Gazetarja Meta e pyeti Ramën në lidhje me përdorimin e standardeve të dyfishta në raport me ndëshkimet penale në rastin e qytetarëve të zakonshëm dhe Belinda Ballukun. Kaq mjaftoi dhe Kryeministri humbi qetësinë dhe kontrollin mbi situatën e krijuar.

TIRANË- Konferenca e kryeministrit Edi Rama me gazetarët ditën e sotme, doli jashtë kontrollit dhe nuk shkoi siç kishte shpresuar Rama që do të përfundonte. Shkak për tensionet në konferencë u bë një pyetje nga gazetarja Ambrozia Meta, e cila e kapi papritur Ramën.

Gazetarja Meta e pyeti Ramën në lidhje me përdorimin e standardeve të dyfishta në raport me ndëshkimet penale në rastin e qytetarëve të zakonshëm dhe Belinda Ballukun. Kaq mjaftoi dhe Kryeministri humbi qetësinë dhe kontrollin mbi situatën e krijuar.

Pas disa minutash replika, Rama ka ndërprerë konferencën për media dhe ka kërkuar 5 minuta pushim. Por ajo çfarë ndodhi gjatë kësaj ndërprerje ishte më e paprecedentë se i gjithë debati i ndodhur para kamerave.

Çfarë ndodhi gjatë ndërprerjes së konferencës së Ramës me gazetarët?

Teksa është siguruar që nuk ishte më ‘Live’, Rama ka ngritur tonet ndaj gazetares Meta duke i thënë se është e përjashtuar përgjithmonë nga konferencat e tij. Këtë e ka thënë vetë Meta gjatë një interviste për Syri Tv, ku dhe shpjegoi të gjithë ngjarjen e ndodhur.

“Në momentin që ka ndërprerë konferencën, ka dalë dhe më ka thënë që duhet të dalësh jashtë nga konferenca. Në momentin që unë kam shkuar për të dalë jashtë, për të mos e agravuar më shumë situatën, ka qenë një punonjës i gardës që nuk donte të më lejonte të dilja, sepse në ato momente Rama ishte duke kaluar në korridor. Dhe unë i kam kërkuar ta hap derën sepse për sa kohë që më kërkoi daljen nga konferenca, unë doja të largohesha. Dhe në këto momente ne jemi përballë sërish në korridor, ku kryeministri më ka thënë që je e përjashtuar përgjithmonë nga konferencat. Pra më ka nxjerrë jashtë. Pra kam marrë karton të kuq në kryeministri, nuk mund të hyj më në konferencat e tij. Nuk është hera e parë në fakt që kryeministri bën këtë gjë,” theksoi gazetarja.

Por e gjithë ngjarja nuk ka përfunduar këtu. Teksa Meta po largohej, pas saj është ngritur dhe gazetari Isa Myzyraj në solidarizim me kolegen e tij. Teksa ishte i ngritur në këmbë, Rama i është kthyer keq dhe Myzyrajt, duke e pyetur nëse do të qendronte në sallë apo do të dilte jashtë. Por përgjigja e gazetarit, ka acaruar akoma më shumë kryeministrin, duke e kthyer situatën në personale dhe të paprecedentë.

Më një ton aspak normal Rama i ka kërkuar Myzyrajt që të largohej nga konferenca, duke e fyer madje me fjalë që t’i thotë një kryeministër nuk janë normale.

“Epo dil jashtë legen mos të shoh më këtu,” mësohet se i ka thënë Rama-gazetarit, i cili është larguar më pas.

Dhe në rinisjen e konferencës, Rama me zërin që i dridhej dhe me një fytyrë të acaruar, nisi të sulmonte televizionet që i dalin kundër. Fjalët e Ramës shkuan përtej aludimeve, duke u kthyer në akuza direkte për evazion fiskal dhe pastrim parash./Dosja.al