VOAL

VOAL

Please Wait ...
0%

Athinë, mbyllet Akropoli për vizitorët për shkak të temperaturave të larta

Athinë

Monumenti i lashtë i Akropolit në Athinë është mbyllur përkohësisht për vizitorët për shkak të temperaturave të larta të regjistruara në kryeqytetin grek, transmeton Anadolu Agency (AA).

Perla më e njohur arkeologjike në Greqi sot do të mbyllet për vizitorët në periudhën nga ora 13 deri në 17 për shkak të temperaturave prej 36 gradë Celsius, edhe pse ndjenja është se termometri tregon 40 gradë.

Meteorologët paralajmërojnë gjithashtu mot të nxehtë edhe të premten ndërsa autoritetet njoftojnë se Akropoli do të mbyllet përsëri nëse temperatura tejkalon 36 gradë.

Në vitin 1987, monumenti më i famshëm i Greqisë së lashtë u vendos në listën e vendeve të trashëgimisë botërore të UNESCO-s në Evropë, si një nga monumentet më të rëndësishme të trashëgimisë kulturore evropiane. Sipas të dhënave zyrtare, vitin e kaluar, Akropoli u vizitua nga 3.15 milionë njerëz.

Vuçiq: Objektivi kryesor i Prishtinës është ta marrë veriun

Presidenti i Serbisë, Aleksandër Vuçiq, ka thënë se situata në veri të Kosovës, është komplekse dhe po bëhet gjithnjë e më e vështirë, veçanërisht në spitalin e Mitrovicës së Veriut.

Vuçiq tha se vështirësitë më të mëdha të furnizimit në atë pjesë janë për shkak të taksës së vendosur nga Prishtina, ndaj mallrave nga Serbia dhe Bosnje e Hercegovina.

Duke komentuar hapjen e pikave të shitjes nga ana e autoriteteve të Prishtinës, pasi për dy ditë me rradhë, afaristët serbë i mbyllen dyqanet, presidenti Vuçiq tha se kjo është bërë me qëllim që “serbët të harrojnë lidhjen me atdheun e tyre”.

“Objektivi kryesor i këtyre masave të Prishtinës, është ta marrë veriun e Kosovës, dhe të dëbojë popullsinë serbe nga mbarë Kosova”, tha Vuçiq.

Të hënën, afaristët serbë në veriun e Kosovës, i mbyllën dyqanet pasi thanë se nuk posedojnë furnizim me mallra, për shkak të taksës 100 për qind të vendosur nga autoritetet në Prishtinë për mallrat nga Serbia.

Qeveria e Kosovës më pas vendosi të hapë pika të shitjes mobile për banorët e asaj pjese.

Gjatë një takimi të martën në mbrëmje, të Shoqatës së Afaristëve të veriut, u vendos që të mërkurën të hapen gjitha pikat e shitjes në veri.

Autoritetet në Serbi disa herë kanë thënë se veriu i Kosovës po ballafaqohet me “krizë humanitare”, por këto pretendime janë kundërshtuar nga ana e institucioneve të Kosovës, duke e quajtur këtë “inskenim të Beogradit”.

Çështja e marrëdhënie me Kosovën – Serbia papritur me sytë nga Uashingtoni

Prej ca kohësh politikanët në Beograd japin gjithnjë e më shumë deklarata për ndikimin vendimtar të Amerikës në procesin e zgjidhjes së ҫështjes së Kosovës, gjë që bie në kundërshtim me deklaratat e mëparshme. Kur Prishtina insistonte për përfshirjen e Amerikës në procesin e Kosovës, Beogradi i refuzonte idetë e tilla, duke theksuar se në këtë rast Serbia do të kërkonte që në dialog të përfshihej edhe Rusia.

Megjithatë, sidomos pas anulimit të samitit në Paris, që në Beograd mes të tjerash shihet edhe si një humbje e Bashkimit Evropian (BE), është evidente se tani gjithnjë e më shumë shpresat varen në fuqinë politike dhe diplomatike të Amerikës.

Ministri serb i Punëve të Jashtme Ivica Dačić tha se dështimi i samitit në Paris tregoi se pa SHBA asgjë nuk mund të kryhet, dhe pak më vonë dërgoi një serë komplimetsh në adresë të administratës amerikane, duke thënë se: administrata e Trumpit ka qenë shumë korrekte përsa i përket dialogut me Prishtinën dhe se pas një kohe të gjatë nuk është paraqitur si problem, por si një faktor që ҫon përpara dialogun”


 

Por ndoshta më ilustrative ishte deklarata e kryetarit të delegacionit parlamentar të Serbisë në Asamblenë e NATO-s, Dragan Shormaz, i cili theksoi se „do të kishte qenë më mirë që ҫështja e marrëdhënieve të Beogradit dhe Prishtinës të përfundohej para zgjedhjeve në SHBA vitin e ardhshëm, me ndihmën e Donald Trumpit dhe SHBA”. Shormaz theksoi më tej se presidenti i Serbisë Aleksandar Vuҫiҫ po punon për përmirësimin e raporteve me SHBA dhe se rezultatet janë të dukshme.

 

Vazhdim i lëvizjeve të gabuara

 

E gjithë seria e deklaratave tregon se Serbia nuk ka një strategji të mirëmenduar në politikën e jashtme, e kjo është vetëm vazhdim i lëvizjeve të gabuara të diplomacisë serbe, si në rastin kur kreu i shtetit u përfshi në fushatën e Hillary Klintonit, vlerëson për DW Naim Leo Beshiri, drejtor i Institutit të Çështjeve Evropiane.

 

„Kjo tani më duket si një përpjekje për të qëndruar në anën e Amerikës, e cila në mënyra të ndryshme përpiqet të lajë hesapet me BE. Nga ana tjetër Amerika e ka njohur Kosovën, por nuk është edhe aq kundër idesë së rishikimit të kufijve dhe këtu ndoshta presidenti Vuҫiҫ ndoshta ka gjetur vend për bisedime. Në Serbi do të konsiderohej si humbje më e vogël, nëse do të merreshin disa territore, edhe pse të gjitha analizat tregojnë se kjo do të sillte përfitime afatshkurtra, dhe do të hapnin shumë ҫështje të tjera në afat më të gjatë, veҫanërisht kur është fjala për Bosnnjë-Hercegovinën”, paralajmëron Beshiri.

 

Kosova – si një kartë për t‘i bërë presion BE

 

Unë dyshoj që Amerika të ketë ndonjë plan konkret për Kosovën, thotë për DW komentuesi i ҫështjeve të politikës së jashtme, Boshko Jakshiҫ, dhe shton: „Dështimi i BE për të bërë hapa përpara në dialog ka hapur ҫështjen e zmadhimit të rolit të SHBA. Ashtu si presidenti amerikan u bëri thirrje presidentëve të Serbisë dhe të Kosovës që të mos e humbasin shansin historik, tani edhe Departamenti i Shtetit i ofron ndihmë Brukselit të dobësuar, por thonë pa patur qëllim që të shtyjnë mënjanë evropianët. Akoma nuk e dimë se cila është përmbajtja e këtij shansi historik, ka mundësi që të mos e dinë as amerikanët – por e qartë është se Uashingtoni mund ta përdorë Kosovën për të vazhduar presionin ndaj aleatëve evropianë, për ta kuptuar përfundimisht se kush është i zoti i shtëpisë”, thotë Jakshiҫ.

Serbia pa veprime serioze

Nga ana tjetër, nëse shikoni faqet kryesore të mediave pranë pushtetit, Amerika vazhdon të jetë armiku numër një i Serbisë dhe këtë moment e thekson për DW edhe Naim Leo Beshiri. Kjo, sipas fjalëve të tij, nuk i shërben vullnetit të deklaruar publikisht nga Serbia, për të përmirësuar marrëdhëniet me Amerikën:

“Aktualisht në administratën amerikane ka një të ashtuquajtur garniturë antiestablishment, e cila i trajton në një mënyrë disi më të lehtë marrëdhëniet ndërkombëtare, gjë që në një farë mënyre është më pranë mentalitetit këtu dhe si Serbia i sheh këto marrëdhënie, kështu që në këtë moment është një klimë e favorshme, që Serbia të gjejë bashkëbisedues në Uashington. Por unë në fakt nuk shoh asnjë fushatë serioze, apo aktivitet të Serbisë në Uashington, që mund të sillte një pozitë më të mirë të Serbisë, kur është fjala për Kosovën”, vëren Beshiri.

Vuçiç para KS të OKB

Beogradi dhe Prishtina janë momentalisht në të njëjtën sintoni, sepse Serbia dhe Kosova mendojnë se roli i Amerikës do të jetë kyҫ për zgjidhjen e problemit të Kosovës. Kjo mund të nënkuptojë që të dyja palët nuk besojnë në fuqinë e Bashkimit Evropian për ta ҫuar deri në fund këtë proces, dhe po krijohet përshtypja se Uashingtoni po shihet gjithnjë e më shumë si negociator kryesor apo si partner në këto bisedime në vend të Brukselit. Boshko Jakshiҫ mendon se kjo është dukja në vështrim të parë, por se Beogradi në këtë kontekst kalon pa parë disa gjëra shumë të rëndësishme, para së gjithash që Uashingtoni natyrisht nuk do të heqë dorë nga pavarësia e Kosovës:

“Le të mos harrojmë se Uashingtoni prej kohësh përsërit të njëjtën mantër, që njohja reciproke është mënyra më efikase dhe më e shpejtë për zgjidhjen e problemit të Kosovës. Nëse Beogradi është i gatshëm të dëgjojë Uashingtonin, atëherë kjo mund të nënkuptonte që Beogradi i afrohet ndonjë varianti konsensi për pavarësinë e Kosovës”, thotë Jakshiҫ.

Kosova nuk është prioritet

Përpjekjen e Beogradit që në bashkëpunim me Uashingtonin të përshpejtohet procesi për Kosovën, apo që ai të përfundojë disi deri në fund të mandatit të parë të Trumpit, Naim Leo Beširi e sheh si një iluzion të zakonshëm.

“Mund të themi se kjo mund të ndodhë, nëse presidenti Trump e ka vënë Kosovën lart në agjendën e tij, por kjo momentalisht nuk është absolutisht e vërtetë dhe nuk ekzistojnë as shenjat, që do të jetë. Nëse Trump fiton mandatin e dytë, ekziston mundësia që Amerika të merret më shumë me rajonin.

Por këtu dua të them për të gjithë Ballkanin, sepse Amerika nuk është e interesuar veҫanërisht për Serbinë apo për vende të tjera të rajonit, por Ballkanin ata e shohin si të tërë. Dhe kjo përsëri mund të nënkuptojë që Amerika të heqë dorë nga ideja e rishikimit të kufijve, sepse ajo është e keqe për të gjithë rajonin”, vlerëson Beshiri.

Zgjidhja në kohën e Trumpit

Nxitimi, që është i dukshëm në Beograd dhe theksi në rolin amerikan për Kosovën, interpretohet si frikë nga kthimi i administratës demokrate në Uashington. Serbia vlerëson, dhe për këtë ka folur edhe ministri Daҫiҫ, se fitorja e kandidatit të demokratëve do të ishte një lajm shumë i keq për Serbinë dhe praktikisht kthim i administratës së Klintonit. Prandaj edhe retorika në Serbi është kthyer në periudhën pas fitores së Donald Trumpit, kur ka patur shpresa të mëdha dhe është pritur një mirëkuptim më i mirë nga administrata e re amerikane. Prandaj edhe Boshko Jakshiҫ paralajmëron se edhe këtë herë ҫdo gjë mund të përfundojë si në fillimin e mandatit të Trumpit, kur kemi parë tituj ‘Trump, o serb!’.

„Ne priremi të jemi euforikë, por postulatet bazë të politikës amerikane megjithatë nuk do të ndryshojnë. E qartë është se do të vazhdohet me presione të mëtejshme ndaj Serbisë, në mënyrë që të pajtohet me disa zgjidhje, të cilat edhe sot e kësaj dite zyrtarisht i refuzon”, përfundon Jakshiҫ./DW

Dodik: Thaçi në Samit jo si president por përfaqësues i Prishtinës

Presidenti i Republikës Serbe, Milorad Dodik i ka dërguar ftesë presidentit të Kosovës, Hashim Thaçi për të marrë pjesë në Samitin e Banja Llukës.

Mirëpo, Dodik ka theksuar se kjo ftesë nuk është për Thaçin si president i Republikës së Kosovës.

Ai ka thënë se Thaçi mund të marrë pjesë si përfaqësues i Prishtinës në këtë Samit.
“Nëse ai do të vijë si Prishtinë dhe nën fusnotë, le të vijë. Nëse nuk është problem për të, pse të jetë për ne”, ka deklaruar Dodik.

Më tej Dodik ka thënë se e ka bërë të qartë qëndrimin e tij për Thaçin duke shtuar se ai duhet të kuptojë që Kosova është pjesë e Serbisë.

Sipas kabinetit të Dodikut, pjesëmarrja e Kosovës në SEECP u zgjidh në vitin 2014 me pëlqimin e të gjithë pjesëmarrësve që nuk e njohin Kosovën: Serbia, Greqia, Rumania, Moldavia dhe Bosnje Hercegovina.

Dodik fton Thaçin në Samitin e SEECP-së që do të mbahet në Bosnjë

KOSOVË

Kryesuesi i Presidencës së Bosnje e Hercegovinës Milorad Dodik i ka dërguar ftesë zyrtare presidentit të Kosovës Hashim Thaçit për të marrë pjesë në samitin e Procesit të Bashkëpunimit në Evropën Juglindore, njofton portali Klix.ba.

Sipas Klix, presidenti Thaçi javën e ardhshme do të marrë vendimin nëse do t’i përgjigjet ftesës. Mediat boshnjake përkujtojnë se presidenti i Kosovës muajin e kaluar ka refuzuar të marrë pjesë në konferencën vjetore të BERZH-it në Sarajevë për shkak se Bosnja nuk e ka pranuar Kosovën, transmeton KP.

Samiti do të fillojë më 1 korrik 2019, ndërsa janë planifikuar takime të ministrave dhe presidentëve të vendeve të Evropës Jugore në Jahorinë dhe në zyrën e Presidencës së BeH. Sipas Klix, presidentët e shteteve të rajonit do të priten në qilimin e kuq para ndërtesës së Presidencës së BeH, ku do të jenë të vendosur pjesëtarët e Forcave të Armatosura të BeH.

Ftesa me nënshkrimin e Dodik tashmë u janë dërguar presidentëve të rajonit, sikurse edhe presidentit Thaçi, nëpërmjet Ministrisë së Punëve të Jashtme të BeH, shkruan Klix. Po ashtu, ftesat janë dërguar edhe në adresat e të gjitha ministrive të Jashtme të vendeve të Samitit të Procesi i Bashkëpunimit në Evropën Juglindore- SEECP.

Kandidati i partisë në pushtet për bashkinë e Stambollit, pranon humbjen

Kandidati i partisë në pushtet në zgjedhjet e përsëritura për Kryetar Bashkie në Stamboll, Binali Yildirim, pranoi humbjen ndaj kandidatit të opozitës, Ekrem Imamoglu.

Votimi i së dielës u mbajt pas anulimit të debatueshëm nga ana e zyrtarëve të zgjedhjeve të fitores së parë historike të zotit Imamoglu në mars, për teknikalitete pasi Presidenti Recep Tayyip Erdogan e kundërshtoi humbjen e kandidatit të tij.

Autoritetet e zgjedhjeve i hodhën poshtë pretendimet e partisë AKP të zotit Erdogan për manipulime, por urdhëruan rivotimin me argumentimin se disa nga fletët e votimit ishin të palexueshme. Opozita e dënoi vendimin dhe tha se votimi i së dielës ishte më i rëndësishëm se sa thjesht për të përcaktuar se kush do ta udhëhiqte qytetin.

Në një tregues të rëndësisë së zgjedhjeve, votimi filloi herët dhe me ritme të shpejta në një qytet kur zakonisht banorët votojnë vonë. Pjesëmarrja ishte e lartë.

Vëzhguesit thonë se strategjia e zotit Imamoglu për të shmangur politikën polarizuese dhe premtimi për gjithëpërfshirje, luajtën rol kyç në fitoren e CHP-së.

Edhe të dielën opozita u fokusua tek mesazhi i ndreqjes së demokracisë së dëmtuar të vendit dhe tek varfëria urbane që është zgjeruar që pas recesionit të vitit 2018.

Partia e presidentit Erdogan e kishte mbajtur kontrollin e Stambollit për 25 vjet.

49-vjeçari Imamoglu fitoi me rezultat të ngushtë ndaj kandidatit të qeverisë në zgjedhjet lokale të 31 marsit dhe madje mori detyrën e kryetarit të bashkisë së Stambollit për vetëm tre javë.

Pas fitores së parë dhe një zmbrapsjeje të hidhur ndaj kontrollit të Presidentit Erdogan, zoti Imamoglu u fokusua gjatë ripërballjes së ashpër elektorale tek varfëria në qytete, pasi vendi hyri në recension në fund të vitit të kaluar.

“Këtu nuk zgjidhet vetëm kryebashkiaku i Stambollit. Është njëkohësisht dita për të riparuar demokracinë nga dëmi i procesit të paligjshëm që i është imponuar vendit tonë. Kjo është kutia e votimit për ta riparuar atë”, deklaroi zoti Imamoglu.

Kandidati i maxhorancës, 63-vjeçari Binali Yildirim, një ish-kryeministër i vendit dhe ministër i hershëm i transporteve në qeveritë Erdogan, përcolli një mesazh paqtimi në ditën e rivotimeve:

“Mendoj se sot është dita të lëmë mënjanë hatërmbetjet dhe të përqëndrohemi tek e ardhmja. Nëse kam bërë ndonjë gabim, ose nëse jam treguar i padrejtë me rivalët dhe banorët, me apo pa dashje, tani u kërkoj bekimin e tyre. Shpresoj që zgjedhjet t’i shërbejnë të mirës së vendit”, deklaroi Binali Yildirim, kandidati i partisë në pushtet AK.

Vetë Kryeministri Erdogan u shfaq në mbështetje të ish-kryeministrit të tij dhe në vijën e parë të një fushate elektorale për këto zgjedhje të pjesshme lokale që perceptohen si një referendum për politikat e tij dhe si një test për demokracinë e trazuar të Turqisë.

“Do të ishte e dobishme të fillonim një konsolidim të (qeverisë) Ankarasë dhe të Stambollit (bashkisë). Mendoj se votuesit e Stambollit do të japin verdiktin e duhur”, deklaroi Presidenti Erdogan.

Stambolli përfaqëson 1/5-tën e vendit me popullsi prej 82 milionë banorësh. za

“Pranojeni, Kosova nuk është Serbi”! Habit deputeti serb

Kryetari i Lidhjes së Social-Demokratëve të Vojvodinës, Nenad Çanak, në një intervistë për gazetën Blic të Serbisë, ka deklaruar se Kosova nuk është pjesë e Serbisë, dhe se këtë realitet Serbia duhet ta pranojë në mënyrë që të zgjidhej përfundimisht problemi.

Ai shtoi se duke e njohur Kosovën, “neve na shtohen garancitë ndërkombëtare se interesat kulturore dhe ekonomike të Serbisë në Kosovë do të jenë të mbrojtura, e mbi të gjitha të përcaktuara”, transmeton Gazeta Express.

“Kosova nuk është Serbi, por një vend ku jetojnë disa njerëz që kanë njësi të plotë shtetërore”, tha Çanak.

Çanak, i cili është nga Vojvodina, e jo shpesh herë ka kërkuar më shumë autonomi për krahinën veriore të Serbisë, ka thënë se edhe Vojvodina duhet të zhvillohet duke e pasur pasurinë e vet e jo të ardhurat e saj të menaxhohen nga “disa zyra në Beograd”.

Ai gjithashtu tha se ka bashkëpunim të ngushtë me liderët e opozitës, por më së shumti bashkëpunon me liberalin Çedomir Jovanoviç.

Vuçiq: Takim në Paris nuk do të ketë

Drejtori i Zyrës për Kosovën në Qeverinë e Serbisë, Marko Gjuriq, u takua në Berlin me një delegacion të Prishtinës, për t’u përgatitur për takimin në Paris, por takim atje nuk do të ketë, tha presidenti i Serbisë, Aleksandar Vuçiq, transmeton Shërbimi i Ballkanit i Radios Evropa e Lirë.

Vuçiq u tha gazetarëve në Minsk, ku po qëndron për vizitë, se ai e ka dërguar Gjuriqin në atë takim dhe se kjo nuk është sekret.

“Nuk ka asnjë sekret, është përgatitje për takimin në Paris. Marko Gjuriqin e kam dërguar atje (në Berlin) dhe kam thënë se Serbia do të jetë konstruktive dhe se duam vazhdimin e dialogut dhe heqjen e taksës. Por shqiptarëve kjo nuk u bie në mend dhe nuk ka rezultate”, tha Vuçiq.

Qeveria e Kosovës deri tash nuk e ka konfirmuar takimin në Berlin, të cilit iu referua Vuçiq.

Vuçiq tha se edhe gjermanët dhe francezët e kanë kuptuar se kush nuk dëshiron dialog dhe kush e frenon atë dhe “kush dëshiron që në vend të Evropës, dikush tjetër të merret me dialog”.

Dialogu midis Kosovës dhe Serbisë për normalizimin e marrëdhënieve, i cili ka nisur qysh në vitin 2011, është ndërprerë në fund të vitit të kaluar, për shkak të taksës që Kosova u ka vënë prodhimeve të importuara nga Serbia.

Vuçiq këmbëngul se dialogu nuk do të vazhdojë pa heqjen e taksës.

Qeveria e Kosovës, e udhëhequr nga kryeministri Ramush Haradinaj, thotë se taksa nuk do të hiqet derisa Serbia ta njohë Kosovën – edhe pse thirrje për heqjen e saj kanë bërë edhe Bashkimi Evropian, edhe Shtetet e Bashkuara.

Më 1 korrik në Paris është paralajmëruar mbajtja e një takimi midis përfaqësuesve të Kosovës dhe Serbisë, nën organizimin e kancelares gjermane, Angela Merkel, dhe të presidentit të Francës, Emmanuel Macron.

Vuçiq: Do të kërkoj mbështetjen amerikane për çështjen e Kosovës

Presidenti i Serbisë, Aleksandar Vuçiq, tha se gjatë dhjetë ditëve të ardhshme do ta ftojë përsëri presidentin e SHBA-së, Donald Trump, të vizitojë Serbinë, si dhe do të “përpiqet të flasë” për Kosovën me disa bashkëpunëtorë të ngushtë të Trumpit. Ai tha se do të kërkojë mbështetjen për një zgjidhje kompromisi për çështjen e Kosovës.

Vuçiq i bëri këto komente kur u pyet për festimin në Kosovë të 20 vjetorit të hyrjes së trupave të NATO-s, dhe deklaratën e bërë nga zëvendës-ndihmës sekretari amerikan i shtetit, Metthew Palmer, se SHBA-ja do të vazhdojë të jetë në anën e Kosovës.

“Natyrisht që Amerika është në anën e Kosovës dhe do ta mbrojë atë. Këtë e bëjnë edhe Gjermania dhe vendet e tjera të Kuint-it, dhe për ne problemi është më i madh dhe më i vështirë”, tha Vuçiq.

Ai shtoi se ky është një problem kyç për Serbinë, por se vendi do të vazhdojë të luftojë për interesat kombëtare.

“Qëllimi ynë është që Serbia të mos ketë armiq, dhe se me ata që dikur ishim, përpiqemi të kemi marrëdhënie normale dhe të balancuara,” tha Vuçiq.
Zëvendës-ndihmës sekretari amerikan i shtetit, Metthew Palmer, në një intervistë për Radion Evropa e Lirë, u bëri thirrje Prishtinës dhe Beogradit të kthehen në tryezën e bisedimeve duke deklaruar se zgjidhja më e mirë është njohja e ndërsjellë. Ai, sërish porositi autoritetet e Kosovës të heqin taksën ndaj mallrave serbe, në mënyrë që të mundësohet vazhdimi i dialogut.

Edhe presidenti kroat Stjepan Mesić nuk ka si të mungojë në festimet e 20 vjetorit të çlirimit të Kosovës

Edhe ish-presidenti Stjepan Mesić nuk ka si të mungojë në festimet e 20 vjetorit të çlirimit të Kosovës.

Kroacia një aleat shumë i rëndësishëm i Kosovës.

Siç e shihni nga foto presidenti Stjepan Mesić është bashkë me presidentin Bill Clinton dhe Fatmir Sejdiun.

Bill Clinton,  Stjepan Mesic dy miqtë e kombit shqiptar.

 

Gjukanoviç: Kisha Ortodokse Serbe në Mal të Zi po ruan infrastrukturën e Serbisë së madhe

Presidenti malazez Milo Gjukanoviç e ka akuzuar Kishën Ortodokse Serbe (KOS) se po përpiqet ta ruajë infrastrukturën e Serbisë së madhe në Mal të Zi dhe ka theksuar se do ta ripërtërijë Kishën Ortodokse të Malit të Zi pa marrë para sysh nëse i pëlqen dikujt kjo ose jo, njoftojnë mjetet malazeze të informacionit.

“Kisha ortodokse Serbe në Mal të Zi po përpiqet ta ruajë infrastrukturën e Serbisë së madhe në të cilën ajo beson” dhe ka theksuar se “qëndrimi i saj për argjipeshkvitë përtej kufijve është në kundërshtim me parimet bazë të organizatës ortodokse kudo nëpër botë”.

“Kisha Ortodokse Serbe mendon se Mali i Zi gabimisht është bërë i pavarur dhe se me kohë do të ndreqet gabimi e do të kuptohet nevoja për të nisur ndërtimin e Serbisë së madhe. Ne duhet, natyrisht me ekzistencën tonë, vendosmërinë dhe vizionin t’i themi se nga ajo nuk ka asgjë”, ka shtuar më tej presidenti M. Gjukanoviç.

Gjukanoviç ka bërë të ditur se Mali i Zi është i pagjunjëzuar për ndërtimin e një shoqërie shumetnike, por ka theksuar se ka mbetur edhe një hap i rëndësishëm me të cilin do të ndreqet padrejtësia e madhe që i është bërë Malit të Zi në fillim të shekullit 20-të, e ajo është përtëritja e Kishës autoqefale ortodokse të Malit të Zi (KOMZ).

Gjukanoviq ka përfunduar se “Mali i Zi bashkëkohor nuk do të lejojë të jetojë nën diktatin e një organizate fetare e cila përfaqëson reliktin e së kaluarës”.

Anlistët malazezë në vazhdimësi kanë theksuar se definimi përfundimtar dhe rrumbullakësimi i shtetësisë dhe qenies kombëtare është kisha autoqefale malazeze. Autoqefalia e kishës malazeze do të ndërpresë aktivitetet shkatërruese të Kishës Ortodokse Serbe. Ata janë të bindur se “Kisha Ortodokse Serbe është pjesa më e errët e qenies politike dhe nacionale serbe. Në Mal të Zi ajo është më shumë institucion paramilitar, parapolitik dhe parakulturor se sa institucion shpirtëror dhe fetar në kuptimin zanafillor kristian”, dhe për kishën serbe Mali i Zi mbetet vetëm nocion serb apo shprehje gjeografike, thonë analistët.

Qeveria e Malit të Zi ua ka ndaluar qëndrimin në këtë vend 30 priftërinjve të Kishës Ortodokse Serbe. E pazgjidhur është ende çështja e pronave të kishës serbe, kur Mbreti Aleksandar më 1919 e zhbëri kishën malazeze dhe krejt pasuria e saj i kaloi Kishës Ortodokse Serbe.

Ambasada amerikane: Daçiq duhet të mendojë për veprimet e tij

Ambasada amerikane në Beograd reagoi pasi ministri i Jashtëm i Serbisë, Ivica Daçiq, iu bashkua një fushate në internet, duke shkruar në bankënotën 100-dollarëshe me alfabet cirilik “Kosova është Serbi”.

“Në vend se të shkatërrojë bankënotën me imazhin e shkencëtarit të madh amerikan dhe burrështetasit, Benjamin Franklin, ministri Daçiq do të mund të mendonte ndoshta për thënien e tij: ‘Ji në luftë me veset tuaja, e në paqe me fqinjët”, thuhet në përgjigjen e Ambasadës së SHBA-së në Beograd dërguar Shërbimit të Ballkanit të Radios Evropa e Lirë.

Presidenti i Kosovës, Hashim Thaçi, tha se fushata, në të cilën ka marrë pjesë edhe zyrtari i lartë serb, është denigruese për vetë serbët.

Daçiq, në një deklaratë për gazetën serbe “Blic”, e arsyetoi qasjen e tij, duke thënë: “Kjo është politika jonë shtetërore, këtë e them vazhdimisht dhe pse mos ta shkruaj”.

Ai po ashtu tha se paratë nuk ishin të tijat dhe se qasja e tij nuk ka lidhje me Shtetet e Bashkuara.

Sipas mediave serbe, Daçiq tha se fjalët “Kosova është Serbi” do t’i shkruante në bankënotën e secilit vend që e thotë të kundërtën.

Në mbrojtje të ministrit Daçiq u shpreh udhëheqja e Partisë Socialiste të Serbisë, e cila kryesohet nga Daçiq.

“Mbi shefin e diplomacisë serbe, Ivica Daçiq, bëhet presion i madh, me kërcënime të hapura për vdekje”, tha Vlladan Zagragjanin, zyrtar i Partisë Socialiste të Serbisë.

Sipas nënkryetarit të Qendrës joqeveritare për Politikë të Jashtme në Serbi, Dragan Gjukanoviq, fakti që Daçiq i është bashkuar fushatës në internet nuk ka asnjë efekt diplomatik.

“…ndërsa sa i përket nivelit simbolik, nuk shoh se cili është mesazhi dhe pse shkruhet në bankënota. Në anën tjetër, nuk mendoj se kjo do ta ndryshojë gjendjen në terren”, tha Gjukanoviq.

Si ka nisur kjo?

Në deklaratën e kryeministres së Serbisë, Ana Bërnabiq, e cila, duke folur për udhëheqësit e Kosovës, tha se ka punë me “njerëz që kanë dalë prej malit”, qytetarët e Kosovës reaguan me një fushatë në internet, duke postuar fotografi me hashtag-un #LiterallyJustEmergedFromTheWoods, që do të thotë “të sapodalë nga mali”.

Disa ditë më vonë, pronari i kafenesë në Beograd “Pavle Korçagin”, Vojin Cuciq, iu bëri thirrje ndjekësve në mediat sociale që në bankënotat e dollarit dhe euros të shkruajnë “Kosova është Serbi” dhe fotografitë e tyre t’i shpërndajnë online.

“Sikur secili serb të shkruante vetëm një bankënotë, kjo do të ishte fushatë e mrekullueshme”, thuhet në një nga postimet në Instagram të kësaj kafeneje.

Aksioni u zhvillua me mbishkrime edhe në bankënotat e Australisë, Danimarkës, Arabisë Saudite, Britanisë së Madhe dhe disa vendeve të tjera.

Fushata mori vëmendje më të madhe pasi asaj iu bashkua ministri serb, Daçiq.

Disa qytetarë të Kosovës u kundërpërgjigjën, duke postuar në mediat sociale bankënota me mbishkrimin “Kosova është Kosovë”. Në mesin e këtyre bankënotave u vërejt edhe dinari serb.

A është shkelje shkrimi në bankënota?

Dëmtimi i një monedhe, sipas ligjit në Shtetet e Bashkuara, është shkelje që dënohet me gjobë financiare ose burgim deri në gjashtë muaj, por vetëm nëse dëmtimi “bëhet me qëllim që letrat me vlerë të bëhen të papërshtatshme për përdorim”.

Nga kjo rrjedh se rregulloret amerikane nuk e ndalojnë shkruarjen e mesazheve në bankënota, përveç nëse ato dëmtohen aq shumë saqë nuk mund të përdoren.

Në Serbi, shkruarja në bankënota nuk është kundërvajtje, por bankënotat e dëmtuara konsiderohen të papërshtatshme për qarkullim.

Përgatiti: Valona Tela

Vuçiq thotë se e mbështet përcaktimin e kufirit me Kosovën

Presidenti i Serbisë, Aleksandar Vuçiq, ka thënë se ai pajtohet për përcaktimin e kufirit me Kosovën duke theksuar se kjo do të ishte “absolutisht gjëja më e shëndetshme për Serbinë dhe serbët”.

Ai i tha Televizionit Prva, se një referendum në këtë temë do të thirret nëse ai do të ketë diçka për t’i ofruar popullit, megjithatë, siç ka thënë, ende nuk ka një propozim konkret.

“Unë jam për përcaktimin e kufirit dhe për këtë nuk turpërohem, por serbët janë kundër kësaj, dhe unë e kam kuptuar porosinë e popullit. Ne, nuk jemi të gatshëm të dëgjojmë të vërtetën për Kosovës, edhe kur të gjithë e dinë atë. Njerëzit nuk dëshirojnë ta pranojnë sepse kjo prek emocionet e tyre”, ka thënë Vuçiq.

Duke folur për sesionin e ardhshëm të Këshillit të Sigurimit të OKB-së, për gjendjen në Kosovë, Vuçiq tha se seancat e Këshillit të Sigurimit janë gjithmonë të rëndësishme për “çështjen e statusit”, por ai vlerësoi se samiti i Parisit në fillim të korrikut, i organizuar nga presidenti i Francës, Emmanuel Macron dhe kancelarja gjermane, Angela Merkel është “shumë i rëndësishëm”, megjithatë, siç tha ai, nuk është e sigurtë nëse ai do të mbahet fare.

Podgoricë: Vllado Zmajeviq dënohet me 14 vjet burg për krime lufte në Kosovë

Gjykata e Lartë në Podgoricë e ka dënuar Vllado Zmajeviqin me 14 vjet burg për krime lufte kundër popullatës civile në Kosovë.

Ai u shpall fajtor për vrasjen e katër civilëve shqiptarë në fshatin Zhegër të Gjilanit në vitin 1999.

Kryetari i Trupit Gjykues, Dragoje Jovoviq, në shpjegimin e aktgjykimit të tij, deklaroi se dëshmitë e paraqitura padyshim se “vërtetuan se krimet e luftës janë kryer, pasi për ato kanë dëshmuar dëshmitarët, por edhe vetë i akuzuari e ka pranuar në fazën e parë hetimore, por më vonë i ka mohuar ato deklarata”.

Zmajeviq ka të drejtë të apelojë aktgjykimin në Gjykatën e Apelit.

Në gusht të vitit 2016, Prokuroria Speciale e Mali të Zi për krim të organizuar dhe krime lufte konfirmoi se kishte arrestuar Vllado Zmajeviqin (47 vjeç) nga Nikshiqi me dyshimin se “ka kryer krime lufte kundër popullatës civile në Kosovë më 1999”.

Drejtori i Fondit për të Drejtën Humanitare në Kosovë, Bekim Blakaj i kishte thënë Radios Evropa e Lirë, se Vllado Zmajeviq ishte i pari në listë për krimet në Zhegër të Gjilanit.

Në bazë të hulumtimeve gjatë vitit 2000, Fondi ka dokumentuar se në këtë krim janë vrarë gjashtë persona, më 29 dhe 30 mars 1999.

“Në bazë të dëshmive të dëshmitarëve, më 29 mars 1999, tetë autobusë, sipas të gjitha gjasave, me vullnetarë të Ushtrisë Jugosllave, kanë arritur në fshat dhe kanë vrarë gjashtë persona. Natyrisht, të gjithë civilë të përkatësisë shqiptare, në mesin e të cilëve edhe pleq dhe gra”, kishte deklaruar Blakaj.

Ish- Presidentët dhe ish-Kryeministrat e rajonit iu japin goditjeve ideve të Vuçiqit dhe Thaçit

Në një konferencë rajonale në Shkup të titulluar “ Integrimet europiane në udhëkryq” nën organizimin e Klubit të Podgoricës, pjesë e të cilit janë ish –Presidentë dhe Kryeministra të vendeve të rajonit Kroacisë, Malit të Zi, Kosovës, Maqedonisë, Shqipërisë, Bosnjës dhe Sllovenisë janë kritikuar idetë për korrigjimin e kufijve

Në një deklaratë të ish – Presidentëve të rajonit ku kanë marrë pjesë ish –Presidenti i Kroacisë Stipe Mesiq, ish –Presidenti i Kosovës Fatmir Sejdiu, Ish – Presidenti i Shqipërisë Alfred Mojsiu, ish- Presidenti i Maqedonisë Branko Crvenkovski dhe ish udhëheqës tjerë të rajonit është miratuar edhe një deklaratë ku theksohet se “ ne anëtarët e Klubit të Podgoricës shprehim gatishmërinë tonë që të bëjmë gjithçka që të parandalojmë që Ballkani Perëndimor përsëri të jetë viktimë e ideve dhe trendëve retrograde”

Klubi i Podgoricës ndër të tjera ka theksuar se është e një rëndësie të veçantë që BE të aprovojë datën e fillimit të negociatave për anëtarësim të Shqipërisë dhe Maqedonisë së Veriut në BE.

“Shtyrja e mëtejme e këtyre vendimeve në kontekstin e tashmë gjeopolitik dhe gjeoekonomik mund të ketë ndikim të dëmshëm edhe në nivel të brendshëm edhe në atë rajonal. Jemi dëshmitarë të sfidave të rendit global që bazohet në vlerat e përbashkëta dhe demokratike të shoqërive dhe mundësinë që ato të kenë ndikim negativ në Ballkanin Perëndimor” thuhet në deklaratën e ish-Presidentëve dhe kryeministrave.

Më pas ata kanë bërë edhe një referencë direkte në lidhje me situatën në Kosovë e në Bosnjë e Serbi duke theksuar se idetë retrograde të ndarjeve që i shkojnë kundër bashkëpunimit rajonal e që nxisin izolacionizëm, politikën e kthimit prapa dhe që bazohen në popullizëm në vend se të bazohen në vlerat e përbashkëta dhe standardet europiane, për fat të keq, nuk janë vetëm kujtime të largëta historike por përbëjnë një kërcënim serioz për Ballkanin Perëndimor.

Jovanoviçi ia mbyll gojën Vuçiçit e Sheshelit në Kuvend: Kosova është shtet, e kemi humbur

Javën e kaluar në Parlamentin e Serbisë, është mbajtur një seancë në të cilën është diskutuar për Kosovën. Aty kanë marrë pjesë edhe krerët e shtetit serb, përfshirë presidentin serb, Aleksander Vuçiq.

E një seancë të tillë e kishte bojkotuar opozita serbe, por jo edhe kreu i Partisë Liberale Serbe, Çedmoir Jovanoviq, i cili me fjalimin e mbajtur kishte heshtur të gjithë, madje edhe Vuçiqin, Gjuriqin e Sheshelin.

Jovanoviq fare pa iu trembur syri, i thoshte Vuçiqit se shqiptarët e Kosovës kanë të drejtë të kenë shtetin e tyre, sikurese çdo popull tjetër, duke ia përsëritur disa herë, se ajo që është humbur një herë nuk mund të humbet për të dytën.

“Nuk mund të humbet diçka për herë të dytë, ajo që ne në Kosovë kemi humbur. Sado e rëndë që mund të jetë kjo, nuk mundet. Nuk mund të qëndrosh dy herë në ujë të njëjtë”, ka thënë Jovanoviq, transmeton Gazeta Express.

Sipas tij, me Kosovën mund të fitohet vetëm një gjë, paqja.

“Thuajeni atë që duhet thënë patjetër. Ne në Kosovë, mund të fitojmë atë që asnjëherë si popull nuk e kemi pasur, paqen zotri president. Paqen mund ta fitojmë”, ka shtuar kreu i liberalëve të Serbisë.

Gjatë fjalimit të tij, Jovanoviq i ka kujtuar Vuçiqit se shqiptarët janë populli i fundit në Ballkan, që ka luftuar për çlirim kombëtar. Ai përsërit që Serbisë para paqes më Kosovën, i duhet paqe me vetveten.

“Populli shqiptar është populli i fundit ballkanik, që bëri luftën e tij për çlirim kombëtar. Për shtetin e tij kombëtar, në një kohë që askush nuk e bën. Me më pak, ose më më shumë gjak, siç kanë qenë të gjitha luftërat kombëtare në Ballkan. Neve na nevojitet paqe me shqiptarët. Por para kësaj paqe, na duhet paqe me vetveten .. paqe me vetën tonë”

Ai thotë se nuk duhet humbur kohë dhe se duhet filluar bisedimet për paqe, duke thënë se taksa e vendosur nga Kosova nuk është problem i Serbisë, por i një lufte të brendshme politike ndërmjet Haradinajt dhe Thaçit.

Megjithatë Jovanoviq thotë se këtë luftë të brendshme në Kosovë, dikush po e shfrytëzon për të bllokuar dialogun.

“Shikoni se si është bota në të cilën po jetojmë. Është turbulluar nga koka. Të gjithë thonë se duhet të presim edhe pak, të presim edhe pak. Hajde të presim pra. Por ne nuk kemi kohë. Tashmë koha nuk numërohet me vite, por me muaj. Patjetër që duhet të vazhdohen bisedimet. Kush e di se çfarë do të dali tjetër pas asaj taksës. Haradinaj nuk dëshiron që ta shoh Hashim Thaçin se si e bën Kosovën shtet. Por a është ky problemi ynë? Jo. Nuk është ky problemi ynë, është i tyre. A e ka shfrytëzuar dikush këtë problem të tyre, për të bllokuar bisedimet?. PO!. “, ka shtuar ndër të tjera Jovanoviq.

Politikani serb thotë që nëse Serbia nuk ndihmon veten dhe shqiptarët që të bëjën Kosovën një shtet normal, atëherë shumë probleme të tjera do të lindin.

“Nëse ne nuk e ndihmojmë shqiptarët dhe veten që ta bëjnë Kosovën shtet normal, do të bashkohet me Shqipërinë, pastaj do të hapet problemi i Maqedonisë, pastaj do të hapet problemi i Malit të Zi, i veriut të Greqisë”, është shprehur Çedomir Jovanoviq, transmeton Gazeta Express.

Jovanoviq në këtë fjalim në Kuvend para syve të Vuçiqit e Gjuriqit, përsëriste vazhdimisht faktin se Kosova ka të drejtë të ketë shtetin e vet.

“Duhet të bëjmë gjithçka për të vendosur paqe me shqiptarët. Ai popull sigurisht që duhet të ketë shtetin e vet. Ai popull duhet patjetër që të ketë shtetin e vet, siç duhet edhe ne”, shprehet Jovanoviq.

Në fund thotë se duhet gjetur një kompromis me shqiptarët, por jo një kompromis në të cilin janë të përziera politika të vejtra, të cilat i kanë sjellë Serbisë vetëm humbje.

“Gjeni një kompromis, por në atë kompromis të mos ketë politika të vjetra, dhe nuk guxon të ketë asnjë mirëkuptim për idetë humbëse që na kanë sjellë në këtë situatë”, ka përfunduar Jovanoviq.

E gjatë gjithë këtij fjalimi të Çedomir Jovanoviq, Vuçiq dhe Gjuriq qëndronin të heshtur./GazetaExpress/

 

Vulin i reagon keq presidentit maqedonas që foli kundër ndarjes së Kosovës

Ministri i Mbrojtjes së Serbisë, Aleksander Vulin, i ka reaguar ashpër presidentit të Maqedonisë Veriore, Stevo Pendarovski, i cili ka kundërshtuar ashpër idenë e Hashim Thaçit dhe Aleksander Vuçiqit, për korrigjim të kufijve ndërmjet Kosovës dhe Serbisë.

Vulin ka thënë se si i zgjidhin punët e veta Kosova dhe Serbia, nuk është një temë që i takon të flasë Pendarovskit.

“ Se si dëshiron të zgjidh Serbia problemet e brendshme nuk është temë për presidentin e Maqedonisë fqinje. Nëse idjea për korrigjim të kufijve është e ‘tmerrshme dhe e papranueshme për shekullin 21”, atëherë lë ta tërheq Maqedonia njohjen për Kosovën’, ka thënë Vulin.

Vulin ndër të tjera ka thënë se Pendrovski duhet të respektojë Serbinë, duke shtuar se ndoshta duhet të flasë pak edhe për nismën e Thaçit dhe Ramës për krijimin e “Shqipërisë së Madhe”, shkruan B92, transmeton Gazeta Express.

Pendarovski dje ka thënë se ideja për prekje të kufijve nuk i përket shekullit 21, dhe sipas tij nuk mund të ketë diçka më të keqe, se sa dikush të përpiqet të shtyjë një ide të tillë përpara./GazetaExpress/

Vuçiq: Kosova do të shkojë drejt bashkimit me Shqipërinë

Presidenti i Serbisë, Aleksandar Vuçiq, tha se është absolutisht i bindur se gjërat do të zhvillohen në drejtimin, që, sipas tij, e ka paralajmëruar presidenti i Kosovës, Hashim Thaçi, kur ka folur për mundësinë e bashkimit të Kosovës me Shqipërinë.

“Jam absolutisht i bindur se gjërat do të zhvillohen në këtë dejtim. Ne do të reagojmë në mënyrë serioze dhe të përgjegjshme, por të ashpër dhe të vendosur”, tha Vuçiq, transmetojnë mediat serbe.

Ditë më parë, presidenti i Kosovës, Thaçi, tha se po krijohen rrethana të reja, të cilat, sipas tij, e ofrojnë bashkimin e Kosovës me Shqipërinë si zgjidhjen më të mirë.

Thaçi inkurajoi Parlamentin e Kosovës dhe atë të Shqipërisë të nxjerrin deklaratën e bashkimit.

Por Vuçiq tha se komuniteti ndërkombëtar e ka siguruar se një gjë e tillë nuk do të ndodhë.

“Para tri ditësh iu kam thënë përfaqësuesve evropianë për këtë që po më pyesni (bashkimin e Kosovës dhe Shqipërisë) dhe ata më kanë thënë: Aleksandar, kjo nuk do të ndodhë. Ne nuk do ta lejojmë kurrë”, tha Vuçiq, por shtoi se pikërisht këto deklarata janë arsyeja përse ai beson se një gjë e tillë do të ndodhë.

Kosova, qysh në vitin 2011, është në proces të bisedimeve për normalizimin e marrëdhënieve me Serbinë.

Por procesi ka ngecur qysh në fund të vitit të kaluar, për shkak të, siç është thënë, taksës që u ka vënë Kosova prodhimeve të importuara nga Serbia.

Rekomandimi i KE për Shqipërinë, Athina: Të drejtë vetëvendosje për minoritetin

GREQI

Athina zyrtare ka reaguar pas marrjes së rekomandimit pozitiv nga Komisioni Europian për Shqipërinë për negociatat. Ministria e Jashtme e Greqisë deklaron se mbështet bashkimin e Shqipërisë me Unionin duke përmbushur të gjitha kushtet dhe duke evidentuar sërish çështjen e minoritetit grek në Shqipëri.

Sipas Ministrisë së Jashtme greke, respekti për minoritetin është i lidhur drejtpërdrejt me perspektivën europiane të vendit. Greqia kërkon garantim të së drejtës për vetëvendosje të minoritetit në të gjithë territorin shqiptar.

“Greqia po punon për të përmirësuar, marrëdhëniet dypalëshe me Shqipërinë dhe mbështet në mënyrë të palëkundur mënyrën me të cilën i bashkohet unionit evropian, duke përmbushur te gjitha kushtet e caktuara.
Siç është e qartë dhe në raportin përkatës të Komisionit Europian respekti për të drejtat e minoritetit grek është i lidhur drejtpërdrejt me perspektivën europiane të Shqipërisë dhe është pjesë integrale e 5 prioriteteve për hapjen e negociatave me Bashkimin Evropian.
Në këtë kontekst, ne presim garantim të plotë të së drejtës së vetëvendosjes së minoritetit në të gjithë territorin e Shqipërisë. Një masë e premtuar nga Shqipëria për t’u miratuar deri në maj 2018″, deklaron MPJ greke.

“Njerëz që vijnë nga mali”, kryeministrja serbe fyen rëndë shqiptarët – reagon Prishtina

Ministri i Jashtëm i Kosovës, Behgjet Pacolli, i ka dërguar një porosi kryeministres së Serbisë, Ana Brnabiq se ajo nuk do të mund të hyjë në Kosovë për sa kohë ndjek një ideologji raciste dhe të sëmurë kundër popullit të Kosovës dhe ndërmjet etnive që jetojnë këtu.

 

Regimi i shefit të diplomacisë kosovare vjen pasi kryeministrja serbe shqiptarët e Kosovës sot i quajti “njerëz që vijnë nga mali”.

Pacolli, përmes një postimi në Facebook, ka thënë se “I pështirë dhe krejtësisht të papranueshëme komentet e Kryeministres serbe Ana Brnanic në prani të shefit të Delegacionit të BE-së në Serbi, Sem Fabrizi ndaj Kosovës “që kemi të bëjmë me njerëz që vijnë nga mali”.

Postimi i Pacollit në Facebook:

“I pështirë dhe krejtësisht të papranueshme komentet e Kryeministres serbe Ana Brnanic në prani të shefit të Delegacionit të BE-së në Serbi Sem Fabrizi ndaj Kosovës ‘që kemi të bëjmë me njerëzit që vijnë nga mali’. 

Ky racizëm i institucionalizuar në Serbi, që ka brumin në ideologjinë ultranacionaliste të sëmurë që promovon Qeveria e Ana Brnabicit. 

Shpresoj që Evropa sot të kuptojë se me çfarë lloj njerëzish kemi të bëjmë, me ata që kanë mbështetur vrasjet masive dhe mohojnë krimet e luftës të kryera nga Beogradi në ish-Jugosllavi.

E them me përgjegjësi që sa të jem unë ministër i jashtëm i Republikës së Kosovës, nuk do të lejojë që Kryeministrja serbe të hyjë në Kosovë, për sa kohë që ajo të ndjek një ideologji raciste dhe të sëmurë kundër popullit të Kosovës dhe ndërmjet etnive që jetojnë këtu”, ka shkruar Pacolli.

Mediat serbe kanë raportuar se kryeministrja serbe, Ana Brnabiq, në një konferencë shtypi sot në Beograd, me shefin e delegacionit të BE-së në Serbi, Sem Fabrizio, duke folur për zhvillimet e fundit në raportet mes Kosovës dhe Serbisë, ka fyer rëndë shqiptarët e Kosovës, duke thënë se “keni punë me njerëz të cilët faktikisht kanë dalë nga mali. Për ata është njësoj nëse atje ka luftë ose jo, dhe kjo më shqetëson”.

Turqia liron shkencëtarin e NASA-s

Serkan Golge

Një shkencëtar turko-amerikan, i cili ka punuar për agjencinë hapësinore të Shteteve të Bashkuara NASA, u lirua nga një burg në Turqi.

Serkan Golge, i cili është mbajtur tre vjet në izolim nën akuza që lidhen me terrorizmin, u lirua pas një bisede telefonike midis presidentit turk, Recep Tayyip Erdogan, dhe presidentit amerikan, Donald Trump.

Shpjegim zyrtar për lirimin e 40-vjeçarit nuk u dha.

Uashingtoni i ka kërkuar vazhdimisht Turqisë të lirojë Golgen.

Golge është arresuar në vitin 2016, derisa ka qenë për pushime në Turqi.

Arrestimi ka pasuar përpjekjen e ushtrisë turke për grushtshtet kundër Erdoganit.

Ai është akuzuar për pjesëmarrje në një organizatë terroriste dhe është dënuar në shkurt të vitit 2018 me shtatë vjet e gjysmë burgim.

Dënimi i tij është reduktuar në pesë vjet pas një apeli.

“E mirëpresim lajmin për lirimin nga burgu të Serkan Golges”, tha zëdhënësja e Departamentit amerikan të Shtetit, Morgan Ortagus.

Golge ka studiuar efektet e rrezatimit tek astronautët që udhëtojnë drejt planetit Mars.

Gruaja e tij tha se puna e tij është ndërprerë pasi ai është dënuar.

Protesta në Beograd kundër një festivali ku prezantohet kultura shqiptare e Kosovës

Grupe ultranacionalistësh serbë protestuan të mërkurën në Beograd kundër festivalit me emrin “Mirdita, Dobar Dan”, nëpërmjet të cilit synohet shkëmbimi i veprimtarive artistike si mjet për normalizimin e marrëdhënieve ndërmjet Kosovës dhe Serbisë.

Forcat e policisë rrethuan qendrën kulturore në Beograd ku nga sot deri më 1 qershor mbahet festivali, ndërsa protestuesit që po brohorisnin “Kosova është Serbi” dhe “Kosovën nuk e japim”, u përleshën më forcat e policisë.

Festivali që ka filluar të mbahet që nga viti 2014, prezanton filma, ekspozita dhe organizon debate për të afruar serbët dhe shqiptarët, thellësisht të ndarë që nga lufta e viteve 1998 – 1999.

Festivali organizohet nga Nisma e të Rinjve për të Drejtat e Njeriut në Serbi në bashkëpunim edhe me organizata nga Kosova.

“Festivali dërgon mesazh të qartë te publiku por edhe elitat politike se pengesat duhet të hiqen në vend që të krijohen të reja”, thuhet në një deklaratë të organizatorëve.

Festivali u hap mes tensionesh të larta, një ditë pasi që Serbia vuri në gjendje të lartë gatishmërie trupat e saj, pas një operacioni arrestimesh të policisë së Kosovës të peronave të dyshuar për përfshirje në veprimtari kriminale, pjesa më e madhe në komunat veriore të banuara me shumicë serbe.

Serbia vazhdon të kundërshtojë pavarësinë e Kosovës të shpallur në shkurt të vitit 2008 me mbështetjen e Shteteve të Bashkuara dhe vendeve kryesore të Bashkimit Evropian. Por ajo është përfshirë në një proces bisedimesh për normalizimin e marrëdhënieve me Kosovës në shkëmbim të integrimit në Bashkimin Evropian.

Të hënën presidenti serb, Aleksandër Vuçiç, tha në parlamentin e Serbisë se vendi duhet të pajtohet që e ka humbur kontrollin mbi Kosovën, por nuk do të heqë dorë nga përpjekjet për të mbrojtur popullatën serbe në Kosovë.

*Mbështetur në agjencitë e lajmeve

Dhjetëra të vdekur e të zhdukur nga mbytja e një anijeje në Danub

Të paktën 7 veta humbën jetën dhe afro 20 syresh u zhdukën, kur një anije me turistë nga Koreja e Jugut u mbyt në ujërat e ftohta e të rrëmbyeshëm të Danubit në kryeqytetin hungarez.

Sipas autoriteteve, anija u përplas me një lundër tjetër turistike përpara se të përpihej nga uji në afërsi të parlamentit hungarez në Budapestin e përfshirë nga shira të rrëmbyeshëm.

Në Seul, ministria e Jashtme tha se në anije kishte 30 turistë si dhe pesë pjesëtarë të ekuipazhit. Shtatë qytetarë nga Koreja e Jugut u shpëtuan, shtatë humbën jetën, ndërsa 19 llogariten te zhdukur.

Operacioni i shpëtimit është vështirësuar shumë nga rrymat e forta në Danubin e fryrë nga reshjet e mëdha.

Rumani: Dënohet për korrupsion udhëheqësi i partisë në pushtet

Gjykata e Lartë e Rumanisë dënoi me tre vjet e gjysëm burg, një nga njerëzit më të fuqishëm të vendit, Liviu Dragneas, udhëheqësi i Partisë Socialdemokrate në pushtet, nën akuzat për korrupsion dhe abuzim me pushtetin.

Dragnea u gjend fajtor vitin e kaluar për mbajtjen e dy grave në borderonëe një agjencie të ndihmave sociale për familjet, ndërkohë që ato punonin për partinë. Vendimi i Gjykatës së Lartë të Rumanisë erdhi vetëm një ditë pasi partia e Dragneas pësoi humbje të mëdha në zgjedhjet e Parlamentit Europian.

Thirrja nga Serbia: Me shqiptarët na duhet paqe, jo territore!

SERBI

Lideri i Partisë Liberal Demokratike të Serbisë (LDP), Çedomir Jovanoviç e ka porositur sot presidentin e Serbisë, Aleksandar Vuçiç,  që për zgjidhjen e çështjes së Kosovës të jetë i tillë çfarë nuk ishin të gjithë të tjerët para tij, përkundër të gjitha kufizimeve dhe të gjitha gabimeve, “sepse ne kemi nevojë për paqe, e jo për territore”.

“Ne nuk kemi më kohë. Duhet të vazhdoni negociatat”, tha Jovanoviç, në mbledhjen e Kuvendit të Serbisë, në të cilën Presidenti i Serbisë, raportoi për çështjen e Kosovës. Siç raportojnë mediat serbe, Jovanoviç potencoi se në përpjekjet e tij për të gjetur një zgjidhje për Kosovën, Vuçiçi është krejtësisht i vetëm.

“Do të doja që në Kishë të gjesh diçka që mund të sillte paqe tek populli ynë i egërsuar, por nuk ka të tillë. Do të doja ta gjeni edhe në Akademi të Shkencave, ku ka njerëz të guximshëm, por as atje nuk do ta gjeni”, tha ai.

Jovanoviç shtoi se do të kishte dëshirë që, po të kishte mundësi. vetë arrijë një zgjidhje për Kosovën në vend të Vuçiçit. “Ju lutem më tregoni se çfarë të bëj unë që populli ynë dhe fëmijët tanë të gjejnë paqe dhe lumturi. Ne në Kosovë mund të fitojmë atë që kurrë nuk kemi pasur – paqen me shqiptarët, por para kësaj ne duhet të gjejmë paqe me veten tonë”, tha Jovanoviç.

Sipas Jovanoviçit, në shtatë vitet e fundit është humbur kohë, në të cilën serbët kanë mundur të përpiqen të bëhen së paku një popull i mirë. Ai e ilustroi këtë me pritjen e dhunshme që i organizuan sot përfaqësuesit e lëvizjes ‘Dveri’  Vuçiçit dhe vuri në dukje se “Presidenti hyri në Parlamentin e Serbisë, sikur të hynte Kuvendin e Kosovës, i përcjellë me fyerje”.

Ushtria dhe policia e Serbisë në gjendje gatishmërie për luftë

Pas aksionit të policisë së Kosovës e cila ka arrestuar në Veri disa policë serbë të lidhur me krimin e organizuar shefi i shtetit serb ka urdhëruar ushtrinë dhe policinë e Serbisë që të vihen në gjendje gatishmërie, shkruajnë mediat lokale.

Edhe pse bëhet fjalë vetëm për arrestime në mediat serbe po njoftojnë se policia serbe apo ROSU siç i referohen ata ka “hyrë në Veri” duke e dramatizuar situatën.

Një aksion të tillë të policisë Vuçiçi ka kohë që e ka paralajmëruar. Gjatë aksionit të Njësisë Speciale të Kosovës në veri të Mitrovicës janë arrestuar 13 anëtarë serbë e që njëherësh janë pjesëtarë të Policisë së Kosovës.

Sipas Tanjug të Serbisë, Njësitë Speciale kanë arrestuar 13 persona në këtë aksion i cili ka filluar në orët e hershme të mëngjesit. Nga ky aksion raportohet të kenë mbetur të plagosur dy pjesëtarë të Policisë së Kosovës. Në mesin e të arrestuarëve është edhe komandanti i policisë në Zubin Potok.

Vuçiq për Kosovën: Zgjedhim midis gënjeshtrave të ëmbla dhe të vërtetës së hidhur

Pas shtatë vjetësh bisedime me Prishtinën mund t’ju them se nuk kemi humbur asgjë pos asaj që ka qenë e humbur, tha presidenti i Serbisë, Aleksandar Vuçiq.

“Kemi fituar paqe dhe siguri më të madhe për serbët në Kosovë dhe, çfarë është më e rëndësishmja, mundësinë për të vazhduar luftën tonë”.

“Po përpiqemi ta kthejmë Serbinë në jetë dhe bisedime, të ruajmë paqen dhe stabilietin politik”, tha Vuçiq.

Ai i bëri këto komente në Parlamentin Popullor të Serbisë, ku të hënën paraqiti një raport të tij për Kosovën.

“Beogradi zyrtar ka marrë pjesë në bisedime me Prishtinën, sepse vetëm për shtatë vjet të qeverisjes së Sllobodan Millosheviqit kemi ardhur te konflikti në Kosovë dhe humbja e sovranitetit mbi Kosovën”, tha Vuçiq.

Ai shtoi se gjatë tetë vjetëve të qeverisjes së Partisë Demokratike të Serbisë, e cila tani është në opozitë, është shpallur pavarësia e Kosovës.

“Ju duhet të negocioni jo sepse doni, por sepse doni të fitoni kohë për Serbinë”, tha Vuçiq, duke shtuar se dialogu ka qenë në interes edhe të serbëve, edhe të shqiptarëve.

“Gjatë periudhës së dialogut, kemi arritur të ruajmë paqen dhe stabilitetin. Gjatë dialogut, nuk ka pasur viktima të konflikteve ndëretnike, as vrasje, përveç vrasjes së Oliver Ivanoviqit (v.j. politikan serb në veri të Kosovës). Gjatë kohëzgjatjes së dialogut, nuk ka pasur krizë intensive të sigurisë, por në të kemi hyrë kur dialogu është ndërprerë”, tha Vuçiq.

Vuçiq është tërhequr nga dialogu për normalizimin e marrëdhënieve me Kosovën, prejse kjo e fundit, në nëntor të vitit të kaluar, u ka vënë taksë 100% mallrave të importuara nga Serbia.

Vuçiq ka thënë se nuk do t’i rikthehet procesit, i cili ka nisur në vitin 2011, derisa kjo taksë mbetet në fuqi, por kryeministri i Kosovës, Ramush Haradinaj, ka këmbëngulur se ajo nuk do të hiqet derisa Serbia nuk e njeh Kosovën.

Presidenti serb e shprehu qëndrimin e njëjtë edhe gjatë fjalimit të hënën, ndërsa tha se Prishtina, në bazë të veprimeve të saj, “është e qartë se nuk dëshiron dialog”.

“Ka mundësi që nuk do të arrijmë kompromis në pesë apo dhjetë vjetët e ardhshëm dhe kjo do të kishte pasoja katastrofike si për shqiptarët, ashtu edhe për serbët. Marrëveshja dhe kompromisi nuk janë humbje, por fitore”, tha Vuçiq dhe shtoi se është koha që të zgjidhet midis “gënjeshtrave të ëmbla dhe të vërtetës së hidhur”.

“Puna ime si president shteti është që njerëzve t’iu them të vërtetën, sado e pakëndshme të jetë. Por, mos mendoni se nuk do të luftoj për popullin tonë në Kosovë”, tha Vuçiq.

Sipas tij, të gjithë duhet të pyeten nëse Serbia mund të llogarisë në të drejtën ndërkombëtare sa i përket Kosovës, pasi “ajo është bombarduar në mënyrë të paligjshme për shkak të Kosovës, në vitin 1999”.

Vuçiq po ashtu pyeti nëse Serbia ka të drejtë të krijojë armiqësi me vendet prej të cilave varet e ardhmja e saj.

Në seancë morën pjesë 156 deputetë, kryeministrja e Serbisë, Ana Bërnabiq, ministrat dhe drejtori i Zyrës për Kosovën në Qeverinë e Serbisë, Marko Gjuriq.

Megjithatë, një pjesë e opozitës, e cila tash e sa kohë e bojkoton punën e Parlamentit, nuk ishte e pranishme. Sipas saj, seanca për Kosovën është vetëm një tjetër “mashtrim” i Qeverisë së Serbisë.

Përgatiti: Valona Tela

Jep dorëheqjen kryeministri grek Aleksis Tsipras

Kryeministri grek Alexis Tsipras ka dhënë dorëheqjen nga posti i kryeministrit. Kreu i qeverisë greke ka bërë thirrje për zgjedhje të parakoshme, pas disfatës së tij në zgjedhjet europiane. Lajmi bëhet i ditur nga greke Ekathimerini.



Tsipras tha nga zyrat e partisë SYRIZA: “Rezultati nuk ishte ai që prisnim, ndaj  nuk do ta injoroj atë rezultat”, shkruan.

Mandati i qeverisë skadon në tetor dhe zyrtarët qeveritarë këmbëngulën që zgjedhjet të mbaheshin në fund të mandatit, por Tsipras duket se është i bindur për zgjedhje të parakohshme.

Tsipras tha se do të takojë presidentin grek për të kërkuar shpërndarjen e parlamentit pas raundit të dytë të zgjedhjeve lokale dhe rajonale më 2 qershor.

Varret ilire në Mal të Zi (video)

Territori i Malit të Zi është i pasur me varreza të mbretërve ilirë si dhe me katakombe parahistorike, qoftë prej guri apo dheu, që paraqesin një pasuri të veçantë të trashëgimisë kulturore. Studiuesit e kësaj fushe vlerësojnë si domosdoshmëri hulumtimin, mbrojtjen dhe ruajtjen e këtyre objekteve të rëndësishme historike dhe kulturore.

Nesër në Parlamentin e Serbisë mbahet seanca e Kosovës, çfarë pritet të ndodhë?

Parlamenti i Serbisë pritet që nesër të mbaj një seancë për çështjen e Kosovës. Kjo seancë është thirrur nga presidenti i Serbisë, Aleksander Vuçiq.

Në këtë seancë do të paraqitet një raport gjashtë vjeçar i bisedimeve mes Kosovës dhe Serbisë. Ky raport është përgatitur nga e ashtuquajtura Zyra për Kosovë në Qeverinë e Serbisë.

Për herë të parë në parlamentin e Serbisë do të diskutohet për Kosovën. Por kjo nuk duket se ka zgjuar interes tek opozita.

Ata pritet që të bojkotojnë edhe nesër Parlamentin, pasi që nuk duan që parlamenti të funksionojë deri sa Vuçiq.

Por ka edhe nga opozita që mendojnë që prezenca nesër është e domosdoshme. Ish presidenti i Serbisë, Boris Tadiq beson që prezenca nesër do të thotë shfuqizim i Vuçiqit.

Presidenti serb ka shtatë vite që injoron parlamentin rreth temës së Kosovës, përkundër kërkesave të shumta të opozitës.

Një nga liderët opozitarë, Boshko Obradoviq beson që ka tema më të rëndësishme për t’u biseduar në Parlament. Sipas tij, Mediat e lira dhe të drejtat janë tema që mund të diskutohen në parlament.

Nesër po ashtu pritet që të flitet rreth kundër masave të mundshme ndaj Kosovës si përgjigje ndaj taksës 100%

Ndryshimi i kufijve – Presidenti i Malit të Zi flet hapur: Ja pse jam kundër

Presidenti i Malit të Zi, Milo Gjukakoviq, ka përsëritur rezervat e tij që marrëveshja mes Kosovës dhe Serbisë të përfshijë edhe ndryshimin e kufijve. Në një intervistë dhënë gazetës podgoricase “Dnevne Novine”, ai ka dhënë dy arsye për këtë qëndrim.

 

“Janë dy arsye për rezervën time. Marrë parasysh që demarkimi pashmangshëm do të perceptohej dhe interpretohej me arsyet etnike (serbët në Serbi, e shqiptarët në Kosovë), kjo gjithsesi se nuk do t’i kontribuonte idesë emanciupese të demokracisë multietnike, të cilën duam ta zhvillojmë në Ballkan”, ka thënë Gjukanoviq, shkruan sot “Koha Ditore”.

“Dhe arsyeja e dytë: në çka e bazojmë besimin se një zgjidhje e tillë nuk do të shkaktonte iniciativa zinxhirore për zgjidhje të çështjeve të tjera të hapura, jo vetëm në Ballkan? Cilat janë garancitë për këtë?”

Në intervistë, Gjukanoviq ka thënë se është shumë mirë që është vendosur dialogu mes Kosovës dhe Serbisë, dhe se nuk është mirë që ndërkohë ai dialog është futur në rrugë qorre.

“E di sa i vjetër dhe kompleks është problemi i marrëdhënieve serbo-shqiptare dhe mosmarrëveshjeve në relacionin Beograd-Prishtinë”, ka thënë ai, duke theksuar se dialogu duhet të vazhdohet dhe të përmbyllet suksesshëm “me një qasje të arsyeshme”.

Daçiq: Synimi im është që askush të mos e njohë më Kosovën

Ministri i Punëve të Jashtme i Serbisë, Ivica Daçiq tha se puna e tij është që të sigurojë, që asnjë vend tjetër të mos e njohë pavarësinë e Kosovës.

“Do të shkoj kudo sepse kjo është puna ime”, tha Daçiq për Radio-Televizionin e Serbisë.

Sipas tij, Serbia po tregohet e sukesesshme në të bindurit e vendeve të tjera, që të tërheqin njohjen e Kosovës, por shtoi Daçiq, një gjë e tillë i shqetëson disa vende perëndimore.

Daçiq po ashtu tha se vizita e tij e fundit në Afrikë ishte e sukesesshme, pasi ka njoftuar shtatë vende afrikane në lidhje me situatën në Kosovë.

“Afrika për ne është shumë e rëndësishme sepse në Kombet e Bashkuara ka 53 anëtarë”, thënë Daçiq.

Ai tha se e mbështet anëtarësimin e Serbisë në Bashkimin Evropian, por tha se ruajtja e integritetit territorial është po ashtu një interes strategjik i Beogradit.

Sipas të dhënave zyrtare, pavarësia e Kosovës është njohur nga 116 vende të botës.

Në mesin e tyre janë edhe 13 shtete, për të cilat autoritetet e Serbisë pretendojnë se e kanë tërhequr njohjen.

Kroacia bisedon me Suedinë dhe SHBA-në për blerjen e aeroplanëve luftarakë

Aeroplanët luftarak F-16

Kroacia është në bisedime me Suedinë dhe Shtetet e Bashkuara për blerjen e avionëve luftarakë të cilët i nevojiten për modernizimin e forcave ajrore të saj, tha të enjten ministri i Mbrojtjes i Kroacisë, Damir Krstiçeviq.

Zagrebi ishte afër një marrëveshjeje për blerjen e një skuadre të avionëve luftarakë F-16 të përdorur dhe të ripunuar nga Izraeli, por përfundimisht Izraeli njoftoi Kroacinë se nuk mund të shiste aeroplanët pasi nuk mund të siguronte një miratim nga Shtetet e Bashkuara.

Agjencia Reuters raporton se Izraeli ishte në garë me disa vende që bën oferta për autoritetet kroate dhe konkurrenti më serioz u raportua të ishte Shërbimi i Navigacionit Ajror të Suedisë (SAAB) duke ofruar aeroplanë të rinj Gripen.

“Qeveria është ende e vendosur të zgjidhë këtë çështje strategjike. Ne jemi në bisedime me Suedinë dhe Shtetet e Bashkuara dhe ne do ta informojmë publikun në kohën kur do të kemi disa informata konkrete”, u tha Krstiçeviq gazetarëve.

Kroacia u bashkua me aleancën e NATO-s në vitin 2009 dhe Bashkimin Evropian në vitin 2013.

Forca e saj ajrore ka një skuadër të fluturimeve MiG-21 të Rusisë që datojnë nga e kaluara e saj brenda ish-Jugosllavisë, por ato janë të vjetruara dhe vetëm pak janë funksionalë për momentin.

Shkoi në Somali të lobojë kundër Kosovës, Daçiq për pak vdiq në sulm terrorist

Të paktën nëntë vetë kanë vdekur dje, përfshirë ish ministrin e Jashtëm somalez, kur ekstremistët islamikë aktivizuan një bombë makinash pranë pallatit presidencial në Mogadishu, tha policia. Mes të vrarëve, ish ministri i jashtëm Hussein Elaba Fahia, i cili ishte gjithashtu këshilltar i presidentit aktual të Somalisë.

Ndërkohë ministri i jashtëm serb, Ivica Daçiq ishte në një takim me presidentin somalez në pallatin presidencial në Mogadishu dje, kur makina plot eksploziv shpërtheu përpara rezidencës. Të paktën gjashtë vetë u vranë gjatë sulmit, ndërsa 13 u plagosën.

Siç i tha Daçiq Tanjugut, u dëgjua një shpërthim i fuqishëm dhe në ndërkohë u tha se ishte një sulm në të cilin kishte shumë të vdekur dhe të plagosur.

Sipas Blic, Daçiq shkoi me delegacionin në një pjesë të qytetit ku ndodhi sulm terrorist, për fat të mirë 10-15 minuta më parë.

Daçiq shtoi se, objektivi i sulmit ishte ish ministri i jashtëm somalez.

Kreu i diplomacisë serbe shtoi se nuk kishte evakuim të punonjësve dhe të ftuarve në pallatin presidencial.

Kujtojmë se Daçiq, prej dy vjetësh është vënë në krye të fushatës së Serbisë për t’ia zbehur njohjen ndërkombëtare Kosovës. Një gjë të tillë sigurisht e ka bërë edhe gjatë kësaj vizite.

Gjithashtu muaj më parë, Daçiq kishte prezantuar në kuvendin e Serbisë punën e tij në pengimin e Kosovës dhe në lobimin anti-pavarësi.

Madje, kjo fushatë e Serbisë është e hapur dhe nuk po hasë në pengesë e as në qortime as nga ana e Bashkimit Evropian.

Vuçiq e quan “të marrë” deklaratën e Quint-it për zgjedhjet në veri të Kosovës

Presidenti i Serbisë Aleksandar Vuçiq tha se nuk ka lexuar asnjëherë diçka “më të marrë” se komunikata e vendeve të Quinti-t për zgjedhjet në veri të Kosovës, në të cilën përmendeshin frikësimet në shumë zona të populluara me serbë që kishin ndodhur në vitin 2017-të.

Vuçiç tha se të gjitha vendet e Quintit dërguan vëzhguesit e tyre për të gjetur ndonjë parregullsi për të cilën më pas do të akuzonin serbët.

“Por, ata nuk munden të gjenin asgjë, kështu që ata duhet të thoshin në një deklaratë se kishte presione në vitin 2017. Imagjinoni të më pyesni diçka, por unë të ju them, dor t’ju kujtoj vitin 2017. Çfarë ka kuptimi ka kjo?”, pyeti Vuçiq.

Të hënën, ambasadat e Francës, Gjermanisë, Italisë, Mbretërisë së Bashkuar dhe Shteteve të Bashkuara, të njohura si vendet e Quint-it, thanë se zgjedhjet në katër komunat në veri të Kosovës, të banuara me shumicë serbe, kanë kaluar në një atmosferë të qetë.

Megjithatë, ato i kujtuan gjetjet e Misionit të Bashkimit Evropian të Vëzhgimit të Zgjedhjeve, më 2017, të cilat shprehnin “shqetësime serioze” për frikësim në shumë zona të populluara me serbë, e sidomos kundër partive politike që konkurronin kundër Listës Serbe.

Zgjedhjet u mbajtën pasi kryetarët e katër komunave veriore, më 26 nëntor të vitit të kaluar, kanë dhënë dorëheqje në shenjë pakënaqësie ndaj taksës doganore 100% që Kosova u ka vënë mallrave të importuara nga Serbia.

Turqia, vendi me bletarinë e dytë më të madhe në botë

Turqia është vendi i dytë me bletarinë më të zhvilluar në botë pas Kinës, tha kreu i një asociacioni bletarësh në Turqi.

Në një intervistë për Anadolu Agency (AA) me rastin e Ditës Ndërkombëtare të Bletëve, Selcuk Solmaz, kryetar i Asociacionit të Bletarëve të Ankarasë, tha se Turqia “është një nga disa vendet e rralla të vetëmjaftueshme në bletari”.

I themeluar në vitin 2003, asociacioni synon të trajnojë bletarët, të diskutojë vështirësitë e profesionit dhe të gjejë zgjidhje për të prodhuar produkte të ndryshme nga bletët në mënyrë më pjellore dhe me cilësi të lartë, shpjegoi Solmaz.

Ai tha se Turqia është gjithashtu një nga vendet e pakta me bimë të ndryshme të mjaltit dhe prodhim me cilësi të lartë të mjaltit.

“Mjalti turk po bëhet i kërkuar në kuzhinën botërore”, tha Solmaz.

“Llojet përfshijnë gështenjën, trumzën, agrumet, pishën, livandën, akacien, bimët malore dhe mjaltin e lules së egër”, njoftoi Solmaz.

“Kohët e fundit, bletarët në Turqi kanë filluar të prodhojnë pelte mbretërore, polen, propolis dhe helm të bletëve”, shtoi ai.

Solmaz tha se ekzistojnë rreth 118.000 koshere bletësh në kryeqytetin turk Ankara, krahasuar me rreth 50.000 në vitin 2003.

“Kjo tregon se sektori i bletarisë po zhvillohet dita ditës”, tha ai.

– Kontributi në ekonomi

Sipas Entit Statistikor të Turqisë (TurkStat), vendi ka prodhuar afër 108.000 ton mjaltë në vitin 2018 dhe ka eksportuar 5.912 ton në të njëjtën periudhë.

“Kjo është gjithashtu e dobishme për bujqësinë organike dhe të pastër”, tha Solmaz.

Sipas tij, bletët lidhen drejtpërdrejt me sigurinë ushqimore, bujqësinë e qëndrueshme dhe biodiversitetin.

“Sipas një studimi të kryer nga ‘Shkenca dhe Politika për Njerëzit dhe Natyrën’ (IPBES) në vitin 2016, prodhimi i ushqimit me anë të pjalmimit dhe pllenimit kushton rreth 235 deri në 577 miliardë dollarë në vit”, vuri në dukje ai.

“Nëse bletët zhduken, shumë krijesa të gjalla do të zhduken. Nëse duam të jetojmë, nëse duam që fëmijët dhe nipërit tanë të jetojnë, ne duhet të japim përpjekjet më të mëdha për t’i mbajtur bletët gjallë”, shtoi Solmaz.

Ai tha se bletaria duhet të zhvillohet jo vetëm për të ruajtur ekosistemin, por edhe për një përdorim më të mirë të bimëve me jetëgjatësi të shkurtër.

Kombet e Bashkuara kanë caktuar 20 majin si Ditën Botërore të Bletëve për të rritur ndërgjegjësimin për rëndësinë e pjalmuesve, siç janë bletët, fluturat dhe kolibrat, kërcënimet me të cilat përballen dhe kontributin e tyre në zhvillimin e qëndrueshëm. aa

Integrimi i Shqipërisë: Tsipras tregon hapur ultimatumin që ia ka dhënë Ramës

Kryeministri i Greqisë, Aleksis Tsipras teksa sqaron ne nje interviste te gjate per Financial Times se përse ai meriton një mandat tjetër për të vazhduar përparimin që ka bërë në vendi i tij nga kriza, permend mes te tjerash edhe marredheniet e Greqise me Shqiperine.

 

Kryeministri grek, tregon se i ka shpjeguar kryeministrit Edi Rama, se Tirana zyrtare duhet të mbrojë më mirë të drejtat e minoritetit grek, ose ndryshe rruga e vendit drejt anëtarësimit në BE do të mbyllet.

“Nëse Shqipëria përmbush detyrimet e saj për të drejtat e njeriut, Greqia  dhe unë personalisht do të mbështes një vendim të mundshëm në qershor për Shqipërinë për të filluar proceset e pranimit në BE, së bashku edhe Maqedoninë e Veriut. Por ne nuk do të rrezikojmë procesin e pranimit për Maqedoninë e Veriut, nëse ajo ka bërë përparim. Kjo do të ishte e padrejtë”- thekson Tsipras.

Turqia kërkon arrestimin e qindra zyrtarëve të Ministrisë së Jashtme

Autoritetet e Turqisë kanë urdhëruar arrestimin e 249 zyrtarëve të ministrisë së Jashtme, pas dyshimeve për lidhje me klerikun fetar, Fethullah Gulen, i cili është akuzuar për organizim të tentimeve të dështuara për puç në 2016, transmeton agjencia e lajmeve Reuters.

Autoritetet kanë kryer një varg operacionesh kundër mbështetësve të dyshuar të Gulenit, i cili jeton në Shtetet e Bashkuara nga viti 1999.

Gulen në anën tjetër mohon akuzat.

Kryeprokurori i Shtetit ka thënë se ka urdhëruar arrestimin e 249 personave, pasi hetimet kanë identifikuar disa parregullsi.

Në deklaratë po ashtu është thënë se 78 të dyshuar janë ndaluar në operacionet në 43 provinca dhe se policia është në kërkim të pjesës tjetër.

Pas tentimeve të dështuara për grushtshtet, në Turqi janë burgosur rreth 77,000 persona, që janë në pritje të gjykimit, derisa 150 000 shërbyes civilë dhe pjesëtarë të ushtrisë janë përjashtuar apo suspenduar nga vendet e tyre të punës.

Grupet për të drejtat e njeriut dhe aleatët perëndimorë të Turqisë kanë shprehur shqetësimet e tyre për këto masa, duke thënë se presidenti turk Recep Tayyip Erdogan ka shfrytëzuar puçin e dështuar si arsyetim për të shuar zërat e kundërshtarëve.

Autoritetet turke kanë thënë në anën tjetër se masat e sigurisë janë të domosdoshme për shkak të kërcënimeve me të cilat përballet Turqia.

Kuvendi i Serbisë diskuton për Kosovën më 27 maj

Kuvendi i Serbisë

Kuvendi i Serbisë, më 27 maj, do të mbajë një seancë të posaçme për Kosovën, bëri të ditur kryetarja e këtij institucioni, Maja Gojkoviq.

Në një konferencë për media, Gojkoviq tha se në seancë do të ftohet presidenti i Serbisë, Aleksandar Vuçiq, i cili do të sjellë një raport për Kosovën dhe do të marrë pjesë në debat.

Ftesë do t’i dërgohet edhe kryeministres së Serbisë, Ana Bërnabiq, dhe drejtorit të Zyrës për Kosovën në Serbi, Marko Gjuriq, raporton Shërbimi i Ballkanit i Radios Evropa e Lirë.

Gojkoviq tha se shpreson se në seancë do të marrin pjesë të gjithë deputetët.

Qysh në muajin shkurt, disa deputetë të opozitës në Serbi e bojkotojnë punën e Kuvendit, duke thënë se deputetët e pushtetit i shkelin procedurat dhe e pamundësojnë debatin demokratik.

Vuçiq, në një intervistë për Radio-Televizionin e Serbisë, tha se është i gatshëm që të flasë për çështjen e Kosovës përpara deputetëve. rel