qëndrimin tonë përpara se ta marrin atë vendim”, tha Sanders.
Në fakt, vendimi i pritur do të autorizojë një hetim për mizoritë e pretenduara nga talibanët dhe forcat e Qeverisë afgane.
Por ai mund të përfshijë edhe raste ku hetuesit amerikanë akuzohen për torturimin e të burgosurve në Afganistan dhe në “lokacione të zeza” në Poloni, Rumani dhe Lituani.
Bolton tha se administrata e Trumpit “do të përdorë çdo mjet të nevojshëm për t’i mbrojtur qytetarët tanë dhe ata të aleatëve nga persekutimi i padrejtë i kësaj gjykate të paligjshme”.
“Ky president nuk do të lejojë që qytetarët amerikanë të ndiqen penalisht nga burokratët e huaj dhe ai nuk do të lejojë që kombet e tjera t’i diktojnë mjetet tona të vetëmbrojtjes”, tha Bolton.
Çfarë është saktësisht Gjykata Ndërkombëtare Penale?
Gjykata Ndërkombëtare Penale është institucioni i parë i përhershëm gjyqësor në botë që pretendon juridiksionin për të ndjekur penalisht individët për gjenocid, krime kundër njerëzimit dhe krime lufte, në bazë të ligjit ndërkombëtar.
Ajo u krijua si një organizatë ndërqeveritare në Hagë, Holandë, në vitin 2002, në bazë të një traktati të njohur si Statuti i Romës i Gjykatës Ndërkombëtare Penale.
Gjykata mbikëqyret nga një asamble e 123 vendeve që e kanë ratifikuar Statutin e Romës. Këto shtete anëtare përfshijnë gjithë Amerikën e Jugut, pothuajse gjithë Evropën, pjesën më të madhe të Oqeanisë dhe rreth gjysmën e Afrikës.
Tridhjetenjë vende e kanë nënshkruar, por nuk e kanë ratifikuar Statutin e Romës.
Katër prej këtyre shteteve nënshkruese – Shtetet e Bashkuara, Rusia, Izraeli dhe Sudani – i kanë njoftuar Kombet e Bashkuara se nuk synojnë më të bëhen palë pjesëmarrëse.
Dyzetenjë shtete anëtare të OKB-së nuk e kanë nënshkruar Statutin e Romës. Ato përfshijnë Kinën dhe Indinë, të cilat janë shumë kritike ndaj Gjykatës Ndërkombëtare Penale.
Si është strukturuar Gjykata Ndërkombëtare Penale?
Gjykata Ndërkombëtare Penale përbëhet nga katër degë – presidenca, sektori gjyqësor, prokurori dhe regjistri.
Tre gjyqtarë formojnë presidencën e gjykatës, e cila është përgjegjëse për administratën e saj.
Secili anëtar i presidencës zgjidhet nga gjyqtarët e gjykatës për një maksimum prej dy mandatesh – secili prej tyre zgjat tre vjet.
Sektori gjyqësor ka 18 gjyqtarë që ulen në tri dhomat e Gjykatës Ndërkombëtare Penale: një dhomë e procedurës paraprake, një gjykatë gjyqësore dhe një gjykatë apeli.
Prokuroria e Gjykatës Ndërkombëtare Penale heton rastet e referuara nga shtetet, nga Këshilli i Sigurimit i OKB-së, ose nga gjyqtarët në dhomën e procedurës paraprake.
Në rastet që arrijnë në gjykim, ajo gjithashtu zhvillon procedurat ligjore kundër të pandehurve.
Regjistri është përgjegjës për çështje jogjyqësore, siç janë: ndihma juridike, menaxhimi i gjykatave, dëshmitarët dhe viktimat, njësia e paraburgimit dhe shërbimet tradicionale të administratës.
Cila është historia e kundërshtimit të Uashingtonit ndaj Gjykatës Ndërkombëtare Penale?
Shtetet e Bashkuara kurrë nuk i janë bashkuar Gjykatës Ndërkombëtare Penale dhe vazhdimisht kanë kundërshtuar fuqizimin e një gjykate ndërkombëtare që do të mund të gjykojë udhëheqës ushtarakë dhe politikë amerikanë në bazë të ligjit ndërkombëtar.
Kjo, kryesisht për shkak të shqetësimeve se ushtarët amerikanë dhe udhëheqësit civilë mund të vihen në gjyq, pa mbrojtjen kushtetuese të SHBA-së, nga një prokuror anti-amerikan në një gjykatë me gjyqtarë joamerikanë.
Trupat amerikan në Afganistan
Në vend të kësaj, krimet e luftës dhe krimet kundër njerëzimit ndiqen penalisht në gjykatat e SHBA-së, sipas Aktit të Krimeve të Luftës të vitit 1996 – një ligj që vlen nëse viktima ose kryerësi i një krimi të dyshuar të luftës është shtetas i SHBA-së ose një anëtar i ushtrisë amerikane.
Administrata e presidentit amerikan, George W. Bush, në mënyrë aktive ka bërë përpjekje që të mos lejojë Gjykatën Ndërkombëtare Penale të ketë juridiksion mbi Shtetet e Bashkuara apo qytetarët e tyre.
Ajo e ka bërë këtë duke negociuar marrëveshje dypalëshe me rreth 100 vende të tjera, për të siguruar që qytetarët e SHBA-së do të kenë imunitet nga ndjekja penale nga Gjykata Ndërkombëtare.
Administrata e presidentit Barack Obama është angazhuar me gjykatën, duke marrë pjesë në organet qeverisëse të saj dhe duke ofruar mbështetje për persekutimet në vazhdim.
Përse mosmarrëveshjet SHBA-Gjykatë janë përshkallëzuar papritmas?
Kërcënimi i Boltonit për t’i sanksionuar gjykatësit dhe prokurorët e Gjykatës Ndërkombëtare Penale vjen pak ditë përpara një vendimi të pritur nga gjykata, nëse prokurorët e saj duhet të nisin hetime formale për krimet e mundshme të luftës në Afganistan, gjatë 15vjetëve të kaluar, e që potencialisht mund të përfshijnë edhe amerikanë.
Gjykata Ndërkombëtare Penale ka thënë në vitin 2016 se pjesëtarët e ushtrisë amerikane dhe të CIA-s mund të kenë kryer krime lufte duke i torturuar të burgosurit në Afganistan.
Në nëntor të vitit 2017, prokurorja e gjykatës, Fatou Bensouda, ka thënë se do të kërkojë autorizim nga gjyqtarët e gjykatës për hetime të situatës në Afganistan.
Pasi Afganistani është anëtar i Gjykatës Ndërkombëtare Penale, gjykata mund të kërkojë juridiksion mbi çdo krim lufte, gjenocid ose krim kundër njerëzimit të kryer në Afganistan, pas 1 majit, 2003.
Por, qeveria në Kabul nuk ka kërkuar një hetim të tillë, e as Këshilli i Sigurimit i OKB-së.
Kjo do të thotë se mënyra e vetme për realizimin e një hetimi formal është që prokurori i gjykatës të marrë autorizim nga dhoma e procedurës paraprake e gjykatës.
Bolton tha se administrata Trump e kundërshton idenë që Gjykata Ndërkombëtare Penale të ketë autoritet më të lartë se Kushtetuta e SHBA-së dhe sovraniteti i SHBA-së.
Bolton u zotua gjithashtu se Uashingtoni “nuk do të bashkëpunojë me Gjykatën Ndërkombëtare Penale”.
“Ne nuk do të ofrojmë asnjë ndihmë për Gjykatën Ndërkombëtare Penale. Do të lejojmë që gjykata të vdesë vetë. Në fund të fundit, për të gjitha synimet dhe qëllimet e saj, ajo tashmë është e vdekur për ne”, tha Bolton.
Pas komenteve të Boltonit, zëdhënësi i Gjykatës Ndërkombëtare Penale, Fadi El Abdallah, i tha Radios Evropa e Lirë ky institucion “si një gjykatë e ligjit, do të vazhdojë të kryejë punën pa u penguar, si institucion i pavarur dhe i paanshëm i mbështetur nga 123 shtete”.
Abdallah tha se këto 123 vende “besojnë se gjykata është e rëndësishme për të siguruar përgjegjësi për krimet që tronditin vetëdijen e njerëzimit”.
Çfarë është rezultati i pritur i një hetimi të Gjykatës Ndërkombëtare Penale?
Alex Whiting, profesor i Shkollës së Ligjit në Harvard, i cili ka punuar në zyrën e prokurorit të Gjykatës Ndërkombëtare Penale më 2010-13, thotë se kjo gjykatë ka “kompetenca jashtëzakonisht të kufizuara hetimore dhe është pothuajse tërësisht e varur nga bashkëpunimi” i shteteve anëtare për mbledhjen e informacioneve.
Në blogun e tij “Vetëm siguri”, Whiting thotë se hetuesit e Gjykatës Ndërkombëtare Penale “nuk do të kenë bashkëpunim nga Qeveria afgane, talibanët apo Shtetet e Bashkuara”.
Whiting gjithashtu vë në dukje se Akti Amerikan për Mbrojtjen e Shërbyesve i ndalon zyrtarët e SHBA-së të bashkëpunojnë vullnetarisht.
Ai thotë se nëse hetimi në Afganistan miratohet nga dhoma e procedurës paraprake, “pret që hetimi të zgjasë me vite”, ndërsa rezultatet të jenë “shumë të pasigurta”.
Whiting parasheh që mosmarrëveshja aktuale SHBA-Gjykatë të rezultojë me dobësimin e Gjykatës Ndërkombëtare Penale.
“Rreziku është që presioni amerikan për t’i dhënë fund gjykatës ose për të kufizuar aktivitetet e saj, mund të ketë pasoja të vërteta këtë herë, duke bërë që edhe miqtë e gjykatës të dëshirojnë të sakrifikojnë institucionin për t’u përqendruar në qëllime të tjera”, thotë Whiting.
Ai shton se kthimi i administratës Trump kundër trashëgimisë së mbështetjes së institucioneve për “arritjen e përgjegjësisë për krimet ndërkombëtare” ka gjasa të vazhdojë “për shumë vite të ardhshme”.
Një zëdhënës i Qeverisë së Republikës së Irlandës ka njoftuar për anulim të vizitës së planifikuar të presidentit amerikan, Donad Trump në këtë vend.
Trump pritej që të vizitonte klubin e tij të golfit në Doonbeg dhe Dublin në 10-11 nëntor.
Zyra e kryeministrit së Irlandës, Leo Varadkar ka konfirmuar anulimin e vizitës së muajit nëntor, duke thënë se “Shtetet e Bashkuara kanë përmendur si arsye planifikimet”.
Kjo do të shënonte vizitën e parë të Trumpit në këtë shtet, prej kur ai është bërë president më 2016.
Trump pritet të udhëtojë në Paris më 11 nëntor në ceremoninë e shënimit të 100-vjetorit të përfundimit të Luftës së Parë Botërore.
Disa politikanë dhe aktivistë në Irlandë patën thënë se do të mbanin protestë gjatë vizitës së Trumpit.
Lideri i Partisë Laburiste, Brendan Howlin, ka thënë se Trump nuk është “shok i demokracisë apo të drejtave të njeriut”.
Partia e Gjelbër po ashtu i ka bërë thirrje Qeverisë irlandeze për të anuluar vizitën.
Presidenti amerikan zotëron një klub të golfit në këtë shtet, të cilin e ka blerë në shkurt të vitit 2014.
Një libër i ri për Presidentin Donald Trump dhe administratën e tij, doli sot në shitje për publikun.
Libri me titull “Frikë: Trump në Shtëpinë e Bardhë”, tashmë në listën e më të shiturve, ka si autor gazetarin hulumtues Bob Woodward, i cili i hedh një vështrim tepër kritik presidencës kaotike 20-mujore të zotit Trump.
Woodward ka shkruar libra rreth shtatë administratave të mëparshme dhe ka fituar famë gati pesë dekada më parë si një nga gazetarët e Uashington Postit, raportimet e të cilëve për korrupsionin në Shtëpinë e Bardhë bënë që presidenti i atëhershëm Richard Nixon të jepte dorëheqjen.
Presidenti Trump e kritikoi librin përpara dales së tij në qarkullim, duke e quajtur një “shaka”. Presidenti tha se libri përbën një tjetër sulm të zakonshëm kundër tij, në morinë e sulmeve të tjera.
Libri tashmë është tashmë numri 1 në listën më të shiturve në Amazon, por zoti Trump thotë se Woodward ka përdorur “burime anonime, të provuara si të pavërteta.” Shumë njerëz, shkruan ai, tashmë kanë deklaruar se citimet e tyre, ashtu si edhe vetë libri, janë të sajuara.
Beteja e hidhur partiake për emërimin e gjykatësit Brett Kavanaugh në Gjykatën Supreme të Shteteve të Bashkuara ka kthyer vëmendjen te njëri prej vendimeve më të rëndësishme që duhet të marrin presidentët amerikanë.
Gjykatësit e Supremes emërohen me mandat të përjetshëm, çfarë do të thotë shumë më gjatë se maksimumi i dy mandateve katërvjeçare që kanë presidentët amerikanë.
Kandidati aktual, 53-vjeçari Kavanaugh, mund të zhvendosë balancën në anën e konservatorëve dhe në këtë mënyrë të krijojë ligjet më të rëndësishme shtetërore për dekadat që vijnë.
Mundësia e presidentit
Kushtetuta amerikane ndan pushtetin për emërimin e gjykatësve të rinj të Gjykatës Supreme midis presidentit dhe dhomës së lartë të Kongresit amerikan – Senatit. Presidenti e emëron një individ dhe Senati tradicionalisht mban seanca publike dëgjimore përpara se të vendosë për kandidatin.
Historikisht, presidentët kanë pasur tendencë të emërojnë një ose dy gjyqtarë gjatë mandateve të tyre, për shkak të daljes në pension ose të vdekjes së gjyqtarëve aktualë.
Emërimi i Kavanaugh është i dyti i Donald Trumpit prejse është bërë president në janar të vitit 2017. I emëruari i tij i parë për Gjykatën Supreme, konservatori Neil Gorsuch, është konfirmuar në prill të vitit të kaluar.
Presidenti amerikan, Donald Trump, dhe gjykatësi Brett Kavanaugh.
“Zgjedhja e gjykatësit të Gjykatës së Lartë është një nga ngjarjet më të rëndësishme dhe më me ndikim në gjithë politikën amerikane”, thotë për Radion Evropa e Lirë Paul M. Collins Jr, profesor dhe drejtor i Studimeve Ligjore në Universitetin e Masaçusets.
“Publiku sigurisht se i kushton vëmendje procesit”, thotë ai, duke vënë në dukje se procesi i përzgjedhjes është “i dizajnuar të jetë politik” dhe se shpesh shndërrohet në çështje partiake.
“Shumë vende i zgjedhin gjykatësit përmes proceseve të bazuara në merita. Procesi në Amerikë është pak i pazakontë”, thotë Collins, bashkautor i librit “Dëgjimet për konfirmimin e gjyqtarëve të Gjykatës Supreme dhe ndryshimet kushtetuese“.
Njëqindetrembëdhjetë burra dhe gra kanë shërbyer në Gjykatën Supreme që nga ngritja e saj në Kushtetutën e Shteteve të Bashkuara më 1789. Ata kanë shërbyer mesatarisht 16 vjet.
Fuqia e Gjykatës
Gjykata Supreme luan rol kyç në interpretimin e Kushtetutës amerikane nga gjyqësori dhe mund të ketë fjalën e fundit edhe në interpretimin e ligjeve të tjera.
Nga ajo kërkohet vazhdimisht të vendosë për çështje me ngarkesë emocionale, si të drejtat e abortit, kontrolli i armëve, të drejtat e homoseksualëve e madje edhe për sfidat e emërimeve në Kongres dhe Presidencë.
Individualisht, çdo ndikim real i një gjykatësi të Gjykatës Supreme në gjykatat më të ulëta dhe në shoqërinë amerikane matet nga të dhënat e tij në gjyqësi –përmes votës në çështje të rëndësishme që mund të radhiten nga diskriminimi te kujdesi shëndetësor dhe liria e fjalës.
Gjykatësit e Supremes po ashtu ndikojnë në proceset ligjore dhe qeveritare, duke shkruar opinione ligjore në lidhje me vendimet – në pajtim ose mospajtim – që mund të formojnë debatin e ardhshëm mbi mosmarrëveshje të rëndësishme kushtetuese, si dhe të ndikojnë opinionin publik përmes deklaratave të bëra jashtë detyrimeve strikte në Gjykatën Supreme.
Precedenti dhe fuqia
Një nga mjetet më të fuqishme të Gjykatës Supreme është ai që e ka themeluar vetë gjykata: shqyrtimi gjyqësor. Kjo është fuqia për t’i deklaruar ligjet nga Dega Legjislative (Kongresi) jokushtetuese.
Gjykata Supreme në përgjithësi vendos për të dëgjuar një rast pasi së paku katër gjykatës të saj pajtohen se duhet një gjë e tillë, ose kur mosmarrëveshja përfshin dy shtete të ndryshme amerikane. Ajo kryesisht shqyrton raste të gjykatave më të ulëta, duke i konfirmuar vendimet e tyre ose duke i përmbysur.
Disa nga vendimet e profilit të lartë të Gjykatës Supreme gjatë shekullit të kaluar përfshijnë:
1. Brown kundër Bordit të Arsimit, më 1954, që vuri mënjanë doktrinën e mëparshme “të ndarë por të barabartë”, për të vendosur se ndarja e studentëve me ngjyrë dhe atyre të bardhë në shkollat publike (ose, për më tepër, në institucione të tjera) është jokushtetuese.
2. Me vendimin Miranda të vitit 1966, Gjykata deklaroi se të dyshuarit në raste kriminale duhet të këshillohen për të drejtat e tyre ligjore përpara se të merren në pyetje nga policia, duke iu garantuar të drejtën për mbrojtës ligjor.
3. Në rastin Roe kundër Wade më 1973, Gjykata Supreme vendosi me 7 vota për dhe 2 kundër se me Amendamentin 14, grave iu garantohet e drejta për abort në dy tremujorët e parë të shtatzënisë, në përputhje me interesin e shtetit për rregullimin e abortit.
4. Në rastin Obergefell kundër Hodges, më 2015, Gjykata Supreme vendosi se parandalimi i martesës së çifteve me gjini të njëjtë përbën diskriminim dhe për këtë arsye ai është ndaluar me klauzolën e mbrojtjes së barabartë të amendamentit të 14-të.
Atmosfera e nxehur
Demokratët, aktualisht parti pakicë në të dyja dhomat e Kongresit, po luftojnë në Senat për të bllokuar konfirmimin e Kavanaugh.
Komiteti Gjyqësor i Senatit po mban seanca dëgjimore, në të cilat senatorët kanë pyetur Kavanaugh drejtpërdrejt rreth qasjes së tij ndaj precedentit dhe aspekteve specifike të ligjit dhe kushtetutës dhe do të pyesin dëshmitarë të tjerë të ftuar.
Zemërimi shpërtheu menjëherë pas nisjes së seancës dëgjimore më 4 shtator, pasi senatorët demokratë i sfiduan procedurat, sepse dhjetëra-mijëra faqe dokumente të lidhura me shërbimin e Kavanaugh në një administratë të mëparshme republikane u dorëzuan vetëm në prag të seancës.
Protestë gjatë një seance dëgjimore për Kavanaugh.
“Demokratët e kuptojnë se shumëçka është në rrezik nëse konfirmohet Kavanaugh, andaj i bëjnë të gjitha përpjekjet për të bllokuar konfirmimin”, thotë Collins.
Paneli i kontrolluar nga republikanët do të rekomandojë, refuzojë ose nuk do të japë asnjë rekomandim për Senatin, i cili pastaj do të votojë për emërimin e tij.
Republikanët kanë aktualisht 51 vota kundrejt demokratëve me 49, kështu që mund të sigurojnë votimin me “po”.
Demokratët duket se i kanë mbështetur shpresat në të bindurit e së paku dy senatorëve republikanë për të braktisur partinë e tyre dhe për të kundërshtuar emërimin e Kavanaugh.
Me këtë strategji, demokratët nuk mund të përjetojnë dezertime nga partia e tyre.
Megjithatë, demokratët nga “shtetet e kuqe”, që i kanë fituar ulëset në shtete që anojnë kryesisht kah republikanët, mund të jenë nën presion për të miratuar Kavanaugh, në mënyrë që të mund të rizgjidhen në zgjedhjet për Kongres, që do të mbahen në nëntor.
“Demokratët e kuptojnë se do të jetë e vështirë të bllokojë konfirmimin e gjyqtarit Kavanaugh, megjithëse unë besoj se ata shpresojnë se mund t’i bindin dy ose më shumë senatorë republikanë për të votuar kundër konfirmimit të tij”, thotë Collins.
Kthim kah e djathta?
Nëse konservatori Kavanaugh konfirmohet për të zëvendësuar gjykatësin në largim, Anthony Kennedy (një konservator i përbetuar, por që herë pas here ka nxjerrë vendime duke u anuar me pakicën, sidomos për të drejtat individuale), studiuesit sugjerojnë se margjina 5 me 4 në favor të konservatorëve, do të paraqesë kthim kah e djathta.
Ky votim është aq i rëndësishëm për demokratët saqë disa prej tyre kanë rrezikuar dëbimin nga Senati duke bërë publike dokumente dhe emaile konfidenciale, lidhur me të kaluarën e Kavanaugh, për të cilat thonë se nxjerrin në pah disa deklarata mashtruese të bëra nga i emëruari në të kaluarën.
Demokratët kanë thënë se Trump ka zgjedhur Kavanaugh bazuar kryesisht në disa shkrime dhe komente të kaluara që sugjerojnë se ai mund të anohet kah Dega Ekzekutive (presidenti) në llogaridhënie të mundshme para Degës Legjislative ose zyrtarëve të tjerë amerikanë.
Këto akuza duket se pasqyrojnë në veçanti perceptimet në lidhje me hetimet e vazhdueshme nga këshilltari i posaçëm, Robert Mueller, për kontakte të mundshme midis Trumpit ose fushatës së tij me zyrtarët rusë dhe për ndërhyrjen e dyshuar të Moskës në zgjedhjet presidenciale në SHBA më 2016.
Këshilltari i posaçëm, Robert Mueller, dhe presidenti Donald Trump.
Kavanaugh deri më tash nuk ka pranuar t’iu përgjigjet pyetjeve për të cilat thotë se janë hipotetike në natyrë.
Ai ka shprehur dëshirë për të mos komentuar mbi “ngjarjet aktuale”.
Gjatë fushatës së tij presidenciale, Trump ka thënë se do të zgjedhë gjyqtarë që kundërshtojnë abortin.
Demokratët dhe grupet e grave kanë shprehur shqetësime rreth pikëpamjeve të Kavanaugh mbi të drejtat e abortit dhe vendimin Roe kundër Wade.
Në një email të vitit 2003, Kavanaugh ka thënë se jo të gjithë studiuesit ligjorë i referohen rastit si “ligj i rregulluar”, një qëndrim që, sipas demokratëve, lë të kuptohet se ai do të votojë për të përmbysur vendimin dhe, në këtë mënyrë, për t’iu hapur derë të re kufizimeve të të drejtave të grave.
Politika të hidhura
Shumë demokratë mbeten të zemëruar me refuzimin e republikanëve për të mbajtur seanca dëgjimore për të emëruarin e presidentit Barack Obama në vitin e fundit të administratës së tij, pas vdekjes së gjykatësit Antonin Scalia në fillim të vitit 2016.
Republikanët në atë kohë nuk kanë pranuar të shqyrtojnë emërimin e Merrick Garland, duke këmbëngulur se vendi bosh duhet të mbushet nga presidenti i ardhshëm, pas zgjedhjeve të nëntorit 2016.
Disa demokratë ende i referohen zëvendësimit të Scalias me gjykatësin Neil Gorsuch si karrige “e vjedhur”.
Paul Krugman, majtist, fitues i Nobelit dhe kolumnist për gazetën New York Times, ka thënë se “Kavanaugh do ta vrasë Kushtetutën”, duke numëruar si arsye procesin e emërimit, vendimet e mëparshme të gjykatësit dhe refuzimin e republikanëve për të publikuar dokumente që lidhen me të kaluarën e tij.
Në anën tjetër, Adriana Cohen, një kolumniste konservatore për Boston Herald, ka akuzuar kritikët e Trumpit për krijimin e “kërdisë” në seancat për Kavanaugh.
Liderët republikanë kanë thënë se shpresojnë për një votim mbi konfirmimin e Kavanaugh deri në fund të shtatorit.
Kavanaugh ka diplomuar në Shkollën Juridike të Yale.
Si avokat, ai ka punuar për Këshillin e Pavarur Kenneth Starr në hetimin që ka çuar në thirrjen e votëbesimit për presidentin demokrat, Bill Clinton, në vitin 1998. (Clinton është shpallur i pafajshëm nga Senati dhe ka mbetur në detyrë).
Kavanaugh ka shërbyer në administratën e presidentit republikan, George H.W. Bush, dhe që nga viti 2006 ka shërbyer si gjyqtar në Gjykatën e Apelit në Uashington.
Këshilltari i Shtëpisë së Bardhë për Siguri Kombëtare, John Bolton.
Shtetet e Bashkuara pritet të kenë qasje të ashpër kundër Gjykatës Ndërkombëtare Penale në Hagë, duke kërcënuar me sanksione kundër gjyqtarëve të së njëjtës, nëse vazhdojnë hetimet për krimet e supozuara të luftës të kryera nga amerikanët në Afganistan.
Këshilltari i Shtëpisë së Bardhë për Siguri Kombëtare, John Bolton pritet të bëjë këtë njoftim përmes një fjalimi në grupin konservator, Shoqëria Federaliste në Uashington.
Kjo ngjarje njëherësh do të shënojë adresimin e tij të madh prej kur i është bashkuar Shtëpisë së Bardhë.
“Shtetet e Bashkuara do të përdorin gjithçka që është e nevojshme për të mbrojtur qytetarët tanë dhe ata të aleatëve tanë nga një ndjekje e padrejtë në këtë gjykatë jolegjitime”, pritet të thotë Bolton, bazuar në disa pjesë të fjalimit të siguruara nga agjencia e lajmeve, Reuters.
Bolton po ashtu pritet të deklarojë se Departamenti amerikan i Shtetit do të njoftojë për mbylljen e Organizatës Çlirimtare të Palestinës (PLO) në Uashington, pas shqetësimeve se palestinezët po tentojnë të nisin hetim për Izraelin në këtë Gjykatë.
“Shtetet e Bashkuara do të qëndrojnë me shtetin tonë mik, Izraelin”, pritet të deklarojë Bolton.
Në rast të nisjes së hetimit për amerikanët në Afganistan, në fjalim thuhet se administrata e presidentit Trump do të konsiderojë një vendim përmes së cilit iu ndalon gjyqtarëve dhe prokurorëve të këtij trupi që të hyjnë në Shtetet e Bashkuara, si dhe të bllokojë fondet e tyre nëse janë pjesë e sistemit financiar amerikan.
Shtetet e Bashkuara nuk kanë ratifikuar Traktatin e Romës, përmes së cilit është themeluar Gjykata Ndërkombëtare Penale më 2002, pasi presidenti i atëhershëm amerikan, George W. Bush nuk është pajtuar me një gjë të tillë.
UASHINGTON – Administrata e presidentit të SHBA-ve Donald Trump ka njoftuar se do të shpallë sot vendimin për mbylljen e zyrës së Organizatës për Çlirimin e Palestinës në Washington.
Duke u thirrur në deklaratën e një zyrtari të paemëruar të Shtëpisë së Bardhë, gazeta “Amerikan Wall Street Journal” njoftoi se vendimin për mbylljen e zyrës së Organizatës për Çlirimin e Palestinës në Washington do ta shpallë këshilltari i Trumpit për siguri kombëtare John Bolton.
I njëjti burim ka publikuar edhe draftin e tekstit që Bolton do të lexojë, ku thuhet se SHBA-të gjithmonë do të qëndrojnë me aleatin dhe mikun e saj Izraelin.
“Administrata e Trumpit nuk do ta mbajë atë zyrë të hapur përderisa palestinezët refuzojnë të hyjnë në bisedime të drejtpërdrejta dhe konstruktive me Izraelin”, shkruan gazeta amerikane.
Në të njëjtën kohë, i njëjti burim njofton se këshilltari i Trumpit, Bolton do të kërcënojë Gjykatën Ndërkombëtare Penale me sanksione në rast se fillon hetime kundër SHBA-ve dhe Izraelit.
Rreth kësaj çështje deri më tani nuk janë prononcuar as Shtëpia e Bardhë e as Departamenti i Shtetit.
Më parë, Trump pezulloi të gjitha ndihmat për Agjencinë e OKB-së për Refugjatët Palestinezë (UNRWA), duke theksuar se SHBA nuk do të ndihmojë palestinezët për aq kohë sa ata nuk vazhdojnë bisedimet e drejtpërdrejta me Izraelin të ndërmjetësuara nga Washingtoni.
Administrata e Trumpit në disa raste ka thënë se është duke punuar për “marrëveshjen e shekullit”, e cila duhet të zgjidhë krizën në Lindjen e Mesme ndërsa presidenti palestinez ka refuzuar të flasë me zyrtarët amerikanë dhe e quajti planin “shuplaka e shekullit”. aa
Senatori amerikan, Ron Johnson, tha në një intervistë për Zërin e Amerikës se zgjidhja e problemeve ndërmjet Kosovës dhe Serbisë duhet të gjendet nga të dyja palët.
Senatori Johnson i cili qëndroi të dielën në Prishtinë, do të shkojë të hënën në Beograd, për të transmetuar siç tha, mbështetjen e Shteteve të Bashkuara për gjetjen e një zgjidhjeje, që “nuk është aspak e lehtë”.
“Pasi të kenë arritur çfarëdo marrëveshje, ne do ta shohim atë për të parë nëse kemi ndonjë shqetësim dhe do të përçojmë ato shqetësime, por tani duam t’u japim Kosovës dhe Serbinë hapësirë nën ombrellën e Bashkimit Evropian, në bisedimet e drejtuara në Bruksel që të gjejnë zgjidhjen. E ritheksoj, nuk do të jetë e lehtë, por besoj se ka dëshirë të sinqertë për të gjetur një zgjidhje”, i tha ai Zërit të Amerikës.
Kosova dhe Serbia ndodhe në një periudhë diskutimesh për të ardhmen e marrëdhënieve ndërmjet tyre nën dritën e ideve për ndarje, shkëmbim territoresh apo ‘korrigjime kufijsh”.
Debatet kanë nxitur reagime në të dyja vendet por edhe ndarje në skenën ndërkombëtare ndërmjet atyre që do të pranonin një zgjidhje të tillë, nëse palët pajtohen dhe atyre që kundërshtojnë idetë e tilla për shkak të drojës nga pasojat në rajonin e Ballkanit Perëndimor.
Senatori Johnson i quan të ligjshme shqetësimet e tilla.
Në intervistën që transmetohet të hënën në emisionin e Zërit të Amerikës, Ditari në orën 18:00, senatori Johnson flet edhe për ndikimin rus në Ballkan e referendumin për emrin e ri të Maqedonisë.
Nënpresidenti amerikan, Mike Pence bëri thirrje të dielën që zyrtari i lartë anonim që po bën qëndresë brenda administratës së Presidentit Trump që “veprojë me dinjitet dhe të jape dorëheqjen”.
Zoti Pence tha në emisionin told Fox News se zyrtari që shkroi artikullin në faqen e opinioneve të gazetës New York Times javën e kaluar ku e quante zotin Trump amoral, po “shkelte betimin jo ndaj presidentit, por ndaj Kushtetutës”, në përpjekjet për të minuar presidencën e zotit Trump.
Nënpresidenti përsëriti se nuk ishte ai që kishte shkruar artikullin, megjithëse aty përfshihej një fjalë të pazakontë, “lodestar” që përkthehet “yll polar”, por me kuptimin e dikujt që shërben si frymëzim, që zoti Pence vetë e ka përdrour në shumë fjalime. Nënpresidenti tha se do të ishte menjëherë i gatshëm t’i nënshtrohej provës të së vërtetës me poligraf, por tha se i takonte zotit Trump të vendoste nëse zyrtarë të tjerë të Shtëpisë së Bardhë, duhet të bënin të njëjtën gjë në përpjekje për të identifikuar personin që e kishte shkruar artikullin.
Zoti Pence tha se ai nuk e dinte se cili ishte autori. Zyrtari ose zyrtarja shkruante se ishte pjesë e një qëndrese të brendshme “që po punon me përkushtim nga brenda për të frenuar pjesë të programit të presidentit dhe instinktet e tij më të dëmshme”.
“Rrënja e problemit është amorilateti e presidentit”, shprehej zyrtari ose zyrtarja, duke denoncuar stilin “impulsiv, konfliktual, meskin dhe joefektiv” udhëheqës të Presidentit Trump.
Zoti Trump e ka denoncuar ashpër autorin, duke thënë në një tubim politik në Montana se “askush nuk e di se kush dreqin është ai apo ajo. Operativë të paidentifikuar që sfidojnë votuesit për të avancuar axhendat e tyre sekrete, janë me të vërtetë kërcënim për demokracinë”.
Artikulli doli një ditë pasi u botuan detajet e para të librit të ri të gazetarit të njohur, Bob Woodward “Frikë: Trump në Shtëpinë e Bardhë”, ku përshkruhet një funksionim kaotik i Shtëpisë së Bardhë të Presidentit Trump, ku vetë zyrtarë kryesorë të administratës së tij, e sulmojnë si injorant në një nivel të rrezikshëm përsa u takon marrëdhënieve ndërkombëtare.
Në libër, Woodward shkruan se stafi i presidentit ka hequr dokumente të rëndësishme nga tavolina e tij që ai të mos i nënshkruante. Libri citon shefin e stafit të Shtëpisë së Bardhë John Kelly që e përshkruan presidentin si të çbalancuar mendërisht. Zoti Kelly citohet gjithashtu të ketë thënë gjatë një takimi se “për shkak se presidenti është ‘idiot’, është “e pakuptimtë të përpiqet ta bindë atë për ndonjë gjë, se ai ka dalë nga shinat dhe se jetojmë në një qytet të çmendurish”.
Presidenti Trump dhe zyrtarë të tjerë të Shtëpisë së Bardhë e kanë quajtur librin e zotit Woodward si sajesë. Por autori tha të dielën në një intervistë në CBS se pretendimi i presidentit se ai nuk flet ashtu siç e ka cituar ai në libër është “i gabuar”, duke thënë se informacioni që ai ka përfshirë është “i saktë dhe i kujdesshëm”, i bazuar nga qindra orë intervista me këshilltarë aktualë dhe të kaluar.
UASHINGTON – George Papadopoulos, ish këshilltari zgjedhor i presidentit të SHBA-ve Donald Trump, i cili është fajtor se ka gënjyer Byronë Federale të Hetimeve (FBI) në kuadër të hetimeve për Rusinë, u dënua me 14 ditë burg.
Papadopulos, i cili pranoi se ka gënjyer FBI-në për kontaktet e tij me zyrtarët rusë në tetor të vitit të kaluar, në një proces gjyqësor të zhvilluar në Washington krahas dënimit me burg është dënuar edhe me 200 orë shërbim në komunitet dhe 9.500 dollarë gjobë.
Në këtë mënyrë Papadapoulos është zyrtari i parë i fushatës zgjedhore të Trumpit i cili dënohet në hetimet për Rusinë të kryera nga prokurori me autoritet special Robert Mueller.
Gjatë seancës gjyqësore duke bërë të ditur se ka bërë një gabim të tmerrshëm, Papadopoulos tha se “Nuk kanë qenë e drejtë dhe mund të kem penguar hetimin”.
Në hetimin i cili vazhdon nën përgjegjësinë e prokurorit special Mueller dhe i cili ka nisur me pretendimin se Rusia ka ndërhyrë në zgjedhjet presidenciale amerikane përmes një sulmi kibernetik, kanë qenë në fokus disa nga njerëzit e përfshirë veçanërisht në fushatën zgjedhore të presidentit amerikan Trump.
Deri më tani, nga prokurori Mueller janë akuzuar ish-këshilltari i Sigurisë Kombëtare të Shtëpisë së Bardhë, Michael Flynn, ish-menaxheri i fushatës së Trumpit, Paul Manafort dhe ndihmësi i tij Rick Gates si dhe një nga këshilltarët e politikës së jashtme të fushatës së Trumpit, George Papadopoulos. aa
Ish-Presidenti Barak Obama, i cili ka qëndruar larg syrit të publikut prej momentit që u largua nga Shtëpia e Bardhë, hyri të premten në betejën e zgjedhjeve të mesmandatit për Kongresin me një shprehje të thjeshtë: “Duhet të votoni sepse demokracia jonë varet nga vota juaj”.
“Mjaft të shohësh lajmet kryesore të ditëve të fundit për të kuptuar se ky është një moment vërtet i ndryshëm. Shumë gjëra janë në lojë. Pasojat për secilin prej nesh që qëndron mënjanë janë më të rënda”, u tha zoti Obama studentëve të Universitetit Champaign-Urbana të Ilinoi-it, ku u nderua me një çmim lidhur me etikën në qeverisje.
Duke iu përmbajtur traditës, zoti Obama ka qenë ngurrues për të bërë komente publike ndaj pasuesit të tij presidentit Donald Trump, pavarësisht faktit që ky i fundit ka qenë një kritik i vazhdueshëm i tij.
Ish-presidenti tha se situata aktuale politike në Uashington nuk nisi me Donald Trumpin, ai është vetëm një simptomë dhe jo shkaku. Ai thjesht po shfrytëzon pakënaqësitë që politikanët përhapin prej kohësh. Frikën dhe zemërimin që i ka rrënjët tek e shkuara, por që është produkt i ndryshimeve të mëdha që kanë ndodhur gjatë jetëve tona të shkurtra.
Zoti Obama u bëri thirrje studentëve të marrin pjesë në votimet e nëntorit duke theksuar se vetëm një në pesë të rinj me të drejtë vote votuan në zgjedhjet e vitit 2016.
“Ky projekt i vetëqeverisjes do të funksionojë vetëm nëse gjithësecili bën atë që i takon. Mos më thoni se vota juaj nuk ka rëndësi”, tha ish-presidenti.
Dalja e zotit Obama përpara studentëve në kampusin e Ilinoit qendor, është e para nga disa takime të fushatës zgjedhore në javët në vazhdim ku ai do të t’u kërkojë votuesve demokratë të marrin pjesë në zgjedhjet e nëntorit me qëllim që të marrin kontrollin e Kongresit nga Partia Republikane e Donald Trump-it.
Ekonomia amerikane ka krijuar më shumë vende të punës se që ka planifikuar fillimisht për muajin gusht.
Punësimet në sektorin e ndërtimtarisë dhe shërbimeve profesionale i kanë ndihmuar ekonomisë në rritjen e 201,000 vendeve të punës muajin e kaluar.
Në po të njëjtën kohë, fitimet mesatare për një orë punë janë rritur për 0.4 përqind muajin e kaluar, duke shënuar rritje në vlerën vjetore në 2.9 përqind, njëherësh më të madhen nga viti 2009.
Kjo rritje e pagave mund të rezultojë me një tjetër rritje të normave amerikane të interesit më vonë gjatë këtij muaji.
Përfaqësuesit e Rezervave Federale të Shteteve të Bashkuara, të cilët kanë rritur normat dy herë këtë vit, pritet të takohen më 25-26 shtator.
Shifra e punësimeve për muajin gusht ka qenë më e lartë në krahasim me 147 000 vendet e punës që janë krijuar në muajin korrik.
Ndërkohë niveli i papunësisë nuk ka ndryshuar, duke qëndruar në 3.9 përqind.
Twiter ka ndaluar përgjithmonë postimet e personalitetit mediatik të krahut të djathtë ekstrem Alex Jones për thyerje të politikave të medias sociale, lidhur me sjelljet abuzive.
Më parë kompania e kishte pezulluar llogarinë e zotit Jones, por tashmë ndalimi i tij është perfundimtar. Alex Jones që njihet si mbështetës i teorive konspirative, ka të rreth 900 mijë ndjekës në twitter. Faqja e tij në internet e quajtur InforWars ka gjithashtu me mijëra ndjekës.
Twiter e akuzon zotin Jones për shkelje të politikave të kompanisë, pasi është parë në televizor duke kritikuar ashpër dhe fyer një gazetar të rrjetit televiziv CNN që priste të hynte në një seancë dëgjimore të Kongresit lidhur me politikat e mediave sociale.
Një amerikan në katër ka fshirë aplikacionin e “Facebook” nga smartfonët e tyre.
54 % kanë deklaruar se kanë modifikuar vendosjet mbi privacinë 12 muaj para sondazhit dhe 42% deklarojnë se po bëjnë pak pushim për disa javë.
Ky është rezultati i kërkimit nga Pew Research Center, që ka intervistuar 4.594 amerikanë të maturuar nga 29 maji në 11 qershor, pas çështjes së ‘Cambridge Analytica’.
Skandali, i cili doli në mes të marsit, ka nxjerrë në dritë abuzimin nga një shoqëri këshillimi, me emër ‘Cambridge Analytica’, e cila mendohet se ka marrë të dhëna nga djetra milionë përdorues të Facebook-ut pa lejen e tyre.
Lajmi për sigurinë e brishtë bëri që sipërmarrja e Zuckerberg të humbiste miliarda dollarë në bursë dhe shkaktoi humbje të besimit nga ana e përdoruesve për rrjetin social.
Sipas sondazhit të realizuar nga Pew, 74% e amerikanëve kanë bërë të paktën një nga këto aktivitete që muaj para se të intervistoheshin: modifikuan vendosjet për privacinë, është shkëputur fare nga rrjeti social për disa javë, ose kanë eleminuar fare aplikacionin nga smartfoni.
Dy analistë amerikanë janë shprehur kundër idesë së shkëmbimit të territoreve si zgjidhja e duhur për normalizimin e marrëdhënieve mes Kosoves dhe Serbisë. Ata theksojnë se kjo mund të nxisë konflikte të reja dhe mund të destabilizojë rajonin.
Presidenti i Kosovës Hashim Thaçi dhe ai i Serbisë Aleksandër Vuçiç takohen të premten në Bruksel në kuadër të dialogut për normalizimin e marrëdhënieve mes dy vendeve. Ideja për korrigjimin e kufijve ose shkëmbimin e territoreve i ka dhënë një rëndësi të veçantë këtij takimi që do të ndërmjetësohet nga Shefja e BE-së për politikën e jashtme, Frederica Mogherini.
David Philips, Drejtor i Institutit të Paqes në Universitetin e Kolumbias në Nju Jork, i tha Zërit të Amerikës se ideja e shkëmbit të kufijve është e rrezikshme.
“Ndryshimi i kufijve do të ishte i rrezikshëm dhe destabilizues. Në dialogun Kosovë-Serbi të lehtësuar nga Bashkimi Evropian Presidetentët Thaçi dhe Vuçiç ndodhen në një udhëkryq. Ata mund të zgjedhin ndarjen ose një zgjidhje të negociuar që do t’i jepte më shumë të drejta sërbëve të Kosovës në përputhje me marrëveshjet e arritura. Kjo pastaj do të duhet të çonte në njohjen e Kosovës si shtet të pavarur dhe sovran nga Serbia. Kjo është një rrugë më e matur dhe më realiste se sa një zgjedhje e pamatur për ndarje”.
Edhe analisti i çështjeve të Ballkanit, Daniel Serwer është kundër idesë së shkëmbimit të territoreve për motive etnike.
“Nuk ka asnjë problem ligjor që Kosova dhe Serbia ta bëjnë këtë, nëse e njohin njëra-tjetrën dhe vendosin marrëdhënie diplomatike. Unë jam kundër shkëmbimit nëse motivi nuk është shkëmbimi i territorit, por shkëmbimi i popullatave në një përpjekje për të homogjenizuar vendet e tyre. Kjo është në kundërshtim me parimet demokratike liberale dhe është një drejtim i gabuar për Serbinë dhe Kosovën”.
Sipas zotit Philips, për të shmangur një rikthim në konfliktet e viteve 1990 në ish-Jugosllavi, është në interesin e Serbisë që të përqëndrohet më shumë në përmirësin e gjendjes së sërbëve në Kosovë sesa në idenë e ndarjes së saj.
“Rruga më e mirë për sigurimin e interesave të saj kombëtare (për Serbinë) është promovimi i interesat e sërbëve të Kosovës që mund të arrihet në Kosovë me të një qeverisje më të mirë dhe respektim të të drejtave të pakicave në bazë të parimeve të Planit të Ahtisarit dhe kushtetutës së Kosovës. Ndryshimi i kufijve nuk e stabilizon situatën, por do ta bënte atë më të pasigurtë”.
Zoti Serwer është dakord me analistin David Philips se aleternativa më e mirë është arritja e një marrëveshjeje që nuk prek kufijtë e tanishëm dhe përqëndrohet në përmirësimin e të drejtave të pakicave.
“Shkëmbimi i territoreve nuk pasqyron shqetësim për trajtimin e serbëve dhe pakicave të tjera në Kosovë. Unë mendoj se ky duhet të jetë shqetësimi kryesor për kosovarët sot sepse aftësia e tyre për t’u integruar në Bashkimin Evropian dhe në NATO varet nga mënyra se si ata do t’i trajtojnë sërbët dhe pakicat e tjera. Shkëmbimi i territorove do të provokonte akte të dhunshme ndaj shqiptarëve që jetojnë në disa fshatra në veri të Kosovës dhe ndaj serbëve në jug të lumit Ibër.”
Analistët thonë se përmirësimi i të drejtave të pakicave dhe gjetja e një zgjidhjeje pa prekur kufijtë ekzistues do të përshpejtonte përpjekjet e Kosovës dhe Serbisë për anëtarësim në Bashkimin Evropian.
Presidenti amerikan, Donald Trump dhe nënpresidenti i SHBA-së, Mike Pence
Nënpresidenti amerikan, Mike Pence ka hedhur poshtë spekulimet se ai është autor i shkrimeve që sulmojnë presidentin e Shteteve të Bashkuara, Donald Trump.
Në një artikull në The New York Times, që është thënë të jetë shkruar nga një zyrtar i Shtëpisë së Bardhë, thuhet se të zgjedhurit Trumpit janë duke tentuar të pengojnë agjendën e presidentit amerikan.
Një zëdhënës i nënpresidentit ka kundërshtuar se Pence është mbrapa shkrimit.
Trump në anën tjetër e ka cilësuar autorin e tekstit të “mjerë” dhe gazetën të “rreme”.
“New York Times duhet të ketë turp ashtu sikurse personi që ka shkruar këtë shkrim të rremë, të palogjikshëm dhe të mjerë. Zyra jonë qëndron përtej atyre akteve amatore”, është shprehur drejtori për Komunikime në Zyrën e Pence, Jarrod Agen.
The Vice President puts his name on his Op-Eds. The @nytimes should be ashamed and so should the person who wrote the false, illogical, and gutless op-ed. Our office is above such amateur acts.
Zërat që mendojnë se Pence është autor i shkrimit bazohen në një pjesë të tekstit ku përdoret termi “udhëheqës”, në aspektin e personit që drejton liderët dhe të cilin nënpresidenti e ka përdorur më parë.
Në një pjesë të artikullit të publikuar të mërkurën, autori i refereoht senatorit të ndjerë republikan, John McCain si “udhëheqës që ka rikthyer nderin në jetën publike dhe dialogun kombëtar”.
Presidenti Donald Trump e quajti ‘pa shtyllë kurrizore’ autorin anonim të një shkrimi të botuar nga gazeta Nju Jork Tajms në rubrikën e opinioneve, i cili duke pretenduar se është zyrtar i lartë i administratës, flet për një rezistencë brenda Shtëpisë së Bardhë kundër kreut të administratës.
Autori i shkrimit, i cili thotë se punon për Presidentin Trump, thekson se shumë zyrtarë të lartë të administratës po veprojnë me seriozitet nga brenda për të sabotuar pjesë të axhendës së tij dhe prirjet më të këqia personale të tij.
Pak orë pas publikimit të shkrimit, Presidenti Trump reagoi në Twitter: “A ekziston vërtet ‘zyrtari i lartë i administratës’, apo është gazeta e dështuar Nju Jork Tajms që del me një burim të rremë? Nëse ky person anonim pa shtyllë kurrizore vërtet ekziston, gazeta Nju Jork Tajms, për qëllime të sigurisë kombëtare, duhet t’ia dorëzojë atë menjëherë qeverisë”, shkruante ai. Në një tjetër koment në Twitter, presidenti pyeste me gërma të mëdha: “TRADHTI?”
Autori anonim i opinionit në Nju Jork Tajms e quan presidentin ‘amoral’ dhe shkruan se “përveç marketimit masiv të idesë se shtypi është ‘armiku i popullit’, impulset e Presidentit Trump janë përgjithësisht anti-tregtisë dhe anti-demokratike.”
“Mos më keqkuptoni, – shkruan ai. – Ka edhe pika pozitive që mbulimi thuajse i pandërprerë negativ i administratës nuk i vë në dukje: heqja e rregullave të tepruara, reforma historike e sistemit të taksave, fuqizimi i mëtejshëm i ushtrisë dhe të tjera. Por këto suksese kanë ardhur jo si rrjedhojë e stilit drejtues të Presidentit, i cili është impulsiv, konfliktual, meskin dhe i paefektshëm”.
“Shqetësimi më i madh, – shkruan autori, – nuk është ajo që zoti Trump i ka bërë presidencës, por ajo që ne si komb e kemi lejuar të na bëjë. Ne jemi zhytur poshtë bashkë me të dhe kemi lejuar që diskursi ynë të zhvishet nga qytetaria.”
Sjellja e paparashikueshme e Presidentit, thotë autori anonim, do të kishte qenë edhe më shqetësuese po të mos ishin “heronjtë e heshtur brenda dhe rreth Shtëpisë së Bardhë”.
“Disa prej ndihmësve të tij janë përshkruar si njerëz të këqinj nga mediat. Por privatisht, ata kanë bërë ç’është e mundur për të mos lejuar që vendimet e gabuara të dalin nga muret e Shtëpisë së Bardhë, megjithëse jo gjithnjë kanë patur sukses.”
Si rrjedhojë, shkruan ai, presidenca funksionon në dy pista.
“Merrni politikën e jashtme: Publikisht dhe privatisht, Presidenti Trump shfaq një preferencë për autokratët dhe diktatorët, si Presidenti Vladimir Putin i Rusisë ose udhëheqësi i Koresë së Veriut, Kim Jong-un, dhe tregon pak vlerësim të sinqertë për marrëdhëniet që na lidhin me aleatët, me vendet që mendojnë si ne. Megjithatë, vëzhguesit e mprehtë kanë vënë re se pjesa tjetër e administratës punon në një pistë tjetër, ku vende si Rusia kritikohen publikisht për ndërhyrje dhe si rrjedhojë ndëshkohen dhe ku aleatët kudo në botë mbahen afër si të barabartë e nuk vihen në lojë si rivalë.”
Gazeta Nju Jork Tajms thotë se me kërkesë të autorit ka ndërmarrë hapin e pazakontë për të botuar këtë shkrim anonim, pasi puna e tij në administratë do të vihej në rrezik nëse emri publikohej.
Në reagimin e saj të mërkurën mbrëma, sekretarja e shtypit e Shtëpisë së Bardhë, Sarah Sanders, kritikonte gazetën dhe e quante frikacak autorin e shkrimit anonim:
“Jemi të zhgënjyer, por jo të habitur, – shkruante ajo – që gazeta ka zgjedhur të publikojë një shkrim të tillë të ulët, të papërgjegjshëm dhe egoist… Personi prapa këtij shkrimi ka marrë përsipër të mashtrojë në vend që të mbështesë presidentin e zgjedhur me proces të rregullt të Shteteve të Bashkuara. Ky frikacak duhet të bëjë gjënë e duhur dhe të japë dorëheqjen.”
“Presidenti Trump ka një program të guximshëm dhe ambicioz. Çdo ditë që nga ardhja në detyrë, ai ka përmbushur premtimet e bëra,” – thuhet në reagimin e Shtëpisë së Bardhë.
Senatori amerikan dhe kryesuesi i Komisionit për Siguri Kombëtare i Senatit të Shteteve të Bashkuara, Ron Johnson, do të vizitojë javën e ardhshme Greqinë, Maqedoninë, Serbinë dhe Kosovën, konfirmoi për Shërbimin e Ballkanit të Radios Evropa e Lirë Ambasada amerikane në Beograd.
Johnson, gjatë turneut në Ballkan, do të takohet me udhëheqësit rajonalë, tha ambasada.
Ai është një nga bashkëpunëtorët e lartë të presidentit amerikan, Donald Trump, i ngarkuar me misione të posaçme.
Vizita e tij vjen në kohën kur Kosova dhe Serbia po shqyrtojnë idenë e ndryshimit të kufijve, ndërsa këshilltari për Siguri Kombëtare në Shtëpinë e Bardhë, John Bolton, ka thënë se SHBA-ja nuk i përjashton korrigjimet territoriale.
Presidenti Donald Trump ndërmori sot një sulm të ri ndaj një libri që e përshkruan presidencën e tij dhe Shtëpinë e Bardhë si kaotike dhe jofunksionale, duke lënë të kuptohet se është e nevojshme të ndryshohen ligjet për shpifjen për të mbrojtur njerëzit nga ato që ai i quan raportime të rreme.
Fjala është për librin e ri me titull “Frikë: Trump në Shtëpinë e Bardhë”, i cili ka 448 faqe dhe pritet të dalë në qarkullim më 11 shtator. Autori, Bob Woodward është gazetari të cilit i njihet merita si njeriu që ndihmoi për rrëzimin e Presidentit Richard Nixon në vitin 1974.
Disa pjesë nga ky libër, të publikuara të martën, përshkruajnë atë që autori e quan një “grusht shteti administrativ” dhe “krizë nervore” gjatë 19 muajve të parë në Shtëpinë e Bardhë.
Në reagimin e tij sot në Twitter, Presidenti Trump thotë: “A nuk është turp që dikush të shkruajë një artikull apo një libër, të sajojë histori krejtësisht të paqena dhe të formojë një imazh që është plotësisht e kundërta e personit që përshkruan dhe të kalojë pa ndonjë ndëshkim apo kosto”. “Nuk e kuptoj pse politikanët e Uashingtonit nuk i ndryshojnë ligjet për shpifjen?”
Libri i autorit Bob Woodward e përshkruan Presidentin Trump si injorant deri në rrezikshmëri ndaj çështjeve botërore ndërsa administratën si jofunksionale dhe të përfshirë nga grindjet e brendshme.
Megjithëse edhe më parë ka patur rrëfime të ngjashme për Shtëpinë e Bardhë nga gazetarë apo ish-pjestarë të stafit, përshkrimet e autorit Woodward japin një tabllo edhe më shqetësuese për administratën.
Në një koment të publikuar mbrëmë në Twitter, Presidenti Trump shtronte pyetjen nëse Woodward është një operativ i Partisë Demokrate të opozitës.
Libri citon shefin e stafit të Shtëpisë së Bardhë John Kelly që e përshkruan presidentin si të çbalancuar mendërisht. Zoti Kelly citohet gjithashtu të ketë thënë gjatë një takimi se “për shkak se presidenti është ‘idiot’, është “e pakuptimtë të përpiqet ta bindë atë për ndonjë gjë, se ai ka dalë nga shinat dhe se jetojmë në një qytet të çmendurish”.
Gjenerali Kelly reagoi menjëherë duke hedhur poshtë citimet që përmenden në libër:
“Ideja që unë ta kem quajtur ndonjëherë presidentin ‘idiot’ nuk është e vërtetë,” tha ai në një deklaratë, duke përsëritur se ai “ka një marrëdhënie tepër të sinqertë dhe të fortë” me presidentin Trump.
Zoti Kelly thekson se ai është i përkushtuar ndaj presidencës së zotit Trump, ndaj axhendës së tij dhe ndaj vendit.
“Kjo është një tjetër përpjekje patetike për të ndotur njerëzit pranë Presidentit Trump dhe për ta hequr vemendjen nga sukseset e shumta të administratës”, shkruan zoti Kelly.
Sekretari i Mbrojtjes Jim Mattis citohet në libër ta ketë përshkruar Presidentin si njeri me nivelin e një nxënësi të “klasës së pestë apo të gjashtë” për nga mënyra se si i kupton gjërat.
Edhe zoti Mattis reagoi me anë të një deklarate të lëshuar të martën mbrëma nga Pentagoni:
“Fjalët përbuzëse për presidentin që më atribuohen mua në librin e Woodward-it nuk janë shqiptuar asnjëherë nga unë ose në praninë time”, shkruan sekretari i mbrojtjes.
Në libër thuhet se në prill të vitit të kaluar kur presidenti sirian Assad urdhëroi që kundër civilëve të përdoreshin armët kimike, Presidenti Trump thirri sekretarin e mbrojtjes Mattis dhe i tha se donte ta vriste Assadin. Mattis citohet në libër t’i ketë thënë një ndihmësi se “ne nuk do ta bëjmë këtë. Do të jemi shumë më të matur”.
E pyetur rreth këtij episodi që përmendet në libër, ambasadorja amerikane në Kombet e Bashkuara, Nikki Haley reagoi duke thënë” “Asnjëherë nuk e kam dëgjuar presidentin të flasë për vrasjen e Asadit.”
Në libër thuhet se dy zyrtarë të larguar nga Shtëpia e Bardhë, këshilltari i lartë ekonomik i presidentit, Gary Cohn dhe sekretari i stafit Rob Porter, kanë hequr dokumente nga tavolina e presidentit që ai të mos i nënshkruante. Arsyeja që ata e bënë këtë, thuhet në libër, ka qenë “për të mbrojtur vendin”.
Në procesin e shkrimit të librit, autori Woodward në mënyrë të përsëritur ka kërkuar të intervistojë me Presidentin Trump por pa sukses.
Nga regjistrimi i një bisede mes tij dhe Presidentit pasi libri ishte bërë gati për shtyp, del se zoti Trump akuzon gazetarin se ka shkruar një “libër shumë të pasaktë”. Sipas zotit Trump, ky libër nuk pasqyron faktin që asnjë prej paraardhësve të tij në Shtëpinë e Bardhë nuk ka “bërë një punë më të mirë se ai” si president.
Woodward thotë në libër se presidenti i shikon përparësitë e sigurisë kombëtare në prizmin e shifrave të deficitit tregtar dhe shpenzimeve për mbajtjen e trupave amerikane jashtë. Sipas librit, kur u pyet nga Presidenti se përse Shtetet e Bashkuara duhet të paguajnë për praninë e madhe me trupa në Korenë e Jugut, sekretari Mattis thuhet se iu përgjigj: “Po e bëjmë këtë për të parandaluar Luftën e Tretë Botërore”.
Presidenti i Shteteve të Bashkuara, Donald Trump, e kritikoi një libër për Shtëpinë e Bardhë nën udhëheqjen e tij, të shkruar nga gazetari Bob Woodward.
Trump e cilësoi atë si “mashtrim për publikun”.
Shefi i stafit të tij dhe sekretari i Mbrojtjes po ashtu thanë se libri është “patetik” dhe “trillim”.
Në libër, ndihmës të lartë të Trumpit citohen të kenë thënë se ata kanë fshehur dokumente të ndjeshme për ta parandaluar Trumpin nga nënshkrimi i tyre.
Ata po ashtu citohen të kenë thënë se presidenti është “idiot” dhe “gënjeshtar”.
Woodward është gazetar i respektuar, i cili ka ndihmuar në zbulimin e rolit të presidentit Richard Nixon në skandalin Watergate, në vitet 1970.
Libri i tij “Frikë: Trump në Shtëpinë e Bardhë” pritet të dalë në publik më 11 shtator.
Një libër i ri për Presidentin Donald Trump e përshkruan udhëheqësin amerikan si injorant deri në rrezikshmëri ndaj çështjeve botërore ndërsa administratën si jofunksionale dhe të përfshirë nga grindjet e brendshme.
Libri i ri i gazetarit Bob Woodward titullohet “Frikë: Trump në Shtëpinë e Bardhë” dhe bazohet në qindra orë intervista me aktorë të dorës së parë në presidencën tashmë 20-muajshe të zotit Trump.
Ai e përshkruan udhëheqësin amerikan si të fiksuar me hetimin penal të prokurorit të posaçëm Robert Mueller mbi ndërhyrjen ruse në zgjedhjet presidenciale të 2016-ës dhe mbi mundësinë që Presidenti Trump të jetë përpjekur të pengojë hetimin.
Woodward shkruan se në një moment, në fillim të këtij viti, ish-avokati i Presidentit Trump John Dowd organizoi një sesion për të praktikuar presidentin që të përgatitej nëse merrej në pyetje rreth lidhjeve të mundshme të fushatës së tij me Rusinë, por zoti Trump u ngatërrua aq shpesh me faktet saqë më në fund shpërtheu në zemërim.
“E gjitha kjo është një mashtrim i çmendur”, tha ai dhe në fund shtoi: “Nuk dua të dëshmoj.” Dowd, sipas librit, i tha presidentit se do të përfundonte në burg nëse dëshmonte para zotit Mueller.
Muaj më vonë, tregon Woodward, Presidenti i tha avokatit Dowd: “Do të jem një dëshmitar vërtet i mirë.”
“Ju nuk jeni dëshmitar i mirë”, u përgjigj Dowd. “Zoti President, kam frikë se nuk mund t’ju ndihmoj dot”.
Të nesërmen në mëngjes, Dowd u largua nga puna si avokat i Presidentit.
Avokatët e tanishëm të presidentit kanë negociuar prej muajsh me ekipin ligjor të zotit Mueller për organizimin e një interviste me Presidentin por nuk kanë arritur dot marrëveshje. Avokati i zotit Trump Rudy Giuliani ka thënë në mënyrë të përsëritur se ka frikë se nëse presidenti dëshmon nën betim, ai do të kapet në dëshmi të rreme, pra se ka gënjyer autoritetet.
Bob Woodward, dekada më parë, kur ishte gazetar i ri i “Uashington Postit” u mor me hetimin e korrupsionit brenda në Shtëpinë e Bardhë dhe shkrimet e tij çuan në dorëheqjen e Presidentit Riçard Nixon.
Në librin e tij, ai citon zyrtarë të tanishëm dhe të mëparshëm të Shtëpisë së Bardhë, që sipas tij flasin me përçmim për Presidentin Trump duke thënë se ai nuk e çan kokën se veprimet e tij si president mund të rrezikojnë sigurinë botërore.
Negociatat e zotit Woodward për një intervistë me Presidentin Trump nuk patën sukses. Më pas, presidenti u përpoq vetë për të folur me gazetarin, por ishte tepër vonë, sepse dorëshkrimi ishte përfunduar.
Autori citon shefin aktual të stafit të Shtëpisë së Bardhë John Kelly ta ketë quajtur Presidentin Trump “idiot” dhe “të paparashikueshëm”. Sipas Woodward, Sekretari i Mbrojtjes Jim Mattis e përshkruan zotin Trump si njeri me nivelin e një nxënësi të “klasës së pestë apo të gjashtë” për nga mënyra se si i kupton gjërat.
“Ai është një idiot, nuk ka kuptim të përpiqesh ta bindësh për ndonjë gjë, ai ka dalë nga shinat, jemi në një qytet të çmendurish”, shkruan Woodward duke cituar gjeneralin Kelly në një takim të stafit në zyrën e tij. “Nuk e kuptoj përse rrimë akoma këtu, kjo është puna më e keqe që kam pasur ndonjëherë”.
Woodward shkruan se ndihmësit shpesh i hiqnin dokumentet nga tavolina e Presidentit Trump në Zyrën Ovale, për të mos lejuar që ai të nënshkruante ndonjë gjë që ndihmësit mendonin se do të rrezikonte sigurinë e botës ose interesat e SHBA. Autori e quan këtë “një grusht shteti administrativ” dhe një “shkatërrim nervor” të degës ekzekutive.
Woodward shkruan gjithashtu se zoti Trump shpesh tallej pas shpine me ndihmësit e tij. Në një rast ai thoshte për ish-këshilltarin e sigurisë kombëtare, HR McMaster se duket “si shitës birre”, për nga kostumet e lira që mban. Ndërsa për shefin e mëparshëm të stafit Reince Priebus thoshte se i ngjan një miu të vogël që vetëm vrapon andej-këtej.
Një zjarr i madh ka përfshirë Muzeun Kombëtar në Rio de Zhaneiro të Brazilit, i cili njëherësh njihet si institucioni më i vjetër shkencor në këtë shtet.
Zjarrfikësit janë duke u përballur me flakët në ndërtesë, në të cilën gjenden më shumë se 20 milionë eksponate.
Deri më tani nuk është raportuar për ndonjë person të përfshirë në flakët e së dielës.
Muzeu, i cili dikur ka shërbyer si rezidencë për familjen mbretërore portugeze, ka shënuar 200-vjetorin e themelimit më herët gjatë këtij viti.
Në disa pamje në transmetuesin televiziv brazilian është parë teksa zjarri ka përfshirë ndërtesën, pasi ky institucion ishte mbyllur për turistët.
Ende nuk është bërë e ditur shkalla e dëmit si pasojë e zjarrit.
Presidenti i Brazilit, Michel Temer ka thënë përmes një postimi në Twitter, se e diela ka qenë “ditë e trishtë për të gjithë brazilianët” pasi “ka humbur puna, kërkimi dhe njohuria 200 vjeçare”.
Pesë ditë të zisë dhe ceremoni të ndryshme mortore për senatorin amerikan John McCain marrin fund sot, me varrimin e tij në Akademinë Ushtarake në Annapolis, të Merilendit, afër Washingtonit.
McCain do të prehet pranë mikut tij të hershëm, shokut të tij të klasës në Akademi, Admiralit Chuck Larson, i cili vdiq në vitin 2014.
Gjatë gjithë këtyre ditëve populli amerikan, familjarë, miq dhe udhëheqës e nderuan senatorin McCain me disa ceremoni, ku folësit shprehën respektin e tyre për një njeri me virtyte të larta, patriot dhe të guximshëm, një ligjvënës që vuri gjatë gjithë jetës së tij interesat e Amerikës mbi gjithshka, duke kapërcyer edhe linjat partiake.
Vetë McCain kishte kërkuar që në shërbesën përkujtimore të tij të flisnin dy ish-presidentë, dikur rivalë të tij në politikë, George W. Bush dhe Barack Obama, duke dhënë një mesazh të qartë për politikanët amerikanë: bashkëpunimin për interesat e vendit.
Në një letër lamtumire drejtuar kombit, zoti McCain shkruante: “E dobësojmë madhështinë tonë kur ngatërrojmë patriotizmin me rivalitetet fisnore që kanë mbjellë fyerje, urrejtje dhe dhunë në mbarë anët e globit. E dobësojmë kur fshihemi pas mureve të larta, në vend që t’i shembim ato; kur vëmë në dyshim fuqinë e idealeve tona, në vend që të besojmë se ato do të jenë forca e madhe për ndryshim, siç kanë qenë gjithnjë”.
Familjarë, miq dhe ish kolegë ishin në mesin e qindra njerëzve që morën sot pjesë në shërbimin përkujtimor për Senatorin e Arizonës John McCain, në Katedralen Kombëtare të Washingtonit.
Dy ish presidentë, Republikan George W. Bush dhe ai demokrat Barack Obama folën në ceremoninë, që McCain e kishte planifikuar që gjatë periudhës kur ai luftonte me kancerin në tru. Zoti McCain nuk mundi të sigurojë emërimin e partisë së tij republikane në vitin 2000, që e fitoi zoti Bush dhe në vitin 2008 ai i humbi zgjedhjet presidenciale ndaj rivalit të Partisë Demokrate, Obama.
Ish-Presidenti Barack Obama tha se ai dhe George W. Bush ishin me fat që konkurruan me John McCain-in për Shtëpinë e Bardhë. “Ai na bëri presidentë më të mirë, ashtu siç e bëri Senatin më të mirë, ashtu siç e bëri më të mirë këtë vend”. “Kanceri nuk e frikësoi”, dhe “…ai kurrë nuk humbi optimizmin e tij, për jetën”. tha presidenti Obama.
Barack Obama denoncoi gjendjen aktuale të politikës amerikane duke e përshkruar atë “të ulët dhe mjerane”, gjatë fjalës që mbajti në ceremoninë e mbajtur sot në Katedralen Kombëtare të Uashingtonit, në ditën e katërt të zisë për heroin e luftës, Senatorin John McCain.
Ish Presidenti Barack Obama
“A nuk është ajo çfarë festojmë këtë javë fryma e të përpjekurit për të qenë më të mirë, për të bërë gjëra më të mira, për të qenë të denjë për trashëgiminë që ngritën themeluesit tanë?”, shtroi pyetjen zoti Obama, ndërsa mbante eulogjinë për mikun dhe shpesh kundërshtarin e tij politik.
“Shumë prej politikës sonë, jetës sonë publike, debatit tonë publik mund të duket e vogël, e ligë, dhe e ulët, e mbytur në deklarime bombastike, fyerje dhe kundërshti false, si dhe inate të sajuara”, tha zoti Obama.
Pa e përmendur me emër Presidentin Donald Trump, zoti Obama shtoi: “Është një politikë që shtiret si e guximshme dhe e fortë, por në fakt është e lindur prej frikës. John-i na bëri thirrje të gjithëve të ngrihemi përtej kësaj. Ai na bëri thirrje të jemi më të mirë se kaq”.
Ish-Presidenti George W. Bush tha se Senatori John Mc Cain do të kujtohet me mirënjohje për shërbimin e tij ndaj vendit, si një burrë me kod moral, për tiparet e tij, kurajon, ndershmërinë dhe dashurinë që kishte për lirinë.
Ish Presidenti George Bush
Në eulogjinë e tij, zoti Bush, tha se McCain “ishte i respektueshëm; kishte gjithnjë parasysh se kundërshtarët e tij ishin sidoqoftë patriotë dhe qenie njerëzore”.
Por, edhe zoti Bush, në vazhdim të fjalës së tij, e konsideroi të papranueshme status quo-në e politikës në Uashington, të cilën e përkufizoi si të kundërtën e pikëpamjeve personale të zotit McCain.
“Ai respektonte dinjitetin e mishëruar në çdo qenie njerëzore, një dinjitet që nuk ndalet tek kufijtë dhe që nuk mund të fshihet nga diktatorët. Ndoshta mbi gjithçka tjetër, John urrente abuzimin me pushtetin”, tha zoti Bush.
Përveç presidentëve Obama and Bush, fjalime lamtumire mbajtën Senatori Lindsey Graham, ish Sekretari i Shtetit Henry Kissinger, që ishte edhe këshilltari i Presidentit Nikson për Luftën e Vietnamit anëtarë të familjes së Senatorit McCain. Në fjalimet e tyre ata theksuan kontributin e zotit McCain për vendin dhe cilësitë e tij të veçanta morale.
Meghan McCain duke folur në ceremoni
Meghan, e bija e zotit McCain, gjithashtu i bëri nderimet babait të saj nëpërmjet një reference pa emër ndaj Presidentit Trump dhe motos së tij “ta bëjmë Amerikën sërish madhështore”.
“Amerika nuk mburret pasi nuk e ka të nevojshme. Amerika e John McCain-it nuk ka nevojë të bëhet sërish madhështore, pasi Amerika është përherë madhështore”, tha ajo mes duartrokitjeve.
“Jetojmë në një epokë kur rrëzojmë heronjtë e vjetër amerikanë për shkak të mangësive të tyre, ndërkohë që asnjë udhëheqës nuk dëshiron të pranojë vetë fajet apo dështimin e tyre”, tha Meghan McCain, ndërsa shtoi se babai i saj ishte “një përjashtim dhe se na dhe një ideal për të cilin të luftojmë”.
Kortezhi u nis të shtunën nga ndërtesa e Kapitolit, drejt Katedrales Kombëtare dhe bëri një ndalesë tek Memoriali i Luftës së Vietnamit, ku bashkëshortja e zotit Mc Cain vendosi një kurorë për nder të atyre që humbën jetën në këtë luftë.
Dje, qindra anëtarë të Kongresit ndoqën ceremoninë, përpara arkivolit në Kapitol, një nder që u është rezervuar vetëm 30 amerikanëve në të gjithë historinë e vendit.
Arkivoli mbështetej mbi një katafalk prej druri, që u përdor për herë të parë në vitin 1865, për të vendosur arkivolin e presidentit të vrarë Abraham Lincoln. Presidenti Donald Trump nuk u ftua në ceremoninë e së premtes, apo në funeralin që mbahet të shtunën, një vendim që është parë nga shumë njerëz si kritikë ndaj zotit Trump.
Në ceremoninë e Kapitolit, foli megjithatë nënpresidenti Pence, ndërsa zyrtarë të tjerë të administratës ishin të pranishëm. Të pranishëm ishin edhe e veja e zotit McCain, Cindy, shtatë fëmijët e tij dhe nëna e tij 106-vjeçare, Roberta McCain. “Gjithmonë do të kujtojmë se John McCain i shërbeu vendit dhe se i shërbeu me nder vendit të tij,” tha zoti Pence.
Kryetari i Dhomës së Përfaqësuesve Paul Ryan e përshkroi senatorin McCain si “një nga shpirtrat më të guximshëm që ka prodhuar ndonjëherë Amerika”.
Pas ceremonisë të së premtes, trupi i senatorit McCain qëndroi në Kapitol për homazhe nga publiku. Pranë arkivolit të mbuluar me flamurin amerikan qëndronte një roje nderi e Kapitolit.
Ndër shoqëruesit në banesën e fundit të John McCain-it radhiteshin aktori Warren Beatty, ish-Nënpresidenti Joe Biden, ish-kryetari i bashkisë i Nju Jorkut Michael Bloomberg, si dhe disidenti rus Vladimir Kara-Murza.
Në një letër lamtumire drejtuar kombit, zoti McCain shkruante: “E dobësojmë madhështinë tonë kur ngatërrojmë patriotizmin me rivalitetet tribale që kanë mbjellë fyerje, urrejtje dhe dhunë në mbarë cepat e globit. E dobësojmë kur fshihemi pas mureve të larta, në vend që t’i shembim ato; kur vëmë në dyshim fuqinë e idealeve tona, në vend që të besojmë se ato do të jenë forca e madhe për ndryshim, siç kanë qenë gjithnjë”.
Dy ish presidentë të Shteteve të Bashkuara flasin sot në shërbimin e memorialit të ish senatorit të Arizonës John McCain, në Katedralen Kombëtare të Washingtonit.
Presidenti Republikan George W. Bush dhe ai demokrat Barack Obama do ta kujtojnë mikun e tyre në një shërbim që McCain e kishte planifikuar vetë që gjatë periudhës kur ai luftonte me kancerin në tru.
Zoti McCain nuk mundi të sigurojë emërimin e partisë së tij republikane në vitin 2000, që e fitoi zoti Bush dhe në vitin 2008 ai i humbi zgjedhjet presidenciale ndaj rivalit të Partisë Demokrate, Barack Obama.
Kortezhi u nis të shtunën nga ndërtesa e Kapitolit, drejt Katedrales Kombëtare, bëri një ndalesë tek Memoriali i Luftës së Vietnamit, ku bashkëshortja e zotit Mc Cain vendosi një kurorë për nder të personave që humbën jetën në këtë luftë.
Presidenti Donald Trump mungon dukshëm në ceremonitë e përkujtimore që po zhvillohen për senatorin John McCain. McCain dhe Trump nuk u pajtuan për një numër çështjesh, duke përfshirë marrëdhëniet mes Shteteve të Bashkuara dhe Rusisë. Disa analistë e shohin grindjen mes tyre si simbolikën e përplasjeve të vlerave brenda Partisë Republikane.
Në pesë ditët e homazheve për senatorin republikan John McCain … një numër figurash të shquara në politikën amerikane, përfshirë ish-nënpresidentin, Joe Biden, i cili foli në shërbesën e së enjtes për të nderuar mikun e tij të afërt.
“Gjithmonë e kam menduar Johnin si vëlla. Kemi patur shumë zënka si të ishim në një familje.”
Biden ishte kandidati për nënpresident në zgjedhjet presidenciale të 2008-ës që i fitoi Barack Obama.
Një ish rival tjetër, George W. Bush, mposhti John McCain për kandidaturën presidenciale republikane në vitin 2000.
Këta politikanë kanë luftuar me senatorin McCain, ndonjëherë edhe ashpër. Megjithatë, ai u kërkoi të dy ish presidentëve, Bush dhe Obama, të mbajnë fjalime lamtumire në funeralin e tij.
“Shumë herë kur bisedon me njerëz që dikur ishin armiqtë e tij politikë, sheh se tani janë miqtë e tij më të mirë. Ai ishte në gjendje të ndryshonte situatën dhe të rregullonte marrëdhëniet”, thotë Peter Kunhardt regjisor i dokumentarit “For Whom the Bell Tolls”.
I vetmi që mungon në shërbimet përkujtimore për senatorin McCain? Presidenti Donald Trump.
“Nuk jam i sigurt nëse kemi parë ndonjëherë, të paktën në jetën tonë, një situatë si kjo ku një president republikan dhe një senator republikan nuk e pëlqejnë njëri-tjetrin në një shkallë të tillë sa të mos të ftohet për funeralin e tjetrit dhe kur presidenti ndryshon mendimin nëse do të ngrejë flamurin në gjysmë shtize”, thotë David Barker me Universitetin Amerikan.
Flamuri mbi Shtëpinë e Bardhë u ul në gjysmë shtize, më vonë u ngrit dhe pastaj përsëri u ul, pas kritikave të ashpra për presidentin Trump.
Përveç një ngushëllimi në Twitter ditën e vdekjes së senatorit McCain, deklarata e parë publike e presidentit Trump erdhi dy ditë më vonë.
“Ne vlerësojmë shumë gjithçka që senatori McCain ka bërë për vendin tonë”.
McCain ishte një kritik i ashpër i presidentit, për të cilin mendonte se ishte shumë pranë Moskës.
McCain e shihte Presidentin rus Vladimir Putin si një diktator dhe shpesh nxiti veprime të Kongresit kundër tij.
Më pas erdhën pikëpyetjet e presidentit Trump nëse McCain ishte një hero i Luftës së Vietnamit.
“Është hero lufte, sepse u kap rob. Më pëlqejnë njerëzit që nuk kapen”.
Analistët thonë se armiqësia McCain – Trump përfaqëson luftën midis pushtetarëve të vjetër dhe të rinj të partisë republikane.
“Të pëlqen ose jo, partia e re republikane është tani partia e Trumpit. Nuk është një parti rreth tregut të lirë apo tregëtisë së lirë apo e parimeve që e dallonin dikur partinë republikane, përfshi disa nga ato që dallonin senatorin John McCain, si politika e jashtme fuqishme”, thotë analisti David Barker.
Përsa i përket senatorit McCain, ai duket se po dërgon një mesazh të fundit jo vetëm për Trumpin, por edhe Putinin, duke zgjedhur disidentin rus Vladimir Kara-Murza si një nga njerëzit që do të mbajnë arkivolin e tij.
Në Uashington vemendja të premten është në selinë e Kongresit amerikan me një ceremoni solemne për senatorin John McCain.
Arkivoli me trupin e senatorit të ndjerë John McCain, i cili vdiq të shtunën në moshën 81 vjeçare, u soll në Kongres për herë të fundit të premten paradite, ku atij po i bëhen homazhe në sallën rrethore të Kapitolit, një nder që u është rezervuar deri sot vetëm 30 personaliteteve që nga viti 1852, kur filloi kjo praktikë. Trupi i Senatorit republikan të Arizonës u soll në Uashington pas një ceremonie përkujtimore të ejten në qytetin Phoenix.
Presidenti amerikan, Donald Trump, ka rritur sulmet e tij ndaj agjencive për zbatim të ligjit, duke paralajmëruar se ai mund të “përfshihet” në vendime, në kohën e hetimeve “të turpshme” që po kryhen nga Departamenti i Drejtësisë dhe FBI-ja.
Duke folur në një tubim në Indiana më 30 gusht, Trump ka thënë se njerëzit janë të zemëruar për çështjet si hetimi i Këshilltarit Special, Robert Mueller, rreth asaj nëse ka pasur bashkëpunim në mes të Rusisë dhe fushatës së Trumpit, në zgjedhjet presidenciale të vitit 2016.
“Departamenti ynë i Drejtësisë dhe FBI-ja jonë duhet të fillojnë të bëjnë punën e tyre në mënyrë të duhur dhe atë menjëherë”, ka deklaruar Trump.
“Unë dua të qëndroj jashtë, mirëpo në një moment, nëse ata nuk reformohen, unë do të përfshihem dhe nëse më duhet do të jem brenda”, ka thënë ai.
Mueller është angazhuar në hetime për të kuptuar nëse fushata e Trumpit është koordinuar me Rusinë për të kthyer rezultatin e zgjedhjeve në favor të tij.
Trumpi deri tani ka hedhur poshtë çdo bashkëpunim me Moskën.
Presidenti rus, Vladimir Putin, ka kundërshtuar se Qeveria e tij ka ndërhyrë në zgjedhje, pavarësisht të dhënave të agjencive amerikane të Inteligjencës dhe komiteteve të Kongresit se, Moska ka ndërhyrë duke manipuluar opinonin publik.
I pyetur në një intervistë për Bloomberg News, të publikuar para tubimit më 30 gusht, nëse do ta pranonte ndonjë thirrje nga Mueller për t’u marrë në pyetje, Trumpi ka thënë se do të shohë se çfarë do të ndodhë.
“Unë e shoh ndryshe”, është cituar të ketë thënë Trumpi.
“Unë e shoh si hetim ilegal” sepse “studiues të mrekullueshëm” kanë thënë se “nuk pa pasur nevojë kurrë për këshilltar special”, ka deklaruar ai.
Avokati i Shtëpisë së Bardhë, Don McGahn, një këshilltar kyç i presidentit Donald Trump, do të largohet në javët e ardhshme, tha zoti Trump të mërkurën.
McGahn ishte avokat i zotit Trump gjatë fushatës së tij të suksesshme presidenciale të vitit 2016, përpara se të merrte postin e këshilltarit juridik të Shtëpisë së Bardhë. Presidenti tha se zoti McGahn do të largohet pasi të ketë mbikqyrur fushatën në Uashington për të ndihmuar gjyqtarin Brett Kavanaugh të marrë konfirmimin e Senatit për t’u bërë anëtar i Gjykatën së Lartë në seancat që zhvillohen muajin tjetër.
Javët e fundit, McGahn ka qenë duke përgatitur dhe prezantuar gjyqtarin Kavanaugh në zyrat e senatorëve për takime të gjata njohëse me ligjvënësit përpara seancave të konfirmimit. Shtëpia e Bardhë shpreson se Senati do ta konfirmojë emërimin e zotit Kavanaugh para 1 tetorit, kur Gjykata e Lartë të fillojë mandatin e ri.
“Kam punuar me Don McGahn për një kohë të gjatë dhe vërtet e vlerësoj shërbimin e tij!” tha Presidenti Trump në Twitter.
Presidenti Trump ka gjithashtu një ekip avokatësh personalë, përfshirë ish-kryebashkiakun e Nju Jorkut, Rudy Giuliani, të cilët e kanë këshilluar përsa u përket hetimeve penale të ndërmarra nga prokurori i posaçëm Robert Mueller rreth ndërhyrjes ruse në zgjedhjet presidenciale dy vjet më parë, rreth një bashkëpunimi të mundshëm të fshehtë të fushatës Trump me Rusinë dhe nëse presidenti ka penguar drejtësinë.
Vitin e kaluar Presidenti Trump shkarkoi ish drejtorin e FBI-së, James Comey, i cili në atë kohë drejtonte hetimin e agjencisë rreth Rusisë, duke çuar në emërimin e zotit Mueller, edhe pse zoti Trump nuk ishte dakord me këtë emërim.
Zoti McGahn shërben si avokat që trajton interesat juridike të Shtëpisë së Bardhë. Por marrëdhëniet e tij me Presidentin Trump, sipas disa njoftimeve, janë bërë më të tensionuara gjatë javëve të fundit, kur dolën lajme lajmet se McGahn, me miratimin e Presidentit Trump, ishte ulur vullnetarisht për 30 orë intervista me hetuesit e zotit Mueller gjatë një periudhe disa muajshe.
Sipas njoftimeve, zoti McGahn iu përgjigj pyetjeve në lidhje me shumë ngjarje brenda Shtëpisë së Bardhë dhe me veprime të ndryshme të Presidentit Trump.
Një makinë e zezë me trupin e senatorit të ndjerë amerikan John McCain, arriti të mërkurën në Kapitolin e shtetit Arizona për homazhe në këtë shtet, që ai e ka përfaqësuar që nga vitet 1980.
Anëtarët e Gardës Kombëtare me uniforma të Arizonës bartën arkivolin në sallën rrethore të Kapitolit ku u vendos trupi i senatorit, ndërkohë që dita e mërkurë përkonte me 82 vjetorin e tij të lindjes.
McCain vdiq të shtunën nga kanceri i trurit.
Para fillimit të ceremonisë, veteranë dhe ushtarakë aktivë kishin dalë në trotuar për të pritur trupin, i cili u soll në Kapitolin e Arizonës nga një shtëpi funeralesh.
Më vonë pasdite, Kapitoli u hap për publikun për t’i dhënë senatorit lamtumirën e fundit.
Për një pjesë të banorëve të Arizonës, McCain ka qenë politikani më i njohur në jetën e jetën e tyre. Ai e mori detyrën në fillim të viteve 1980, së pari si kongresmen dhe më pas si senator, një post i mbajtur dikur nga senatori Barry Goldwater.
McCain është personaliteti i tretë publik, trupi i të cilit vendoset në Kapitolin e Arizonës për homazhe gjatë 40 viteve të fundit.
Të premten, trupi i tij do të vendoset në Kapitolin e Kongresit në Uashington, ndërsa shërbimi përkujtimor përfundimtar do të mbahet të shtunën në Katedralen Kombëtare të Uashingtonit.
NEW YORK – Një tufë e madhe bletësh ka vërshuar sheshin Times, një nga pikat e famshme turistike të qytetit të New Yorkut në Shtetet e Bashkuara të Amerikës (SHBA).
Mijëra bletë dje në orët e pasdites kanë vërshuar një tezgë për shitjen e sanduiçëve me salsiçe (hot-dog) që gjendej në kryqëzimin mes Rrugës 43 dhe Bulevardit Broadway në Sheshin Square, qendrën e lagjes Manhattan.
Bletët shkaktuan rrëzimin e çadrës së tezgës. Në vendin e ngjarjes ndërhyri policia, ndërkohë që trafiku u mbyll përkohësisht.
Policia e New Yorkut përdori metodën me vakum për të mos i dëmtuar bletët, duke i transferuar ato në një vend tjetër.
Andrew Cote nga ekipi policor tha se vërshimet e këtilla të bletëve zakonisht ndodhin në muajt e pranverës, por shtoi se për shkak të ngrohjes së motit, mbretëresha mund të ketë braktisur kosheren dhe për këtë arsye bletët e tjera mund të jenë mbledhur në çadrën e tezgës.
“Mbase bletët kanë dashur vetëm të hanë sanduiç me salsiçe”, tha Cote në formë shakaje. aa
Një grup zyrtarësh dhe ish zyrtarësh amerikanë nga i gjithë spektri politik do të marrin pjesë në ceremoninë përkujtimore të së shtunës për Senatorin John McCain, i cili vdiq të shtunën në moshën 81-vjeçare. Në ceremoninë që do të mbahet në Katedralen Kombëtare në Uashington do të flasin ish-Presidentët Barak Obama dhe Xhorxh W. Bush si dhe ish-sekretari i shtetit Henry Kissinger dhe ish senatori Joseph Lieberman.
Ndërkaq, dje pasdite Presidenti Donald Trump komentoi për herë të parë për senatorin e ndjerë pas një heshtjeje publike që zgjati dy ditë. Komentet erdhën pas një proteste nga grupet e veteranëve.
Në një ceremoni në Shtëpinë e Bardhë për nder të udhëheqësve evangjelistë, Presidenti Trump ofroi vlerësime për senatorin McCain, i cili ishte gjithashtu ish-rob lufte, avioni i të cilit u rrëzua në Vietnam.
“Zemrat dhe lutjet tona janë me familjen e Senatorit John McCain. Do të ketë shumë aktivitete në ditët e ardhshme dhe ne vlerësojmë shumë gjithçka që Senatori McCain ka bërë për vendin tonë. Faleminderit”
Përpara komentit të së hënës, presidenti Trump nuk përfilli pyetjet e gazetarëve rreth senatorit McCain, duke lënë shumë njerëz të dyshonin se presidenti Trump nuk e kishte kapërdirë dot humbjen që i shkaktoi vota e senatorit McCain ndaj përpjekjeve të presidentit për të shfuqizuar aktin e kujdesit shëndetësor, të njohur si “Obamacare”.
Ndryshimi i qëndrimit të Presidentit Trump nga presioni i grupeve të veteranëve për të ulur në gjysmë shtizë flamujt në Shtëpinë e Bardhë për nder të senatorit McCainit, nxiti spekulimet se presidenti mund të ruante inatin ndaj senatorit McCain, i njohur për “fjalën e drejtpërdrejtë”. Para vdekjes së tij, senatori McCain kërkoi që presidenti Trump të mos merrte pjesë në asnjë ceremoni për të. Nënpresidenti Mike Pence, me të cilin McCain shërbeu në Kongres, do të marrë pjesë në një ceremoni në Kongres të premten dhe tre anëtarë të kabinetit të presidentit Trump do të marrin pjesë në përkujtimoret e kësaj jave.
Trupi i senatorit McCain, veteran i luftës dhe burrë shteti, do të vendoset në sallën e Kongresit në Uashington para funeralit të tij të dielën. McCain do të varroset në Akademinë Detare në Annapolis të Merilendit, ku ai ka studiuar.
Gjatë fjalimit për evangjelistë të hënën, presidenti Trump gjithashtu ofroi lutje dhe ngushëllime për viktimat e incidentit në Xheksonvil të Floridës, ku një person vrau dy njerëz dhe plagosi disa të tjerë para se të merrte jetën e tij në një kampionat lojrash elektronike.
UASHINGTON – Presidenti amerikan, Donald Trump, i është nënshtruar presionit të opinionit publik mbrëmë dhe urdhëroi që në institucionet në mbarë SHBA-të flamujt të ulen në gjysmë shtizë për shkak të vdekjes të senatorit amerikan, John McCain.
Fundjavën e kaluar ndërroi jetë senatori i shquar republikan dhe veterani i luftës së Vietnamit, McCain, i cili gëzonte respekt të madh edhe në bllokun demokrat. McCain njihej si një nga kritikët më të ashpër të presidentit amerikan Trump dhe në testamentin e tij ai kërkoi që Trump të mos jetë i pranishëm në funeralin i cili do të mbahet më 2 shtator.
Trump në lidhje me vdekjen e McCain ka lëshuar një mesazh ngushëllimi familjes McCain dhe nuk i ka lejuar administratës së Shtëpisë së Bardhë të publikojë një deklaratë zyrtare në të cilën vlerëson senatorin e ndjerë.
McCain në testamentin e tij ka deklaruar se kombi amerikan mbahet me ideale, jo me territore dhe gjak, me çka ka kundërshtuar nacionalistët e bardhë të cilët kryesisht mbështesin Trumpin dhe idenë e tij për kombin e madh amerikan.
Trump në deklaratën e radhës konfirmoi se kishte pikëpamje të ndryshme, por megjithatë, ka thënë se respekton McCain dhe shërbimin e tij që i ka bërë Amerikës.
Trump konfirmoi se nuk do të marrë pjesë në tubimet tre ditore komemorative të cilat fillojnë të premten, ndërsa administratën e Shtëpisë së Bardhë do ta udhëheqë zëvendëspresidenti i SHBA-ve, Mike Pence. aa
Senatori John McCain, i cili vdiq të shtunën pas një beteje të gjatë me kancerin e trurit, do të nderohet me ceremoni në Arizona dhe Uashington.
Trupi i tij do të vendoset së pari në kapitolin e shtetit të Arizonës, ku të mërkurën do të mbahet një ceremoni private, me rastin e 82-vjetorit të ditëlindjes.
Të enjten, në një kishë baptiste të qytetit Feniks do të mbahet një shërbim përkujtimor privat me pjesmarrjen e publikut.
Në Uashington, ku flamujt në institucionet e ndryshme janë ngritur në gjysmë shtizë, trupi i senatorit McCain do të vendoset të premten në ndërtesën e Kapitolit, ku njerëzit do të bëjnë homazhe.
McCain do të jetë senatori i 13-të amerikan, trupi i të cilit nderohet në sallën rrethore të Kapitolit, një nder që u rezervohet “qytetarëve më të shquar” të vendit, sipas zyrtarëve të Kapitolit.
Të shtunën në Katedralen Kombëtare të Uashingtonit do të mbahet një shërbim përkujtimor, ku do të flasin ish-presidentët Barak Obama dhe Xhorxh W. Bush.
Senatori McCain do të prehet në Varrezat e Akademisë Detare në Anapolis të shtetit Marilend, pranë mikut më të ngushtë që ai kishte gjatë viteve të Akademisë detare, Admiralit Chuck Larson.
Disa nga kritikët e Presidentit Donald Trump po bëjnë thirrje për ngritje akuzash me qëllim shkarkimin e Presidentit në Kongres, pasi ish-avokati i tij e implikoi Presidentin në një shkelje të mundshme të ligjeve për financimin e fushatave elektorale. Por, siç njofton korrespondenti i Zërit të Amerikës, Marcus Harton, kundërshtarët politikë të Presidentit në Kongres janë duke mbajtur një qëndrim më të kujdesshëm.
Michael Cohen, ish-avokati personal i Presidentit Donald Trump, u vetëdeklarua fajtor javën e kaluar për tetë akuza për shkelje të ligjeve për financimin e fushatave, për mashtrim me taksat dhe mashtrim bankar. Shkeljet përfshijnë edhe kryerjen e pagesave për të blerë heshtjen e grave që pretendojnë se kanë patur marrëdhënie intime me zotin Trump. Zoti Cohen thotë se zoti Trump e udhëzoi për të bërë pagesat, por Presidenti dhe mbështetësit e tij e mohojnë këtë dhe e quajnë zotin Cohen gënjeshtar.
Janë shtuar tashmë thirrjet për ngritjen e akuzave në Kongres me qëllim shkarkimin e Presidentit, por ligjvënësi demokrat Eric Swalwell, tha gjatë emisionit “ABC THIS WEEK” se nuk ka ende prova të mjaftueshme. Ai është anëtar i Komisionit Juridik të Dhomës së Përfaqësuesve, që do të ishte edhe organi që do të ndërmerrte hapin e parë drejt ngritjes së akuzave. Ligjvënësi Swalwell thotë se është e parakohshme të diskutohet ky hap. Por, ai shtoi se hetimet do të ishin përparësi e punës nëse demokratët do të kontrollonin Dhomën e Përfaqësuesve.
“Gjëja më e mirë që mund të bëjmë është që t’i premtojmë popullit amerikan se nëse na jep shumicën, ne do të kryejmë hetimet që republikanët nuk duan t’i bëjnë. Për shkeljet në financimin e fushatës elektorale. Për kontaktet e tij me rusët. Madje, edhe për deklaratën e tij të taksave që populli amerikan ende nuk e ka parë. Premtoj se një shumicë demokrate do ta realizojë edhe këtë”, tha ligjvënësi Swalwell.
Shumica e republikanëve në Dhomën e Përfaqësuesve kanë mbrojtur Presidentin mes hetimeve të ndërhyrjes së Rusisë në zgjedhje dhe pengimit të drejtësisë.
Avokati aktual i Presidentit Trump tha javën e kaluar se do të ishte gabim ngritja e akuzave për shkarkimin e Presidentit.
“Mendoj se një proces shkarkimi do të ishte i tmerrshëm. Nuk ka asnjë arsye. Ai nuk bashkëpunoi me rusët. Ai nuk pengoi drejtësinë. Gjithçka që tha Cohen është hedhur poshtë. Shkarkimi do të bëhej vetëm për arsye politike dhe populli amerikan do të rebelohej”, deklaroi Rudy Giuliani, avokat i Presidentit Trump.
Analistët thonë se demokratët ngurrojnë të flasin për shkarkimin pasi i druhen provokimit të mbështetësve të zotit Trump. Kjo temë ushqen trazirat politike ndërsa vendi po i afrohet zgjedhjeve të mesmandatit në muajin nëntor, zgjedhje të cilat do të përcaktojnë shumicën në të dyja dhomat e Kongresit.
UASHINGTON – Presidenti i SHBA-së Donald Trump ka penguar administratën e Shtëpisë së Bardhë për të publikuar një kumtesë zyrtare me rastin e vdekjes të senatorit republikan John McCain.
Duke u thirrur në deklaratat e zyrtarëve të paemëruar të Shtëpisë së Bardhë, mediat amerikane raportojnë se zëdhënësja Sarah Sanders dhe shefi i kabinetit të Trumpit, John Kelly me rastin e vdekjes së djeshme të senatorit McCain lëshuan një njoftim zyrtar të Shtëpisë së Bardhë në të cilën flitet në superlativ për senatorin tashmë të ndjerë McCain duke e cilësuar si hero amerikan.
Të njëjtat burime raportojnë se presidenti amerikan Trump nuk ka miratuar publikimin e këtij teksti.
McCain ishte një nga kritikët më të zëshëm të politikave të Trumpit brenda qarqeve republikane, ndërsa Trump me rastin e vdekjes së tij u mjaftua me një mesazh ngushëllues që ia dërgoi familjes McCain përmes Twitterit.
Trump tre vite më parë publikisht kontestoi epitetin e McCain si hero nga lufta e Vitenamit.
“Ai nuk është hero lufte. Njihet se hero pasi ishte kapur si rob, ndërsa unë i dua ata që nuk janë kapur robër”, pati thënë Trump në një prononcim në vitin 2015.
Nga ana tjetër, zyra e senatorit të ndjerë McCain ka njoftuar se varrimi i tij do të mbahet më 2 shtator në varrezat e Akademisë Detare në Mayland.
Në ndërkohë në Arizona dhe në Washington do të mbahen akademi komemorative. aa
Astronautët e NASA do të zhvendosen për të jetuar në një bazë pranë Hënës më 2024. Ky është lajmi që ka dhënë zëvendëspresidenti amerikan Mike Pence.
“Ndërkohë që shikimi ynë është fokusuar edhe njëherë tëk fqinji ynë hënor, këtë herë nuk do jemi të kënaqur vetëm me të lënit pas disa gjurmë, madje as të largohemi.” -ishin fjalët e tij gjatë një konference pranë “Nasa’s Johnson Space Centre”.
“Ka ardhur koha për Shtetet e Bashkuara që te marrim çfarë kemi mësuar gjatë gjithë këtyre dekadave, të vëmë në punë të gjithë zgjuarsinë dhe kreativitetin e NASA-s dhe të krijojmë një banim permanent rreth Hënës.”- shtoi ai.
NASA po zhvillon një satelit të quajtur “Lunar Orbital Platform-Gateway” , i cili do të niset në hapësirë në vitin 2022 dhe do të shërbejë si një ndalim stacionar përpara eksplorimeve të ardhshme.
Ky sipas Mike Pence, është misioni i qeverisë së Trump për të bërë programin amerikan të hapësirës të shkëlqyer sërish.
VOAL – John Sidney McCain III ka lindur më 29 gusht 1936 në Coco Solo, në zonën e kontrolluar të Panamasë prej Shteteve të Bashkuara. Të dy gjyshi dhe babai, John S. McCain Jr, mburren për një karrierë të shkëlqyer si admiralë të Marinës së SHBA. Gjyshi i tij, John McCain S., Sr, ishte komandant i marinës së forcave ajrore gjatë betejës së Okinavës në vitin 1945, ndërsa babai i tij ishte në komandën e forcave të armatosura gjatë Luftës së Vietnamit.
John vijoi në shkollën episkopale deri në vitin 1954, pastaj hyri në Akademinë Detare Annapolis. Ai u diplomua në vitin 1958.
Pas akademisë detare është transferuar në bazën ajrore të Pensacola (Florida), ku ai filloi trajnimin e tij si një pilot detar. Pavarësisht nga një aksident që pësoi avioni i tij duke rënë në gjirin Corpus Christi, ai merr patentën për të hyrë në aviacionin.
Në vitin 1965, John McCain u martua me Karol Shepp, një model nga Filadelfia, nga e cila adopton fëmijë (ajo i kishte nga një martesë e mëparshme), lind me të një vajzë (në vitin 1966) dhe ndahen më 1980.
Gjatë luftës së Vietnamit aeroplani i tij u rrëzua. Është 26 tetor 1967. McCain është i burgosur: i ndaluar për më shumë se pesë vjet, ai kthehet në atdhe dhe bëhet i famshëm në shkallë kombëtare. Në Vietnam ai ishte torturuar dhe nuk ishte dorëzuar.
Në vitin 1980 u martua me Cindy Hensley (me të cilën ka katër fëmijë) dhe me të u zhvendos në Phoenix, në shtetin e Arizonës.
Pas njëzet e dy viteve të karrierës ushtarake ai iu përkushtua politikës, ku ai përfshihet më 1977, si përfaqësues i marinës në Senat. Në vitin 1982 ai u zgjodh në Kongres ku mbështeti administratën Reagan. Ai pastaj aplikoi për Senatin për shtetin e Arizonës dhe u zgjodh në vitin 1986.
Në vitin 1999 ai botoi librin “Besimi i Etërve të mi”, i cili tregon historinë ushtarake të familjes së tij dhe që përfshin përvojat e tij tragjike.
Republikan, një konservator i fortë, në vitin 2000 vendosi të kandidojë për presidencën. Megjithatë, ai mundi nga Xhorxh W. Bush.
Kthehet në garë për zgjedhjet e vitit 2008; megjithëse është konservator, në sytë e opinionit publik ai tregon pavarësi të konsiderueshme: nuk është e pazakontë që votat e tij të devijojnë nga linjat e partisë.
Në nëntor 2008 ai u mposht nga Barack Obama.
Në vitin 2012 ai nuk u kthye në zgjedhjet presidenciale, të fituara nga konservatori Mitt Romney, të cilin vendosi ta mbështeste menjëherë. Megjithatë, ai do të mposhtet nga Obama.
Në vitin 2016, në moshën 80 vjeçare, në zgjedhjet paraprake republikane për president në vitin 2016, përballë mbështetjes në rritje ndaj miliarderit Donald Trump, merr një qëndrim kundër manjatit. McCain ndan fjalët e ish presidentit të kandidatit 2012 Mitt Romney duke kërkuar që “të mos votojnë për Trumpin” sepse vlerat e tij janë të papajtueshme me republikanizmin. Megjithatë, Trump zgjidhet.
Në korrik 2017 ai u diagnostikua me një glioblastomë, një formë agresive e tumorit të trurit për të cilën ai iu nënshtrua operacionit. Ende pa u shëruar, ai nuk heq dorë për të shkuar në Senat për të votuar kundër veprimit të Trumpit herë për të shfuqizuartë ashtuquajturin “Obamacare”, reformën e dëshiruar nga Obama që revolucionarizoi sistemin amerikan të kujdesit shëndetësor, duke i dhënë më shumë të drejta dhe mbrojtje pacientëve.
McCain vdiq më 25 gusht 2018 në Phoenix, Arizona, në moshën 81 vjeç.
Senatori amerikan, John McCain, gjashtë herë senator republikan nga Arizona dhe hero i luftës që ka duruar gati gjashtë vjet torturë dhe robëri në burgun famëkeq Hanoi Hilton, ka vdekur në moshën 81-vjeçare.
I njohur për qëndrimin luftarak gjatë gjithë dekadave në Senat dhe për dy përpjekje të dështuara për t’u zgjedhur president i Shteteve të Bashkuara, McCain ka vuajtur nga kanceri në tru.
Ai ka qenë i rrethuar nga familja dhe miqtë në Arizona në ditët e fundit, ndërsa ka ndërruar jetë pas publikimit të librit të tij të fundit “Vala e shqetësimit: Kohët e mira, kauzat e drejta, luftërat e mëdha dhe vlerësimet e tjera”.
Në librin e tij, McCain ka pranuar se nuk ka ide se sa kohë i ka mbetur për të jetuar, porse kjo nuk e ka ndaluar të godasë presidentin aktual, Donald Trump, të shprehë keqardhje për zgjedhjen e ish-guvernatores së Alasakës, Sarah Palin, si kandidate për zëvendëse të tij në fushatën e vitit 2008, si dhe të shprehë shqetësime për reputacionin ndërkombëtar të vendit të tij.
Për kohë të gjatë kryetar i Komitetit të Senatit për Shërbime të Armatosura, McCain është konsideruar ekspert në çështje të mbrojtjes dhe të politikës së jashtme.
McCain ka lindur në Stacionin Detar Solo Coco të Panamasë më 29 gusht, 1936, në një familje me histori të thellë ushtarake.
Duke ndjekur gjurmët e babait dhe të gjyshit të tij, të dy admiralë me katër yje, ai ka diplomuar në Akademinë Detare në Anapolis, në vitin 1958.
Më pak se një dekadë më vonë, ai është dërguar në Vietnam, ku aeroplani i tij është goditur në Hanoi.
Pavarësisht dy duarve të thyera, gjurit të thyer dhe torturës së vazhdueshme, McCain i ka refuzuar ofertat për lirim të parakohshëm nga robëria, duke thënë se ai do të largohet vetëm kur i burgosuri i fundit amerikan të dalë nga dera.
John McCain, 1973
“Kam rënë në dashuri me vendin tim kur kam qenë i burgosur në vendin e dikujt tjetër”, ka thënë McCain kur ka pranuar emërimin e Partisë Republikane për kandidat në zgjedhjet presidenciale të vitit 2008.
“I kam dashur Shtetet e Bashkuara për dinjitetin e tyre, për besimin në urtësinë, drejtësinë dhe mirësinë e popullit të tyre. I kam dashur sepse nuk kanë qenë vetëm një vend, por një ide, një kauzë për të cilën duhet luftuar. Nuk kam qenë kurrë i njëjti përsëri. Nuk kam qenë i vetes sime më, kam qenë i vendit tim”, ka thënë McCain.
Por, ai ka vazhduar të jetë vetja e tij.
Si senator, ai i ka sfiduar presidentët, pavarësisht përkatësisë partiake, nëse e ka ndjerë se politikat e tyre nuk janë në përputhje me pikëpamjet e tij. Në sytë e publikut, ai është transformuar nga hero i luftës në ikonë politike, duke fituar reputacionin e një rebeli.
Gjatë mandatit të tij të parë në Kongres, ai është ngritur kundër presidentit Ronald Reagan, një republikan i respektuar deri më sot, për shkak të vendimit të tij për t’i vendosur marinsat paqeruajtës në Bejrut me kapacitete të kufizuara mbrojtëse.
Shqetësimet e McCainit kanë qenë me vend, pasi një sulmues vetëvrasës ka hedhur veten në erë në kazermë, duke vrarë 241 marinsa në tetor të vitit 1983.
Nami i tij është rritur derisa vazhdimisht ka sfiduar presidentin tjetër republikan, George W. Bush, në lidhje me shkurtimet e taksave, akuzat për tortura dhe strategjinë e SHBA-së në Irak.
McCain ka qenë po aq i ashpër edhe me udhëheqësit e Partisë Demokratike.
Ai ka qenë një nga kritikët më të ashpër të politikës së jashtme të presidentit Barack Obama. Ai ka vënë në pikëpyetje vendimin e tij për të tërhequr trupat nga Iraku dhe refuzimin e tij për të mos tërhequr “vija të kuqe” në Siri, pasi presidenti i këtij vendi, Bashar al-Assad, ka përdorur armët kimike kundër popullit të tij.
Në vitin 2017, McCain ka vizituar Kosovën.
Gjërat kanë ndryshuar pak edhe kur republikani Donald Trump ka marrë udhëheqjen e Shtëpisë së Bardhë në vitin 2017.
McCain është vënë në rolin e kundërshtarit kryesor të presidentit. Të dy ata janë përplasur shpesh publikisht në lidhje me politikën e jashtme, sidomos sa i përket Sirisë, Rusisë dhe Kinës.
Trump, i cili vazhdimisht nënçmon republikanët dhe demokratët që e kritikojnë, e ka quajtur McCainin “jokompetent”. Si kandidat, Trump është tallur me McCainin, duke thënë se “ai është hero i luftës, sepse është zënë rob”. Trump, i cili kurrë nuk ka shërbyer në ushtri, ka thënë se i pëlqen “njerëzit që nuk janë zënë robër”.
Në skenën ndërkombëtare, McCain ka qenë i njohur për qëndrime të drejtpërdrejta dhe për gjuhën e thjeshtë që i ka bërë shpesh çështjet e vështira politike më të lehta për t’u kuptuar.
Ai ka qenë mbështetës i fuqishëm i anëtarësimit të vendeve të Evropës Lindore në NATO.
Në prill të vitit 2017, McCain ka vizituar Malin e Zi dhe ka thënë se anëtarësimi i këtij vendi në aleancën perëndimore ushtarake është jetik për stabilitetin rajonal dhe përpjekjet e përbashkëta të aleatëve perëndimorë për t’i rezistuar një Rusie të rilindur.
Presidenti rus, Vladimir Putin, ka thënë në një intervistë të publikuar më 8 qershor të vitit 2017 se McCain – kritikues i tij, i cili ka thënë se Putin është kërcënim më i madh për botën sesa grupi ekstremist Shteti Islamik – jeton në “Botën e Vjetër”.
McCain po ashtu i është referuar Rusisë si “stacion gazi që maskohet si shtet”. Megjithatë, Putin ka thënë se e admiron patriotizmin e McCainit.
McCain ka lënë prapa gruan e tij Cindy, me të cilën ka qenë i martuar për 38 vjet, dhe pesë fëmijë.
